Burabeti ao Taetae ni Burabeti

Burabeti ao taetae ni burabeti iai tabeia ae korakora ni kabuta Te O Tetemanti. Aberaam, Itaaka, ao Iakobwa a noori mii ni burabeti ao n taetae ma taan uarorongo mai karawa. Mote e taetae nakon te Atua n itaramata mangaia ao ni kaoti Ana kantaninga nakoia tibun Iteraera. Ana moan ao ana kauoua ni boki Uea a karakin mwakuri aika aki kona ni mwanuokinaki ao aia rongorongo burabeti aika Eria ao Eritai. Te O Tetemanti e taekiniia naba burabeti aine n aron Miriam ao Tebora, n ikotaki ma aine riki tabeman ake a kakabwaiaki n te taetae ni burabeti, n aron Rebeka ao Ana. Ao e ngae ngke aki koreaki Taian Areru irouia burabeti aika a kinaaki, ngaiia naba a kaonaki ma tamnein te taetae ni burabeti, ai moarara riki ngkai a kakantaninga okin te Meetia.

Akea mai buakon aei ae riki bwa te bwai ae kamiimi irouia kaain Ana Ekaretia Iesu Kristo ibukiia Aika Itiaki ni Boong aika Kaitira. Ni koauana, ana euangkerio Iesu Kristo e reireiniira bwa burabeti tiaki tii mwakoron te rongorongo ae kakukurei ma te mwakoro ae kakawaki ibukin ana babaire te Atua. Ee ngae ngke tabeman tao a taraia burabeti bwa akea n ai aroia inanon taai n Te O Tetemanti, ti taraia n aron ae taneiai te aba iai ma tain Te O Tetemanti.

Ma warekan mwakoron Itaia ke Etekiera e bae ni kaokoro man warekan te marooro n te maungatabu ni kabuta mairoun te Beretitenti ae ngkai n te Ekaretia. N tabetai e bon kangaanga n taraia bwa burabeti n taai ake ngkoa iai te bwai ae a na taekinna nakoira. Imwiin bwaai nako, te aonaaba ae ti maeka iai n te bong aei kanga e bon kaokoro man te aonaaba are a kabwarabwaraa ao n taetae ni burabeti iai. Ao te koaua are bon iai ara burabeti ae maiu e kona n tabeka te titiraki: Bukin tera ngkai e bon kakawaki te konabwai—ao e bon kainnanoa te kekeiaki—ni wareka aia taeka burabeti n taai ake ngkoa?

Ibukin iterana ae moan te kakawaki, aomata ni boong aikai tiaki moan aomata irouia burabeti n Te O Tetemanti. Burabeti akanne iai naba tabeaiangaia ake a maroroakin inanon aia tai ao n aia tabo—n aron ae a maroroakin ara burabeti ni boong aika kaitira n tabeiangara aika ngkainaba.

N te tai naba anne, a kona naba burabeti n noora are e riaon riki tabeaiangara aika ngkainaba. A reirei koaua aika akea tokiia, ake a bootau nakon te tai ao te tabo. Ni kakabwaiaaki ma te kaotioti, a noora te taratara ae raababa n ana mwakuri te Atua. N aron te katooto, Itaia e kauringiia aomata inanon ana bong ibukin aia bure. E korea naba taekan kainaomatakiia tibun Iteraera ake a na maiu 200 te ririki n taai aika a na roko. N te tai naba anne, e taetaekina naba taekan te kainaomataki are a ukoukoria ana aomata ni kabane te Atua. Ao e korei taetae ni burabeti bwa, e ngae ngke ni boong aikai, a kakantaninga te bwai ae na tia ni kakoroaki bukina—n aron berita ibukin “te aonaaba nabangkai” (Itaia 65:17) are “e na buta n atakin te Uea” (Itaia 11:9), ike te baronga are Iteraera a tia ni manga ikotaki ao ike “botanaomata” a na aki “manga reireia te buaka” (Itaia 2:4). Iteran te kimwareirei ao te kairi man warekan aia taeka burabeti n Te O Tetemanti n aron Itaia bon ataakina bwa ti karaoa tabera n te bong ae mimitong are e a kaman n nooraki n te mii.

Ngaia are ngkana ko wareki taetae ni burabeti ake ngkoa, e kona n ibuobuoki n reiakin taeka ake a korei—ma ko bon riai n nooriko naba inanona, ke “kabotaui [nakoim]” (1 Nibwaai 19:24; taraa naba te kibu 23). N tabetai e nanonaki n ataakin Bwaburon bwa kanikinaean te bure ao te kainikatonga, tiaki n ae ti te kaawa n taai ake ngkoa. E kona n nanonaki n ataakin Iteraera bwa ana aomata te Atua inanon te tai ao n te tabo. Ke e kona n nanonaki n iangoan Tion bwa te mwakuri ni boong aika kaitira are a butimwaea ana aomata te Atua, ma tiaki n ae e taraaki bwa te taeka teuana ibukin Ierutarem.

Ti kona ni kabootaui koroboki aika tabu nakon maiura ibukina bwa ti ataia bwa e kona ni kakoroaki bukin te taetae ni burabeti ni kawai aika a mwaiti. Te katooto ae tamaroa n aei bon te taetae ni burabeti n Itaia 40:3: “Bwanaan temanna ae takarua n te rereua, Kam na katauraoa kawain te Uea.” Nakoia Iutaia ake a tautoronaki i Bwaburon, te rongorongo aei e bon kaineti nakon te Uea ngke e katauraoa te kawai ni kainaomataaki man te tautoronaki ao n oki nako Ierutarem. Nakon Mataio, Mareko, ao Ruka, te taetae ni burabeti aei e kakoroaki bukina iroun Ioane te Tia Bwabetito, are e katauraoa kawain te Tia Kamaiu ibukin ana mwakuri n te maiu ae mamate. Ao Iotebwa Timiti e karekea te kaotioti bwa te taetae ni burabeti aei ni boong aikai e bon korobukina n te katauraoi ibukin ana mwakuri Kristo tenga n ririki. Inanon kawai are ti teimatoa ni karekea te atatai, burabeti n taai ake ngkoa a bon taetae nakoira. Ao a reirei koaua aika akea tokiia ake moan te mwaiti ae akea n ai arona, are a bongana nakoira n aron teia ngkoa nakon Iteraera n taai ake ngkoa.

Tao ae moan te kakawaki riki nakon noorakim i bon iroum n te taetae ni burabeti n Te O Tetemanti bon noorakin Iesu Kristo inanoia. Ngkana ko kakaea, ko na kunea, e ngae ngkana E aki taekinaki n arana. E na kona ni ibuobuoki ni kawakinna n ara iango bwa Atuan Te O Tetemanti, te Uea ae Iehova, bon Iesu Kristo. N taainako burabeti a kabwarabwara te bwai are e karaoia ao are E na karaoia, a taetae ibukin te Tia Kamaiu.

Ko na kona naba ni kunei bwaai n ibuobuoki nakon Temanna are e a Tia ni Kabiraki, te Tia Kabooi Maiura, ao te Uea n taai aika a na roko man kanoan. Aikai ni kabane bon taetae ni burabeti ibukin Iesu Kristo. N ae tabangaki riki, ko na wareka taekan te kamaiuaki, kabwarabure, kaboan maiura, ao kaokan bwai. Ma te Tia Kamaiu n am iango ao inanom, taetae ni burabeti aikai a na kairiko nakon Natin te Atua. Imwiin bwaai nako, te kabanea n tamaroa ni kawai n ataa te taetae ni burabeti bon karekan “te taetae ni burabeti,” are ti tuangaki iroun Ioane “ana kakoaua Iesu” (Te Kaotioti 19:10).