Itaia 1–12

E reirei te Tia Kamaiu bwa “bwaai nako ake [Itaia] e taekin a tia ao a na bon riki, ni kaineti ma taeka ake e taekin” (3 Nibwaai 23:3). Ngkai ko kamatebwaia ana boki Itaia, iangoia n karaoa te tiata ibukin taeka ni burabeti n atuuna n aron aikai: Ana bong Itaia, Ana mwakuri Te Tia Kamaiu iaon te aba, ao Boong aika kaitira. Taraia bwa e mwaiti ana taeka ni burabeti Itaia aika a koro nanoia n angaa aika mwaiti (taraa Bible Dictionary, “Itaia”).

Beretitenti Dallin H. Oaks e reirei: “Ana boki Itaia iai inanon taetae ni burabeti aika bati are e taraa ni bati aron kakoroan nanoia. Teuana ae taraa n rootia aomata n ana bong Itaia ke n aia waaki te roro are imwina. Teuana riki nanona, e aki toki n tei ibukin te bwai teuana, e taraa ni kaeineti ma taai ake ngkoa, ngke e uruakaki Ierutarem ao a maenako aomatana imwin taurakin Natin te Atua. Ma nanona teuana ke kakoroan nanona e taraa n irekereke ma baike a na riki n te Kauaoki iroun te Tia Kamaiu. Te koaua bwa e mwaiti taetae ni burabeti aika kona ni bati nanoia e kaota kakaawakin ukoran te reitaki ae tabu mairoun te Tamnei ae Raoiroi ni buokira ni kabwara nanoia” (“Scripture Reading and Revelation,” Ensign, Tianuare. 1995, 8).

N aroia burabeti n taai nako, Itaia e teimatoa n kauringiia aomata ibukin maiuia n tamnei. Ngkai ko wareka Itaia 1; 3; 5, taratarai kiibu ake a kabwarabwara aroia aomata n kekeiaki n te maiu n tameni (taraa, te katooto, Itaia 1:2–4, 21–23; 3:9, 16–17; 5:11–12, 20–23). Tera kangaanga aika ko nori aika titebo ma taai aikai? Ko kona n kakaei kiibu aika kauringiira te rekenikai nakon maiuia n tamnei kaain Iteraera (n aron Itaia 1:7; 3:17–26; 5:5–7, 13–15).

N ikotaki ma kauring, Itaia e korei rongorongo aika e na reke iai te kantaninga ibukin karekean te kamaiuaki rinanon te Tia Kamaiu (taraa, ibukin te katooto, Itaia 1:16–19, 25–27; 3:10; 4). Tera ae ti reiakinna mairoun te Uea man taian rongorongo aikai? E kanga ana rongorongo te Uea ni kiibu aikai ni kaokoro man te bwai are e tangiriira Tatan bwa tina kakoaua?

N aron Itaia, burabeti n boong aikai a kauringiira taekan te bure ma rekenikaina, ao a kanakoi rongorongo ibukin karekean te kaantaninga iroun Iesu Kristo. Tera katooto riki tabeua aika ko kona n iangoi? Ko na bae n tangiria n rinanon te rongorongo man te maungatabu ni kabuta ae tia n nako, n kakaei aekaki n kauring ao berita aikai.

Angiin ana koroboki Itaia bon taetae ni burabeti ake a kaineti raoi nanoia nakon ara bong. Ibukin karekeaia, kakaei weabe aika i mwaira ni kibu aikai (n aron “e na riki” ke “e na nako”). Te katooto, tatarai weabe aikai ngkana ko wareka Taian Areru 2; 4; 11–12. Ko kona n kataia n onei mwiia ma weabe n te tai aio (n aron bon ke e a nako). Tera mai ibuakon taeka ni burabeti aikai aika a kakukurei riki nakoim? Tera ae ko reiakinna man taeka ni burabeti aika ibukin Tion, katean tembora, ao ikoikotan Iteraera?

Itaia 2:2–3 e kaineti raoi kakawakina nakoia Aika Itiaki ni Boong aika Kaitira. A kanga taeka ni burabeti aika ni kakoroaki nanoia? Tera ae ko reiakina iaon “aron nako” te Uea ao “kawai” n Ana auti? (kibu 3).

Taraa naba Itaia 5:26; “Nora te Manuia,” Anene n Taromauri, nambwa. 5.

N Itaia 6, Itaia e taekina weteana n riki bwa te burabeti. Ngkai ko wareka te mwakoro aei, tera ae e kaunga nanom n te bwai are e rinanona Itaia? E kanga te mwakoro aei ni bita am iango ibukin te Uea, Ana burabeti, ao te mwakuri are a weteaki bwa a na karaoia?

Ni moan n ana kabwarabwara Itaia, te tautaeka n Iteraera e karekea ana boraraoi ma Turia bwa e na katea otangana ni kaitara Assyria. Iteraera ao Turia a tangiria ni kairoroa Aati, uean Iuta, bwa e na raoniia n aia reitaki. Ma Itaia e taetae ni burabeti bwa te reitaki aei e na bwaka ao e tuanga Aati bwa e na onimakina te Uea (Itaia 7:7–9; 8:12–13).

Ngkai Itaia e reireina Aati, e karaoi tabeua taetae ni burabeti aika a rang n ataaki, n aron ake a kuneaki n Itaia 7:14; 8:13–14; 9:2, 6–7. Ngkai e tuai rang ni matata raoi bwa tera ae nanonaki n taetae ni burabeti aikai n ana tai Aati, a bane ni matata bwa e kaineti nakon Iesu Kristo (taraa naba Mataio 1:21–23; 4:16; 21:44; Ruka 1:31–33). Bukin tera “Emanuera” bon te ara ae tamaroa ibukin te Tia Kamaiu? (tara Mataio 1:23). E kanga n tia n riki Iesu Kristo bwa “te Tia Reirei” ke “Uean te Rau” nakoira? (Itaia 9:7). Tera ae ko reiakinna n rongorongon te Tia Kamaiu man kiibu aikai?

• N Itaia 1:2–4, kakaei ma am ataei bukina tabeua ngkai e aki rang ni kukurei te Uea ma ana aomata. Noria bwa te kabotaua ma maan n kibu 3—antai ara “mataniwii”? N te aro raa ae ti kaotia iai nakon te Atua bwa ti kinaa?

• Ibukin katamneian Itaia 1:16-18, ko kona ma am ataei n tratarai bwaai aika uraura ao bwaai aika mainaina. Ke tao ko kona n ikotaki n uaati bwaai. Ti na kanga n bareka tamneira? E kanga Iesu Kristo ni buokiira n kaitiakiira? Tera ae ti reiakinna n rongorongon te Tia Kamaiu man kiibu aikai? Tibwaua am namakin Ibukina nakoia ataei ao bwaai ake E a tia ni karaoi ibukim.

• Itaia e a kaman nora te tai ibukin “maungan ana auti te Uea,” e na katika mataia aomata man “aaba ni kabane.” (Isaiah 2:2). Ko na kanga ni buokiia am ataei bwa a na kaingangaa te nako nakon ana auti te Uea? Ko kona n kaoia bwa ana korea tamnein mwengaia. Imwiina ao warewaremangaia n Itaia 2:2ao tuangiia bwa ana korea tamnein “ana auti te Uea,” are bon te tembora. Wareka Itaia 2:3 ni bootaki. Kaoia bwa ana karinna n aia tamnei aomata aika mwaiti n nakon te tembora, n raonaki ma aia utu.

• Kam kona n wareka Itaia 2:2–3 ao ni kinai man kiibu aikai bwaai aika a kaungaia bwa ana nakon te tembora n te tai teuana. Ngkane, imwiin warekan Taian Areru 2:4 n ikotaki, kam kona n maroroakina aron te tembora n uota te rau nakoia. Iangoia n anenea taekan te tembora, n aron “I Love to See the Temple” (Aia Boki n anene Ataei, 95). Buokiia am ataei bwa a na kunei mwakoro n taeka n te anene are e reirei taekan te tembora ao tera ae ti karaoi ikekei.

• Ni kabwarabwarai ana taeka n burabeti Itaia ibukin Kristo, ngkoe ma am ataei kam kona n maroroakini nakoaia aomata, n aron te beretitenti, bitiobi, tia reirei. Tera ae reireiniira nakoa aikai ibukiia aomata? Buokiia ataei ni kakaea aran Iesu Kristo n Itaia 7:14 ao 9:6–7 (tara naba te waaki ni kakukurei ibukin te wiiki aei). Tera ae ti reiakinna man aara aikai Ibukina? Tera riki ae ti reiakinna man kiibu aikai ibukin Iesu Kristo?

• Ko kona naba n tibwauaia ma ataei “Itaia te burabeti” (n Karaki man Te O Tetemanti, 150– 51). Kamotirawaa n tainako teutana te tai bwa aonga ataei n taekina taekan te bwai ae ataia Itaia ibukin Iesu Kristo n ririki aika mwaiti n nako imwain ae E bungiaki. Ko kona ngkane n kabongana Mataio 1:21–23; Ruka 1:31–33 ao maroroakinna bwa a kanga ana taetae ni burabeti Itaia n Itaia 7:14; 9:6–7 ni koro bukiia.

  

  1:18