Mapisarema 1–2; 8; 19–33; 40; 46

Apo paunoverenga Mapisarema, ungangocherechedza kuti vanyori vanotaura kakawanda zvakadini kutya, rusuwo, kana kushushikana. Manzwiro akadaro ndeamazuva ose, kunyangwe kuvanhu verutendo. Asi chinoita kuti Mapisarema akurudzire ndechekuti anopa gadziriso dzinokurudzira, kusanganisira ruvimbo rwakazara muna Ishe. Apo paunoverenga Mapisarema 1; 23; 26–28; 46, nyora pasi:

• Kokero dzekuvimba naIshe:

• Mashoko anoVatsanangura.

• Mashoko anotsanangura runyararo, simba, nemamwe maropafadzo aVanopa:

• Mashoko anotsanangura vanhu vanovimba Navo:

Tsvakawo fananidziro yakajekesa nezviratidzo zvinoshandiswa neMapisarema kudzidzisa pamusoro peMuponesi. Somuenzaniso, muPisarema 23, ndevo dzakaita sedzekuti “vatisa pamafuro manyoro” kana kuti “mvura inozorodza” (ndima 2) dzinounza chii kupfungwa? “Tsvimbo” uye “mudonzvo” zvinonyaradza (ndima 4) zvinokwanisa kumiririra chii? Zvingava zvinorevei kuti “mukombe” wedu (ndima 5) ufashukire?

Mapisarema akati wandei anonongedzera kuupenyu hunofa hwaJesu Kristu. VaKristu munguva dzeTestamente Itsva vakaona kuenderanawo uku. Funga pamusoro pekuverenga majerero ezvinyorwa zvitsvene anotevera. Tarisa kuenderana kuri pakati pemashoko ari mumapisarema aya neupenyu hweMuponesi:

• Pisarema 2:1–3 uye Mabasa aVaApositora 4:24–28

• Pisarema 2:7 uye Mabasa aVaApositora13:30–33

• Pisarema 22:1 uye Mateo 27:45–46

• Pisarema 22:7–8 uye Mateo 27:39–43

• Pisarema 22:16 uye Ruka 23:32–33

• Pisarema 22:18 uye Mateo 27:35

• Pisarema 31:5 uye 23:46

Chii chaunodzidza kubva pakunzvera endererano idzi? Ndehupi huporofita nezvivimbiso zvemagwaro matsvene zvisati zvazadzikiswa? Chii chaunowana muvimbiso idzi chinokupa tariro yeramangwana?

Kuverenga Mapisarema 8; 19; uye 33 kungangogona kukukurudzira kuti ufunge pamusoro pezvisikwa zvizhinji zvinoshamisa zvaIshe. Fungisisa pamusoro pemanzwiro ako apo paunoita kudaro. ­ Zvisikwa zvaIshe “zvinozivisa kubwinya kwaMwari” sei kwauri? (Pisarema 19:1).

Hedzino dzimwe nziyo dzakakurudzirwa neMapisarema:

• Pisarema 23: “The Lord Is My Shepherd” (Hymns, nhamba 108)

• Mapisarema 23:6; 150: “Praise to the Lord, the Almighty” (Hymns, nhamba 72)

• Pisarema 26:8: “We Love Thy House, O God” (Hymns, nhamba 247)

• Pisarema 27:1: “The Lord Is My Light” (Hymns, nhamba 89)

• Mapisarema 33:1–6; 95:1–6: “For the Beauty of the Earth” (Hymns, nhamba 92)

• Pisarema 37:3–9: “Be Still, My Soul” (Hymns, nhamba 124)

• Pisarema 148: “All Creatures of Our God and King” (Hymns, nhamba 62)

MuMapisarema, mashoko akaita seekuti uchapupu, mitemo yakatarwa, murairo, uye mitongo anokwanisa kureva shoko raIshe. Chengeta izvozvo mupfungwa apo paunoverenga Pisarema 19:7–11. Ndima idzi dzinotaura kuti kudii pamusoro peshoko raIshe? Ko Pisarema 29 inokudzidzisa chii pamusoro peinzwi Ravo? Muruzivo rwako, shoko kana inzwi raIshe rakafanana sei netsananguro idzi?

Nokuda kwokuti temberi paJerusarema yakavakirwa pachikomo, ndevo yekuti “gomo raIshe” (Pisarema 24:3) inokwanisa kureva temberi kana pamberi paMwari. Izvi zvinowedzera chii kunzwisiso yako yePisarema 24? Zvinorevei kwauri kuva “nemaoko akachena, nemwoyo wakarurama ”? (ndima 4). Apo paunoverenga Mapisarema 26–27, chii chimwe chaunodzidza pamusoro peimba yaIshe?

Dzimwe nguva, tinogona kuora mwoyo patinonzwa kuti tinofanira kuva vakarurama kuti tipinde pamberi paMwari. Mushure mazvose, tose tinonetseka, uye hapana ani wedu asina zvikanganiso. Itariro ipi yaunowana mushoko raGosa David A. Bednar“Clean Hands and a Pure Heart”? (Liahona, Mbudzi 2007, 80–83). Ungakwanisa kushandisa sei shoko ravo kubatsira mumwe munhu anonzwa kuremerwa nekuda kuva asina zvikanganiso? Funga pamusoro pekuti ungakwanisa sei kugamuchira rubatsiro rweMuponesi mukuedza kwako kuva “nemaoko akachena, nemwoyo wakarurama.”

Onawo Bradley R. Wilcox, “Worthiness Is Not Flawlessness,” Liahona, Mbudzi 2021, 61–67.

• Funga pamusoro pekunyora kuti Ishe ndivo … Koka vana vako kuti vatsvake nzira dzekupedzisa mutsetse iwoyo vachishandisa zvinyorwa zvitsvene zvakaita seizvi: Mapisarema 23:1; 27:1; 28:1; 28:7; 32:7; 46:1. Ndima idzi dzinotidzidzisa chii pamusoro pemabatsirirwo atinokwanisa kuitwa naIshe?

• Unokwanisa kukurukura nevana vako izvo zvinodikanwa negwayana kuti rive rakachengeteka uye rine utano. Zvino, apo pamunoverenga pamwechete Pisarema 23, batsira vana vako kuti vaenzanise izvo mufudzi zvaanoitira gwayana neizvo Jesu zvaanotiira. Chii chatinoda kuti tive takachengeteka uye tiine utano pane zvepamweya? Imbai pamwechete rumbo runokwanisa kuvapa mazano, rwakaita serwokuti “I Feel My Savior’s Love” (Children’s Songbook, 74–75).

• Apo pamunoverenga Pisarema 24:3 pamwechete, vana vako vanokwanisa kutsvaka mashoko anovayeuchidza nezve temberi. Vanokwanisawo kutarisa pamufananidzo wetemberi. Zvino munokwanisa kuverenga pamwechete ndima 4 kuti mudzidze kuti ndiani anokwanisa kupinda mutemberi. Munokwanisa kutaura pamusoro pekuti maoko anosviba sei uye kuti tinoachenesa sei. Tinosviba sei pane zvepamweya? Muponesi anobatsira sei kutichenesa pane zvepamweya?

• Kana uine vana vaduku, unokwanisa kuvakoka kuti vanyepedzere kuchema paunenge uchiverenga kubva kuPisarema 30:5, “Kuchema kungavapo madekwana.” Zvino vakumbire kuti varatidze mufaro apo paunoverenga panoti, “Asi mufaro unosvika mangwanani.” Dzokorora ndevo iyi kakati wandei.

• Ratidza mufananidzo weMuponesi, uye wotaurira vana vako izvo zvaAkakuitira zvinokuunzira mufaro. Unokwanisawo kupa mwana woga woga chijana chekubata mufananidzo wacho uye ogovera izvo zvakaitwa naJesu zvinomuunzira mufaro.

• Batsira vana vako kuziva nemusoro mutsetse wokutanga kubva kuPisarema 46:10 unoti: “Nyararai, muzive kuti ndini Mwari.” Zvinorevei “kunyarara”? Zvimwe mungakwanisa kupedza imwe nguva muchidzidzira kunyarara. Munokwanisawo kugoverana zviitiko apo kuva “wakanyarara” pakwakasimbisa hukama hwako naMwari. Batsira vana vako kufunga nezve nguva mukati mezuva apo pavanokwanisa “kunyarara” kuti vanzwe kuva pedyo naBaba Vokudenga.