2 Шастир 14–20; 26; 30

Аса Иудагийн хаан байхдаа өнөөгийн бид бүхэнтэй адил янз бүрийн сорилттой тулгардаг байв. Та нар түүнд тулгарсан сорилт бэрхшээлүүдийн талаар уншихдаа тэр итгэлээ хаана тавьдаг байсныг, энэ нь цаг хугацаа өнгөрөхийн хэрээр хэрхэн өөрчлөгдсөнийг ажигла.

Бид яагаад заримдаа Их Эзэнд итгэхээ больдог вэ? Та Асагийн амьдралаас өөр юуг мэдэж авсан бэ?

Ахлагч Д.Тодд Кристоффэрсоны “Бидний Бурхантай харилцах харилцаа” хэмээх захиасыг 2022 оны 5-р сарын Лиахона сэтгүүлээс үзнэ үү.

Эш үзүүлэгч Микаиа Иехошафат хаан, Ахаб хаан хоёрын Сирийн эсрэг дайны амжилтыг зөгнөхдөө ихээхэн дарамт мэдэрсэн байх. Ийм дарамттай байсан нотолгоог 2 Шастир 18:1–12-оос хайж олно уу. Та 13–27-р шүлгээс Микаиагийн эр зориг, шударга байдлын ямар нотолгоог олж мэдсэн бэ? (14-р шүлэгт Микаиа егөөдсөн хариулт өгсөн бөгөөд түүний жинхэнэ хариулт 16-р шүлэгт байгааг анхаар.) Микаиагийн үгс 28–34-р шүлэгт хэрхэн биелсэн бэ?

Та ямар нөхцөлд Микаиа шиг дарамтад орж болох вэ? Их Эзэний төлөө, мөн Түүний сургаалын төлөө зогсох зоригийг юу танд өгдөг вэ?

Та нар 2 Шастир 20:1–12-ыг уншихдаа Иехошафат хаан олон улс үндэстэн Иуда руу довтлохоор ирэхэд юу хийснийг хайж ол. Та хүнд нөхцөл байдалд хэрхэн түүнтэй адил үйлдэж болох вэ?

Их Эзэн Иехошафатын залбиралд хэрхэн хариулсныг 14–17-р шүлгээс олж болно. Хүнд хэцүү үед таныг эсвэл таны таньдаг хэн нэгнийг тайтгаруулж болох ямар үг хэллэгийг та тэндээс олж мэдсэн бэ?

Маргааш нь Иерусалимын хүмүүс дайсны цэргүүдтэй уулзахаар явав. 2 Шастир 20:20-ийг уншихдаа Иехошафат Иерусалимын хүмүүст юу гэж захисныг хайж ол. Түүний үг хэрхэн биелсэн бэ? (22–23-р шүлгийг үзнэ үү). Түүнд итгэж, Түүний бошиглогчдыг дагасны төлөө Бурхан таныг хэрхэн адисалсан бэ?

Ерөнхийлөгч Рассэлл М.Нэлсон: “Би бошиглогчдын хэлсэн үг сургаал мөн эсэхийг асуухаа больж, тэднийг дагахад л анхаарлаа хандуул гэсэн зарчмыг баримталдаг. Би хэзээ ч ‘Бошиглогч хэзээ бошиглогчийн хувиар эсвэл хувь хүнийхээ хувьд ярьдаг бол?’ гэж өөрөөсөө асууж байгаагүй. ‘Би хэрхэн түүнтэй илүү адил болох вэ?’ гэдэгт л санаа тавьдаг байсан” хэмээн хэлсэн (in Lane Johnson, “Russell M. Nelson: A Study in Obedience,” Ensign, Aug. 1982, 24).

Мөн Сургаал ба Гэрээнүүд 21:4–6; Gospel Library дахь “A Secure Anchor” видеог болон “Сүнслэгээр өдөөгдсөн сонголтуудыг хий” гарчигтай хэсгийг Өсвөр үеийнхний бат бөх байдлын төлөө: Сонголт хийхэд туслах хөтөч (2022)-ийн 4–5-р хуудаснаас үзнэ үү.

3:37

Иудагийн бусад олон хааны адилаар Уззиагийн хаанчлал агуу амжилтаар эхэлсэн ч эмгэнэлт үйл явдлаар төгссөн. Энэ загварыг 2 Шастир 26-аас хайж ол. Уззиагийн амьдралын эргэлтийн цэг юу байсан гэж та хэлэх вэ?

Та 16–23-р шүлгийг уншихдаа энэ үед зөвхөн тахилчдад л ариун сүмд утлага уугиулахыг зөвшөөрдөг байсныг санаарай. Таны бодлоор, Уззиа хаан яагаад Бурханд дуулгаваргүй байсан бэ? Та энэ эмгэнэлт туршлагаас юу сурч мэдсэн бэ?

“Та даруу бай” дууллыг Дуулал номын х. 64-өөс үзнэ үү.

2 Шастир 30-д Хезекиа Иудагийн хаан байв. Тэр израилчуудын тэмдэглээгүй удсан Алгасал баярыг тэмдэглэхээр Израилын өрсөлдөгч хаант улсыг Иерусалимд цугларахад урив (1–12-р шүлгийг үзнэ үү). Тэрхүү урилга, мөн үүнийг Израилын зочид, Иудагийн эзэд хэрхэн хүлээн авч байгаа нь танд ямар сэтгэгдэл төрүүлж байна бэ?

Алгасал баярыг тэмдэглээгүй удсан байсан тул Иерусалимын зарим зочин энэ баярт хэрхэн оролцох тухай нарийн ширийн зүйлийг мэддэггүй байв. Та нар 2 Шастир 30:18–27-г уншихдаа Хезекиагийн хариултаас мөн хариултын үр дүнгээс юу мэдэж авсан бэ?

Рассэлл М.Нэлсоны “Амар тайвныг тогтоогчид хэрэгтэй” хэмээх захиасыг Лиахона сэтгүүлийн 2023 оны 5-р сарын дугаараас үзнэ үү.

• Их Эзэнд итгэх итгэлийг танилцуулахын тулд та шүхэр, хүрэм гэх зэрэг бороо ороход таныг хуурай байлгана гэж итгэдэг ямар нэг зүйлийг хүүхдүүддээ үзүүлж болно. Бид яагаад эдгээр зүйлд итгэж болох талаар тэднээр яриул. Мөн үүнийг Их Эзэнд итгэх итгэлтэйгээ харьцуулахад нь тэдэнд тусал. Бид сүнслэг байдлын хувьд аюулгүй байхын тулд яагаад Түүнд итгэдэг вэ?

• Та Аса хаан, Иехошафат хаан хоёр Их Эзэнд итгэснээр сорилт бэрхшээлд хэрхэн хандсаныг ойлгоход нь хүүхдүүддээ тусалж чадна (2 Шастир 14:11; 20:3–5, 12-ыг үзнэ үү). Их Эзэнд итгэдгээ Түүнд харуулах арга замуудыг бие биетэйгээ хуваалц.

• Энэ долоо хоногийн үйл ажиллагааны хуудас Иехошафатын залбирлын түүх болон Их Эзэний хариултыг ойлгоход нь хүүхдүүдэд тань туслах болно. Та болон танай хүүхдүүд Бурхан залбирлыг тань сонсож, хариулсан үеийг хуваалцаж болно. Хариултууд нь таны бодож байгаагүй цаг хугацаа, арга замаар ирсэн тохиолдлуудыг багтааж болно. “I Pray in Faith” (Children’s Songbook, 14) зэрэг залбирлын тухай дуу хүүхдүүдийн тань итгэлийг хөгжүүлэхэд тусалж чадна.

• Танай хүүхдүүд бардамналын аюулын талаар суралцахын тулд шоонууд эсвэл жижиг аягануудаар цамхаг барьж болно. Тэднийг шоо эсвэл аяга болгоноо цамхаг дээр байрлуулахдаа 2 Шастир 26:3–15-аас Уззиагийн амжилтуудаас нэгийг дурдахад тэдэнд тусал. Тэднийг цамхгаа дуусгахад Уззиа цамхгаа хэрхэн өндөр, бат бөх хэвээр байлгаж болох байсныг хүүхдүүдтэйгээ ярилц. Юу үүнийг нурааж болох байсан бэ? Дараа нь та нар 16-р шүлгийг уншихдаа зүрх сэтгэлээ “ихэд бардам болгох” гэдэг нь юу гэсэн утгатай болохыг ярилцаж болно. 16–23-р шүлэгт Уззиад юу тохиолдсоныг хүүхдүүдтэйгээ хуваалц. Тэднээр цамхгийг нураалга. Даруу байхын тулд бид юу хийж болох тухай ярилц.

• Дээрх зураг дээр Хезекиа Алгасалыг тэмдэглэхээр Израилын хаант улсаас Иудагийн хөршүүдийг урьсныг харуулдаг. Та энэ зургийг хүүхдүүдтэйгээ хамт хараад мөн зарим зочин Мосегийн хуулийн дагуу өөрсдийгөө угаагаагүй байсныг тайлбарласан 2 Шастир 30:18–19-ийг уншиж болно. Хезекиа юу хийсэн бэ? Энэ нь зочдод ямар сэтгэгдэл төрүүлэх байсан бэ? Хезекиагийн адилаар бусадтай хэрхэн харьцаж болох талаар бодож үзэхэд нь хүүхдүүддээ тусал.