Isaiah 1–12

Ewe Chon Amanau a fen osukuna pwe “mettoch meinisin minne [Isaiah] a apasa ra fen fis me repwe fis, pwan mwo anongonong won ekkewe kapas minne i a apasa” (3 Nifai 23:3). Nupwen ka kaeo ew puken Isaiah, ekieki ne fori eu etettenin osini ren itenaper usun ekkei: fansoun Isaiah, An ewe Chon Amanau angangen afanafan, me Ekkewe fansoun soponon. Apareni pwe chommong me nein an Isaiah kewe osini ra pwonuta non chommong napanap (nengeni Bible Dictionary, “Isaiah”).

Preseten Dallin H. Oaks a osukuna: “Ewe puken Isaiah a masoweni chommong osini ekkewe usun ita a chommong pwonutar. Eu usun mi apachanong aramasen fansoun Isaiah we ika nonnomun ewe tappin fansoun mwirin. Pwan eu wewen, fan ekkoch esisinan, usun ita a wewe ngeni mettoch non ewe nepoputan fansoun, nupwen Jerusalem a tano me noun kewe aramas ra toropas fetan mwirin irapengesinon ewe Noun Kot. Pwan eu wewen ika pwonutan ewe chok osini usun mi wewe ngeni ekkewe mettoch mi fis ngeni ewe Oruwan Wareto an ewe Chon Amanau. Ewe ennet pwe chommong me nein ekkei osini ra tongeni chommong wewer a apochokuna ewe auchean ach kutta pwarata seni ewe Ngun mi Fel an epwe anisi kich ne awewer” (“Scripture Reading and Revelation,” Ensign, Jan. 1995, 8).

Usun soufos non meinisin fansoun, Isaiah a sopoosopono ne fonou ekkewe aramas usun nonnomun ngunur. Nupwen ka anneani Isaiah 1; 3; 5, kutta ekkewe kaspas mi anapanapa ifa usun ekkewe aramas ra fori non pekin ngun (nengeni, ren awewe, Isaiah 1:2–4, 21–23; 3:9, 16–17; 5:11–12, 20–23). Met osukosuk mi nonno fengen ka kuna non ach fansoun? Ka tongeni pwan kutta ekkewe uwokisin mi fonou usun ekkewe mwirimwirin nonnomun ngunun ekkewe Chon Israel (usun ren Isaiah 1:7; 3:17–26; 5:5–7, 13–15).

Ren kapachetan ekkena kapasen fon, Isaiah a awora porousen epinukunukun ngaseno me ren ewe Chon Amanau (nengeni, ren awewe, Isaiah 1:16–19, 25–27; 3:10; 4). Met ka kaeo usun ewe Samon seni ekkei uwokisin? Ifa usun an ewe Samon porous non ekkei uwokisin ra sokkono seni met Setan a mochen kich sipwe nuku?

Usun Isaiah, soufos ikenai ra fonou kich usun tipis me mwirimwirin kewe, me ra awora porousen epinukunuk me ren Jises Kraist. Met awewe ka tongeni ekieki usun? Kopwe mochen atona sefani eu porous seni mwichenap akkom, ne kukutta ekkena sokkun kapasen fon me pwon.

Chommong me nein an Isaiah osini a wor tichikin wewer fan iten ach fansoun. Ach sipwe kutter, kutta ekkewe foun kapas mi awewei fofforun fansoun mwan (usun ren “epwe” ika “repwe feino”). Ren awewe, kutta ekkei kapasen foffor nupwen ka anneani Isaiah 2; 4; 11–12. Ka tongeni fen pwan sossot nge ekkesiwinir ngeni foun kapas mi awewei fansoun iei (usun mi ika mi feino). Met osini ra akkaewin auchea ngonuk? Met ka kaeo seni ekkei osini usun Zion, forutan tempel, me ionfengenin Israel?

Isaiah 2:2–3 mi akkaewin wewe ngeni Aramas mi pin non Fansoun soponon. If ausun ekkei osini ra pownueta? Met ka kaeo usun an ewe Samon “napanap” me “aan” non Imwan we? (uwokisin 3).

Nengeni pwan Isaiah 5:26; “Won Ungun Chuk Tekia,” Kon mi fen, no. 28.

Non Isaiah 6, Isaiah a achema sefani an kokko ngeni an epwe emon soufos. Nupwen ka anneani ei sopwun, met a eingok usun met a fis ngeni Isaiah? Ifa usun ei sopwun a siwini ewe napanap ka ekieki usun ewe Samon, Noun kewe soufos, me ewe angang ra kokkko ar repwe fori?

Fansoun an Isaiah angangen afanafan, Israel a fori eu chiechi fengen ngeni Syria an epwe eppeti pwisin seni Assyria. Israel me Syria ra mochen echimwa Ahaz, ewe kingen Judah, an epwe fitir. Nge Isaiah a osini pwe ewe chiechi fengen esap fisioch me ouroura Ahaz pwe epwe nuku non ewe Samon (Isaiah 7:7–9; 8:12–13).

Nupwen Isaiah a ouroura Ahaz, a fori ekkoch osini mi itefouno, usun ren ekkewe mi pwa non Isaiah 7:14; 8:13–14; 9:2, 6–7. Met chok ekkei osini ra wewe ngeni Ahaz, mi fatoch pwe rese nounou ngeni Jises Kraist (nengnei pwan Matthew 1:21–23; 4:16; 21:44; Luke 1:31–33). Pwata “Immanuel” a eu itenap mi och fan iten ewe Chon Amanau? (Nengeni Matthew 1:23). Ifa usun I a en emon “Chon Aninis” ika “Princen Kinamwe” ngonuk? (Isaiah 9:7). Met ka pwan kaeo usun ewe Chon Amanau seni ekkei uwokisin?

• Non Isaiah 1:2–4, en me noum kewe semirit oua tongeni kutta ekkoch popun pwata ewe Samon ese pwapwa ren ekkewe aramas. Apareni ewe anonno fengen ngeni man non uwokisin 3—ion ach “masta”? Ifa usun sia tongeni pwari pwe sia sinei I?

• Ne anapanapa non ekiek Isaiah1:16–18, en me noum kewe semirit oua tongeni nenengeni och mettoch mi paretik me och mettoch mi unusen pwechepwech. Ika menin oua tongeni angang fengen ne tonu och mettoch. Ifa usun ach winiti mi nimengaw non pekin ngun? Ifa ussu Jises anisuk a anisi kich ne nimenimoch? Met sia kaeo usun ewe Chon Amanau seni ekkei uwokisin? Aporousa ngeni noum kewe semirit ifa usun ka mefi usun I me met I a fen fori fan itom.

• Isaiah a osini eu fasnsoun nupwen “ewe chukun imwen ewe Samon” epwe ofieto aramas seni “muu meinisin” (Isaiah 2:2). Ifa usun ka tongeni anisi noum kewe semirit repwe mefi meseik usun ar repwe feinno ngeni imwen ewe Samon? Ka tongeni etiwer repwe chungani echo sasingin imwer. Mwirin annea fengeni Isaiah 2:2, me etiwer repwe chungani echo sasingin “ewe imwen ewe Samon,” minne eu tempel. Anneani Isaiah 2:3 fengen. Etiwer repwe apachata ngeni nour kewe sasing chommong aramas ra feito ngeni ewe tempel, mi pachenong ar kewe famini.

• Ka tongeni annea Isaiah 2:2–3 fengen me affatata och mettoch mi peseok me noum kewe semirit ne no ngeni ewe tempel. Iwe, mwirin anneani Isaiah 2:4 fengen, oua tongeni kapas ifa usun ewe tempel a wator rer kinamwe. Ekieki ne konu echo kon usun ewe tempel, usun ren “I Love to See the Temple” (Noun Semirit Puken Kon, 95). Anisi noum kewe semirit repwe kutta kapas non ewe kon minne mi aitir met ewe tempel me met sia fori ikewe.

• Om kopwe esinei usun an Isaiah osini usun Kraist, en me noum kewe semirit oua tongeni kapas usun itenapen aramas, usun preseten, pisop, ika ticher. Met ekkei itenap ra ureni kich usun ekkei aramas? Anisi noum kewe semirit ar repwe kutta itenapen Jises Kraist non Isaiah 7:14 me 9:6–7 (nengeni pwan peichen urumotun non ei wiik). Met eu me eu ekkei itenap ra aiti kich usun I? Met ka pwan sia kaeo usun Jises Kraist seni ekkei uwokisin?

• Ka pwan tongeni aporousa ngeni noum kewe semirit “Isaiah ewe Soufos” (non Porousen Testamen Sofo, 150–51). Kopwe kan kokouno fansoun me fansoun ne eis met Isaiah a sinei usun Jises Kraist chommong ier me mwen I a uputiw. Iwe mwirin ka tongeni aea Matthew 1:21–23; Luke 1:31–33 ne kapas ren ifa usun an Isaiah osini non Isaiah 7:14; 9:6–7 ra pwonueta.

  

  1:18