2 IziKhronike 14–20; 26; 30

Ngesikhathi u-Asa eyinkosi yakwaJuda, wabhekana nezinselele eziningi—njengathi sonke namuhla. Ngesikhathi ufunda ngezivivinyo abhekana nazo, qaphela ukuthi wayelibekaphi ithemba lakhe nokuthi lokho kwashintsha kanjani ngokuhamba kwesikhathi.

Kungani ngezinye izikhathi siyeka ukwethemba iNkosi? Yikuphi okunye okufundayo empilweni ka-Asa?

Bheka futhi iGosa uD. Todd Christofferson, “Our Relationship with God,” iLiyahona, ngoMeyi 2022, 78–80.

Kufanele ukuba umphrofethi uMikhaya wazizwa ecindezeleke kakhulu ukuba abikezele impumelelo yamakhosi uJehoshafati no-Ahabi empini yawo neSiriya. Bheka ubufakazi balokho kucindezela ku 2 IziKhronike 18:1–12. Yibuphi ubufakazi obutholayo besibindi nobuqotho bukaMikhaya emavesini 13–27? (Qaphela ukuthi kwivesi 14, uMikhaya unikeza impendulo ebhuqayo; impendulo yakhe yangempela kwivesi 16.) Agcwaliseka kanjani amazwi kaMikhaya kumavesi 28–34?

Yiziphi ezinye izimo ongabhekana nazo ezingakucindezela njengoMikhaya? Yini ekunika isibindi sokumela iNkosi nezimfundiso Zayo?

Ngesikhathi ufunda 2 IziKhronike 20:1–12, bheka ukuthi iNkosi uJehoshafati yenzani ngesikhathi izizwe eziningi zizohlasela uJuda. Ungazisebenzisa kanjani izenzo zakhe ezimweni eziyinselele obhekene nazo?

Impendulo yeNkosi emkhulekweni kaJehoshafati itholakala kumavesi 14–17. Yimiphi imishwana oyithola lapho engaduduza wena noma othile omaziyo ngezikhathi ezinzima?

Ngosuku olulandelayo, abantu baseJerusalema baphuma bayohlangabeza ibutho eliphikisayo. Ngesikhathi ufunda 2 IziKhronike 20:20, bheka umyalezo uJehoshafati awunikeza abantu baseJerusalema. Agcwaliseka kanjani amazwi akhe? (bheka amavesi 22–23). UNkulunkulu ukubusise kanjani ngokukholelwa Kuye nokulandela abaphrofethi Bakhe?

UMongameli uRussell M. Nelson wathi: “Isipiliyoni sami ukuthi uma usuyekile ukubeka izimpawu zombuzo ngemuva kwezinkulumo zomphrofethi futhi ubeke izibabazo esikhundleni salokho, uvele ukwenze, izibusiso ziyazithelekela nje. Angikaze ngizibuze, ‘Kunini lapho umphrofethi ekhuluma khona njengomphrofethi futhi nalapho engakhulumi njengaye?’ Ukuthatheka kwami bekuwukuthi, ‘Ngingafana kanjani naye?’” (kwinkulumo kaLane Johnson, “Russell M. Nelson: A Study in Obedience,” Ensign, Aug. 1982, 24).

Bheka futhi IMfundiso neziVumelwano 21:4–6; “A Secure Anchor” (ividiyo), Umtapo woLwazi lweVangeli; “Make inspired choices,” For the Strength of Youth (Okwakha Intsha): Umhlahlandlela Wokwenza Izinqumo (2022), 4–5.

3:37

Njengamanye amakhosi amaningi akwaJuda, ukubusa kuka-Uziya kwaqala ngezinto ezinkulu kodwa kwaphetha ngenhlekelele. Bheka le phethini ku 2 IziKhronike 26. Ubungathi kwakuyisiphi isikhathi soshintsho empilweni ka-Uziya?

Ngesikhathi ufunda amavesi 16–23, khumbula ukuthi ngalesi sikhathi, abaphristi kuphela ababevunyelwe ukushisa impepho ethempelini. Ucabanga ukuthi kungani iNkosi u-Uziya ingamlalelanga uNkulunkulu? Ufundani kulokhu okwamehlakalela okubuhlungu?

Bheka futhi “Be Thou Humble,” Amaculo, no. 130.

Ku 2 IziKhronike 30, uHezekiya wayeyinkosi yamaJuda. Wamema uMbuso wakwa-Israyeli oyimbangi ukuba uhlangane eJerusalema ukuzogubha iPhasika—into ama-Israyeli ayengakwazi ukuyenza iminyaka eminingi (bheka amavesi 1–12). Yini ekuhlaba umxhwele ngalesi simemo nendlela esamukelwa ngayo—ngabo bobabiili izivakashi ezingama-Israyeli nabasingathi bakwaJuda?

Ngenxa yokuthi kwase kuyisikhathi eside, ezinye izivakashi zaseJerusalema zazingayazi imininingwane yendlela yokuhlanganyela ePhasikeni. Ngesikhathi ufunda 2 IziKhronike 30:18–27, ufundani empendulweni kaHezekiya kanye nemiphumela yempendulo yakhe?

Bheka futhi uRussell M. Nelson, “Peacemakers Needed,” iLiyahona, ngoMeyi 2023, 98–101.

• Ukwethula isu lokwethemba iNkosi, ungabonisa abantwana bakho into oyethembayo ukuthi izokugcina womile uma lina, njengesambulela noma ibhantshi. Bavumele bakhulume ngokuthi kungani singazethemba lezi zinto. Bese ubasiza baqhathanise lokho nokuthembela kwethu eNkosini. Kungani simethemba ukuthi uzosigcina siphephile ngokomoya?

• Ungasiza abantwana bakho bathole ukuthi iNkosi u-Asa kanye neNkosi uJehoshafati basabela kanjani ezinseleleni ngokuthembela eNkosini (bheka 2 IziKhronike 14:11; 20:3–5, 12). Yabelanani ngezindlela eningabonisa ngazo iNkosi ukuthi niyayethemba.

• Ikhasi lomsebenzi lalelisonto lingasiza abantwana bakho ukuba baqonde indaba yomkhuleko kaJehoshafati kanye nempendulo yeNkosi. Wena kanye nabantwana bakho ningabelana ngezikhathi lapho uNkulunkulu ezwa futhi waphendula imikhuleko yenu. Cabanga ukufaka izikhathi lapho izimpendulo zafika ngezindlela noma ngezikhathi obungazilindele. Iculo ngomkhuleko, elithi “I Pray in Faith” (Amaculo Abantwana, 14), lingase lisize ukwakha ukholo labantwana bakho.

• Ukuze ufunde ngezingozi bokuzazisa, abantwana bakho bangakha umbhoshongo ngamabhulokhi noma izinkomishi ezincane. Ngesikhathi bebeka ibhlokhi ngayinye noma inkomishi embhoshongweni, basize babone enye yezinto zika-Uziya azifezile kusukela ku 2 IziKhronike 26:3–15. Ngemva kokuqeda umbhoshongo, xoxa nabantwana bakho ngokuthi u-Uziya angawugcina kanjani umude futhi uqinile. Yini engawenza uwe? Ungabe usufunda ivesi 16, ukhulume ngokuthi kusho ukuthini ukuba nezinhliziyo zethu “ziphakanyiselwe ekubhujisweni [kwethu].” Yabelana nabantwana bakho ngokwenzeka ku-Uziya kumavesi 16–23. Bayeke bawise umbhoshongo wabo. Khuluma ngalokho esingakwenza ukuze sihlale sithobekile.

• Isithombe esingenhla sibonisa lapho uHezekiya emema omakhelwane bakwaJuda eMbusweni wakwa-Israyeli ukuba bazogubha iPhasika nabo. Ungabuka lesi sithombe nabantwana bakho bese ufunda ku 2 IziKhronike 30:18–19, ezichaza ukuthi ezinye zezimenywa zazingazange zizihlanze ngokomthetho kaMose. Wenzani uHezekiya? Lokhu kwakungenza izimenywa zizizwe kanjani? Siza abantwana bakho bacabange ngendlela abangamlingisa ngayo uHezekiya ngendlela abaphatha ngayo abanye.