Isaiah 13–14; 22; 24–30; 35

Non fansoun Isaiah we, Babylon a eu muu mi napanap ren emon chon nemenem mi unusen pochokun. Iei Babylon a uruon nom. Iwe pwata an Isaiah porous ngeni Babylon, non Isaiah 13–14, mi auchea ngeni kich ikenai? Pokiten Babylon a esisinata namanam tekia, tipemwong, me tipis, mettoch mi chok pweni kicheno ikenai. Ekieki usun ei esisin nupwen ka anneani Isaiah 13:1–11, 19–22; 14:1–20. Ka tongeni ekieki kapaseis usun ekkei:

• Met nonno fengen ka kuna nefinen ewe namanam tekia an ewe kingen Babylon me ewe namanam tekia an Setan? (nengeni Isaiah 14:4–20; Moses 4:1–4). Met kapasen fon ka kuna fan itom me non ekkei uwokisin?

• Ifa usun ewe Chon Amanau a awora “asoso seni om netipechou, me seni om nuokus”? (Isaiah 14:3).

Ekkewe osukunen Isaiah ra kan soun kapas usun an ewe Chon Amanau angang, mi pachenong An asoren achasefan, Manausefan, me Oruwan Wareto. Met kinikinin An angang a tonong non om ekiek nupwenka anneani ekkei uwokisin: Isaiah 22:22–23; 24:21–23; 25:6–8; 26:19; 28:16? Me pwan ekkoch porous ka kuna mi achema ngonuk usun ewe Chon Amanau?

Non An umoumoch, ewe Samon a tinato Isaiah an epwe fonou ekkewe aramas pwon pwe ra rikino seni I. Katon ika kopwe tongeni kuna ekkewe esisinen fon non pekin ngun usun ei non Isaiah 24:5; 29:13; 30:8–12. Pwata ekkei nikinik me foffor ra afeiengaw ngeni pekin ngun?

An epwe fonou usun ekkewe mwirimwirin ach kunno seni ewe Samon, Isaiah a aea ekkoch anonno fengen sise tongeni monnuki. Nupwen ka kaeo, eisinuk pwisin ifa usun nikinikin ach kunnuno seni ewe Samon:

• Eu enetipenawen fonufan mi pon (Isaiah 24:1–12).

• Sakaw (Isaiah 28:7–8).

• Echik me kaka (Isaiah 29:7–10).

• Eu ta mi ta ika nenien konik (Isaiah 30:13–14).

Pwata mi ouchea ngonuk om kopwe chok nonnom unukun ewe Samon?

Mi mwo turusonuk och mettoch ka ekieki pwe kosap chiwen tongeni kunasefani? Ika menin och mettoch a tano, me ka aureki pwe esap chiwen tongeni forsefan. Nupwen sia kun seni ewe Samon, Setan a mochen kich sipwe ekieki pwe sise chiwen tongeni niwin ika chikarsefan. Inamo, Isaiah a anapanapa ekkoch ekkewe mettoch mi auchea ewe Samon epwe fori ne anisi kich ne kun sefan ngeni I. Met ka kaeo seni Isaiah 29:13–24; 30:18–26; 35 usun ewe Samon, An tong, me An manaman? Menin ka tongeni kuna eu kapas non ekkei uwokisin ewe a ngonuk epinukunuk nupwen a namot ngonuk chikar. Ka pwan tongeni kutta non an Sister Amy A. Wright porous “Christ Heals That Which Is Broken” (Liahona, May 2022, 81–84).

Eu anen an ewe Samon pwarano An manaman me umoumoch ina seni ewe Niwinsefaniton An kapas allim. Isaiah 29 mi masoweni ekkoch porous mi nonno pok ngeni mettochun ewe Niwinsefanito. Ren awewe:

• Anonno fengeni Isaiah 29:11–12 ngeni 2 Nifai 27:6–26 me Joseph Smith—History 1:63–65.

• Anonno fengeni Isaiah 29:13–14 ngeni Doctrine and Covenants 4 me Joseph Smith—History 1:17–19.

• Anonno fengnei Isaiah 29:18–24 ngeni ewe peichen itenapen ewe Puken Mormonn.

Non om ekiek, pwata “auchea: me “amwarar” (Isaiah 29:14) ir kapas mi och ne anapanapa ewe Samon a eniwinisefani An kapas allim? Ifa usun ka tongeni aninis ne apwonueta ekkewe osini usun ewe Niwinsefanito? Ren ekkoch kokkot, nenengeni non an Elter Gerrit W. Gong porous “Muu Meinisin, Einang, me Sokopaten Kapas” (Liahona, Nov. 2020, 38–41).

Nengeni pwan“Ewe Niwinsefaniton ewe Unusochun ewe Kapas Allimen Jises Kraist: Esinesinen Eu Achechemen Ruepuku Ier ngeni ewe Fonufan” (Nenien puken Kapas Allim); “The Morning Breaks,” Kon mi fen, no 1.

• Ifa usun kopwe tongeni anisi noum kewe semirit repwe kuna ewe Chon Amanau non ekkewe mak an Isaiah? Ka tongeni anisir ne kutta kapas mi achemar usun I non Isaiah 14:3; 25:8; or 28:16. Ra tongeni pwan apponuwa ekkei uwokisin seni Isaiah ngeni ekkoch uwokisin mi osukuna usun ewe Chon Amanau, usun ren Matthew 11:28–30; 1 Corinthians 15:53–57; Ilaman 5:12. Met mettoch mi auchea ewe Samon a fen fori fan itach?

• Mwirin ami annea Isaiah 25:8–9 fengen, oua tongeni nenengeni ekkoch sasingin ewe Chon Amanau non Gethsemane, won ewe irapenges, me mwirin An Manausefan. Mut ngeni noum kewe semirit repwe kapas usun met a fis non ekkewe sasing me pwata ra tongei Jises me “pwapwa non an amanau” (uwokisin 9).

• Ka tongeni fini ne ureni noum kewe semirit usun ewe netipengaw ka mefi nupwen emon ka tongei a mano. Pwarata usun ewe kinamwe ka angei pokiten Jises Kraist. Menin noum kewe semirit ra tongeni chungani eu mas mi kechiw me mwirin tonano ekkewe chonun mas nupwen oua anneani Isaiah 25:8 fengen.

• Met en me noum kewe semirit oua fen kuna ewe feiochun tumunun neni fansoun eu monumon ika chumwon non eu ran mi pwichikar? Ika oua fen pwapwaiti eu mwongo nupwen oua echik? Kapas usun ekkei mettoch nupwen oua anneani Isaiah 25:4–6. Ifa usun Jises a usun ekkei mettoch?

• Nupwen en me noum kewe semirit oua anneani Isaiah 29:14, aporousa ngenir ekkoch kapas mi wewen ewe chok mettoch usun “auchea” me “amwarar.” Mut ngenir repwe anisuk ne kutta mettoch ika sasing mi esisinata ekkoch an ewe Samon kewe angang mi auchea me non fansoun soponon. Ekkei mi tongeni pachenong eu kapin ew Puken Mormon, echo sasing eu tempel, ika echo sasingin ewe Aewin Nemasepwi (mi wor eu nepoputan ei etetten). Mwirin noum kewe semirit ra tongeni fini eu mettoch me aporousa pwata mi auchea ngenir.

• Echo kon usun ewe Niwinsefaniton ewe kapas allim a tongeni fitiochu Isaiah 29, usun ren “On a Golden Springtime” (Noun Semirit puken kon, 88). Me menin och mettoch a pwisin fis ngonuk a tongeni anisi ekkewe semirit ne weweiti met wewen niwinsefanito Ren awewe, en me noum kewe semirit oua tongeni kapas usun och mettoch a turuseni kemi me ifa usun oua kuna sefani. Anisi noum kewe semirit repwe anonno fengeni ei ngeni ewe Niwinsefaniton ewe kapas allim. Anongonong won Isaiah 29:13–15, pwata mi namot ewe Niwinsefanito? Met amwararen angang ewe Samon a fori ne eniwini sefani An kapas allim? (nengeni peichen urumot ren ei wik).