“ວັນທີ 6–12 ເດືອນກໍລະກົດ. ‘ຢູ່ໃນອິດສະຣາເອນມີສາດສະດາຄົນໜຶ່ງ’: 2 ກະສັດ 2–7,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 6–12 ເດືອນກໍລະກົດ. ‘ຢູ່ໃນອິດສະຣາເອນມີສາດສະດາຄົນໜຶ່ງ,’” ຈົ່ງຕາມເຮົາມາ: ພຣະຄຳພີເດີມ 2026

At River’s Edge [ຢູ່ແຄມແມ່ນ້ຳ], ໂດຍ ແອນນີ ເຮັນຣີ ເນເດີ

ວັນທີ 6–12 ເດືອນກໍລະກົດ: “ຢູ່ໃນອິດສະຣາເອນມີສາດສະດາຄົນໜຶ່ງ”

2 ກະສັດ 2–7

ພາລະກິດຕົ້ນຕໍຂອງສາດສະດາແມ່ນທີ່ຈະສິດສອນ ແລະ ເປັນພະຍານເຖິງພຣະຜູ້ຊ່ວຍໃຫ້ລອດ ພຣະເຢຊູຄຣິດ. ເຖິງຢ່າງໃດກໍຕາມ, ບັນທຶກຂອງເຮົາເຖິງສາດສະດາເອລີຊາ, ບໍ່ໄດ້ມີຫຍັງຫລາຍກ່ຽວກັບການສິດສອນ ຫລື ການເປັນພະຍານຂອງເພິ່ນ. ສິ່ງທີ່ມີຢູ່ໃນບັນທຶກແມ່ນການອັດສະຈັນທີ່ເອລີຊາໄດ້ກະທຳ, ລວມທັງການນຳເດັກນ້ອຍທີ່ຕາຍແລ້ວໃຫ້ຄືນມີຊີວິດອີກ (ເບິ່ງ 2 ກະສັດ 4:18–37), ການລ້ຽງເຂົ້າຝູງຊົນດ້ວຍອາຫານເລັກນ້ອຍ (ເບິ່ງ 2 ກະສັດ 4:42–44), ແລະ ການປິ່ນປົວຄົນຂີ້ທູດ (ເບິ່ງ 2 ກະສັດ 5:1–14). ສະນັ້ນເຖິງແມ່ນວ່າເຮົາບໍ່ມີຖ້ອຍຄຳຂອງເອລີຊາກ່ຽວກັບພຣະຄຣິດ, ແຕ່ເຮົາມີການປະຕິບັດສາດສະໜາກິດ ແລະ ການມະຫັດສະຈັນຂອງເອລີຊາ, ຊຶ່ງເປັນພະຍານເຖິງພຣະຄຣິດ. ມັນເປັນການສະແດງໃຫ້ປະຈັກທີ່ມີພະລັງເຖິງອຳນາດທີ່ໃຫ້ຊີວິດ, ການບຳລຸງລ້ຽງ, ແລະ ການປິ່ນປົວຂອງພຣະຜູ້ເປັນເຈົ້າ. ການມະຫັດສະຈັນເກີດຂຶ້ນເລື້ອຍໆໃນຊີວິດຂອງເຮົາຫລາຍກວ່າທີ່ເຮົາຮູ້ຈັກ. ເພື່ອຈະເຫັນສິ່ງເຫລົ່ານີ້, ເຮົາຕ້ອງສະແຫວງຫາສັດທາທີ່ເອລີຊາມີ ເມື່ອເພິ່ນອະທິຖານເພື່ອຄົນຮັບໃຊ້ໜຸ່ມຂອງເພິ່ນທີ່ວ່າ: “ຂ້າແດ່ພຣະຜູ້ເປັນເຈົ້າ, ຂໍພຣະອົງເປີດຕາຄົນຮັບໃຊ້ຂອງຂ້ານ້ອຍຄົນນີ້ໃຫ້ເຫັນ” (2 ກະສັດ 6:17).

ສຳລັບລາຍລະອຽດເພີ່ມເຕີມກ່ຽວກັບ 2 ກະສັດ, ໃຫ້ເບິ່ງ “Kings, books of” ໃນ Bible Dictionary.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

2 ກະສັດ 2–6

ພຣະເຈົ້າສາມາດທຳການອັດສະຈັນໃນຊີວິດຂອງເຮົາ.

ການອັດສະຈັນສະແດງໃຫ້ເຮົາເຫັນອຳນາດຂອງພຣະເຈົ້າ. ມັນສາມາດຊ່ວຍໃຫ້ເຮົາເອົາຊະນະຄວາມຫຍຸ້ງຍາກຢູ່ໃນຊ່ວງມະຕະ—ເຊັ່ນແຜ່ນດິນທີ່ແຫ້ງແລ້ງ ຊຶ່ງຕ້ອງການນ້ຳບໍລິສຸດ (ເບິ່ງ 2 ກະສັດ 2:19–22) ຫລື ຂວານທີ່ຫາຍໄປ ຊຶ່ງຕ້ອງກູ້ກັບຄືນມາ (ເບິ່ງ 2 ກະສັດ 6:4–7). ແຕ່ສິ່ງສຳຄັນທີ່ສຸດ, ການອັດສະຈັນສາມາດຫັນເຮົາໄປຫາພຣະຜູ້ເປັນເຈົ້າໄດ້. ຂະນະທີ່ທ່ານອ່ານ 2 ກະສັດ 2–6, ໃຫ້ພິຈາລະນາທີ່ຈະຂຽນການອັດສະຈັນທີ່ທ່ານພົບເຫັນລົງໄວ້, ແລະ ໄຕ່ຕອງບົດຮຽນທາງວິນຍານທີ່ທ່ານໄດ້ຮຽນຮູ້ຈາກແຕ່ລະຢ່າງ.

ທ່ານກໍອາດຈະປຽບທຽບການອັດສະຈັນທີ່ເອລີຊາໄດ້ເຮັດກັບການອັດສະຈັນທີ່ພຣະເຢຊູຄຣິດໄດ້ເຮັດ (ເບິ່ງ 2 ກະສັດ 4:8–37 ແລະ ລູກາ 7:11–16; 2 ກະສັດ 4:42–44 ແລະ ໂຢຮັນ 6:1–13; 2 ກະສັດ 5:1–15 ແລະ ລູກາ 17:11–19). ການອັດສະຈັນເຫລົ່ານີ້ສິດສອນທ່ານຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ ແລະ ສາດສະດາຂອງພຣະອົງ?

ເບິ່ງ 2 ນີໄຟ 26:12–13; 27:23; ໂມໂຣໄນ 7:35–37; ພາກສ່ວນ “Seek and expect miracles” ໃນ Russell M. Nelson, “The Power of Spiritual Momentum,” Liahona, May 2022, 99–100 ນຳອີກ.

ເອລີຊາກຳລັງນຳເດັກຄືນມາຈາກຕາຍ — Elisha Raising the Son of the Shunamite [ເອລີຊາກຳລັງນຳລູກຊາຍຂອງຊາວຊູເນມຄືນມາຈາກຕາຍ], ໂດຍ ເຟຣເດຣິກ ເລຕັນ

2 ກະສັດ 4:8–17; 7:1–16

ພຣະຜູ້ເປັນເຈົ້າຈະສຳເລັດພຣະຄຳຂອງພຣະອົງ ທີ່ໄດ້ປະທານໃຫ້ຜ່ານທາງສາດສະດາຂອງພຣະອົງ.

ພຣະຜູ້ເປັນເຈົ້າໄດ້ດົນໃຈເອລີຊາເພື່ອທຳນາຍສິ່ງທີ່ຈະມາເຖິງ—ຕາມປົກກະຕິແລ້ວ, ສິ່ງທີ່ເບິ່ງຄືວ່າຈະບໍ່ເກີດຂຶ້ນ. ຂະນະທີ່ທ່ານອ່ານ 2 ກະສັດ 4:8–17; 7:1–16, ໃຫ້ຄິດກ່ຽວກັບວ່າທ່ານຈະຕອບສະໜອງພຣະຄຳຂອງພຣະຜູ້ເປັນເຈົ້າ ຜ່ານທາງສາດສະດາຂອງພຣະອົງໃນມື້ນີ້ແນວໃດ. ຄຳສອນ, ການທຳນາຍ, ຫລື ຄຳສັນຍາໃດແດ່ທີ່ທ່ານໄດ້ຍິນຈາກສາດສະດາທີ່ມີຊີວິດຢູ່? ທ່ານກຳລັງເຮັດຫຍັງແດ່ເພື່ອກະທຳຕາມຖ້ອຍຄຳຂອງພວກເພິ່ນດ້ວຍສັດທາ?

ເບິ່ງ 3 ນີໄຟ 29:6; ຄຳສອນ ແລະ ພັນທະສັນຍາ 1:37–38; “Teachings of Presidents” collection, ຫ້ອງສະໝຸດພຣະກິດຕິຄຸນ ນຳອີກ.

2 ກະສັດ 5

ເມື່ອເຮົາຖ່ອມຕົວ ແລະ ເຊື່ອຟັງ, ພຣະເຢຊູຄຣິດສາມາດປິ່ນປົວເຮົາ.

ຂະນະທີ່ທ່ານອ່ານ 2 ກະສັດ 5, ໃຫ້ພິຈາລະນາທີ່ຈະປຽບທຽບການເປັນຂີ້ທູດຂອງນາອາມານກັບຄວາມທ້າທາຍທາງວິນຍານທີ່ທ່ານກຳລັງປະເຊີນ.

ມີບາງຄົນທີ່ເປັນແບບ “ຄົນຮັບໃຊ້” ຜູ້ນີ້ໃນຊີວິດຂອງທ່ານບໍ, ທີ່ຊຸກຍູ້ທ່ານໃຫ້ສະແຫວງຫາການຊີ້ນຳກ່ຽວກັບຄວາມທ້າທາຍຂອງທ່ານ ຈາກສາດສະດາຂອງພຣະຜູ້ເປັນເຈົ້າ? (ເບິ່ງ ຂໍ້ທີ 2–3, 13).

ພຣະຜູ້ເປັນເຈົ້າກຳລັງເຊື້ອເຊີນໃຫ້ທ່ານເຮັດຫຍັງ ທີ່ອາດເບິ່ງວ່າງ່າຍເກີນໄປ—ເຊັ່ນ “ອາບນ້ຳ, ຊຳລະຕົວ”? (ຂໍ້ທີ 13). ແມ່ນຫຍັງທີ່ຈະຂັດຂວາງທ່ານຈາກການຮັບເອົາຄຳເຊື້ອເຊີນທີ່ລຽບງ່າຍຂອງພຣະອົງ?

ທ່ານຈະສາມາດສະແດງຄວາມຖ່ອມຕົນຄືກັນກັບນາອາມານໄດ້ແນວໃດ?

ໃຫ້ສັງເກດເບິ່ງປະສົບການຂອງນາອາມານ ວ່າມີຜົນກະທົບແນວໃດຕໍ່ສັດທາຂອງລາວ ໃນພຣະເຈົ້າແຫ່ງອິດສະຣາເອນ (ເບິ່ງ ຂໍ້ທີ 15). ທ່ານຮຽນຮູ້ຫຍັງແດ່ຈາກເລື່ອງນີ້?

ເບິ່ງ ລູກາ 4:27; 1 ເປໂຕ 5:5–7; ແອວມາ 37:3–7; ອີເທີ 12:27; L. Whitney Clayton, “Whatsoever He Saith unto You, Do It,” Liahona, May 2017, 97–99; “Naaman and Elisha” (ວິດີໂອ), ຫ້ອງສະໝຸດພຣະກິດຕິຄຸນ.

ປຽບທຽບພຣະຄຳພີກັບຊີວິດຂອງທ່ານ. ບາງເທື່ອມັນງ່າຍກວ່າທີ່ຈະພົບເຫັນຄວາມໝາຍສ່ວນຕົວຢູ່ໃນພຣະຄຳພີ ເມື່ອທ່ານປຽບທຽບສິ່ງທີ່ເປັນທາງໂລກຢູ່ໃນເລື່ອງລາວ ໃສ່ກັບສິ່ງທີ່ເປັນທາງວິນຍານໃນຊີວິດຂອງທ່ານ. ຍົກຕົວຢ່າງ, ຂະນະທີ່ທ່ານສຶກສາ 2 ກະສັດ 2–7, ທ່ານສາມາດປຽບທຽບສະຖານະການໃນຊີວິດຂອງທ່ານກັບສິ່ງຕ່າງໆເຊັ່ນຂີ້ທູດ, ຂວານທີ່ຢືມ, ນ້ຳຈໍແດນ, ຫລື ກອງທັບໃຫຍ່ທີ່ຮຸກຮານ. ບົດຮຽນໃດແດ່ທີ່ພຣະຜູ້ເປັນເຈົ້າມີສຳລັບທ່ານຢູ່ໃນເລື່ອງລາວເຫລົ່ານີ້?

2 ກະສັດ 6:8–23

“ຝ່າຍຂອງພວກເຮົາມີຫລາຍກວ່າຝ່າຍຂອງພວກເຂົາ.”

ຂະນະທີ່ທ່ານພະຍາຍາມຕິດຕາມພຣະຄຣິດ, ທ່ານເຄີຍຮູ້ສຶກຄືກັນກັບຄົນຮັບໃຊ້ໜຸ່ມຂອງເອລີຊາບໍ—ມີຈຳນວນໜ້ອຍກວ່າ ແລະ ຢ້ານກົວ? ລອງນຶກພາບວ່າທ່ານຢູ່ໃນສະພາບການດຽວກັນກັບເພິ່ນ ຂະນະທີ່ທ່ານອ່ານ 2 ກະສັດ 6:8–23. ເລື່ອງນີ້ປ່ຽນວິທີທີ່ທ່ານຄິດ ແລະ ຮູ້ສຶກກ່ຽວກັບການທົດລອງຂອງທ່ານ, ໜ້າທີ່ຮັບຜິດຊອບຂອງທ່ານ, ແລະ ຄວາມພະຍາຍາມຂອງທ່ານທີ່ຈະດຳລົງຊີວິດຕາມພຣະກິດຕິຄຸນແນວໃດ?

ຂະນະທີ່ທ່ານໄຕ່ຕອງ, ໃຫ້ພິຈາລະນາຖ້ອຍຄຳຂອງປະທານເຮັນຣີ ບີ ໄອຣິງ ທີ່ວ່າ: “ເຊັ່ນດຽວກັນກັບຄົນຮັບໃຊ້ຄົນນັ້ນຂອງເອລີຊາ, ມີຄົນຢ່າງຫລວງຫລາຍຢູ່ກັບທ່ານ ຫລາຍກວ່າຜູ້ທີ່ທ່ານເຫັນວ່າຕໍ່ຕ້ານທ່ານ. ບາງຄົນທີ່ຢູ່ກັບທ່ານຈະເບິ່ງບໍ່ເຫັນດ້ວຍຕາມະນຸດຂອງທ່ານ. ພຣະຜູ້ເປັນເຈົ້າຈະໃຫ້ກຳລັງໃຈທ່ານ ແລະ ບາງເທື່ອຈະເອີ້ນບາງຄົນໃຫ້ຢືນຢູ່ກັບທ່ານ” (“O Ye That Embark,” Liahona, Nov. 2008, 58).

ໃຫ້ພິຈາລະນາເຮັດລາຍການກ່ຽວກັບ “ຝ່າຍຂອງ [ທ່ານ]” (ຂໍ້ທີ 16)—ຜູ້ຄົນທີ່ພຣະເຈົ້າໄດ້ວາງໄວ້ໃນຊີວິດຂອງທ່ານ ເພື່ອສະໜັບສະໜູນທ່ານ. ທ່ານອາດຂໍໃຫ້ພຣະອົງຊ່ວຍເຫລືອທ່ານລະບຸພວກເຂົາ ໂດຍການເປີດຕາທາງວິນຍານຂອງທ່ານ. ພຣະອົງອາດໄດ້ວາງທ່ານໄວ້ໃນຊີວິດຂອງຄົນອື່ນ ເພື່ອຊ່ວຍເຫລືອພວກເຂົາເຊັ່ນກັນ. ທ່ານຈະສາມາດດຶງເອົາຄວາມເຂັ້ມແຂງ ແລະ ການສະໜັບສະໜູນຈາກກັນແລະກັນໄດ້ແນວໃດ?

ທ່ານເຄີຍຮູ້ສຶກໄດ້ຮັບການສະໜັບສະໜູນທີ່ພຣະຜູ້ເປັນເຈົ້າບັນຍາຍໃນ ຄຳສອນ ແລະ ພັນທະສັນຍາ 84:88 ເມື່ອໃດ?

ທ່ານອາດສຶກສາຂ່າວສານຂອງຊິດສະເຕີ ມິແຊວ ດີ ເຄຣກ “Eyes to See” (Liahona, Nov. 2020, 15–17) ນຳອີກ. ໃຫ້ຖາມຕົວທ່ານເອງວ່າ, “ພຣະເຈົ້າຢາກໃຫ້ເຮົາເຫັນຫຍັງແດ່?”

ເມື່ອອ້າງເຖິງເລື່ອງລາວໃນ 2 ກະສັດ 6:8–23, ແອວເດີ ຣອນໂນ ເອ ແຣັສ໌ແບນ ໄດ້ກ່າວວ່າ: “ເຮົາອາດມີ ຫລື ບໍ່ມີລົດຮົບທີ່ເປັນໄຟຖືກສົ່ງມາກຳຈັດຄວາມຢ້ານກົວຂອງເຮົາ ແລະ ເອົາຊະນະມານຂອງເຮົາ, ແຕ່ບົດຮຽນກໍແຈ່ມແຈ້ງດີ. ພຣະຜູ້ເປັນເຈົ້າຢູ່ນຳເຮົາ, ເປັນຫ່ວງເຮົາ, ແລະ ໃຫ້ພອນເຮົາໃນວິທີທາງທີ່ພຽງແຕ່ພຣະອົງເທົ່ານັ້ນທີ່ສາມາດເຮັດໄດ້. ຄຳອະທິຖານສາມາດເອີ້ນໃຫ້ພະລັງ ແລະ ການເປີດເຜີຍທີ່ເຮົາຕ້ອງການລົງມາ ເພື່ອໃຫ້ຄວາມນຶກຄິດຂອງເຮົາເຈາະຈົງຢູ່ທີ່ພຣະເຢຊູຄຣິດ ແລະ ການເສຍສະລະຊົດໃຊ້ຂອງພຣະອົງ. ພຣະຜູ້ເປັນເຈົ້າໄດ້ຮູ້ແລ້ວວ່າ ບາງເທື່ອເຮົາຈະຮູ້ສຶກເຖິງຄວາມຢ້ານກົວ. ຂ້າພະເຈົ້າເຄີຍຢູ່ໃນສະພາບນັ້ນ ແລະ ທ່ານດ້ວຍ. … ໃນສາດສະໜາຈັກ ເຖິງແມ່ນວ່າເຮົາຈະມີຈຳນວນໜ້ອຍຕາມທີ່ໂລກຄຳນວນອິດທິພົນ, ແຕ່ເມື່ອເຮົາເປີດຕາທາງວິນຍານຂອງເຮົາ, ‘ຝ່າຍຂອງພວກເຮົາມີຫລາຍກວ່າຝ່າຍຂອງພວກເຂົາ’ [2 ກະສັດ 6:16]” (“Be Not Troubled,” Liahona, Nov. 2018, 18, 19). ທ່ານຈະໃຊ້ຄຳເຫລົ່ານີ້ເພື່ອຊ່ວຍເຫລືອຄົນທີ່ຮູ້ສຶກກັງວົນ ຫລື ຢ້ານກົວແນວໃດ?

ເບິ່ງ “Dearest Children, God Is Near You,” Hymns, no. 96 ນຳອີກ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

2 ກະສັດ 4

ພຣະເຈົ້າສາມາດທຳການອັດສະຈັນໃນຊີວິດຂອງເຮົາ.

ຫລັງຈາກທີ່ຊ່ວຍໃຫ້ລູກໆຂອງທ່ານເຂົ້າໃຈວ່າການອັດສະຈັນແມ່ນຫຍັງ, ໃຫ້ເຊື້ອເຊີນພວກເຂົາໃຫ້ຂຽນລາຍການຕົວຢ່າງຂອງການອັດສະຈັນຫລາຍຢ່າງເທົ່າທີ່ພວກເຂົາສາມາດເຮັດໄດ້. ຮູບພາບໃນ ປຶ້ມຮູບພຣະກິດຕິຄຸນ ຫລື ຈົ່ງຕາມເຮົາມາ ສາມາດຊ່ວຍໄດ້. ແລ້ວພວກເຂົາສາມາດຊອກຫາການອັດສະຈັນໃນ 2 ກະສັດ 4:1–7, 14–17, 32–35, 38–44. ການອັດສະຈັນເຫລົ່ານີ້ສິດສອນຫຍັງແດ່ກ່ຽວກັບພຣະບິດາເທິງສະຫວັນ?
ທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບວ່າພຣະເຈົ້າໄດ້ສະແດງຄວາມຮັກຂອງພຣະອົງຜ່ານທາງການອັດສະຈັນແນວໃດ. ພວກທ່ານກໍສາມາດຮ້ອງເພງນຳກັນເຊັ່ນ “God’s Gracious Love” (ຫ້ອງສະໝຸດພຣະກິດຕິຄຸນ).

ສາວໃຊ້ຊາວອິດສະຣາເອນເປັນພະຍານຕໍ່ພັນລະຍາຂອງນາອາມານ — Stand as a Witness [ຢືນເປັນພະຍານ], ໂດຍ ຄະວານີ ໂພວີ ວິນເດີ

2 ກະສັດ 5:1–15

ເຮົາສາມາດເລືອກເຮັດສິ່ງທີ່ພຣະເຈົ້າບັນຊາ ຜ່ານທາງສາດສະດາຂອງພຣະອົງ.

ຊ່ວຍໃຫ້ລູກໆຂອງທ່ານຮຽນຮູ້ເລື່ອງລາວໃນ 2 ກະສັດ 5:1–3, 9–14. ໃຫ້ພິຈາລະນາທີ່ຈະໃຊ້ “ເອລີຊາປິ່ນປົວນາອາມານ” (ໃນ ເລື່ອງພຣະຄຳພີເດີມ, 134–37) ຫລື ໃຊ້ຮູບພາບຂອງນາອາມານໃນໂຄງຮ່າງຂອງອາທິດນີ້. ເປັນຫຍັງນາອາມານຈຶ່ງບໍ່ຢາກລົງໄປອາບໃນແມ່ນ້ຳຈໍແດນ, ເຖິງແມ່ນເອລີຊາໄດ້ບອກວ່າ ເພິ່ນຈະຫາຍດີຈາກພະຍາດຂອງເພິ່ນ? ນາອາມານໄດ້ຮັບພອນແນວໃດ ເມື່ອເພິ່ນໄດ້ເຮັດຕາມຄຳແນະນຳຂອງເອລີຊາ? ພວກທ່ານອາດແບ່ງປັນປະສົບການນຳກັນກ່ຽວກັບຕອນທີ່ພວກທ່ານໄດ້ເຊື່ອຟັງພຣະຜູ້ເປັນເຈົ້າ, ແມ່ນແຕ່ເມື່ອທ່ານບໍ່ແນ່ໃຈວ່າທ່ານຕ້ອງການຫລືບໍ່ກໍຕາມ.

1:52
Elisha Heals Naaman
ທ່ານອາດຈະເນັ້ນ 2 ກະສັດ 5:13 ນຳອີກ, ຊຶ່ງຄົນຮັບໃຊ້ຂອງນາອາມານໄດ້ຊ່ວຍເພິ່ນໃຫ້ຕັດສິນໃຈເຊື່ອຟັງສາດສະດາເອລີຊາ. ແລ້ວລູກໆຂອງທ່ານສາມາດເວົ້າລົມກັນກ່ຽວກັບວິທີທີ່ພວກເຂົາສາມາດຊ່ວຍໃຫ້ໝູ່ເພື່ອນ ຫລື ສະມາຊິກໃນຄອບຄົວຂອງພວກເຂົາຟັງ ແລະ ເຊື່ອຟັງສາດສະດາ.

2 ກະສັດ 6:8–17

ເຮົາບໍ່ໄດ້ຢູ່ຄົນດຽວ.

ທ່ານ ແລະ ລູກໆຂອງທ່ານສາມາດນຶກພາບວ່າພວກທ່ານຖືກອ້ອມຮອບດ້ວຍກອງທັບທີ່ມີດາບ, ມ້າ, ແລະ ລົດຮົບ. ພວກທ່ານຈະຮູ້ສຶກແນວໃດ? ພວກທ່ານຈະເຮັດຫຍັງ? ແລ້ວລູກໆຂອງທ່ານສາມາດຫລັບຕາ ຂະນະທີ່ທ່ານອ່ານ 2 ກະສັດ 6:16–17 ໃຫ້ພວກເຂົາຟັງ. (ເບິ່ງ “ເອລີຊາ ແລະ ກອງທັບພຣະຜູ້ເປັນເຈົ້າ,” ໃນ ເລື່ອງພຣະຄຳພີເດີມ, 138–39, ຫລື ຮູບພາບຢູ່ໃນທ້າຍໂຄງຮ່າງນີ້ ນຳອີກ.) ເມື່ອທ່ານອ່ານເຖິງຄຳວ່າ “ເປີດຕາຄົນຮັບໃຊ້” (ຂໍ້ທີ 17), ຂໍໃຫ້ລູກໆເປີດຕາຂອງພວກເຂົາ. ເວົ້າລົມກັນກ່ຽວກັບສິ່ງທີ່ຜູ້ຮັບໃຊ້ໄດ້ເຫັນ. ແບ່ງປັນກັບລູກໆຂອງທ່ານວ່າ ທ່ານຮູ້ສຶກແນວໃດທີ່ພຣະຜູ້ເປັນເຈົ້າສະຖິດຢູ່ກັບທ່ານໃນຊ່ວງເວລາທີ່ທ້າທາຍຂອງທ່ານ, ແມ່ນແຕ່ເບິ່ງຄືກັບວ່າທ່ານຢູ່ຄົນດຽວກໍຕາມ.

1:9
Elisha and the Lord’s Army

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ເອລີຊາ ແລະ ຊາຍໜຸ່ມກຳລັງສັງເກດເບິ່ງລົດຮົບເປັນໄຟ — “Fear not: for they that be with us are more than they that be with them,” [“ບໍ່ຕ້ອງຢ້ານ: ຝ່າຍຂອງພວກເຮົາມີຫລາຍກວ່າຝ່າຍຂອງພວກເຂົາ,”] ໂດຍ ສະເຕຊີ ມິນຊ໌

ໜ້າກິດຈະກຳປະຖົມໄວ: ເຮົາສາມາດເລືອກເຮັດສິ່ງທີ່ພຣະເຈົ້າບັນຊາ ຜ່ານທາງສາດສະດາຂອງພຣະອົງ — “Fear not: for they that be with us are more than they that be with them,” [“ບໍ່ຕ້ອງຢ້ານ: ຝ່າຍຂອງພວກເຮົາມີຫລາຍກວ່າຝ່າຍຂອງພວກເຂົາ,”] ໂດຍ ສະເຕຊີ ມິນຊ໌