“ວັນທີ 20–26 ເດືອນກໍລະກົດ. ‘ໄດ້ແຕ່ຂໍເພິ່ງພຣະອົງໃຫ້ຊ່ວຍເຫລືອເທົ່ານັ້ນ’: 2 ຂ່າວຄາວ 14–20; 26; 30,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ວັນທີ 20–26 ເດືອນກໍລະກົດ. ‘ໄດ້ແຕ່ຂໍເພິ່ງພຣະອົງໃຫ້ຊ່ວຍເຫລືອເທົ່ານັ້ນ,’” ຈົ່ງຕາມເຮົາມາ: 2026
King Jehoshaphat’s Prayer [ຄຳອະທິຖານຂອງກະສັດເຢໂຮຊາຟັດ], ໂດຍ ຄີລີ ແຣ
ວັນທີ 20–26 ເດືອນກໍລະກົດ: “ໄດ້ແຕ່ຂໍເພິ່ງພຣະອົງໃຫ້ຊ່ວຍເຫລືອເທົ່ານັ້ນ”
2 ຂ່າວຄາວ 14–20; 26; 30
ອານາຈັກຢູດາຍໄດ້ຖືກລ້ອມ. ກອງທັບທັງໝົດຈາກສາມຊົນຊາດຂອງສັດຕູທີ່ຊົງພະລັງກຳລັງອອກເດີນທັບພ້ອມກັນ, ໂດຍກຽມພ້ອມສຳລັບການສູ້ຮົບ. ໃນຊ່ວງເວລາອັນສິ້ນຫວັງແຫ່ງຄວາມຂັດສົນ, ເຢໂຮຊາຟັດ, ກະສັດແຫ່ງຢູດາຍ, ໄດ້ຫັນໄປຫາກະສັດແຫ່ງສະຫວັນ ແລະ ແຜ່ນດິນໂລກ. ເຢໂຮຊາຟັດໄດ້ເຕົ້າໂຮມຜູ້ຄົນຂອງເພິ່ນຢູ່ທີ່ພຣະວິຫານ ແລະ ໄດ້ອະທິຖານ. ເພິ່ນໄດ້ຮັບຮູ້ເຖິງຄວາມອ່ອນແອຂອງມະນຸດຂອງພວກເຂົາ ແລະ ໄດ້ອ້ອນວອນຂໍການປົດປ່ອຍ. ເພື່ອເປັນການຕອບ, ພຣະຜູ້ເປັນເຈົ້າໄດ້ສັນຍາເຖິງການປົກປ້ອງຂອງພຣະອົງ: “ຢ່າສົງໄສ ຫລື ຢ້ານກົວເລີຍ” (2 ຂ່າວຄາວ 20:17).
ເຮົາອາດບໍ່ມີກອງທັບກຳລັງຮຸກຮານຢູ່ໜ້າປະຕູໂດຍຂູ່ວ່າຈະທຳລາຍເຮົາ, ແຕ່ບາງເທື່ອ ເຮົາກໍຮູ້ສຶກຖືກລ້ອມໂດຍຜູ້ປໍລະປັກ ແລະ ຄວາມຊົ່ວຮ້າຍ. ເສັ້ນທາງຂອງເຮົາສູ່ການປົດປ່ອຍແມ່ນເສັ້ນທາງດຽວກັນທີ່ເຢໂຮຊາຟັດໄດ້ສະແຫວງຫາ, ແລະ ຄຳອະທິຖານຂອງເຮົາສາມາດເປັນຄືກັນກັບຂອງເພິ່ນເຊັ່ນກັນ: “ພຣະອົງເປັນພຣະເຈົ້າຂອງພວກຂ້ານ້ອຍ, … ສຳລັບພວກຂ້ານ້ອຍນັ້ນເຮັດຫຍັງບໍ່ໄດ້ແລ້ວກັບກອງທັບອັນໃຫຍ່ໂຕ ຊຶ່ງກຳລັງມາໂຈມຕີພວກຂ້ານ້ອຍ. ພວກຂ້ານ້ອຍບໍ່ຮູ້ຈັກຈະເຮັດຢ່າງໃດ ໄດ້ແຕ່ຂໍເພິ່ງພຣະອົງໃຫ້ຊ່ວຍເຫລືອເທົ່ານັ້ນ” (2 ຂ່າວຄາວ 20:12).
ໃນ 2 ຂ່າວຄາວ 14–30, ທ່ານຈະອ່ານກ່ຽວກັບເຢໂຮຊາຟັດ ແລະ ກະສັດຄົນອື່ນໆໃນຢູດາຍ. ໃຫ້ພິຈາລະນາວ່າ ການປະຕິຮູບທີ່ຂັບເຄື່ອນດ້ວຍສັດທາ, ໄຊຊະນະ, ແລະ ຄວາມທ້າທາຍຂອງພວກເຂົານັ້ນ ສາມາດນຳໃຊ້ກັບຊີວິດຂອງທ່ານເອງແນວໃດ.
ສຳລັບພາບລວມຂອງພຣະທຳ 2 ຂ່າວຄາວ, ໃຫ້ເບິ່ງ “ຂ່າວຄາວ” ໃນ ຄູ່ມືພຣະຄຳພີ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
2 ຂ່າວຄາວ 14–16
ການໄວ້ວາງໃຈໃນພຣະເຈົ້າຈະນຳສັນຕິສຸກມາສູ່ເຮົາ.
ຕອນທີ່ອາຊາເປັນກະສັດຂອງຢູດາຍ, ເພິ່ນໄດ້ປະເຊີນກັບຄວາມທ້າທາຍຫລາຍຢ່າງ—ດັ່ງທີ່ເຮົາທຸກຄົນປະເຊີນຢູ່ທຸກມື້ນີ້. ຂະນະທີ່ທ່ານອ່ານກ່ຽວກັບການທົດລອງທີ່ເພິ່ນໄດ້ປະເຊີນ, ໃຫ້ສັງເກດວ່າ ເພິ່ນໄດ້ວາງຄວາມໄວ້ວາງໃຈຂອງເພິ່ນໄວ້ຢູ່ໃສ ແລະ ມັນໄດ້ປ່ຽນແປງໄປຕາມການເວລາແນວໃດ.
|
ຂໍ້ອ້າງອີງ |
ຄວາມທ້າທາຍທີ່ອາຊາໄດ້ປະເຊີນ |
ບ່ອນທີ່ອາຊາວາງຄວາມໄວ້ວາງໃຈຂອງເພິ່ນ |
|---|---|---|
ຂໍ້ອ້າງອີງ 2 ຂ່າວຄາວ 14:9–12 | ||
ຂໍ້ອ້າງອີງ 2 ຂ່າວຄາວ 15:1–8 | ||
ຂໍ້ອ້າງອີງ 2 ຂ່າວຄາວ 16:1–10 |
ເປັນຫຍັງບາງເທື່ອເຮົາຈຶ່ງເຊົາໄວ້ວາງໃຈພຣະຜູ້ເປັນເຈົ້າ? ທ່ານຮຽນຮູ້ຫຍັງອີກແດ່ຈາກຊີວິດຂອງອາຊາ?
ເບິ່ງ Elder D. Todd Christofferson, “Our Relationship with God,” Liahona, May 2022, 78–80 ນຳອີກ.
2 ຂ່າວຄາວ 18
ເຮົາສາມາດປົກປ້ອງຄວາມຈິງໄດ້, ເຖິງແມ່ນວ່າມັນຈະບໍ່ເປັນທີ່ນິຍົມກໍຕາມ.
ສາດສະດາ ມີກາອີຢາ ຄົງຈະຮູ້ສຶກກົດດັນຫລາຍທີ່ຈະຄາດເດົາຄວາມສຳເລັດໃຫ້ກະສັດເຢໂຮຊາຟັດ ແລະ ກະສັດອາຮາບໃນສົງຄາມຂອງພວກເພິ່ນກັັບຊີເຣຍ. ໃຫ້ຊອກຫາຫລັກຖານຂອງຄວາມກົດດັນນັ້ນໃນ 2 ຂ່າວຄາວ 18:1–12. ທ່ານພົບຫລັກຖານໃດແດ່ກ່ຽວກັບຄວາມກ້າຫານ ແລະ ຄວາມຊື່ສັດສຸດຈະລິດຂອງມີກາອີຢາໃນ ຂໍ້ທີ 13–27? (ໃຫ້ສັງເກດວ່າ ໃນ ຂໍ້ທີ 14, ມີກາອີຢາໃຫ້ຄຳຕອບແບບປະຊົດປະຊັນ; ຄຳຕອບທີ່ແທ້ຈິງຂອງເພິ່ນແມ່ນຢູ່ໃນ ຂໍ້ທີ 16.) ຖ້ອຍຄຳຂອງມີກາອີຢາໄດ້ສຳເລັດຄົບຖ້ວນແນວໃດໃນ ຂໍ້ທີ 28–34?
ມີສະຖານະການໃດແດ່ທີ່ທ່ານອາດປະເຊີນກັບຄວາມກົດດັນດັ່ງທີ່ມີກາອີຢາໄດ້ປະເຊີນ? ແມ່ນຫຍັງທີ່ເຮັດໃຫ້ທ່ານມີຄວາມກ້າຫານທີ່ຈະຢືນຢັດເພື່ອພຣະຜູ້ເປັນເຈົ້າ ແລະ ຄຳສອນຂອງພຣະອົງ?
ໃນສະໄໝຂອງກະສັດເຢໂຮຊາຟັດ, ສາມຊົນຊາດໄດ້ໂຈມຕີເຢຣູຊາເລັມ.
2 ຂ່າວຄາວ 20:1–25
ໃນຊ່ວງເວລາທີ່ຍາກລຳບາກ, ເຮົາສາມາດຫັນໄປຫາພຣະຜູ້ເປັນເຈົ້າ ແລະ ສາດສະດາຂອງພຣະອົງ.
ຂະນະທີ່ທ່ານອ່ານ 2 ຂ່າວຄາວ 20:1–12, ໃຫ້ຊອກຫາສິ່ງທີ່ກະສັດເຢໂຮຊາຟັດໄດ້ເຮັດ ເມື່ອຫລາຍປະຊາຊາດເຂົ້າມາໂຈມຕີຢູດາຍ. ທ່ານຈະສາມາດນຳໃຊ້ການກະທຳຂອງເພິ່ນໃນສະພາບການອັນທ້າທາຍທີ່ທ່ານປະເຊີນໄດ້ແນວໃດ?
ຄຳຕອບຂອງພຣະຜູ້ເປັນເຈົ້າຕໍ່ຄຳອະທິຖານຂອງເຢໂຮຊາຟັດແມ່ນພົບໃນ ຂໍ້ທີ 14–17. ວະລີໃດທີ່ທ່ານພົບໃນນັ້ນທີ່ສາມາດປອບໂຍນທ່ານ ຫລື ຄົນທີ່ທ່ານຮູ້ຈັກໃນຊ່ວງເວລາທີ່ຍາກລຳບາກ?
ມື້ຕໍ່ມາ, ຜູ້ຄົນແຫ່ງເຢຣູຊາເລັມໄດ້ອອກໄປພົບກັບກອງທັບຝ່າຍກົງກັນຂ້າມ. ຂະນະທີ່ທ່ານອ່ານ 2 ຂ່າວຄາວ 20:20, ໃຫ້ຊອກຫາຂ່າວສານທີ່ເຢໂຮຊາຟັດໄດ້ມອບໃຫ້ຜູ້ຄົນແຫ່ງເຢຣູຊາເລັມ. ຖ້ອຍຄຳຂອງເພິ່ນໄດ້ສຳເລັດຄົບຖ້ວນແນວໃດ? (ເບິ່ງ ຂໍ້ທີ 22–23). ພຣະເຈົ້າໄດ້ອວຍພອນທ່ານສຳລັບການເຊື່ອໃນພຣະອົງ ແລະ ຕິດຕາມສາດສະດາຂອງພຣະອົງແນວໃດ?
ປະທານຣະໂຊ ເອັມ ແນວສັນ ໄດ້ກ່າວວ່າ: “ປະສົບການຂອງຂ້າພະເຈົ້າກໍຄື ທັນທີທີ່ທ່ານຢຸດເອົາເຄື່ອງໝາຍຖາມໃສ່ທາງຫລັງຄຳກ່າວຂອງສາດສະດາ ແລະ ໃສ່ເຄື່ອງໝາຍທ້ວງແທນ, ແລະ ເຮັດຕາມ, ພອນກໍຈະໄຫລມາເທມາ. ຂ້າພະເຈົ້າບໍ່ເຄີຍຖາມຕົວເອງເລີຍວ່າ, ‘ເມື່ອໃດທີ່ສາດສະດາໄດ້ກ່າວໃນຖານະສາດສະດາ ແລະ ເມື່ອໃດທີ່ເພິ່ນບໍ່ໄດ້ເປັນ?’ ຄວາມສົນໃຈຂອງຂ້າພະເຈົ້າກໍຄື, ‘ຂ້ອຍຈະເປັນເໝືອນດັ່ງເພິ່ນໃຫ້ຫລາຍຂຶ້ນໄດ້ແນວໃດ?’” (ໃນ Lane Johnson, “Russell M. Nelson: A Study in Obedience,” Ensign, Aug. 1982, 24).
ເບິ່ງ ຄຳສອນ ແລະ ພັນທະສັນຍາ 21:4–6; “A Secure Anchor” (ວິດີໂອ), ຫ້ອງສະໝຸດພຣະກິດຕິຄຸນ; “ເຮັດການເລືອກດ້ວຍການດົນໃຈ,” ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ (2022), 4–5.
A Secure Anchor
ລະບຸຄຳກ່າວແຫ່ງຄວາມຈິງທີ່ລຽບງ່າຍ. ແອວເດີ ນຽວ ເອ ແມ໊ກສະແວວ ໄດ້ສິດສອນວ່າ: “ພຣະຄຳພີມອບເພັດແຫ່ງຄຳສອນຢ່າງຫລວງຫລາຍໃຫ້ແກ່ເຮົາ. ແລະ ເມື່ອແສງສະຫວ່າງຂອງພຣະວິນຍານສ່ອງມາຍັງດ້ານຕ່າງໆຂອງພວກເຂົາ, ພວກເຂົາກໍຈະເປັ່ງປະກາຍດ້ວຍສຳຜັດແຫ່ງສະຫວັນຊັ້ນສູງ ແລະ ສ່ອງສະຫວ່າງໃສ່ເສັ້ນທາງທີ່ເຮົາຕ້ອງເດີນຕາມ” (“According to the Desire of [Our] Hearts,” Ensign, Nov. 1996, 21). ຂະນະທີ່ທ່ານສຶກສາພຣະຄຳພີ, ໃຫ້ຄິດທີ່ຈະໃຊ້ເວລາໃນການລະບຸ, ໝາຍ, ແລະ ໄຕ່ຕອງຂ່າວສານທີ່ສັ້ນ ແຕ່ມີພະລັງ. ບາງຕົວຢ່າງສາມາດພົບໄດ້ໃນ 2 ຂ່າວຄາວ 14:11; 15:7; 18:13; 20:15; 26:5. ມີ “ເພັດແຫ່ງຄຳສອນ” ໃດແດ່ທີ່ທ່ານພົບ?
2 ຂ່າວຄາວ 26:3–21
ຄວາມອວດຕົວນຳໄປສູ່ການທຳລາຍ.
ເຊັ່ນດຽວກັບກະສັດຄົນອື່ນໆແຫ່ງຢູດາຍ, ການປົກຄອງຂອງອຸດຊີຢາໄດ້ເລີ່ມຕົ້ນດ້ວຍຄວາມສຳເລັດທີ່ຍິ່ງໃຫຍ່ ແຕ່ຈົບລົງດ້ວຍຄວາມເສົ້າສະຫລົດໃຈ. ຊອກຫາແບບແຜນນີ້ໃນ 2 ຂ່າວຄາວ 26. ທ່ານວ່າຈຸດຫັນປ່ຽນໃນຊີວິດຂອງອຸດຊີຢາແມ່ນຫຍັງ?
ຂະນະທີ່ທ່ານອ່ານ ຂໍ້ທີ 16–23, ໃຫ້ເກັບໃສ່ໃຈວ່າ ໃນຕອນນີ້, ມີແຕ່ປະໂລຫິດເທົ່ານັ້ນທີ່ໄດ້ຮັບອະນຸຍາດໃຫ້ເຜົາເຄື່ອງຫອມໃນພຣະວິຫານ. ເປັນຫຍັງທ່ານຈຶ່ງຄິດວ່າ ກະສັດອຸດຊີຢາຈຶ່ງບໍ່ເຊື່ອຟັງພຣະເຈົ້າ? ທ່ານຮຽນຮູ້ຫຍັງແດ່ຈາກປະສົບການອັນເສົ້າສະຫລົດໃຈນີ້?
ເບິ່ງ “Be Thou Humble,” Hymns, no. 130 ນຳອີກ.
2 ຂ່າວຄາວ 30
ເຮົາສາມາດເປັນຜູ້ສ້າງຄວາມສະຫງົບສຸກ.
ໃນ 2 ຂ່່າວຄາວ 30, ເຮເຊກີຢາເປັນກະສັດແຫ່ງຢູດາຍ. ເພິ່ນໄດ້ເຊື້ອເຊີນອານາຈັກຄູ່ແຂ່ງແຫ່ງອິດສະຣາເອນໃຫ້ມາເຕົ້າໂຮມກັນເພື່ອສະຫລອງງານປັດສະຄາ—ສິ່ງທີ່ຊາວອິດສະຣາເອນບໍ່ສາມາດເຮັດໄດ້ມາເປັນເວລາຫລາຍປີ (ເບິ່ງ ຂໍ້ທີ 1–12). ແມ່ນຫຍັງທີ່ປະທັບໃຈທ່ານກ່ຽວກັບການເຊື້ອເຊີນນີ້ ແລະ ກະແສຕອບຮັບຂອງມັນ—ທັງໂດຍແຂກຊາວອິດສະຣາເອນ ແລະ ໂດຍຜູ້ຈັດຂອງພວກເຂົາໃນຢູດາຍ?
ເນື່ອງຈາກວ່າມັນຜ່ານມາດົນນານມາແລ້ວ, ຜູ້ຢ້ຽມຢາມນະຄອນເຢຣູຊາເລັມບາງຄົນບໍ່ຄຸ້ນເຄີຍກັບລາຍລະອຽດໃນການເຂົ້າຮ່ວມງານປັດສະຄາ. ຂະນະທີ່ທ່ານອ່ານ 2 ຂ່າວຄາວ 30:18–27, ທ່ານຮຽນຮູ້ຫຍັງແດ່ຈາກການຕອບສະໜອງຂອງເຮເຊກີຢາ ແລະ ຜົນໄດ້ຮັບຂອງການຕອບສະໜອງຂອງເພິ່ນ?
ເບິ່ງ Russell M. Nelson, “Peacemakers Needed,” Liahona, May 2023, 98–101 ນຳອີກ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
2 ຂ່າວຄາວ 14–16; 20
ຂ້ອຍສາມາດໄວ້ວາງໃຈພຣະເຈົ້າ.
-
ເພື່ອແນະນຳແນວຄິດຂອງການໄວ້ວາງໃຈພຣະຜູ້ເປັນເຈົ້າ, ທ່ານອາດເອົາສິ່ງໃດສິ່ງໜຶ່ງໃຫ້ລູກໆຂອງທ່ານເບິ່ງ ທີ່ທ່ານໄວ້ວາງໃຈວ່າ ຈະຊ່ວຍໃຫ້ຕົວທ່ານແຫ້ງເມື່ອຝົນຕົກ, ເຊັ່ນ ຄັນຮົ່ມ ຫລື ເສື້ອກັນໜາວ. ໃຫ້ພວກເຂົາເວົ້າກ່ຽວກັບວ່າ ເປັນຫຍັງເຮົາຈຶ່ງໄວ້ວາງໃຈສິ່ງເຫລົ່ານີ້. ແລ້ວຊ່ວຍພວກເຂົາປຽບທຽບສິ່ງນັ້ນກັບຄວາມໄວ້ວາງໃຈຂອງເຮົາໃນພຣະຜູ້ເປັນເຈົ້າ. ເປັນຫຍັງເຮົາຈຶ່ງໄວ້ວາງໃຈພຣະອົງໃຫ້ຮັກສາເຮົາໃຫ້ປອດໄພທາງວິນຍານ?
-
ທ່ານສາມາດຊ່ວຍລູກໆຂອງທ່ານຄົ້ນພົບວິທີທີ່ກະສັດອາຊາ ແລະ ກະສັດເຢໂຮຊາຟັດຕອບຮັບກັບຄວາມທ້າທາຍ ໂດຍການໄວ້ວາງໃຈໃນພຣະຜູ້ເປັນເຈົ້າ (ເບິ່ງ 2 ຂ່າວຄາວ 14:11; 20:3–5, 12). ແບ່ງປັນນຳກັນວິທີທີ່ທ່ານສາມາດສະແດງໃຫ້ພຣະຜູ້ເປັນເຈົ້າເຫັນວ່າ ທ່ານໄວ້ວາງໃຈພຣະອົງ.
2 ຂ່າວຄາວ 20:1–29
ພຣະເຈົ້າຈະໄດ້ຍິນ ແລະ ຕອບຄຳອະທິຖານຂອງເຮົາ.
-
ໜ້າກິດຈະກຳຂອງອາທິດນີ້ ສາມາດຊ່ວຍໃຫ້ລູກໆຂອງທ່ານເຂົ້າໃຈເລື່ອງລາວຂອງຄຳອະທິຖານຂອງເຢໂຮຊາຟັດ ແລະ ຄຳຕອບຂອງພຣະຜູ້ເປັນເຈົ້າ. ທ່ານ ແລະ ລູກໆຂອງທ່ານສາມາດແບ່ງປັນກ່ຽວກັບຊ່ວງເວລາທີ່ພຣະເຈົ້າໄດ້ຍິນ ແລະ ໄດ້ຕອບຄຳອະທິຖານຂອງທ່ານ. ໃຫ້ຄິດທີ່ຈະລວມຊ່ວງເວລາທີ່ຄຳຕອບໄດ້ມາໃນວິທີ ຫລື ໃນເວລາທີ່ທ່ານບໍ່ຄາດຄິດ. ເພງກ່ຽວກັບການອະທິຖານ, ເຊັ່ນ “I Pray in Faith” (Children’s Songbook, 14), ສາມາດຊ່ວຍສ້າງສັດທາໃຫ້ລູກໆຂອງທ່ານໄດ້.
2 ຂ່າວຄາວ 26:3–23
ເຮົາສາມາດເປັນຄົນຖ່ອມຕົວ.
-
ເພື່ອຮຽນຮູ້ກ່ຽວກັບອັນຕະລາຍຂອງຄວາມທະນົງຕົວ, ລູກໆຂອງທ່ານສາມາດສ້າງຫໍຄອຍດ້ວຍທ່ອນໄມ້ ຫລື ຈອກນ້ອຍໆ. ຂະນະທີ່ພວກເຂົາວາງທ່ອນໄມ້ ຫລື ຈອກແຕ່ລະອັນໃສ່ເທິງຫໍຄອຍ, ຊ່ວຍພວກເຂົາລະບຸໜຶ່ງໃນຄວາມສຳເລັດຂອງອຸດຊີຢາຈາກ 2 ຂ່າວຄາວ 26:3–15. ຫລັງຈາກທີ່ສ້າງຫໍຄອຍສຳເລັດແລ້ວ, ໃຫ້ສົນທະນາກັບລູກໆຂອງທ່ານເຖິງວິທີທີ່ອຸດຊີຢາສາມາດຮັກສາໃຫ້ມັນສູງ ແລະ ຄົງຄວາມແຂງແກ່ນໄດ້. ແມ່ນຫຍັງທີ່ສາມາດເຮັດໃຫ້ມັນລົ້ມໄດ້? ຫລັງຈາກນັ້ນ, ຂະນະທີ່ທ່ານອ່ານ ຂໍ້ທີ 16, ທ່ານສາມາດເວົ້າກ່ຽວກັບວ່າ ການເຮັດໃຫ້ໃຈຂອງເຮົາ “ຈອງຫອງຂຶ້ນອັນເປັນເຫດໃຫ້ [ເຮົາ] ຫລົ້ມຈົມ” ນັ້ນ ໝາຍຄວາມວ່າແນວໃດ. ແບ່ງປັນກັບລູກໆຂອງທ່ານກ່ຽວກັບສິ່ງທີ່ເກີດຂຶ້ນກັບອຸດຊີຢາໃນ ຂໍ້ທີ 16–23. ໃຫ້ພວກເຂົາທຸບຫໍຄອຍຂອງພວກເຂົາລົງ. ເວົ້າກ່ຽວກັບສິ່ງທີ່ເຮົາສາມາດເຮັດໄດ້ເພື່ອຄົງຄວາມຖ່ອມຕົວ.
King Hezekiah and the People Thank God [ກະສັດເຮເຊກີຢາ ແລະ ຜູ້ຄົນຂອງເພິ່ນຂອບຄຸນພຣະເຈົ້າ], © Lifeway Collection/ໄດ້ຮັບອະນຸຍາດຈາກ goodsalt.com
2 ຂ່າວຄາວ 30
ເຮົາສາມາດເປັນຜູ້ສ້າງຄວາມສະຫງົບສຸກ.
-
ຮູບທີ່ຢູ່ດ້ານເທິງສະແດງເຖິງຕອນທີ່ເຮເຊກີຢາໄດ້ເຊື້ອເຊີນເພື່ອນບ້ານຂອງຢູດາຍຈາກອານາຈັກອິດສະຣາເອນມາເພື່ອສະຫລອງງານປັດສະຄາກັບພວກເຂົາ. ທ່ານສາມາດເບິ່ງຮູບພາບນີ້ກັບລູກໆຂອງທ່ານ ແລະ ອ່ານ 2 ຂ່າວຄາວ 30:18–19, ຊຶ່ງອະທິບາຍວ່າ ແຂກບາງຄົນບໍ່ໄດ້ລ້າງຕົນເອງຕາມກົດຂອງໂມເຊ. ເຮເຊກີຢາໄດ້ເຮັດຫຍັງ? ສິ່ງນີ້ໄດ້ເຮັດໃຫ້ແຂກທັງຫລາຍຮູ້ສຶກແນວໃດ? ຊ່ວຍໃຫ້ລູກໆຂອງທ່ານຄິດວິທີທີ່ພວກເຂົາສາມາດເປັນຄືກັນກັບເຮເຊກີຢາໃນວິທີທີ່ພວກເຂົາປະຕິບັດຕໍ່ຄົນອື່ນ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.