2 Króníkà 14–20; 26 30

Nígbàtí Ásà jẹ́ ọba Júdàh, ó kojú ọ̀pọ̀lọpọ̀ àwọn ìpènijà—gẹ́gẹ́bí gbogbo wa ti nṣe ní òní. Bé ẹ ti nkà nípa àwọn àdánwò tí ó kojú, ẹ kíyèsí ibití ó fi ìgbẹ́kẹ̀lé rẹ̀ sí àti bí èyí ṣe yípadà ní ìgbà díẹ̀.

Kínni ìdí tí a máa nfi ìgbàmíràn dáwọ́dúró ní gbígbẹ́kẹ̀lé Olúwa? Kínni ohun míràn tí ẹ kọ́ láti inú ìgbésí ayé Ásà?

Wo D. Todd Christofferson, “Ìbáṣepọ̀ Wa pẹ̀lú Ọlọ́run,” Làìhónà, Oṣù Kárun 2022, 78–80.

Wòlíì Míkáíàh gbọ́dọ̀ ti ní ìmọ̀lára ìtẹ̀mọ́lẹ̀ púpọ̀ láti sọ àsọtẹ́lẹ̀ ìyege fún àwọn ọba Jèhóṣáfátì àti Áhábù nínú ogun wọn ní ìdojúkọ Síríà. Ẹ wá ẹ̀rí ìtẹ̀mọ́lẹ̀ náà nínú 2 Króníkà 18:1–12. Kínni ẹ̀rí tí ẹ rí nípa ìgboyà àti òtítọ́ inú Míkáíàh nínú àwọn ẹsẹ 13–27? (Ṣe àkíyèsí pé nínú ẹsẹ 14, Míkáíàh fúnnni ní èsì ègérì; ìdáhùn rẹ̀ tòótọ́ wà nínú ẹsẹ 16.) Báwo ni àwọn ọ̀rọ̀ Míkáíàh ṣe di mímúṣẹ nínú àwọn ẹsẹ 28–34?

Kínni àwọn ìpò kan nínú èyí tí ẹ ti lè kojú ìtẹ̀mọ́lẹ̀ bí Míkáíàh ṣe kojú? Kínni ó fún yín ní ìgboyà láti dúró fún Olúwa àti àwọn ìkọ́ni Rẹ̀?

Bí ẹ ti nka 2 Króníkà 20:1–12, ẹ wá ohun tí Ọba Jèhóṣáfátì ṣe nígbàtí àwọn orílẹ̀-èdè púpọ̀ wá láti kọlu Júdàh. Báwo ni ẹ ṣe lè lo àwọn ìṣe rẹ̀ ní pípe àwọn ipò tí ẹ nkojú níjà?

Èsì Olúwa sí àdúrà Jèhóṣáfátì ni a rí nínú àwọn ẹsẹ 14–17. Kínni àwọn gbólóhùn ọ̀rọ̀ tí ẹ rí níbẹ̀ tí ó lè tù yín nínú tàbí ẹnìkan tí ẹ mọ̀ ní àwọn àkokò ìṣòrò?

Ní ọjọ́ tó tẹ̀lé, àwọn ènìyàn Jérúsálẹ́mù jáde lọ láti pàdé àwọn ọmọ-ogun alátakò. Bí ẹ ti nka 2 Króníkà 20:20, ẹ wá ọ̀rọ̀ tí Jèhóṣáfátì fi fún àwọn ènìyàn ti Jérúsálẹ́mù. Báwo ni àwọn ọ̀rọ̀ rẹ̀ ṣe di mímúṣẹ? (wo àwọn ẹsẹ 22–23). Báwo ni Ọlọ́run ṣe bùkún yín fún gbígbàgbọ́ nínú Rẹ̀ àti títẹ̀lé àwọn wòlíì Rẹ̀?

Ààrẹ Russell M. Nelson wípé: “Ìrírí mi ni pé nígbàtí ẹ bá dúró ní fífi àmì ìbèèrè sí ẹ̀hìn àwọn ẹ̀là ọ̀rọ̀ ti wòlíì kí ẹ sì fi àwọn àmì igbe dípò bẹ́ẹ̀, àti láti ṣe é, àwọn ìbùkún náà ṣàn lásán. Èmi kò bi ara mi léèrè rí, ‘Nígbà wo ni wòlíì nsọ̀rọ̀ bí wòlíì kan àti nígbà wo ni kìí sọ̀rọ̀?’ Ìdùnmọ́ mi ti jẹ́, ‘Báwo ni mo ṣe lè dàbíi rẹ̀?’” (nínú Lane Johnson, “Russell M. Nelson: Ẹ̀kọ́ kan nínú Ìgbọ́ran,” Ẹ́nsáìnì, Ọsù Kẹjọ. 1982,24).

Bákannáà wo Ẹ̀kọ́ ati awọn Májẹ̀mú 21:4–6; “Ìmúdúró Ìdákòró kan” (fídíò), Ibi-ìkàwé Ìhìnrere; “Ṣe àwọn Àṣàyàn Ìmísí,” Fún Okun àwọn Ọ̀dọ́ (2022), 4–5.

3:37

Bíiti ọ̀pọ̀lọpọ̀ àwọn ọba Júdàh míràn, àkóso Ussíà bẹ̀rẹ̀ pẹ̀lú àwọn àṣeyọrí nlá ṣùgbọ́n ó parí pẹ̀lú àjálù. Ẹ wá àwòṣe yí nínú 2 Króníkà 26. Kínni ẹ yíò sọ pé ó jẹ́ àmì ìyípadà ní ayé Ussíà?

Bí ẹ ti nka àwọn ẹsẹ 16–23, ẹ ṣe ìpamọ́ ní inú yín pé ní àkokò yí, àwọn àlùfáà nìkan ni a fi ààyè gba láti jó tùràrí nínú tẹ́mpìlì. Kínni ìdí tí ẹ fi rò pé Ọba Ussíà ṣe àìgbọ́ran sí Ọlọ́run? Kínni ẹ kọ́ láti inú ìrírí olóró yí?

Báknanáà wo “Ẹ Jẹ́ Onírẹ̀lẹ̀,” Àwọn Orin Ìsìn, nọ́mbà 130.

Nínú 2 Króníkà 30, Hesekíàh jẹ́ ọba Júdàh. Ó pe orogún Ìjọba ti Ísráẹ́lì láti kórajọ ní Jérúsálẹ́mù láti ṣe àṣeyẹ Ìrékọjá—ohun kan tí àwọn ará Ísráẹ́lì kò tíì lè ṣe fún ọ̀pọ̀lọpọ̀ ọdún (wo àwọn ẹsẹ 1–12). Kínni ìwọnilọ́kàn tí ẹ ní nípa ìfipè àti bí ẹ ṣe gbà á—méjèèjì nípa àwọn àlejò ará Ísráẹ́lì àti nípa àwọn olùgbàlejò wọn ní Júdàh?

Nítorí ó ti pẹ́ gan, àwọn àlejò sí Jérúsálẹ́mù ni a kò faramọ́ pẹ̀lú àwọn àlàyé kíníkíní ti bí a ó ṣe kópa nínú Ìrékọjá. Bí ẹ ti nka 2 Króníkà 30:18–27, kínni ẹ kọ́ láti inú èsi Hesekíàh àti àbájáde èsì rẹ̀?

Wo Russell M. Nelson, “A Nílò Àwọn Onílàjà,” Làìhónà, Oṣù Karun 2023, 98–101.

• Láti fi èrò ti gbígbẹ̀kẹ̀lé Olúwa hàn, ẹ lè fi ohun kan tí ẹ gbẹ́kẹ̀lé láti pa yín mọ́ ní gbígbẹ nígbàtí òjò bá rọ̀ han àwọn ọmọ yín, bíi agboòrùn tàbí jákẹ́tì. Ẹ jẹ́ kí wọ́n sọ̀rọ̀ nípa ìdí tí a fi lè gbẹ́kẹ̀lé àwọn ohun wọ̀nyí. Lẹ́hìnnáà ẹ ràn wọ́n lọ́wọ́ láti fi iyẹn wé ìgbẹ́kẹ̀lé wa nínú Olúwa. Kínni ìdí tí a fi ngbẹ́kẹ̀lé E láti pa wá mọ́ làìléwu níti ẹ̀mí?

• Ẹ lè ran àwọn ọmọ yín lọ́wọ́ láti ṣe àwárí bí Ọba Ásà àti Ọba Jèhóṣáfátì ti fèsì sí àwọn ìpènijà nípa níní ìgbẹ́kẹ̀lé nínú Olúwa (wo 2 Króníkà 14:11; 20:3–5, 12). Ẹ pín pẹ̀lú ara yín àwọn ọ̀nà tí ẹ fi lè fihan Olúwa pé ẹ gbẹ́kẹ̀lé E.

• Ojú-ewé iṣẹ́ ṣíṣe ọ̀sẹ̀ yí lè ran àwọn ọmọ yín lọ́wọ́ láti ní òye ìtàn nípa àdúrà Jèhóṣáfátì àti ìdáhùn Olúwa. Ẹ̀yin àti àwọn ọmọ yín lè pín àwọn àkokò nígbàtí Ọlọ́run ti gbọ́ tí ó sì dáhùn áwọn àdúrà yín. Ẹ yẹ àwọn àkokò wò pẹ̀lú ìgbàtí àwọn ìdáhùn ti wá ní àwọn ọ̀nà tàbí àkokò tí ẹ kò rò. Orin kan nípa àdúrà, bí irú “Mo Gbàdúrà nínú Ìgbàgbọ́” (Ìwé-orin àwọn Ọmọdé, 14), lè ṣèrànwọ́ láti gbé ìgbàgbọ́ àwọn ọmọ yín ga.

• Láti kọ́ nípa àwọn ewu ti ìgbéraga, àwọn ọmọ yín lè kọ́ ilé ìṣọ́ pẹ̀lú búlọ́kì tàbí àwọn ago kékéré. Bí wọ́n ṣe ndi búlọ́kì kọ̀ọ̀kan tàbí ago sí orí ilé ìṣọ́ gíga, ẹ ràn wọ́n lọ́wọ́ láti yẹ ọ̀kan lára àwọn àṣeyọrí Ussíà wò láti inú 2 Króníkà 26:3–15. Lẹ́hìn tí wọ́n bá parí ilé ìṣọ́ gíga náà, ẹ sọ̀rọ̀ pẹ̀lú àwọn ọmọ yín bí Ussíà ṣe lè paámọ́ ní gíga àti lílágbára. Kínni ó lè mú un ṣubú? Lẹ́hìnnáà, bí ẹ ti nka ẹsẹ 16, ẹ lè sọ̀rọ̀ nípa ohun tí ó túmọ̀ sí láti ní ọkàn wa ní “gbígbé sókè sí ìparun [wa].” Ẹ pín ohun tí ó ṣẹlẹ̀ sí Ussíà pẹ̀lú àwọn ọmọ yín nínú àwọn ẹsẹ 16–23. Ẹ jẹ́ kí wọ́n wó ilé ìṣọ́ gíga wọn lulẹ̀ Ẹ sọ̀rọ̀ nípa ohun tí a lè ṣe láti dúró ní ìrẹ̀lẹ̀.

• Àwòrán òkè ṣe àfihàn ìgbàtí Hesekíàh pe àwọn aládùúgbò Júdàh láti inú Ìjọba Ísráẹ́lì láti ṣe ayẹyẹ Ìrékọjá pẹ̀lú wọn. Ẹ lè wo àwòrán yí pẹ̀lú àwọn ọmọ yín kí ẹ sì ka 2 Króníkà 30:18–19, èyí tí ó ṣe àlàyé pé àwọn àlèjò kan ti wẹ ara wọn gẹ́gẹ́bí òfin Mósè. Kínni Hesekíàh ṣe? Báwo ni èyí ṣe mú kí àwọn àlejò náà ní ìmọ̀lára? Ẹ ran àwọn ọmọ yín lọ́wọ́ láti ronú nípa bí wọ́n ṣe lè dàbí Hesekíàh ní ọ̀nà tí ó fi tọ́jú àwọn ẹlòmíràn.