Salamo 1–2; 8; 19–33; 40; 46

Rehefa mamaky ny Salamo ianao dia mety ho tsikaritrao hoe impiry ireo mpanoratra no naneho ny tahony na ny alahelony na ny tebitebiny. Tsy mahagaga ny fahatsapana toy izany, na ho an’ny olona manam-pinoana aza. Fa ny mahatonga ny Salamo ho mitondra fitaomam-panahy dia noho izy ireo manolotra ihany koa vahaolona manentana ny fanahy, isan’izany ny fatokiana tanteraka ny Tompo. Soraty izao eo am-pamakianao ny Salamo 1; 23; 26–28; 46:

• Fanasana hatoky ny Tompo.

• Ireo teny izay mamariparitra Azy.

• Ireo teny mamariparitra ny fiadanana sy ny hery ary ireo fitahiana hafa omeny.

• Ireo teny mamariparitra ireo olona matoky Azy.

Jereo ihany koa ireo fampakana sary an-tsaina sy tandindona ampiasain’ny Salamo mba hampianarana momba ny Mpamonjy. Ohatra, ao amin’ny Salamo 23 dia mampahatsiahy inona ireo andian-teny toy ny hoe “mampandry … amin’ny ahi-maitso” na “rano fialan-tsasatra” (andininy 2)? Mety ho tandindon’ny inona ny “tsorakazo” sy ny “tehina” (andininy 4) mahafa-tahotra? Mety hidika inona ny hoe feno dia feno ny “kapoaka”-ntsika (andininy 5)?

Salamo maro no miresaka ny fiainan’i Jesoa Kristy teto an-tany. Nahita ireo fifandraisana ireo koa ireo Kristianina tamin’ny andron’ny Testamenta Vaovao. Hevero ny hamaky ireto toko sy andinin-tsoratra masina ireto. Tadiavo ny zavatra mampifandray ireo teny ao amin’ireo salamo ireo amin’ny fiainan’ny Mpamonjy:

• Salamo 2:1–3 sy ny Asan’ny Apostoly 4:24–28

• Salamo 2:7 sy ny Asan’ny Apostoly 13:30–33

• Salamo 22:1 sy ny Matio 27:45–46

• Salamo 22:7–8 sy ny Matio 27:39–43

• Salamo 22:16 sy ny Lioka 23:32–33

• Salamo 22:18 sy ny Matio 27:35

• Salamo 31:5 sy ny Lioka 23:46

Inona no zavatra ianaranao avy amin’ny fandalinana ireo zavatra mifandray ireo? Inona avy ireo faminaniana sy fampanantenana ao amin’ny soratra masina izay tsy mbola tanteraka? Inona no hitanao ao amin’ireo fampanantenana ireo ka manome fanantenana anao ny amin’ny ho avy?

Ny famakiana ny Salamo 8, 19; 33 dia mety hitaona anao handinika ireo voary kanto maro nataon’ny Tompo. Henoy tsara ny zavatra tsapanao eo am-pamakiana izany. Azonao atao ihany koa ny mihira na misaintsaina ny tonon’ny hira iray mifandray amin’ireto salamo ireto, toy ny“Seigneur, mon Dieu” (Cantiques, 44). “Mitory ny voninahitr’ Andriamanitra” amin’ny fomba ahoana ny voary nataon’ny Tompo? (Salamo 19:1).

Ireto misy fihirana hafa vitsivitsy nakana hevitra avy amin’ny Salamo:

• Salamo 23: “L’Eternel est mon berger” (Cantiques, no. 57)

• Salamo 23:6; 150: “Louange à Dieu” (Cantiques, no. 37)

• Salamo 26:8: “Nous aimons ta maison” (Cantiques, no. 152)

• Salamo 27:1: “Christ est ma lumière” (Cantiques, no. 50)

• Salamo 33:1–6; 95:1–6: “Pour la terre et sa beauté” (Cantiques, no. 43)

• Salamo 37:3–9: “Va ne crains pas” (Cantiques, no. 65)

• Salamo 148: “Vous créations de notre Dieu” (Cantiques, no. 31)

Ao amin’ny Salamo, ny teny toy ny hoe tenivavolombelona, fandidiana, didy, ary fitsarana dia mety ilazana ny tenin’ny Tompo. Tadidio izany rehefa mamaky ny Salamo 19:7–11 ianao. Inona no ambaran’ireo andininy ireo aminao momba ny tenin’ny Tompo? Inona no ampianarin’ny Salamo 29 anao momba ny feony? Raha jerena avy amin’ny zavatra niainanao dia ahoana no ifanandrifian’ny teny na ny feon’ny Tompo amin’ireo famariparitana ireo?

Koa satria naorina teo ambony tendrombohitra ilay tempoly tao Jerosalema, ilay andian-teny hoe “tendrombohitr’i Jehovah” (Salamo 24:3) dia mety ilazana ny tempoly na ny fanatrehan’ Andriamanitra. Inona no fahatakarana fanampiny entin’izany ho anao momba ny Salamo 24? Midika inona aminao izany hoe “madio tanana sy mahitsy fo”? (andininy 4). Rehefa mamaky ny Salamo 26–27 ianao dia inona koa no ianaranao momba ny tranon’ny Tompo?

Indraindray dia mety ho kivy isika rehefa mahare fa mila madio vao afaka miditra eo anatrehan’ Andriamanitra. Isika rehetra rahateo samy sahirana amin’izany daholo, ary tsy misy tanteraka amintsika.

Jereo koa ny Bradley R. Wilcox, “Ny fahamendrehana dia tsy midika hoe tsy fisiana kilema,” Liahona, nôv. 2021, 61–67.

• Hevero ny hanoratra hoe Ny Tompo dia … Asao ny zanakao hitady fomba hamenoana io fehezan-teny io amin’ny alalan’ny fampiasana soratra masina tahaka ireto: Salamo 23:1; 27:1; 28:1; 28:7; 32:7; 46:1. Inona no ampianarin’ireo andinin-tsoratra masina ireo antsika momba ny fomba ahafahan’ny Tompo manampy antsika?

• Azonao atao ny mifanakalo hevitra amin’ny zanakao momba ny zavatra ilain’ny zanak’ondry mba ho voaro sy ho salama. Avy eo, rehefa miara-mamaky ny Salamo 23 ianareo dia ampio ny zanakao hampitaha ny zavatra ataon’ny mpiandry ondry iray amin’ny zavatra ataon’i Jesoa ho antsika. Inona no ilaintsika mba ho voaro sy salama ara-panahy? Miaraha mihira hira iray izay mety hanome hevitra azy ireo, toy ny “Ny fitiavany dia natolony ho ahy” (Bokin-kiran’ny ankizy, 74–75).

• Rehefa miara-mamaky ny Salamo 24:3 ianareo dia afaka mitady teny izay mampahatsiahy azy ireo ny tempoly ireo zanakao. Afaka mijery sarina tempoly iray ihany koa izy ireo. Avy eo dia azonareo atao ny miara-mamaky ny andininy 4 mba hahafantarana hoe iza no afaka miditra ny tempoly. Azonareo atao ny miresaka momba ny fomba mampaloto ny tanantsika sy ny fomba hanadiovantsika izany. Ahoana no mampaloto antsika ara-panahy? Ahoana no hanadiovan’ny Mpamonjy antsika ara-panahy?

• Raha manan-janaka kely ianao dia azonao asaina izy ireo hody hanao hoe mitomany eo am-pamakianao ny Salamo 30:5, “Amin’ny hariva dia misy fitomaniana tonga hivahiny miloaka alina.” Avy eo dia angataho izy ireo haneho fifaliana eo am-pamakianao ny hoe: “Fa nony maraina kosa dia misy fihobiana.” Avererimbereno vetivety io andian-teny io.

• Mampisehoa sarin’ny Mpamonjy iray ary tantarao amin’ny zanakao ireo zavatra nataony ho anao izay mitondra fifaliana ho anao. Azonao asaina koa ny ankizy tsirairay hifandimby hihazona ilay sary sy hizara ny zavatra nataon’i Jesoa izay mitondra fifaliana ho azy ireo.

• Ampio ny zanakao hitadidy ny andalana voalohany amin’ny Salamo 46:10 manao hoe: “Mitsahara, ka aoka ho fantatrareo fa Izaho no Andriamanitra.” Inona no mety ho dikan’ny hoe “mitsahara”? Azonareo atao tsara ny manokana fotoana hanazarana tena hitsahatra. Azonareo atao ihany koa ny mifampizara zavatra niainana rehefa nampatanjaka ny fifandraisanareo tamin’ Andriamanitra ny “fitsaharana”. Ampio ny zanakao hieritreritra ireo fotoana izay ahafahan’izy ireo “mitsahatra” mandritra ny andro mba hahatsapa ho akaiky ny Ray any An-danitra.