2 تواریخ 14–20؛ 26؛ 30

جب آسا یہوداہ کا بادشاہ تھا، تو اُس نے بُہت سے مسائل کا سامنا کِیا—بالکل اُسی طرح جیسے آج ہم سب کرتے ہیں۔ جب آپ اُن آزمایشوں کے متعلق پڑھتے ہیں جن کا اُس نے سامنا کِیا، تو غور کریں کہ اُس نے کس پر بھروسا کِیا اور وقت کے ساتھ ساتھ یہ کیسے تبدیل ہُوا۔

بعض اوقات ہم خُداوند پر بھروسا کرنا کیوں بند کرتے ہیں؟ آپ آسا کی زندگی سے اور کیا سیکھتے ہیں؟

مزید دیکھیں ایلڈر ڈی ٹاڈ کرسٹوفرسن، ”خُدا سے ہمارا رشتہ،“ لیحونا،“ مئی 2022، 78–80۔

مِیکایاہ نبی نے شام کے خلاف جنگ میں بادشاہوں یہُوسفط اور اخی اب کی کامیابی کی پیش گوئی کرنے کے لیے بُہت زیادہ دباؤ محسُوس کیا ہوگا۔ اُس دباو کا ثبوت 2 تواریخ 18:‏1–12 میں تلاش کریں۔ آپ آیات 13–27 میں مِیکایاہ کی ہمت اور سالمیت کے کیا ثبوت پاتے ہیں؟ (غور کریں کہ آیت 14 میں، مِیکایاہ طنزیہ جواب دیتا ہے؛ اُس کا اصل جواب آیت 16 میں ہے۔) آیات 28–34 میں مِیکایاہ کا کلام کیسے پُورا ہوتا ہے؟

کون سی ایسی صورتِ حال ہیں جن میں آپ کو مِیکایاہ جیسے دباؤ کا سامنا کرنا پڑا؟ خُداوند اور اُس کی تعلیمات کے لیے کھڑے ہونے کے لیے آپ کو کیا چیز ہمت بخشتی ہے؟

جب آپ 2 تواریخ 20:‏1–12 پڑھتے ہیں، تو تلاش کریں کہ جب مُتعدد قومیں یہوداہ پر حملہ کرنے کے لیے آئی تھیں تو یہُوسفط بادشاہ نے کیا کِیا۔ آپ اُس کے اعمال کو اُن مشکل حالات میں کیسے لاگو کر سکتے ہیں جن کا آپ سامنا کرتے ہیں؟

یہُوسفط کی دُعا پر خُداوند کا جواب آیات 14–17 میں پایا جاتا ہے۔ آپ کو وہاں ایسے کون سے فقرات ملتے ہیں جو آپ کو یا کسی کو جِسے آپ جانتے ہیں مُشکل اوقات میں تسلی دے سکتے ہیں؟

اگلے روز، یروشلیم کے لوگ مُخالف فوج کا سامنا کرنے کے لیے باہر نکلے۔ جب آپ 2 تواریخ 20:‏20 پڑھتے ہیں، تو پیغام کو دیکھیں جو یہُوسفط نے یروشلیم کے لوگوں کو دیا تھا۔ اُس کا کلام کیسے پُورا ہُوا؟ (دیکھیں آیات 22–23)۔ خُدا نے آپ کو اُس پر ایمان لانے اور اپنے نبیوں کی پیروی کرنے کے لیے کیسے برکت دی ہے؟

صدر رسل ایم نیلسن نے فرمایا: ”میرا تجربہ یہ ہے کہ ایک بار جب آپ نبی کے بیانات کے پیچھے سوالیہ نشان لگانا بند کر دیں، اور اِس کی بجائے نشانِ ندا لگا دیں، اور ایسا کریں، تو برکات نچھاور ہوتی ہیں۔ مَیں خُود سے کبھی نہیں پُوچھتا، ’نبی کب بطور نبی کلام کرتا ہے اور کب نہیں کرتا؟‘ میری دِلچسپی یہ رہی ہے، ’مَیں کیسے مزید اُس کی مانند بن سکتا ہُوں؟‘“ (لین جانسن میں، ”رسل ایم نیلسن: فرمان برداری میں مُطالعہ،“ انزائن، اگست 1982، 24)۔

مزید دیکھیں عقائد اور عہُود 21:‏4–6؛ ”محفُوظ لنگر“ (ویڈیو)، گاسپل لائبریری؛ ”الہامی انتخابات کریں،“ برائے مضبوطی نوجوانان : فیصلہ سازی کے لیے ہدایت نامہ (2022)، 4–5۔

3:37

یہوداہ کے دُوسرے بُہت سے بادشاہوں کی طرح، عُزّیاہ کی حکومت کا آغاز بڑی کامیابیوں سے ہُوا مگر اُس کا اختتام سانحہ سے ہُوا۔ اِس نمونہ کے لیے دیکھیں 2 تواریخ 26۔ آپ کیا کہیں گے کہ عُزّیاہ کی زندگی کا نقطہ تبدیلی کیا تھا؟

جب آپ آیات 16–23 پڑھتے ہیں، تو یہ بات ذہن نشین رکھیں، اُس وقت صرف کاہنوں کو ہَیکَل میں بخور جلانے کی اجازت تھی۔ آپ کے خیال میں عُزّیاہ بادشاہ نے خُدا کی نافرمانی کیوں کی؟ ہم اِس الم ناک تجربہ سے کیا سیکھتے ہیں؟

مزید دیکھیں ”تُو فروتن ہو،“ گیت، نمبر 130۔

2 تواریخ 30 میں، حِزقیاہ یہوداہ کا بادشاہ تھا۔ اُس نے اسرائیل کی حریف سلطنت کو دعوت دی کہ وہ فسح کا جشن منانے کے لیے یروشلیم میں جمع ہو—کُچھ ایسا جو اسرائیلی کئی سالوں سے نہیں کر سکے تھے (دیکھیں آیات 1–12)۔ آپ کو دعوت اور اِسے—دونوں اسرائیلی مہمانوں اور یہوداہ میں اُن کے میزبانوں نے کیسے مُوصول کِیا اِس کے بارے میں آپ کو کیا بات مُتاثر کرتی ہے؟

چوں کہ بُہت طویل عرصہ ہو گیا تھا، یروشلیم میں آنے والے کُچھ زائرین فسح میں شرکت کرنے کی تفصیلات سے نا آشنا تھے۔ جب آپ 2 تواریخ 30:‏18–27 پڑھتے ہیں، تو آپ حِزقیاہ کے ردِعمل اور اُس کے ردِعمل کے نتائج سے کیا سیکھتے ہیں؟

دیکھیں رسل ایم نیلسن، ”صالحین کی ضرورت ہے،“ لیحونا، مئی 2023، 98–101۔

• خُداوند پر بھروسا کرنے کے خیال کو متعارف کرانے کے لیے، آپ اپنے بچّوں کو ایسی چیز دکھا سکتے ہیں جس پر آپ بھروسا کرتے ہیں کہ بارش کے دوران، آپ کو خشک رکھے گی مثلاً چھتری یا جیکٹ۔ اُنھیں اِس بارے میں بات کرنے دیں کہ ہم اِن چیزوں پر کیوں بھروسا کر سکتے ہیں۔ پھر اُنھیں اِس کا موازنہ خُداوند پر ہمارے بھروسا سے کرنے میں مدد کریں۔ ہم رُوحانی طور پر محفُوظ رہنے کے لیے کیوں اُس پر بھروسا کرتے ہیں؟

• آپ اپنے بچّوں کی یہ دریافت کرنے میں مدد کر سکتے ہیں کہ آسا بادشاہ اور یہُوسفط بادشاہ نے خُداوند پر بھروسا کرتے ہُوئے چنوتیوں کا کیسے جواب دیا (دیکھیں 2 تواریخ 14:‏11؛ 20:‏3–5، 12)۔ ایک دُوسرے کو وہ طریقے بتائیں جن سے آپ خُداوند کو ظاہر کر سکتے ہیں کہ آپ اُس پر بھروسا کرتے ہیں۔

• اِس ہفتے کی عملی سرگرمی کا صفحہ آپ کے بچّوں کو یہُوسفط کی دُعا اور خُداوند کے جواب کی کہانی کو سمجھنے میں مدد دے سکتا ہے۔ آپ اور آپ کے بچّے ایسے اوقات کا بتا سکتے ہیں جب خُدا نے آپ کی دُعاؤں کو سُنا اور جواب دیا ہو۔ ایسے اوقات کو شامل کرنے پر غور کریں جب جوابات ایسے اوقات یا انداز میں ملے ہوں جن کی آپ کو توقع نہ تھی۔ دُعا کے بارے میں گیت، مثلاً ”مَیں ایمان کے ساتھ دُعا کرتا ہُوں“ (بچّوں کے گیتوں کی کِتاب، 14)، آپ کے بچّوں کے ایمان کی تعمیر میں مدد کر سکتا ہے۔

• تَکَبُّر کے خطرات کے بارے میں جاننے کے لیے، آپ کے بچّے بلاکس یا چھوٹے کپ کے ساتھ مینار تعمیر کر سکتے ہیں۔ جب وہ ہر بلاک یا پیالہ کو مینار پر رکھتے ہیں، تو اُنھیں 2 تواریخ 26:‏3–15 میں سے عُزّیاہ کی کامیابیوں میں سے ایک کی نشان دہی کرنے میں مدد کریں۔ اُن کے مینار بنانا ختم کرنے کے بعد، اپنے بچّوں سے تبادلہ خیال کریں کہ عُزّیاہ اُسے کیسے اُونچا اور مضبُوط رکھ سکتا تھا۔ اُسے کیا چیز گرا سکتی تھی؟ پھر، جب آپ آیت 16 پڑھتے ہیں، تو آپ اِس بارے میں بات کر سکتے ہیں کہ ہمارے دِلوں کو ”[ہماری] تباہی کے لیے پھُلانے“ سے کیا مُراد ہے۔ آیات 16–23 میں عُزّیاہ کے ساتھ کیا ہُوا اپنے بچّوں کو بتائیں۔ اُنھیں اُن کے مینار گرانے دیں۔ اِس بارے میں بات کریں کہ ہم فروتن رہنے کے لیے کیا کر سکتے ہیں۔

• مذکورہ بالا تصویر ظاہر کرتی ہے جب حِزِقیاہ نے اسرائیل کی سلطنت سے یہوداہ کے پڑوسیوں کو اپنے ساتھ عیدِ فسح منانے کی دعوت دی۔ آپ اِس تصویر کو اپنے بچّوں کے ساتھ دیکھ سکتے ہیں اور 2 تواریخ 30:‏18–19 کو پڑھ سکتے ہیں، جو وضاحت کرتا ہے کہ کُچھ مہمانوں نے موسیٰ کی شریعت کے مطابق خود کو دھویا نہیں تھا۔ حِزقیاہ نے کیا کِیا؟ اِس سے مہمانوں کو کیسا محسُوس ہُوا ہوگا؟ اپنے بچّوں کی یہ سوچنے میں مدد کریں کہ وہ دُوسروں کے ساتھ پیش آنے میں کیسے حِزقیاہ کی مانند بن سکتے ہیں۔