Konupin 102–103; 110; 116–119; 127–128; 135–139; 146–150

Esinna ifa usun Konupin 102:1–11 a anapanapa memmefin noninen me anamon ewe mi kan soun fis fansoun weires. Menin en ika ekkoch ka sisiner oua fen mefi ekkena sokkun memmef. Nupwen ka anneani Könupin 102:12–28; 103; 116, kukutta ekkewe kapas minne ra ngonuk epinukunuk ne “kokkori iten ewe Samon” non om fansoun sossot (Könupin 116:13). Kopwe mochen esisina, chechemeni, ika aporousa ngeni ekkoch kapas mi ngonuk epinukunuk non I.

Nengeni pwan Isaiah 25:8; Hebrews 2:17–18; Alma 7:11–13; Camille N. Johnson, “Christ Is Relief,” Liahona, May 2023, 81–83; “Where Can I Turn for Peace?” (Kon mi Fel,, no. 129).

Ekkewe Könupin mi masoweni porous mi iti ngeni ewe manau me angangen afanafan an Jises Kraist. Ikkei ekkoch awewe:

• Könupin 110:1–4 (nengeni Matthew 22:41–45; Hebrews 5:4–10; 6:20)

• Konupin 118:22 (nengeni Matthew 21:42; Föfför 4:10–11; 1 Peter 2:7)

• Konupin 118:25–26 (nengeni Matthew 21:9)

Met ekkei uwokisin ra aituk usun Jises Kraist? Pwata mi ouchea ngonuk om kopwe sinei usun I?

Konupin 119 mi masoweni chommong kapas mi anonnoi manauach ngeni eu sai sefan ngeni Samach won Nang. Nupwen ka anneani, kutta kapas usun “fetan,” “aan,” “aneno,” “peche,” me “fetan fein.” Ekipwichi om pwisin sai—ian ka fen pin nom ia, ian ka non ia iei, me ian kopwene no ia. Met ka kaeo seni ei konupin usun om sai sefan ngeni imwom? Met ka fen kaeo ren om katon anen ekkoch? Anongonong won ei konupin, met Kot a fen awora ne anisuk kopwe nom won An aan?

Ekieki usun eu fansoun nupwen om tapweno mwirin eu aan ika eu map a anisuk ne saino ekis mi fetanoch. Met ena fansoun a fis a aituk usun om tapweno mwirin an Kot aan?

Non chommong ekkoch pukefel, ewe Samon me Noun soufos ra kapas usun eu aan. Fan mi wor ekkoch minen awewe. Ekieki om kutta kutta non ekkei uwokisin me makketiw ika aporousa ngeni ekkoch met ka kaeo.

Ifa usun ekkei ennet repwe anisuk ne nom won an Kot aan?

Met pwan ekkoch mirit ka tongeni kaeo seni ewe ourour seni Preseten Russell M. Nelson?

“Ika ach sai non manau pwe sipwe fetanoch, mi namot sipwe tapweno mwirin emwen seni nang. Ewe Samon a apasa, Kutaei non ekiek meinisin; kosap tipemwaramwar kosap nuokus [(Doctrine and Covenants 6:36]. Me ewe chon Konupin a makkei ,‘Om kapas a ussun ew nam a emweniei, me a asarama ewe an upwe fetan won’ [Konupin 119:105]. …

“Non om sai non unusen manau, ka churi chommong eppet me fori ekkoch muan. Emwenin pukefel a anisuk ne esinna met mi muan me a fori ewe pungun mi namot. Ka kouno ne feino non ewe fetanin aan mi muan. Ka tumunoch ne kaeo ewe mappin anen pukefel. Mwirin ka soposopono ren aier me siwin sefan mi namot om kopwe tota won ‘ewe aan mi aukukun me chokisikis minne a wenengeni manau esemuch [2 Nifai 31:18]” (“Living by Scriptural Guidance,” Ensign, Nov. 2000, 17).

Nengeni pwan Dieter F. Uchtdorf, “Ewe Noun Mi Mwanecheno me ewe An Ngeni Imw,” Liahona, Nov. 2023, 86–88.

Apareni pwata, anongonong won Könupin 135:15–18, ese mirit ne epinukunuk non kot mi chofona. Met ita epwe sotunuk om kopwe epinukunuk non mi nonno ngeni eu niosun anu muan? Kopwe tongeni fori eu etettenen ekkewe mettoch ewe Samon a tongeni fori, usun ewe chon konupin a fori non Konupin 134–36. Met mettoch mi manaman I a fen fori fan itom?

Met ka kuna non Konupin 139 mi anisuk ne weweiti pwe ewe Samon mi aparenuk—om ekiek me foffor, pochokun me apwangapwang? Ifa usun ei ennet a siwini manauom me om finata?

Nupwen ka anneani ekkei amuchunon konupinin mwareiti, ekieki usun om popun ne mwareiti ewe Samon. Pwata mi auchea om kopwe mwareiti I? Met ekkoch napanap ka tongeni mwareiti I?

• En ika emon me nein noum kewe semirit a tongeni anneani Konupin 102:1–2, kukutta ifa usun ewe Samon a anisi kich fansoun ach weires. Ifa usun sia tongeni kuna An aninis? Ka pwan tongeni aporousa fengeni ekkoch fansoun nupwen a namot ngonuk aninis me mefi pwata Kot a rong om iotek.

• Noum kewe semirit meni repwe sani ne kapas usun memefin ar repwe nom non ewe rochopwak. Ika ra tongeni aporousa mettoch mi weires ar repwe fori non ewe rochopwak. Meni kopwe mochen etiwer repwe fori och mettoch ren meser mi apung, usun ar chungani echo sasing. Met sia keao seni Könupin 119:105 usun saram me ewe kapasen Kot?

• Kutta och mettoch Samach won Nang a fen ngenikich an epwe anisi kich sipwe nom won Anan we non ekkei uwokisin: Konupin 119:47–48; 119:105; 1 Nifai 11:25; 2 Nifai 31:20. Met sia tongeni fori ach sipwe nom won an Kot we aan?

• Noum kewe semirit meni repwe sani ar repwe nennengeni ekkoch sasingin ekkewe mettoch mi mak non Könupin 119:105. Ra tongeni etetteni ekkewe sasing nupwen ra anneani ewe uwokisin. Ka pwan tongeni konu fengeni echo kon mi wewe ngeni, usun ren “Aitiei Fetan Non An Kot Saram” (Noun Semirit Puken Kon, 60) ika “I Will Walk with Jises” (Nenien puken Kapas Allim).

• Ekieki om kopwe fori ew tettenin mettoch en mi sinei usun emon me emon noum kewe semirit. Nupwen ka anneani ewe etetten fan eu me eu, eisini ekkewe semirit repwe esisina ion ewe ka anapanapa. Iwe, mwirin anneani Konupin 139: 1– 3 fengen, oua tongeni etettenatiw mettoch Samach won Nang me Jises mi sinei usuch.

• Makkei ekkewe kapasen Psalm 139:23–24 won echo toropwe ika won eu pap. Etiwa noum kewe semirit repwe chungani eu nain fan ekkewe kapas mi anapanapa mettoch Kot a tongeni fori fan itach. Pwata sipwe mochen Kot epwe fori ekkei mettoch?

• Menin noum kewe semirit ra tongeni aporousa fansoun nupwen emon a mwareitir ika urenir pwe ra fori och angang mi och. Aporousa ekkoch ekkewe mettoch seni Könupin 146:6–9 minne ewe Samon a fen fori (anisi noum kewe semirit repwe weweiti kapas sise sisinei). Etiwa noum kewe semirit repwe kapas usun ekkoch mettoch I a fori fan itach. Ifa usun sia tongeni mwareiti I ren ekkena mettoch?