2 Whakapapa 14–20; 26; 30

I te nohonga a Aha hei kīngi o Hura, he nui āna whakapātaritari—pērā i a tātou katoa i ēnei rā. I a koe e pānui ana e pā ana ki ana whakapātaritari, kia aro ki te āhua o tana whakawhirinaki, ā, he aha te rerekē i a ia e pērā ana.

He aha tātou e kore ai e whakawhirinaki ki te Ariki i ētahi wā? He aha atu ngā akoranga māu i te oranga o Aha?

Tirohia anōtia tā D. Todd Christofferson, “Our Relationship with God,” Liahona, Mei 2022, 78–80.

Kāore e kore i pēhia nuitia te poropiti Mikaia kia tuku kōrero matakite wikitōria ki a kīngi Iehōhapata rāua ko kīngi Ahapa i tā rātou pakanga ki a Ahiria. Rapua ngā taunaki mō taua pēhitanga i 2 Whakapapa 18:1–12. He aha ngā taunaki e kite nei koe mō te māia, me te ngākau pono o Mikaia i ngā whiti 13–27? (Kia aro ki whiti 14, ka tuku a Mikaia i tētahi whakautu tawai; kei whiti 16 tana whakautu tūturu.) I pēhea ngā kupu a Mikaia i whakatutukihia ai i ngā whiti 28–34?

He aha ētahi āhuatanga e pā mai ai ngā pēhitanga pērā i te pēhitanga i tau ai ki runga i a Mikaia? He aha ngā mea nā konā māia ai koe kia tū ake mō te Ariki me Ana whakaakoranga?

I a koe e pānui ana i 2 Whakapapa 20:1–12, kimihia ngā mea i mea ai a Kīngi Iehōhapata i te wā i whakaeke mai ngā iwi maha ki a Hura. He aha tāu hei whakahāngai i ana mahi ki ngā whakapātaritari e huapae mai nei ki mua i a koe?

Ka kitea te whakautu ki te inoi a Iehōhapata i ngā whiti 14–17. He aha ngā rerenga e kite nei koe e whakaāio i a koe, i tētahi atu rānei i roto i ngā wā uaua?

Ao ake te rā, ka puta atu te iwi o Hiruhārama ki te tutaki ki te tauā e whakaeke mai ana. I a koe e pānui ana i 2 Whakapapa 20:20, kimihia te karere i tukuna atu ai e Iehōhapata ki te iwi o Hiruhārama. I pēhea ana kupu i whakatutukihia ai i ngā (tirohia whiti 22–23). He aha ngā manaakitanga a te Atua ki a koe nā tō whakapono ki a Ia me tō whai i Ana poropiti?

Nā Tumuaki Russell M. Nelson i kī: “Kei te mōhio au, nā, ina aukati te whakanoho i ngā tohu pātai whai muri iho i ngā kīanga a te poropiti kātahi ka whakanoho i ngā tohu whakakaha kē ki reira, kātahi ka mahia, ka maringi iho ngā manaakitanga. Kua kore au e pātai ki ahau anō, ‘He aha ngā wā e kōrero ai te poropiti hei poropiti, ā, he aha ngā wā kāore ia e kōrero hei poropiti?’ Ko tāku kē, ‘Me pēhea au e rite ake ki a Ia?’” (i Lane Johnson, “Russell M. Nelson: A Study in Obedience,” Ensign, Akuhata 1982, 24).

Tirohia anōtia Whakaakoranga me ngā Kawenata 21:4–6; “A Secure Anchor” (whitiāhua), Wharepukapuka Rongopai; “Make inspired choices,” For the Strength of Youth: A Guide for Making Choices (2022), 4–5.

3:37

Pērā i ērā atu kīngi o Hura tokomaha, i tīmata te kīngitanga o Utia i runga i ngā mahi nui whakamiharo, engari hei tōna mutunga he pōuri rawa. Kimihia tēnei tauira i 2 Whakapapa 26. He aha tāu e kī nei koia te pito whakatahuritanga i te oranga o Utia?

I a koe e pānui ana i ngā whiti 16–23, kia titia ki te hinengaro i taua wā, ko ngā pirihi anake ngā mea i whakaaehia kia tahuna ngā pawapawa i roto i te temepara. He aha te take, ki ō whakaaro, kīhai a Utia i whakarongo ai ki te Atua? He aha ngā mea e ako ai koe i tēnei āhuatanga pōuri?

Tirohia anōtia “Be Thou Humble,” Hymns, no. 130.

I 2 Whakapapa 30, ko Herekia te kīngi o Hura. I tonoa e ia te Kīngitanga o Iharaira kia hui atu ai i Hiruhārama ki te whakanui i te Kapenga—tētahi mea kāore i taea te mahi e ngā Iharaira mō ngā tau maha (tirohia ngā whiti 1–12). He aha ngā mea pai e pā ana ki te tono me te whakawhiwhinga—a ngā manuhiri Iharaira me te iwi manaaki i Hura?

Nā te tino roa, kāore i mōhio ētahi o ngā tauhou ki Hiruhārama me pēhea te whakanui i te Kapenga. I a koe e pānui ana i 2 Whakapapa 30:18–27, he aha tāu e ako ai i tā Herekia whakautu me ngā hua o tana whakautu?

Tirohia anōtia Russell M. Nelson, “Peacemakers Needed,” Liahona, Mei 2023, 98–101.

• Hei huataki i te whakaaro kia whakawhirinaki ki te Ariki, ka whakaatu atu koe ki ō tamariki tētahi mea e whakawhirinaki nei koe hei mea ārai ua, pērā i te hamarara, i te koti ua rānei. Tukua rātou kia kōrero he aha te take e whakawhirinaki nei tātou ki ēnei mea. Kātahi ka whakahāngai tērā ki tā tātou whakawhirinaki ki te Ariki. He aha tātou e whakawhirinaki ai ki a Ia kia tiakina tātou ki te taha wairua?

• Māu ō tamariki e āwhina kia kite rātou i tā Kīngi Aha rāua ko Kīngi Iehōhapata aro ki ngā whakapātaritari nā tō rāua whakawhirinaki ki te Ariki (tirohia 2 Whakapapa 14:11; 20:3–5, 12). Kōrerohia atu tētahi me tētahi mō ētahi atu huarahi e taea te whakaatu ki te Ariki e whakawhirinaki koe ki a Ia.

• Mā te whārangi mahi mō tēnei wiki e āwhina ai i ō tamariki kia mārama ki ngā kōrero mō te inoi a Iehōhapata me te whakautu a te Ariki. Ka kōrero ngātahi koutou ko ō tamariki mō ngā wā i rangona, i whakautua e te Atua ō inoi. Me kōrero hoki mō ngā wā i tau mai ai ngā whakautu i ngā āhuatanga ohorere. Mā tētahi waiata mō te inoi, pēnei i “I Pray in Faith” (Children’s Songbook, 14), e whakakaha i te whakapono o ō tamariki.

• Ka hangaia e ō tamariki tētahi pourewa ki ngā paraka, ki ngā kapu rānei hei whakaako i a rātou e pā ana ki te whakapehapeha. Ia rātou e whakatau i ia paraka, kapu rānei ki runga i te pourewa, āwhinatia rātou kia tohua tētahi o ngā tutukitanga a Utia mai i 2 Whakapapa 26:3–15. Whai muri iho i tā rātou whakaoti i te pourewa, me kōrero ki ō tamariki e pā ana ki tā Utia mahi e teitei tonu ai, e kaha tonu ai te pourewa. Mā te aha e hinga ai? Ka mutu, ia koe e pānui ana i whiti 16, me kōrero koe e pā ana ki te tikanga o te kōrero kia “kake [ō tātou] ngākau ki te whakangaromanga.” Kōrerohia atu ki ō tamariki i ahatia a Utia i ngā whiti 16–23. Tukua rātou kia turakina iho tō rātou pourewa. Me kōrero e pā ana ki tā tātou e noho whakaiti tonu ai.

• E whakaatu mai ana te pikitia o runga ake nei i tā Herekia tono ki ngā kiritata o Hura mai i te Kīngitanga o Iharaira kia whakanui ngātahi i te Kapenga. Ka taea te titiro ki tēnei karere kātahi ka pānui i 2 Whakapapa 30:18–19, e whakamāramahia ana kīhai ētahi o ngā manuhiri i horoi i a rātou anō kia rite ki te ture a Mohi. I aha a Herekia? Me pēhea ngā whakaaro a ngā manuhiri? Āwhinatia ō tamariki kia whakaarohia ake e rātou ētahi mea e rite ai ā rātou mahi ki ngā mahi a Herekia ki ētahi atu.