2 Berɛsosɛm 14–20; 26; 30

Berɛ a na Asa yɛ Yuda hene no, ɔhyiaa ɔhaw ahodoɔ bebree—te sɛ deɛ yɛn nyinaa hyia nnɛ yi. Berɛ a wokenkan fa nsɔhwɛ ahodoɔ a ɔhyiaeɛ ho no, hyɛ deɛ a ɔde ne ho too so ne sɛdeɛ ɛsesaeɛ berɛ kɔɔ anim no nso.

Adɛn nti na ɛduru mmerɛ bi a yɛgyae sɛ yɛde yɛn ho to Awurade so? Deɛn foforɔ na wosua firi Asa abrabɔ mu?

San hwɛ Elder D. Todd Christofferson, “Our Relationship with God,” Liahona, Kɔtɔnima 2022, 78–80.

Ɔhyɛ kɛseɛ bɛtumi aba nkɔnhyɛni Mikaia so sɛ ɔhyɛɛ nkonimdie ho nkɔm maa ahemfo Yehosafat ne Ahab wɔ wɔne Syriafoɔ ɔko no mu. Hwehwɛ saa ɔhyɛ no ho adanseɛ wɔ 2 Berɛsosɛm 18:1–12. Adanseɛ bɛn na wohunu fa Mikaia akokoɔduro ne mudie ho wɔ nkyekyɛmu 13–27? (Hyɛ no nso sɛ wɔ nkyekyɛmu 14, no, Mikaia ma fɛwdie mmuaeɛ; ne mmuaeɛ ankasa wɔ nkyekyɛmu 16.) Sɛn na Mikaia nsɛm no ba mu wɔ nkyekyɛmu 28–34?

Tebea ahodoɔ bɛn mu na wobɛtumi ahyia nhyɛsoɔ te sɛ deɛ Mikaia hyiaeɛ no? Deɛn na ɛma wo akokoɔduro de gyina ma Awurade ne Ne nkyerɛkyerɛ?

Berɛ a wokenkan 2 Berɛsosɛm 20:1–12, no, hwehwɛ deɛ Ɔhene Yehosafat yɛeɛ berɛ a aman pii baa sɛ wɔrebɛto ahyɛ Yuda so no. Sɛn na wobɛtumi de ne nneyɛɛ no adi dwuma wɔ tebea dennen ahodoɔ a wohyia no mu?

Mmuaeɛ a Awurade de maa Yehosafat mpaebɔ no wɔ nkyekyɛmu 14–17. Kasasin ahodoɔ bɛn na wohunu wɔ hɔ a ɛbɛtumi akyekye wo anaa obi a wonim no werɛ wɔ mmerɛ a ɛmu yɛ den mu?

Adeɛ kyeeɛ no, Yerusalemfoɔ firii adi kɔhyiaa asraafoɔ a wɔrebɛtia wɔn no. Berɛ a wokenkan 2 Berɛsosɛm 20:20, no, hwehwɛ nkrasɛm a Yehosafat de maa Yerusalemfoɔ no. Sɛn na ne nsɛm no baa mu? (hwɛ nkyekyɛmu 22–23). Sɛn na Onyankopɔn ahyira wo sɛ woagye No adi na woadi Ne nkɔnhyɛfoɔ akyi?

Titenani Russell M. Nelson kaa sɛ: “Me suahunu ne sɛ, sɛ wogyae asɛmmisa agyinahyɛdeɛ a wode to nkɔnhyɛni no nsɛm akyi na wode nteamudeɛ mmom, na woayɛ, a, nhyira no hwie gu kɛkɛ. Memmisa me ho da sɛ, ‘Berɛ bɛn na nkɔnhyɛni no kasa sɛ nkɔhyɛni na berɛ bɛn na ɔnkasa saa?’ Deɛ mehwehwɛ ne sɛ, ‘Mɛyɛ dɛn atumi ayɛ sɛ ɔno kɛse?’” (wɔ Lane Johnson, “Russell M. Nelson: A Study in Obedience,” Ensign, Ɔsanaa 1982, 24).

San hwɛ Nkyerɛkyerɛ ne Apam 21:4–6; “A Secure Anchor” (sini), Asɛmpa Nwoma korabea; “Make inspired choices,” De ma Mmabunu Ahoɔden: Woreyi Ɔpɛ ho Akwankyerɛ (2022), 4–5.

3:37

Sɛdeɛ na ɛteɛ wɔ Yuda ahemfo afoforɔ pii ho no, Usia ahennie no hyɛɛ aseɛ wɔ nneɛma akɛse mu nanso ɛkɔɔ awieeɛ wɔ awerɛhoɔ mu. Hwehwɛ saa nhwɛsoɔ yi wɔ 2 Berɛsosɛm 26. Deɛn na wobɛka sɛ ɛde nsakrae kɛseɛ baa Usia abrabɔ mu?

Berɛ a wokenkan nkyekyɛmu 16–23, no kae sɛ saa berɛ yi, na asɔfoɔ nko ara na wɔma kwan ma wɔhye aduhwam wɔ tɛmpol. Wodwene sɛ deɛn nti na Ɔhene Usia anni Onyankopɔn asɛm so? Deɛn na wosua firi saa awerɛhosɛm yi mu?

San hwɛ “Be Thou Humble,” Nnwom, no. 130.

Wɔ 2 Berɛsosɛm 30, no na Hesekia yɛ Yuda hene. Ɔtoo nsa frɛɛ Israel Ahemman a na ɔne no di ako no sɛ wɔnhyiam wɔ Yerusalem nni Twam afahyɛ —biribi a na Israelfoɔ no ntumi nyɛeɛ mfeɛ pii (hwɛ nkyekyɛmu 1–12). Deɛn na w’ani gye wɔ ɔfrɛ no ne sɛdeɛ wɔgyee no ho—Israelfoɔ ahɔhoɔ no ne wɔn afrɛfoɔ a wɔwɔ Yuda no nyinaa?

Esiane sɛ na akyɛ pii nti, na ahɔhoɔ binom a wɔbaa Yerusalem no nhunu sɛdeɛ wɔde wɔn ho bɛhyɛ Twam Afahyɛ no mu yie. Berɛ a wokenkan 2 Berɛsosɛm 30:18–27, no, deɛn na wosua firi Hesekia mmuaeɛ ne deɛ ɛfirii ne mmuaeɛ no mu baeɛ no mu?

San hwɛ Russell M. Nelson, “Peacemakers Needed,” Liahona, Kɔtɔnima 2023, 98–101.

• Sɛ wobɛkyerɛ sɛdeɛ wode wo ho bɛto Awurade so a, wobɛtumi de biribi a wode wo ho to so sɛ ɛbɛma wo ho awo berɛ a nsuo tɔ, te sɛ kyiniiɛ anaa gyakɛte. Ma wɔnka deɛ enti a yɛbɛtumi de yɛn ho ato saa nneɛma yi so. Afei boa wɔn ma wɔmfa ntoto Awurade mu ahotosoɔ a yɛwɔ ho. Adɛn nti na yɛgye No di sɛ ɔbɛkora yɛn so wɔ honhom mu?

• Wobɛtumi aboa wo nkwadaa ma wɔahunu sɛdeɛ Ɔhene Asa ne Ɔhene Yehosafat de wɔn ho too Awurade so berɛ a wɔhyiaa ɔhaw ahodoɔ (hwɛ 2 Berɛsosɛm 14:11; 20:3–5, 12). Mo ne mo ho mo ho nkyɛ sɛdeɛ mobɛtumi akyerɛ Awurade sɛ mowɔ Ne mu ahotosoɔ.

• Nnawɔtwe yi dwumadie kratafa no bɛtumi aboa wo nkwadaa ma wɔate Yehosafat mpaebɔ ne Awurade mmuaeɛ ho abasɛm no ase. Wo ne wo nkwadaa bɛtumi akyɛ mmerɛ a Onyankopɔn tiee mo mpaebɔ na ɔbuaeɛ. Dwene ho sɛ wode mmerɛ a mmuaeɛ no baeɛ wɔ akwan ahodoɔ so anaa mmerɛ bi a na wonhwɛ kwan so bɛka ho. Mpaebɔ ho dwom, te sɛ “I Pray in Faith” (Nkwadaa Nnwomnwoma, 14), bɛtumi aboa ma wo nkwadaa gyidie anyini.

• Sɛdeɛ wo nkwadaa bɛhunu asiane a ɛwɔ ahantan mu no, wɔbɛtumi de borɔɔgo anaa nkuruwa nketewa asi abantenten. Berɛ a wɔde borɔɔgo anaa kuruwa biara si abantenten no so no, boa wɔn ma wɔnhunu deɛ Usia tumi yɛeɛ no baako mfiri 2 Berɛsosɛm 26:3–15. Sɛ wɔwie abantenten no a, wo ne wo nkwadaa nkasa mfa sɛdeɛ Usia tumi maa ɛyɛɛ tenten na ɛyɛɛ den ho. Deɛn na ɛbɛtumi ama no abu? Afei, berɛ a mokenkan nkyekyɛmu 16, no, mobɛtumi akasa afa deɛ ɛkyerɛ, sɛ yɛyɛ “ahantan kɔ [yɛn] ɔsɛe mu” ho. Ka kyerɛ wo nkwadaa no, deɛ ɛtoo Usia wɔ nkyekyɛmu 16–23. Ma wɔmmubu wɔn abantenten no. Monka mfa deɛ yɛbɛtumi ayɛ de akɔ so abrɛ yɛn ho ase ho.

• Mfonin a ɛwɔ atifi hɔ no kyerɛ berɛ a Hesekia too nsa frɛɛ Yuda afipamfoɔ a wɔfiri Israel Ahemman mu sɛ wɔne wɔn mmɛdi Twam Afahyɛ no. Wo ne wo nkwadaa bɛtumi ahwɛ saa ohoni yi na moakenkan 2 Berɛsosɛm 30:18–19, a ɛkyerɛ mu sɛ na ahɔhoɔ no mu binom nhohoroo wɔn ho sɛdeɛ Mose mmara kyerɛ no. Deɛn na Hesekia yɛeɛ? Atenka bɛn na anka yei bɛtumi ama ahɔho no anya? Boa wo nkwadaa ma wɔnnwene sɛdeɛ wɔbɛtumi ayɛ te sɛ Hesekia wɔ sɛdeɛ wɔne afoforɔ tena ho.