Sálmarnir 1–2; 8; 19–33; 40; 46

Þegar þið lesið Sálmana, gætuð þið veitt því athygli hversu oft höfundar þeirra tjá ótta, sorg eða kvíða. Slíkar tilfinningar eru eðlilegar, jafnvel hjá trúuðu fólki. Það sem þó gerir Sálmana andríka er að þeir bjóða fram andríkar lausnir, þar á meðal að treysta Drottni fullkomlega. Þegar þið lesið Sálmana 1; 23; 26–28; 46, skrifið þá:

• Boð um að treysta Drottni.

• Orð sem lýsa honum.

• Orð sem lýsa friði, styrk og öðrum blessunum sem hann veitir.

• Orð sem lýsa fólki sem treystir honum.

Gætið líka að myndmáli og táknum sem Sálmarnir nota til að kenna um frelsarann. Dæmi: Hvað kemur t.d. upp í hugann í Sálmi 23 við lestur orðtaka líkt og: „Á grænum grundum lætur hann mig hvílast“ eða „leiðir mig að vötnum þar sem ég má næðis njóta“ (vers 2)? Hvað gætu huggandi „sproti“ og „stafur“ táknað (vers 4)? Hvað gæti það þýtt að „bikar“ (vers 5) okkar sé barmafullur?

Nokkrir Sálmanna vísa til jarðlífs Jesú Krists. Kristnir menn á tíma Nýja testamentisins sáu líka þessar samsvaranir. Íhugið að lesa eftirfarandi ritningartilvísanir. Gætið að samsvörunum í texta þessara sálma og lífi frelsarans:

• Sálmarnir 2:1–3 og Postulasagan 4:24–28

• Sálmarnir 2:7 og Postulasagan 13:30–33

• Sálmarnir 22:2 og Matteus 27:45–46

• Sálmarnir 22:8–9 og Matteus 27:39–43

• Sálmarnir 22:17 og Lúkas 23:32–33

• Sálmarnir 22:19 og Matteus 27:35

• Sálmarnir 31:7 og Lúkas 23:46

Hvað lærið þið við að rannsaka þessar tengingar? Hvaða spádómar og loforð ritninganna hafa enn ekki uppfyllst? Hvað finnið þið í þessum loforðum sem vekur ykkur von varðandi framtíðina?

Lestur Sálmanna 8; 19; og 33 gæti veitt ykkur innblástur til að hugleiða hin mörgu og dásamlegu sköpunarverk Drottins. Gefið gaum að tilfinningum ykkar þegar þið gerið það. Þið gætuð líka viljað syngja eða ígrunda texta söngs sem tengist þessum sálmum, til að mynda „Þú mikill ert“ (Sálmar, 22). Hvernig „kunngjörir“ sköpun Drottins ykkur „[verk] hans handa“? (Sálmarnir 19:2).

Hér eru nokkrir fleiri sálmar innblásnir af Sálmunum:

• Sálmarnir 23: „Minn hirðir er Drottinn“ (Sálmar, nr. 19)

• Sálmarnir 23:6; 150: „Praise to the Lord, the Almighty“ (Hymns, nr. 72)

• Sálmarnir 26:8: “Þitt hús vér elskum öll“ (Sálmar, nr. 95)

• Sálmarnir 27:1: „The Lord Is My Light“ (Hymns, nr. 89)

• Sálmarnir 33:1–6; 95:1–6: „Fyrir þessa fögru jörð“ (Sálmar, nr. 14)

• Sálmarnir 37:3–9: „Ver hljóð, mín sál“ (Sálmar, nr. 41)

• Sálmarnir 148: „Öll sköpun syngi Drottni dýrð“ (Sálmar, nr. 16)

Í Sálmunum geta orð eins og vitnisburður, fyrirmæli, boðorð og ákvæði átt við um orð Drottins. Hafið þetta hugfast við lestur Sálmanna 19:8–12. Hvað segja þessi vers ykkur um orð Drottins? Hvað kenna Sálmarnir 29 ykkur um rödd hans? Hvernig hefur orð eða rödd Drottins átt við um þessa lýsingu samkvæmt ykkar reynslu?

Þar sem musterið í Jerúsalem var byggt á hæð, gæti orðtakið „fjall Drottins“ (Sálmarnir 24:3) vísað til musterisins eða návistar Guðs. Hvernig eykur þetta skilning ykkar á Sálmunum 24? Hver er merking þess að hafa „flekklausar hendur og hreint hjarta“? (vers 4). Hvað fleira lærið þið um hús Drottins við lestur Sálmanna 26–27?

Stundum gætum við misst móðinn við að heyra að við þurfum að vera hrein til að komast í návist Guðs. Hvað sem öllu líður, þá glímum við öll við eitthvað og ekkert okkar er fullkomið. Hvaða von finnið þið í boðskap öldungs Davids A. Bednar, „Flekklausar hendur og hreint hjarta“? (aðalráðstefna, október 2007). Hvernig getið þið notað boðskap hans til að hjálpa einhverjum sem finnst yfirþyrmandi að hugsa um það að vera fullkominn? Íhugið hvernig þið getið notið hjálpar frelsarans í þeirri viðleitni ykkar að hafa „flekklausar hendur og hreint hjarta“.

Sjá einnig Bradley R. Wilcox, „Verðugleiki er ekki óaðfinnanleiki,“ aðalráðstefna, október 2021.

• Íhugið að rita: Drottinn er …. Bjóðið börnum ykkar að reyna að ljúka þessari setningu með því að nota ritningarvers eins og þessi: Sálmarnir 23:1; 27:1; 28:1; 28:7; 32:7; 46:2. Hvað kenna þessi vers okkur um það hvernig Drottinn getur hjálpað okkur?

• Þið gætuð rætt við börn ykkar um hvað lamb þarf til að vera öruggt og heilbrigt. Þegar þið síðan lesið saman Sálmana 23, hjálpið þá börnum ykkar að bera saman það sem hirðir gerir fyrir lamb og það sem Jesús gerir fyrir okkur. Hvað þurfum við til að vera andlega örugg og heilbrigð? Syngið saman söng sem gæti veitt þeim hugmyndir, t.d. „Í faðmi frelsarans“ (Barnasöngbókin, 42).

• Þegar þið lesið saman Sálmana 24:3 gætu börn ykkar leitað orða sem minna þau á musterið. Þau gætu líka skoðað mynd af musteri. Þið gætuð síðan lesið saman vers 4 til að læra hverjir fá inngöngu í musterið. Þið gætuð rætt hvernig hendur óhreinkast og hvernig við þvoum þær. Hvernig óhreinkumst við andlega? Hvernig hjálpar frelsarinn okkur að hreinsast andlega?

• Ef þið eigið ung börn, gætuð þið boðið þeim að látast gráta meðan þið lesið í Sálmunum 30:6: „Að kveldi gistir oss grátur.“ Biðjið þau síðan að tjá gleði er þið lesið: „En gleðisöngur að morgni.“ Endurtakið þetta orðtak nokkrum sinnum.

• Sýnið mynd af frelsaranum og segið börnum ykkar hvað hann hefur gert fyrir ykkur sem veitir ykkur gleði. Þið gætuð líka gefið hverju barni tækifæri til að halda í myndina og segja frá því sem Jesús hefur gert sem veitir þeim gleði.

• Hjálpið börnum ykkar að læra utanbókar fyrstu línuna í Sálmunum 46:11: „Hættið og játið að ég er Guð.“ Hvað merkir orðtakið „að hætta“? Þið gætuð ef til vill varið tíma í að æfa ykkur að vera kyrr. Þið gætuð líka miðlað hvert öðru upplifunum þar sem það styrkti samband ykkar við Guð að vera kyrr. Hjálpið börnum ykkar að hugsa um stundir dagsins þegar þau geta verið kyrr til að finna nálægð við himneskan föður.