“Ekiek ach sipwe Onomu non Ekiek: Anneani Kapasen Memmef non ewe Testamen Noom,” Feito, Tapweto Mwiri—Ren Imw me Mwichefen: Testamen Noom 2026 (2026)
“Anneani Kapasen Memmef non ewe Testamen Noom,” Feito, Tapweto Mwiri: Testamen Noom 2026
Kokkot sipwe Onomu non Ekiek
Anneani Kapasen Memmef non ewe Testamen Noom
Non ekkewe puken Testamen Noom ren Genesis ngeni Esther, sia kuna napengeni tutunap—uruo emon a aporousa ekkewe mi awewe uruon mettoch mi fis seni pekin ngun. Noah a fana efoch waim, Hannah a iotek an epwe wor emon noun att, me soposopono. Poputa me ren Job, sia kuna eu sokonon napanapen mak. Non ekkei puk, chon makkei Testamen Noom ra kun ngeni kapasen memmef ar repwe affata anonnonen memmef ika auchean osini non eu napanap sipwe kon chechemeni.
Sia fen kuna ekkoch minen awewe usun kapasen memmef mi toropas paras fetan me non unusen puken uruon ewe Testamen Noom. Seni ewe puken Job feino, sipwe kuna chommong usun. Ekkewe puken Job, Könupin, me Proverbs ir napengeni unuser ir makken kapasen memmef, usun chok pwan kinikinin puken osini usun Isaiah, Jeremiah, me Amos. Pokiten anneani makken memmef mi sokono seni ach anneani eu tutunap, ach sipwe weweiti a namot eu sokkonon napanap. Ikkei ekkoch ekiek mi tongeni anisuk ne kutta watten weweoch non makken memmef non ewe Testamenin Noom.
Sineochu Makken Memmef non Hebrew
Aewin, meni epwe anisuk om kopwe sinei pwe makken memmef non Hebrew non ewe Testamen Noom ese anongonong won an epwe nonno fengen ngingin, usun ekkoch pwan sokkun makken memmef. Me inamo ika nonno fengen ngingin, kapasen urumot, me enniwinin ngingi ir ekkewe wesetan nikinikin pekin makken memmef me nom non Hebrew, ekkei mettoch ra soun mworukono wewer. Inamo, eu nikinik kopwe apareni, ina ewe enniwinin ekiek ika kokkot, fan ekkoch a iteni “nonno pok.” Iei eu mecheresin awewe seni Isaiah:
Pwinitanong om pochokun, O Zion
Pwinitanong ufom mi ningoch, O Jerusalem. (Isaiah 52:1)
Könupin 29 a chommong nain mi nonno pok—ren awewe:
Ewe mongungun ewe Samon mi unusen manaman;
ewe mongungun ewe Samon mi uren ning. (Konupin 29:4)
Me iei eu awewe ikewe ach sinei pwe ewe oruwen nain mi nonno pok ngeni ewe aewin a fori ewe porous epwe mecheres ne weweiti:
Ua pwan ngeni kemi nimochun ngi non unusen teninimwom kewe,
Me mochenin pinewa non unusen neniom kewe. (Amos 4:6)
Non ekkei awewe, ewe chon makkei memmef a enniwni eu ekiek ren ekis chok sokkonon. Ei napanap a tongeni apochokuna ewe enniwinin ekiek me aea ekkewe sokkofesen ne unusen awewei ika anapano.
Non ekkoch fansoun, ekkewe ru nonno pok sentence ra aea nonno fengenin kapas ar repwe atoura sokofesenin ekiek, usun non ei awewe:
Eu ponuwan mi pwetete a okunnano ningeringer:
nge kapas mi ngaw a efisata song. (Proverbs 15:1)
Ei sokkun nonno pok ese chok fis seni seroch. Ekkewe chon mak ra finata ne fori. A anisir ne atoura memmefin ngun ika ennet ren ir me ru manaman me ning. Iwe nupwen ka apareni nonno pok non makken Testament noom, eisinuk pwisin ifa usun a anisuk ne weweiti an ewe chon mak porous. Ren awewe, met ita Isaiah a fen sossot ne apasa ren an awewei “pochokun” ngeni “uf mi ningoch” me “Zion” ngeni “Jerusalem”? (Isaiah 52:1). Met sia tongeni osopwano usun ewe kapas “eu ponuwan mi pwetete” ika kich mi sinei pwe “kapas mi ngaw” ina sosoran? (Proverbs 15:1).
He Restoreth My Soul, seni Walter Rane
Makken Memmef non Hebrew usun emon Minafon Chiechi
Ekkoch aramas ra anonno fengeni anneani makken memmef ngeni ar churi emon minafon aramas. Anneani makken memmef non Testament noom, akkom, menin a usun ach churi emon seni eu neni towaw me orenien ekis ewe a kapas non sokofesenin fosun ekis seni kich—me ewe a nap seni ru ngerou ierin. Ei aramas menin epwe apasa ekkoch mettoch sise weweiti akkom, nge ena esap wewen pwe ese wor rer mettoch mi namot ar repwe apasa. Mi chok namot sipwe awora ach fansoun rer, achocho ne kuna mettoch seni ekiek. Menin sipwe kuna pwe non netipach, kich mi fen wesen weweiti fengeni kich. Me ika sia pwarano tipepos me kirekiroch, ewe minafon aramas kich mi sisinei mi tongeni epwe winiti emon chienach achengicheng.
Iwe nupwen ka anneani eu porous seni Isaiah, ren awewe, ekieki pwe ina om aewin keran sisinei emon minafon aramas. Eisinuk pwisin, “Met unusenapen nikiniki?” Met ewe porous a fori kopwe mefi—ika mwo kose weweiti meinisin kapas? Mwirin anneani sefan, fan chommong ika mi tufich. Ekieki om kopwe neuwomong ne anneani; ekkoch aramas ra kuna pwe anapano weweochun non ena napanap. Esinna tichikin kapas Isaiah a finata, akkaewin foun kapas epwe fori om kopwe anchangei eu fatochun sasing non om ekiek. Ifa usun ekkena sasing ra fori om kopwe mefi? Met ra apasa ngonuk usun an Isaiah memmef? Ren napenon om kaeo ekkewe kapas an ekkei chon mak non Testament noom, a pwan napeno om kuna pwe ra wesen finiochueeta ar kapas me napanapen ar repwe affata anonnonen porousen ngun.
Toropwen memmef ra tongeni repwe chiechiach mi amwarar pokiten ra anisi kich ne weweiti ach memmef me met mi fis ngeni kich. Toropwen memmef non Testament noom ir mi akkaewin auchea pokiten ra anisi kich ne weweiti ach kewe wesen auchean memmef me met mi fish ngeni kich—ekkewe mi ochu nefinach ngeni Kot.
Nupwen ka anneani ekkewe makken memmef non ewe Testament noom, chechemeni pwe kaeon pukefel mi kon auchea nupwen a emweni kich ngeni Jises Kraist. Kutta esisin, sasing non ekiek, me ennet mi awatteta om nuku non I. Ausening ngeni ourour seni ewe Ngun mi Fel nupwen ka kaeo.
Ekkewe makken Mirit
Eu kinikinin makken memmef non Testament Noom ina met sou tipachem ra eita ngeni “ekkewe makken mirit.” Job, Proverbs, me Ecclesiastes ra nom non ei kinikin. Nupwen konupin a kapas usun memmefin mwareiti, netipeta, me fen ngeni, ekkewe makken mirit ra kapas usun auchean ourour ika anonnonen, kapaseisen kaeon nongonong. Ewe puken Job, ren awewe, a anamwa ewe pungochun Kot me ekkewe popun an aramas riaffou. Proverbs a awara ourouren ifa usun sipwe manauoch, mi pachenong kapasen mirit mi ochufengen me keititiw seni akkomwen tappin fansoun. Me Ecclesiastes a efisi emon epwe wor tipemwaramar usun ewe popun manau—nupwen mettoch meinisin usun ra chok mwochomwoch, ian sia kuna ennetin weweoch? Menin ka tongeni ekieki usun ekkewe makken memmef usun ir ekiekochun aporous ren chon ourour ekkewe ra mochen aporousa mettoch usun Kot me we fonufan I a forata—me menin epwe anisuk an epwe napeno om weweiti ekkei mettoch nap seni me akkom.