“August 3–9. ‘Mini’ e manang … ngiyal’n’ey nra taw ngay’: Esther” Moey, Ngam Lakeg—Fan ko Tabinaew nge Galasia: Bin Kakrom e M’ag 2026 (2026)

“August 3–9. ‘Mini’ e manang … ngiyal’n’ey nra taw ngay,’” Moey, Ngam Lakeg: Bin Kakrom e M’ag 2026

Esther ni Queen ni Ayuweg pi Gidii’en Jehovah, ke yib rok Sam Lawlor

August 3– 9: “Mini’ e manang … ngiyal’n’ey nra taw ngay”

Esther

Oran i tin ni buch ulan fare babyor ku Esther e wod bogi banaan ni fal’ wathaath. Ya uw rogon ni ngamu weliy mornga’agen bochi tir ni bulyol nireb e Jewish ni dariy e galabthir rok nimang fare queen nu Persia ko ngiyal’ ni kari t’uf ninge pi’ e ayuw ko gidii’ rok’ ni dabin lii’rad? Uw rogon ni ngamu weliy ni fare cousin ku Esther ni kanog i Mordekai ngak e rung’ag mornga’agen ni ngan nlii’ fare pilung? Tiney e bogi banaan ni pos me buch, fa bang ko bogi banaan nikan thogthog? Elder Ronald A. Rasband e yoeg: “Banaan ni go wod e pos be buch, e riyul’, ni Chitamangiy nu Tharmiy e ire ke gagiyegnag. … Somoel a be muruwel ulan e yafos rodad” (“By Divine Design,” Liahona, Nov. 2017, 56). Gathi gubin ngiyal’ ma gadad ma guy rogon nibe muruwel Somoel ulan e yafos rodad ko “pin’ey nib achichig rogon.” Machane kad guyed rogon nike buch rok Esther ni rayog ni nge powi’iydad ko kanawo’ me fal’ag rogdad ko fare “ngiyal’n’ey nra taw ngay” (Esther 4:14) ni ngad uned ngad pi’ed e ayuw ko muruwel Rok.

Mornga’agen e babyor ku Esther ni ga’angin, muguy ko “Esther, fare babyor” ulan fare Bible Dictionary.

Kanawo’en i Fil Mornga’agen ulan e Tabinaew nge lane Galasia

Esther

Somoel e ma pi’eg nga yungi banaan nrayog ningu tawa’ath nag e gidii’ riy.

Ke machib nag President Dieter F. Uchtdorf nra bogdad mab “sak’iy u bayaang nibthil ma bay reb e muruwel nikan pii’ ngak ni nge rrin nikemus ni [gadad] e rayog ni ngad rrin’ed rogon. … Bay fan nike pii’ Somoel boch e muruwel ngom. Bay boch e gidii’ ni karimus nigur e rayog ni ngamu thilyeg gum’ircha’en. Ma bay ndabiyog nge rrin’ be’ ni wod rogon nrayog ni ngamu rrin’” (“Lift Where You Stand,” Liahona, Nov. 2008, 56).

Napon ni baymu be’eg mornga’agen fare yaat ku Esther, mu tafney nag rogon e tin baraay e thin nibsor fan ngak. Muguy rogon nike pi’ Somoel e ayuw ngak Esther ni nge ayuweg fapi Jews (muguy ko, ni wod, Esther 2:21–23; 3:10–14; 4:14–16). Nge mu’ mag tafney nag rogon nike ayuwegnem kam tawa’ath nag boch e gidii’. Mang boch banaan nike ayuwegnem riy fake powi’iyem riy “ko ngiyal’n’ey nra taw ngay”? (Esther 4:14). Faanra bay fare patriarchal blessing rom, mrayog ni ngamu be’eg ngam nang mornga’agen e muruwel nike pii’ Somoel ngom ni ngamu rrin’. Mang e rayog ni ngam rin’ e chiney ni ngam ngongliy e biney e muruwel?

Ngkum guy ko “Mini’ e manang e ngiyal’n’ey nra taw ngay” (video), ChurchofJesusChrist.org.

Bo’or banaan ni gadad mafil rogon ni yibe gay rogon ko bin baraay nikemus ningan motoyil ngay. Elder David A. Bednar e mulwol ngak gidii’en e sensey: “Gathi ngad lemniged ko ‘Mang e ran’en ni ngog ngorad?’ Ya n’en nsusun ningan fith e, ‘Mang e rayog ni nggu piningrad ngar uned ngay? Mang e duwer e rayog ni nggu fith, ni faanra yadbadag ni ngar fulweged taban, ma rayog ninge pining fare Kan ni Thothup ngalan e yafos rorad?” (ulan e Teaching in the Savior’s Way, 25). Faanra gabe machib nag mornga’agen Esther ko tabinaew rom fa reb e klass, ma mang e rayog ni ngam fith ni ngar rrin’ed nrayog ni nge ayuwegrad?

Mordekai nibe yaaliy yaan Haman nibe yun u os u dakean e kanawo’ — “Nap’an ni nang Haman ni der ragbug Mordekai … mri damumuw,” (Ester 3:5).

Esther 3; 5:9–14; 7

Uf nge damomuw e rayog ni nge wawoliy be’ ngemul.

Ulan fare babyor ku Esther, makad filed mornga’agen Esther nge Mordekai nri yow ba yul’yul’, ma kad filed e n’en nibuch ku Haman nibachon e uf nge damomuw rok. Napon nibay mu be’eg Esther 3; 5:9–14, mag tafney nag rogon e thin, ngongol, nge thamtham ku Haman. Mang e be m’ug ko rogon e ngongol rok nge tin nibe lemnag? Mang e buch rok? (muguy ko Esther 7). Sana be’eg mornga’agen Haman e rayog ni nge pi’ e athamgil ngom ngamsap ko pin’en nima gagiyegnag e thamtham rom nga ngongol rom. Kan thogthog nigem ni ngamu thilyeg bang riy? Rayog ni ngamu sap ngak e Chitamangiy nu Tharmiy nge ayuwegnem?

Ngkum guy ko Proverbs 16:32; Alma 5:28.

Esther 3–4; 5:2–3; 8:11–12

Balaynag e abich rom era dag nibe pagaen’um ma gabe taga’ ngak Somoel.

Kam guy fan nike duugliy Esther nge fapi Jews ni ngar balay niged e abich rorard (muguy ko Ester 3:13; 4:1–3, 10–17). Ba uw rogon ni fare balaynag e abich rorad e ke tawa’ath nagrad? (muguy ko Esther 5:2–3; 8:11–12). Mongfan nike fith Somoel ngodad ni nga ud balay niged e abich rodad? (muguy ko fapi Topics nge Duwer, “Fasting and Fast Offerings,” Gospel Library). Mu tafney nag rogon nrayog ni nge par ni fare balaynag e abich e ramang bang ko tawa’ath ulan e yafos rom.

Ngkum guy ko Isaiah 58:6–12; “Fasting: Young Single Adult Ward, Amanda” (video), ChurchofJesusChrist.org.

Esther 3:1–11; 4:10–17; 5:1–4; 9:17–19

Rin’ e tin nib mataw’ banaan i bnt’uf nima un e athamgil ngay.

Napon ni dag Esther nge Mordekai e tin nib michuwun’ row ngay nga gidii’ rorow, ma kar moem nigew nrayog ni ngan lii’ row. Tin ni gadad be mel’eg e bay ni gathi rib gel marrin, machane un ngan rrin’ e tin nib mat’aw e rikab t’uf e athamgil riy. Mang e kam fil ko mornga’agen e Esther 3:1–4; 4:10–17 ko rogon ni ngan athamgil ngan rrin’ e tin nib mat’aw banaan? Kam guy rogon nib thil e n’en ni buch ku Mordekai nge Esther u tomuren nikar athamgil gow (muguy ko Esther 3:5–11; 5:1–4). Mang e ran’en nibt’uf ninge nang Esther nge Mordekai ko mornga’agen Got ni ngayog nra mel’egew e tin nib t’uf ni ngar rin’ew?

Mu tafney nag banaan nike buch rom nike t’uf ni ngamu sak’iy ngalang ngam rrin’ e tin nib mat’aw. Mang e kam fil ko mornga’agen Esther nge Mordekai nra pii’ e ayuw ngom ngam pir’eg e athamgil u dakean Somoel?

Bochan e athamgil ni dag Esther e powi’iy ko fare “rran ni ngu’ur murgad ma yad be felfelan” (muguy ko Esther 9:17–19). Ba uw rogon e athamgil nike pi’ Kristus ngom ko ba “rran ni ngu’ur murgad ma yad be felfelan”?

Ngkum guy ko “Courage,” “Dare to Stand Alone” (videos), Gospel Library; “True to the Faith,” Hymns, no. 254.

Faanra gabadag ni ngamu guy boch mornga’agen, muguy ko fapi magazine ko Liahona nge Fan ko Gelngin e Pi’in ni Fal’yangren ko piney e puul.

Boech e Kanawo’ ko Machib

Esther 2:5–7

Rayog ni nggu pigpig ngak e tabinaew rog.

Rayog ni ngamu be’eg Esther 2:7 mag fil mornga’agen ngak pifakam ko rogon nrayog ni ngar pi’ed e ayuw ngak be’ u tabinaew nike t’uf e ayuw rok, ni wod rogon ni ayuweg Mordekai i Esther. Rayog ni ngamu be’eged fapi guruy u tababang fa mu ngochnag mornga’agen mag weliy ngorad. Nge mu’ mag un ngak e bitir rom ngam tafney niged be’ nrayog ni ngamu pi’ed e ayuw ngak. Fal’eged rogon kanawo’en ni ngamu ayuweged rad.

Esther 3:1–11; 4:10–17

Somoel e rayag ni nge ayuweg neg nggu athamgil.

Rogon kanawo’en nike dag Esther nge Mordekai e rayog ninge ayuweg pifakam ngar filed rogon e chagnag ko ngiyal’ ni yadbe rus. Rayog ni ngamu yoloey e ra bugithin ni baraay ngabut’ Mordekai e bachaeg nag ko napon ni… ma Esther e bachaeg nag ko napon ni … . Napon ni baymu filed mornga’agen fare yaat ku Esther u tabaang, ma rayog ni nge uneg pifakam e thin nga tomuren fagli thin ni baraay ulang. Ma krayog ni ngamu be’eg Esther 3:1–11; 4:10–17 fa “Esther ni Queen” (ulan Fapi Yaat ko Bin Kakrom e M’ag, 166–70) fa mu yaliy yaan e sassing riy ko outline. Nge mu’ mag yoloey ngabut’ Gura chaegnag nggu … , mag pining pifakam ngar yoloeyed boch banaan ni badag e Chitamangiy nu Tharmiy ni ngar athamgil gad ngar chaeggad riy. Reb e tang ko mornga’agen e chaegnag, ni wod fare “Dare to Do Right” (Children’s Songbook, 158), e rayog ni nge pii’ e ayuw ko biney.

2:45
Queen Esther
Ma krayog ni ngamu fil mornga’agen fare ngiyaal ni athamgil nge chaeg Yesus Kristus—ni woed, fare ngiyaal’ ni gafgow ko fapi denen rodad u Gathsemane nge dakean e kuruth (muguy ko Matthew 26:36–39; 27:33–35). Mu fithngak pifakam ko bangyaal nikar gayed rogon e chaegnag, makum weliy banaan nike buch rom nikam gay rogon e chaegnag.

Esther 4:1–3, 10–17

Balaynag e abich era fek fapi tawa’ath rok’ Somoel ngodad.

Be’eg Esther 4:1–3, 10–17 e rayog ni nge ayuwegnem ngam machib nag mornga’agen e balaynag e abich ngak pifakam. Mongfan ni balaynag Esther nga fapi Jews e abich rorada? Moeg ngak pifakam fan ni gama balaynag e abich rom. Ma krayog ni ngamu fith ngorad ko uw rogon ni yaedra weliy mornga’agen e balaynag e abich ngak e fagar rorad ni dowri rrin’ e biney. Uw rogon nrayog ni ngad ayuweged e pi tafagar rodaed ni ngar nangfaned fapi tawa’ath nima yib ko balaynag e abich?
Mpii’ e athamgil ngak pifakam ngar tafney niged banaan nrayog ni ngar fithed e ayuw riy ngak Somoel. Moeg yoeg ngorad ni rayog ni ngar fithed e biney ko bin migid e Madnom ni yira balaynag e abich.

Esther ni Queen nib sak’iy u barba’ fare pilung — Bachan ni athamgil Esther nga chaegnag, aramfan niyag ni ayuweg e pogofan ko fapi gidii’ rok Somoel.

Esther 4:14

Rayog ni nggu pii’ e ayuw ko muruwel rok Got.

Mu ayuweg pifakam ni nge nangfan ni napon nibe rus Ester, me pi’ Mordekai e athamgil ngak meyoeg ngak ni Somoel e ke ayuweg Ester kemang e queen ni ngeyog ni ayuweg e gidii’ rok ko re “ngiyal’n’ey nra taw ngay” (Esther 4:14). Mang e be yipfan Mordekai ko bin e thin? Mu weliyed utabang ko rogon ni pii’ Esther e ayuw ko muruwel rok’ Somoel. Uw rogon nrayog ni ngad uned magdad pii’ e ayuw ko muruwel rok Somoel?
Uw rogon nrayog ni ngamu ayuweg pifakam nge nangfan e biney ni ngan mang ayuw? Sana rayog ni ngamu pining be’ nge chaleg reb e musik ko talne tang fa dag yaan be’ nibe muruwel ko talne muruwel. Ma krayog ni ngamu weliyed mornga’agen rogon nrayog ni ngan un ngan pii’ e ayuw ko muruwel rok’ Got.

Faanra gabadag ni ngamu guy boch mornga’agen, muguy ko fare magazine ko Pi Tafagar ko biney e puul.

Esther ni Queen, nike yib rok Minerva Teichert, © William nge Betty Stokes

Activity page ko Primary: Somoel e rayag ni nge ayuweg neg nggu chaegnag — Esther ni Queen, nike yib rok Minerva Teichert, © William nge Betty Stokes