Jobo 1–3; 12–14; 19; 21–24; 38–40; 42

Zvitsauko zvekutanga zvaJobo zvinosimbisa, nenzira yekudetemba, basa raSatani somuvengi kana mupomeri wedu; hazvitsananguri mataurirano chaiwo akaitika pakati paMwari naSatani. Apo paunoverenga izvo zvakataurwa naSatani pamusoro paJobo (ona Jobo 1:9–11; 2:4–5), ungangozvibvunza kuti, “Sei ndichiramba ndakatendeka kuna Mwari?” Sei zviinenjozi kuteerera Ishe nokuda chete kwechikonzero chakataurwa naSatani?

Chii chinokufadza pamusoro pedaviro dzaJobo kumiedzo yake? (ona Jobo 1:20–22; 2:9–10).

Shamwari dzaJobo dzakataura kuti Mwari vaiva vari kumuranga (ona Jobo 4–5; 8; 11). Ndeapi matambudziko aunoona nepfungwa iyi? Verenga mhinduro yaJobo muzvitsauko 12–13. Chii chaizivikanwa naJobo pamusoro paMwari chakaita kuti akwanise kuramba achivimba? Chii chaunoziva pamusoro paMwari chinokubatsira kutarisana nematambudziko?

Dzimwe nguva tinodzidza zvokwadi zvakakosha zvikurusa munguva dzedu dzakaomesesa. Fungisisa miedzo yakatsanangurwa naJobo muna Jobo 19:1–22 uye zvokwadi zvaakazivisa mundima 23–27. Unoziva sei kuti Mununuri wako mupenyu. Mutsauko upi unoitwa neruzivo urwu muupenyu hwako?

Funga pamusoro pekuimba kana kuteerera kurwiyo rwuri pamusoro paJesu Kristu, rwakaita serwokuti “Ndinoziva Mununuri Wangu mupenyu” (Nziyo neDzevana Vadiki, nhamba 74). Mashoko api kubva murwiyo urwu anotaura manzwiro ako pamusoro Pake?

Onawo Dzidziso neZvibvumirano 121:1–12; 122.

Muna Jobo 21–24, unozoverenga nezve hurukuro pakati paJobo neshamwari dzake. Pakati pehurukuro iyi paiva nemubvunzo unobvunzwa nevanhu vazhinji wokuti: Sei vanhu vakarurama dzimwe nguva vachitambura?

Kunyangwe zvazvo tisina mhinduro dzose, muvhangeri rakadzorerwa raJesu Kristu, tine zvimwe zvokwadi zvinokwanisa kutibatsira kunzwisisa nezve nhamo nekutambura. Pazasi pane zvinyorwa zvitsvene zvemazuva ekupedzisira zvine zvimwe zvezvokwadi izvi. Zvinyorwa zvitsvene izvi zvinotidzidzisa chii pamusoro paBaba Vokudenga naJesu Kristu?

• 2 Nifai 2:11–13

• Mosaya 23:21–23; 24:10–16

• Eta 12:27

• Dzidziso neZvibvumirano 58:3–5

• Abrahama 3:22–26

Unokwanisawo kuverenga dzidziso dzeMutungamiri Spencer W. Kimball pamusoro pematambudziko “muTragedy or Destiny?” Teachings of Presidents of the Church: Spencer W. Kimball [2011]), 11–21).

Maererano neizvo zvawanzvera, ungapindura sei mubvunzo wakaita sewokuti “Sei Mwari vachibvumira kuti vanhu vakarurama vatambure?”

Atsamwiswa nepomero dzeshamwari dzake (ona Jobo 16:1–5; 19:1–3), Jobo akabvunza Mwari kakawanda kuti sei aifanira kutambura zvikuru zvakadaro (ona Jobo 19:6–7; 23:1–9; 31). Ishe havana kupa chikonzero chakajeka mubhuku raJobo. Asi Vakadzidzisa shoko rakakosha muzvitsauko 38–40. Ungapfupisa sei shoko iroro? Somuenzaniso, chii chaunodzidza kubva pamibvunzo yaIshe muna Jobo 38:1–7, 18–24?

Unozocherechedza kuti Ishe vakataura naJobo pamusoro pezvimwe zvezvisikwa Zvavo uye mamwe mabasa makuru Avo (ona Jobo 38–39). Ungangotarisa pazvimwe zvezvisikwa izvozvo (kana mifananidzo yazvo). Zvinhu izvi zvinokubatsira sei kuva nemafungiro akasiyana pamusoro paMwari? pamusoro pemiedzo yako? Zvakashandura sei maonero ezvinhu aJobo? (ona Jobo 42:1–6; onawo Mosesi 1:8–10).

Heano mashoko maviri emusangano mukuru ayo anokwanisa kubatsira kushandura maonero ezvinhu edu: Tamara W. Runia, “Seeing God’s Family through the Overview Lens” (Liahona, Mbudzi 2023, 62-69); Russell M. Nelson, “Think Celestial!” (Liahona, Mbudzi 2008, 117–120). Mune rimwe remashoko aya, tsvaka chimwe chinhu chaunozoda kuyeuka nguva inotevera apo miedzo yako painoratidzika seiri kukukurira. Unozozviyeuchidza sei nezve izvo zvawakadzidza ?

• Kurudzira vana vako kuti vakutaurire izvo zvavanoziva pamusoro paJobo. Kana vachida rubatsiro, unokwanisa kuvanongedzera kuna Jobo 1:1, 13–22; 2:7–10 kana kuna “Jobo” (muNyaya dzeTestamente Yekare, 145–47). Jobo akadavira sei kumatambudziko ake? (ona Jobo 1:21; 2:10).

  

  1:55

• Jobo akanga akatendeka mumatambudziko ake nokuda kwezvaaiziva pamusoro paIshe. Pamwe iwe nevana vako munokwanisa kutarisa pamifananidzo yaJesu Kristu achitaurirana nevamwe (sezvakaita uyo uri pazasi kana mifananidzo iri muBhuku reMifanidzo yeVhangeri). Taura pamusoro pezvaunoziva pamusoro Pake uye kuti Akaita sei. Hedzino dzimwe ndima dzinoratidza izvo Jobo zvaaiziva pamusoro paIshe: Jobo 12:10, 13, 16; 19:25–27. Sei zvakakosha kuziva zvinhu izvi pamusoro Pake?

• Jobo akabvunza mubvunzo wakakosha muna Jobo 14:14. Pamwe iwe nevana vako munokwanisa kutora mijana yokugovera mapinduriro amunoizoita Jobo. Unokwanisa kutsvaka mazano muna Aruma 11:42-44, muvhidhiyo inonzi “In a Coming Day” (Gospel Library), kana kuti murwiyo pamusoro peKumuka Kuvakafa, rwakaita serwokuti “Did Jesus Really Live Again?” (Children’s Songbook, 64).

1:11

• Apo Jobo paaiva akasuwa, shamwari dzake dzakataura kuti Mwari vaiva vari kumuranga nokuda kwokuti akanga atadza (ona Jobo 22–5). Dai taiva shamwari dzaJobo, taizoedza sei kumubatsira? Mashoko edu anokwanisa kubatsira vamwe sei apo pavanenge vakasuwa? (ona Jobo 16:5 Funga pamusoro pekuratidza mumwechete kana yakawanda yemifananidzo iri muchidzidzo chino apo pamunokurukura mibvunzo iyi.

• Funga pamusoro pekukumbira vana vako kuti vadorongodze humwe hunhu hweshamwari yakanaka uye vadome shamwari ine hunhu uhwu. Zvino munokwanisa kutarisa pamufananidzo waJesu Kristu. Jesu ishamwari yakanaka kune mumwe nemumwe wedu nemunzira dzipi? Ungangofunga nezve mumwe munhu arikusangana nenguva yakaoma. Ronga kuti unozova sei shamwari yakaita saKristu kwavari.

• Mushure mekuverenga Job 19:23–27, iwe nevana vako munokwanisa kutaura pamusoro pemaziviro amunoita kuti Mununuri wedu mupenyu. Mungangoshanda pamwechete kuisa uchapupu hwenyu (kana mifananidzo yeMuponesi) mubhuku (ona ndima 23)

• Munokwanisawo kuimba rumbo rwunopupura nezve Muponesi, rwakaita serwokuti “Ndinoziva Mununuri Wangu Mupenyu” (Nziyo neDzevana Vadiki, nhamba 74). Govera ndevo kubva murwiyo rwacho idzo dzinosimbisa rutendo rwako maAri. Sei zvakakosha kuziva kuti Jesu Kristu anorarama?