Soufos me Osini

Soufos me osini ir a watte wiser me non unusen ewe Testamen Noom. Abraham, Isaac, me Jacob ra kuna nemasepwi me kapas ngeni chon kuno seni nang. Moses a nenefengen ne kapas ngeni Kot me atoura An mochen ngeni ekkewe semiriten Israel. Ewe aewin me oruwen puken Kings ra achema sefani ekkewe angang mi amwarar me porous seni ekkewe soufos Elijah me Elisha. Ewe Testamen Noom a pwan kapas usun soufos fefin usun Miriam me Deborah, fiti fengen me ekkoch pwan fefin kewe ra feioch ren ewe ngunun osini, usun ren Rebekah me Hannah. Me inamo ika ekkewe Konupin rese mak me ren wesen soufos, ir pwan ra ureno ren ewe ngunun osini, akkaewin nupwen ra itini ngeni kich ewe wareton ewe Messiah.

Ese wor me nein ekkei ra fis non amairu ngeni chon Ewe Mwichefenin Jises Kraist ren Aramas mi Pin non Fansoun Soponon. Ennetin, ewe niwinsefaniton ewe kapas allimen Jises Kraist a aiti kich pwe soufos esap chok ir aramasen uruo mi amwarar nge ir eu auchean kinikinin an Kot kokkot. Inamo ekkoch meni repwe nenengeni soufos pwe ir mi sokkono ngeni chok fansoun Testamen Noom, kich sia nenengenir usun mettoch mi wor ngeni kich mi nonno ngeni fansoun Testamen Noom.

Nge ach anneani eu sopwun seni Isaiah ika Ezekiel epwe sokkono seni ach anneani eu porousen mwichenap seni ewe Presetenin ewe Mwichefen iei. Fan ekkoch mi weires ach sipwe kuna pwe a wor mettoch soufosun nom repwe apasa ngeni kich. Pun ina, ewe fonufan sia nom non ikenai mi fokkun sokkono seni ewe fonufan ra afanafan me osini non. Me ewe ennet pwe mi wor nouch emon soufos mi manau a tongeni efisata eu kapaseis: Pwata a namot ewe achocho—me a watte achocho—ne anneani ekkewe kapasen soufosun nom?

Napengeni, aramas ikenai esap ir ekkewe popunapen chon ausening noun soufosun Testamen Noom. Ekkena soufos a wor ar mwitirin aurek ra atoura non ar fansoun me nenier—usun chok ren nouch soufosun fansoun soponon ra ponuweni ach weiweitan aurek ikenai.

Non ewe chok fansoun, soufos ra pwan tongeni kuna nap seni aurekin iei. Ra osukuna ennet esemuch, mi wewe ngeni och fansoun me neni. Ra feioch fen pwarata, ra weweiti nap seni kich usun an Kot angang. Ren awewe, Isaiah a fonou aramas non an fansoun usun ar tipis. I a pwan makkei usun ewe ngasenon ekkewe Chon Israel ekkewe repwe manau 200 ier non fansoun mwan. Non ewe chok pwan fansoun, i a osukuna usun ewe ngaseno minne noun Kot aramas meinisin ra kukutta. Me i a makkei osini minne, pwan mwo ikenai, ir mi chiwen ewitiwiti ar repwe pwonueta—usun ekkewe pwonen “eu minafon fonufan” (Isaiah 65:17) ewe epwe “ureno ren ewe miriten ewe Samon” (Isaiah 11:9), ikewe ekkewe einangen Israel mi mwonucheno repwe ioifengen me ikewe “ekkewe muu” resap “kaeo chiwen kaeo maun” (Isaiah 2:4). Kinikinin ewe pwapwa me ourour ra feito seni ach anneani ekkewe kapasen soufosun Testamen Noom usun Isaiah ina ach esinna pwe kich mi wor wisach non ewe amwararen ran ra kuna.

Iwe nupwen ka anneani osinien nom, a tongeni och ach sipwe kaeo usun ewe napanap minne ra mak non—nge kopwe pwan kuna pwisin inisum non ir, ika “anonnor [ngonuk]” (1 Nifai 19:24; nengeni pwan uwokisin 23). Fan ekkoch ena a wewen ach esinna Babylon usun eu esisinen tipis me namanam tekia, esap chok eu teninimwen nom. A tongeni wewen ach weweiti Israel usun noun Kot aramas non och fansoun me neni. Ika epwe fen tongeni wewen ach ekieki Zion pwe ewe popun fansoun soponon minne noun Kot aramas ra etiwa, me nukun ar kuna pwe eu chok kapas fan iten Jerusalem.

Sia tongeni anonno fengeni ekkewe pukefel ngeni manauach pokiten sias weweiti pwe u osini a tongeni pwonueta non chommong napanap. Eu ochun awewe ina ewe osini non Isaiah 40:3: “Ewe mongungun i ewe a pupuchor me non ewe fonupon, Amonnata aanen ewe Samon.” Ngeni ekkewe mi fotek chon Jew non Babylon, ei kapas meni a wewe ngeni ewe Samon an awora eu anen tou seni fotek me niwin sefan ngeni Jerusalem. Ngeni Matthew, Mark, me Luke, ei osini a wewe ngeni John ewe Chon Papatais, ewe a amonnata ewe anen an ewe Chon Amanau angangen afanafan. Me Joseph Smith a angei pwarata pwe ei osini mi chiwen pwonueta ikenai ren amonnetan an Kraist we angangen ewe engorou ier. Non ekkoch napanap kich mi chiwen fetan ngeni ach sipwe weweiti, soufosun nom ra kapas ngeni kich. Me ra osukuna chommong auchean, ennet esemuch ekkewe ir mi chiwen chok och ngeni kich usun ir mi och ngeni Israel me nom.

Menin fen aucheanap seni om pwisin kunak me non osinien Testamen Noom ina om kopwe kuna Jises Kraist me non ir. Ika ka kukutta I, kopwe kuna I, pwan mwo ika I ese mak itan non. Meni epwe aninissoch om kopwe onnomu non ekiek pwe ewe Koten ewe Testamen Noom, ewe Samon Jehovah, i Jises Kraist. Inet chok ekkewe soufos ra anapanapa met ewe Samon a fori ika met I epwe fori, ra kapas usun ewe Chon Amanau.

Kopwe pwan kuna kapas mi wewe ngeni Emon mi Kepit, emon Chon Angasano, me emon Kingen fansoun mwach seni mwirimwirin David. Ekkewe meinisin ir osini usun Jises Kraist. Nge akkaewin, kopwe annea usun ngaseno, omusomusen tipis, amanau, me niwinsefanito. Ren ewe Chon Amanau non om ekiek me netip, ekkei osini repwe pukutan itini ngonuk ewe Noun Kot. Akkauchean, ewe murinon anen ach sipwe weweiti osini ina an epwe wor rech “ewe ngunun osini,” minne John a urenikich pwe ina “ewe kapasen pwarata usun Jises” (Pwarata 19:10).