“ຄວາມຄິດທີ່ໃຫ້ເກັບໄວ້ໃນໃຈ: ‘ພຣະເຢຊູຈະກ່າວກັບຊາວອິດສະຣາເອນທັງໝົດວ່າ, “ຈົ່ງກັບບ້ານ,”’” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ຄວາມຄິດທີ່ໃຫ້ເກັບໄວ້ໃນໃຈ: ‘ພຣະເຢຊູຈະກ່າວກັບຊາວອິດສະຣາເອນທັງໝົດວ່າ, “ຈົ່ງກັບບ້ານ,”’” ຈົ່ງຕາມເຮົາມາ—ສຳລັບບ້ານ ແລະ ໂບດ: 2026
ຄວາມຄິດທີ່ໃຫ້ເກັບໄວ້ໃນໃຈ
“ພຣະເຢຊູຈະກ່າວກັບຊາວອິດສະຣາເອນທັງໝົດວ່າ, ‘ຈົ່ງກັບບ້ານ’”
ໃນທະເລຊາຍຂອງພູຊີນາຍ, ໂມເຊໄດ້ເຕົ້າໂຮມລູກຫລານຂອງອິດສະຣາເອນຢູ່ຕີນພູເຂົາ. ຢູ່ທີ່ນັ້ນພຣະຜູ້ເປັນເຈົ້າໄດ້ປະກາດວ່າ ພຣະອົງຢາກປ່ຽນກຸ່ມຜູ້ຄົນທີ່ຫາກໍຖືກປົດປ່ອຍຈາກການເປັນຂ້າທາດ ໃຫ້ກາຍເປັນຜູ້ຄົນທີ່ຍິ່ງໃຫຍ່. “ພວກເຈົ້າ,” ພຣະອົງກ່າວ, “ເປັນອານາຈັກແຫ່ງປະໂລຫິດ, ແລະ ເປັນຊົນຊາດບໍລິສຸດສຳລັບເຮົາ” (ອົບພະຍົບ 19:6). ພຣະອົງໄດ້ສັນຍາວ່າ ພວກເຂົາຈະເຕີບໂຕ ແລະ ຈະເລີນຮຸ່ງເຮືອງ, ແມ່ນແຕ່ຕອນທີ່ຖືກອ້ອມຮອບໄປດ້ວຍສັດຕູທີ່ມີຈຳນວນຫລາຍກວ່າ ແລະ ມີພະລັງຫລາຍກວ່າກໍຕາມ.
ທຸກສິ່ງຢ່າງນີ້ຈະເກີດຂຶ້ນ ບໍ່ແມ່ນຍ້ອນຊາວອິດສະຣາເອນມີຈຳນວນຢ່າງຫລວງຫລາຍ ຫລື ເຂັ້ມແຂງ ຫລື ຊຳນານ. ມັນຈະເກີດຂຶ້ນ, ພຣະຜູ້ເປັນເຈົ້າໄດ້ອະທິບາຍວ່າ, ຖ້າພວກເຂົາ “ເຊື່ອຟັງ [ພຣະອົງ] ແລະ ຮັກສາພັນທະສັນຍາຂອງ [ພຣະອົງ]” (ອົບພະຍົບ 19:5). ອຳນາດຂອງພຣະເຈົ້າ, ບໍ່ແມ່ນອຳນາດຂອງພວກເຂົາເອງ, ທີ່ຈະເຮັດໃຫ້ພວກເຂົາຍິ່ງໃຫຍ່.
ແຕ່ຊາວອິດສະຣາເອນບໍ່ໄດ້ເຊື່ອຟັງສຸລະສຽງຂອງພຣະເຈົ້າຕະຫລອດເວລາ, ແລະ ເມື່ອເວລາຜ່ານໄປ ພວກເຂົາໄດ້ຢຸດຮັກສາພັນທະສັນຍາຂອງພຣະອົງ. ຫລາຍຄົນເລີ່ມຕົ້ນນະມັດສະການພະອື່ນ ແລະ ຮັບເອົາພາກປະຕິບັດຕາມວັດທະນະທຳທີ່ຢູ່ອ້ອມຮອບພວກເຂົາ. ພວກເຂົາໄດ້ປະຕິເສດສິ່ງທີ່ໄດ້ເຮັດໃຫ້ພວກເຂົາແຕກຕ່າງຈາກປະຊາຊາດອື່ນ—ຄວາມສຳພັນແຫ່ງພັນທະສັນຍາຂອງພວກເຂົາກັບພຣະຜູ້ເປັນເຈົ້າ. ປາດສະຈາກອຳນາດຂອງພຣະເຈົ້າເພື່ອປົກປ້ອງພວກເຂົາ, ກໍເລີຍບໍ່ມີສິ່ງໃດທີ່ຈະຢຸດຢັ້ງສັດຕູຂອງພວກເຂົາ.
ການກະຈັດກະຈາຍ
ຫລາຍເທື່ອລະຫວ່າງປະມານ 735 ແລະ 720 ປີກ່ອນ ຄ.ສ., ຊາວອັດຊີເຣຍໄດ້ໂຈມຕີອານາຈັກພາກເໜືອຂອງຊາວອິດສະຣາເອນ, ບ້ານເມືອງສິບເຜົ່າຂອງຈຳນວນສິບສອງເຜົ່າ, ແລະ ພາຊາວອິດສະຣາເອນຫລາຍພັນຄົນໄປເປັນຊະເລີຍຢູ່ໃນຫລາຍບ່ອນຂອງຈັກກະພັດອັດຊີເຣຍ. ຊາວອິດສະຣາເອນເຫລົ່ານີ້ໄດ້ຖືກຮູ້ຈັກກັນວ່າເປັນ “ເຜົ່າທີ່ສູນຫາຍໄປ,” ທີ່ພາກສ່ວນໜຶ່ງແມ່ນຍ້ອນພວກເຂົາໄດ້ຖືກພາໜີໄປຈາກບ້ານເກີດເມືອງນອນຂອງພວກເຂົາ ແລະ ໄດ້ກະຈັດກະຈາຍກັນຢູ່ໃນທ່າມກາງປະຊາຊາດອື່ນໆ. ແຕ່ພວກເຂົາກໍໄດ້ສູນເສຍຄວາມຮູ້ສຶກທີ່ເລິກເຊິ່ງ, ເມື່ອເວລາຜ່ານໄປ ພວກເຂົາໄດ້ສູນເສຍເອກະລັກຂອງຕົນ ໃນຖານະຜູ້ຄົນແຫ່ງພັນທະສັນຍາຂອງພຣະເຈົ້າ.
ແຕ່ໃນທີ່ສຸດຫລາຍໆຄົນຢູ່ທີ່ອານາຈັກພາກໃຕ້ຂອງຢູດາຍກໍໄດ້ຫັນໜີໄປຈາກພຣະຜູ້ເປັນເຈົ້າຄືກັນ. ຊາວອັດຊີເຣຍໄດ້ໂຈມຕີ ແລະ ໄດ້ຂຶ້ນຄອງອານາຈັກນັ້ນເກືອບທຸກບ່ອນນຳອີກ; ພຽງແຕ່ນະຄອນເຢຣູຊາເລັມເທົ່ານັ້ນທີ່ຖືກຮັກສາໄວ້ຢ່າງມະຫັດສະຈັນ. ຕໍ່ມາ, ລະຫວ່າງ 597 ແລະ 580 ປີກ່ອນ ຄ.ສ., ຊາວບາບີໂລນໄດ້ທຳລາຍນະຄອນເຢຣູຊາເລັມ, ລວມທັງພຣະວິຫານ, ແລະ ໄດ້ຈັບເອົາຫລາຍຄົນໄປເປັນຊະເລີຍ. ປະມານ 70 ປີຕໍ່ມາ, ຜູ້ຄົນທີ່ເຫລືອຢູ່ຂອງອານາຈັກຢູດາຍໄດ້ຖືກອະນຸຍາດໃຫ້ກັບຄືນໄປນະຄອນເຢຣູຊາເລັມ ແລະ ສ້າງພຣະວິຫານຄືນໃໝ່. ເຖິງຢ່າງໃດກໍຕາມ, ຫລາຍຄົນໄດ້ອາໄສຢູ່ໃນບາບີໂລນຕໍ່ໄປ.
The Destruction of Jerusalem by Nebuzar-adan [ເຢຣູຊາເລັມຖືກທຳລາຍ ໂດຍ ເນບູຊາຣາດານ], ໂດຍ ວິວລຽມ ບຣາຊີ ໂຮລ໌, © Providence Collection/ໄດ້ຮັບອະນຸຍາດຈາກ goodsalt.com
ເມື່ອເວລາຜ່ານໄປ, ຊາວອິດສະຣາເອນຈາກທຸກເຜົ່າໄດ້ຖືກ “ກວາດ … ເໝືອນລົມພະຍຸພັດ ໃຫ້ໜີໄປອາໄສຢູ່ຕ່າງປະເທດ” (ເຊກາຣີຢາ 7:14). ບາງຄົນໄດ້ຖືກພຣະຜູ້ເປັນເຈົ້ານຳພາໄປແຜ່ນດິນອື່ນໆ. ອີກບາງຄົນໄດ້ໜີໄປຈາກອິດສະຣາເອນເພື່ອລົບໜີການຈັບຕົວ ຫລື ເປັນເພາະເຫດຜົນດ້ານການເມືອງ ຫລື ເສດຖະກິດ.
ເຮົາເອີ້ນເຫດການເຫລົ່ານີ້ວ່າ ການກະຈັດກະຈາຍຂອງຊາວອິດສະຣາເອນ. ແລະ ມັນສຳຄັນທີ່ຈະຮູ້ກ່ຽວກັບການກະຈັດກະຈາຍ ດ້ວຍຫລາຍເຫດຜົນ. ຢ່າງໜຶ່ງ, ມັນເປັນຫົວຂໍ້ສຳຄັນຢູ່ໃນພຣະຄຳພີເດີມ—ສາດສະດາຫລາຍທ່ານຂອງພຣະຄຳພີເດີມໄດ້ເປັນພະຍານເຖິງການເສື່ອມໂຊມທາງວິນຍານ ທີ່ນຳໄປສູ່ການກະຈັດກະຈາຍ. ພວກເພິ່ນໄດ້ເຫັນເຫດການນີ້ລ່ວງໜ້າ ແລະ ໄດ້ຕັກເຕືອນກ່ຽວກັບເລື່ອງນີ້. ບາງຄົນກໍໄດ້ມີຊີວິດຜ່ານຜ່າເຫດການນັ້ນ. ມັນຊ່ວຍໄດ້ຫລາຍທີ່ຈະຈື່ຈຳ ເມື່ອທ່ານອ່ານພຣະທຳເອຊາຢາ, ເຢເຣມີຢາ, ອາໂມດ, ແລະ ສາດສະດາທ່ານອື່ນໆ ໃນສ່ວນຫລັງຂອງພຣະຄຳພີເດີມ. ໂດຍຄຳນຶງກ່ຽວກັບເນື້ອຫານີ້, ເມື່ອທ່ານອ່ານຄຳທຳນາຍຂອງພວກເພິ່ນກ່ຽວກັບອັດຊີເຣຍ ແລະ ບາບີໂລນ, ການຂາບໄຫວ້ຮູບເຄົາລົບ ແລະ ການເປັນຊະເລີຍ, ການຖືກທຳລາຍ ແລະ ໃນທີ່ສຸດການຟື້ນຟູ, ທ່ານຈະຮູ້ວ່າພວກເພິ່ນເວົ້າກ່ຽວກັບຫຍັງ.
ຄວາມເຂົ້າໃຈການກະຈັດກະຈາຍຂອງຊາວອິດສະຣາເອນ ຈະຊ່ວຍທ່ານໃຫ້ເຂົ້າໃຈພຣະຄຳພີມໍມອນຫລາຍຂຶ້ນກວ່າເກົ່າ, ເພາະວ່າພຣະຄຳພີມໍມອນເປັນບັນທຶກຂອງກິ່ງງ່າທີ່ກະຈັດກະຈາຍຂອງຊາວອິດສະຣາເອນ. ບັນທຶກນີ້ເລີ່ມຕົ້ນດ້ວຍຄອບຄົວຂອງລີໄຮ ໜີຈາກນະຄອນເຢຣູຊາເລັມ ປະມານ 600 ປີກ່ອນ ຄ.ສ., ບໍ່ດົນກ່ອນບາບີໂລນໄດ້ມາໂຈມຕີ. ລີໄຮໄດ້ເປັນໜຶ່ງໃນບັນດາສາດສະດາທີ່ໄດ້ທຳນາຍກ່ຽວກັບການກະຈັດກະຈາຍຂອງຊາວອິດສະຣາເອນ. ແລະ ຄອບຄົວຂອງເພິ່ນໄດ້ຊ່ວຍເຮັດໃຫ້ຄຳທຳນາຍເກີດເປັນຈິງ, ໄດ້ນຳພາກິ່ງງ່າຂອງອິດສະຣາເອນ ແລະ ເອົາມັນໄປປູກໄວ້ຢູ່ໃນຊີກໂລກອີກເບື້ອງໜຶ່ງ, ໃນອາເມຣິກາ.
ການເຕົ້າໂຮມ
ເຖິງຢ່າງໃດກໍຕາມ, ການກະຈັດກະຈາຍຂອງຊາວອິດສະຣາເອນ, ເປັນພຽງແຕ່ເຄິ່ງໜຶ່ງຂອງເລື່ອງລາວ. ພຣະຜູ້ເປັນເຈົ້າບໍ່ໄດ້ລືມໄລຜູ້ຄົນຂອງພຣະອົງ, ຫລື ປະຖິ້ມພວກເຂົາ, ເຖິງແມ່ນພວກເຂົາໄດ້ປະຖິ້ມພຣະອົງກໍຕາມ. ການທຳນາຍຫລາຍຢ່າງວ່າພຣະເຈົ້າຈະກະຈັດກະຈາຍຊາວອິດສະຣາເອນ ກໍມີຄຳສັນຍາຫລາຍຢ່າງຢູ່ໃນນັ້ນ ວ່າພຣະອົງຈະເຕົ້າໂຮມພວກເຂົາໃນວັນໜຶ່ງ.
ວັນນັ້ນແມ່ນທຸກວັນນີ້—ວັນເວລາຂອງເຮົາ. ການເຕົ້າໂຮມໄດ້ເລີ່ມຕົ້ນແລ້ວ. ໃນປີ 1836, ຫລາຍພັນປີຫລັງຈາກໂມເຊໄດ້ເຕົ້າໂຮມລູກຫລານຂອງອິດສະຣາເອນຢູ່ຕີນພູເຂົາຊີນາຍ, ເພິ່ນໄດ້ປະກົດຢູ່ໃນພຣະວິຫານເຄີດແລນ ເພື່ອມອບ “ຂໍກະແຈແຫ່ງການເຕົ້າໂຮມຂອງຊາວອິດສະຣາເອນຈາກສີ່ທິດຂອງແຜ່ນດິນໂລກ” ໃຫ້ແກ່ໂຈເຊັບ ສະມິດ (ຄຳສອນ ແລະ ພັນທະສັນຍາ 110:11). ບັດນີ້, ພາຍໃຕ້ການຊີ້ນຳຂອງຜູ້ທີ່ດຳລົງຂໍກະແຈເຫລົ່ານີ້, ເຜົ່າຕ່າງໆຂອງອິດສະຣາເອນ ກຳລັງຖືກເຕົ້າໂຮມຈາກທຸກປະຊາຊາດ ບ່ອນທີ່ຜູ້ຮັບໃຊ້ຂອງພຣະຜູ້ເປັນເຈົ້າສາມາດໄປຫາ.
Moses, Elias, and Elijah Appear in the Kirtland Temple [ໂມເຊ, ອີລາຍ, ແລະ ເອລີຢາ ປະກົດຕົວຢູ່ໃນພຣະວິຫານເຄີດແລນ], ໂດຍ ແກຣີ ອີ ສະມິດ
ປະທານຣະໂຊ ເອັມ ແນວສັນ ໄດ້ເອີ້ນການເຕົ້າໂຮມນີ້ວ່າເປັນ “ສິ່ງສຳຄັນທີ່ສຸດ ທີ່ກຳລັງເກີດຂຶ້ນຢູ່ໃນໂລກ ໃນທຸກວັນນີ້. ບໍ່ມີສິ່ງອື່ນໃດທີ່ໃຫຍ່ໂຕໄປກວ່ານີ້, ບໍ່ມີສິ່ງໃດທີ່ສຳຄັນໄປກວ່ານີ້, ບໍ່ມີສິ່ງໃດທີ່ສະຫງ່າງາມໄປກວ່ານີ້. ແລະ ຖ້າຫາກທ່ານເລືອກທີ່ຈະເຮັດ, ຖ້າຫາກທ່ານຢາກເຮັດ, ທ່ານສາມາດເປັນພາກສ່ວນໃນການເຕົ້າໂຮມທີ່ຍິ່ງໃຫຍ່ນີ້ໄດ້.”
ເຮົາຈະຊ່ວຍໄດ້ແນວໃດ? ການເຕົ້າໂຮມອິດສະຣາເອນໝາຍຄວາມວ່າແນວໃດ? ມັນໝາຍເຖິງການນຳສິບສອງເຜົ່າຄືນສູ່ແຜ່ນດິນທີ່ພວກເຂົາເຄີຍອາໄສຢູ່ບໍ? ຕາມຈິງແລ້ວ, ມັນໝາຍເຖິງສິ່ງທີ່ຍິ່ງໃຫຍ່ກວ່ານັ້ນ, ເປັນນິລັນດອນຫລາຍກວ່ານັ້ນ. ດັ່ງທີ່ປະທານແນວສັນໄດ້ອະທິບາຍວ່າ:
“ເມື່ອເຮົາກ່າວເຖິງ ການເຕົ້າໂຮມ, ເຮົາພຽງກ່າວເຖິງຄວາມຈິງຂັ້ນພື້ນຖານນີ້: ລູກໆທຸກຄົນຂອງພຣະບິດາເທິງສະຫວັນຂອງເຮົາ, ຢູ່ທັງສອງຟາກມ່ານ, ມີສິດທີ່ຈະໄດ້ຍິນຂ່າວສານຂອງພຣະກິດຕິຄຸນຂອງພຣະເຢຊູຄຣິດທີ່ຖືກຟື້ນຟູ. …
“ທຸກເທື່ອ ທີ່ທ່ານເຮັດ ສິ່ງ ທີ່ຊ່ວຍ ບາງຄົນ—ຢູ່ທັງສອງຟາກມ່ານ—ເພື່ອເຮັດ ແລະ ຮັກສາພັນທະສັນຍາກັບພຣະເຈົ້າ ແລະ ຮັບເອົາການບັບຕິສະມາ ແລະ ພິທີການຂອງພຣະວິຫານທີ່ຈຳເປັນ, ແລ້ວທ່ານກໍໄດ້ຊ່ວຍເຕົ້າໂຮມອິດສະຣາເອນ. ມັນງ່າຍໆແບບນັ້ນ.”
ສິ່ງນີ້ເກີດຂຶ້ນ, ດັ່ງທີ່ເອຊາຢາໄດ້ກ່າວວ່າ, “ແຕ່ລະຄົນ” (ເອຊາຢາ 27:12) ຫລື, ດັ່ງທີ່ເຢເຣມີຢາໄດ້ບອກລ່ວງໜ້າວ່າ, “ຄົນໜຶ່ງຈາກແຕ່ລະເມືອງ, ແລະ ສອງຄົນຈາກແຕ່ລະຕະກຸນ” (ເຢເຣມີຢາ 3:14).
ການເຕົ້າໂຮມອິດສະຣາເອນໝາຍເຖິງການນຳລູກໆຂອງພຣະເຈົ້າກັບມາຫາພຣະອົງ. ມັນໝາຍເຖິງການນຳພາເຂົາເຈົ້າຄືນສູ່ຄວາມສຳພັນແຫ່ງພັນທະສັນຍາກັບພຣະອົງ. ມັນໝາຍເຖິງການສະຖາປະນາ “ຊົນຊາດບໍລິສຸດ” ຄືນໃໝ່ ຊຶ່ງພຣະອົງໄດ້ສະເໜີໃຫ້ສະຖາປະນາດົນນານມາແລ້ວ (ອົບພະຍົບ 19:6).
ຈົ່ງກັບບ້ານ
ໃນຖານະຄົນໜຶ່ງຜູ້ໄດ້ເຮັດພັນທະສັນຍາກັບພຣະເຈົ້າ, ທ່ານເປັນພາກສ່ວນໃນເຊື້ອສາຍອິດສະຣາເອນ. ທ່ານຖືກເຕົ້າໂຮມ, ແລະ ທ່ານເປັນຜູ້ເຕົ້າໂຮມ. ເລື່ອງລາວອັນຍືດຍາວແບບບົດກະວີຂອງຜູ້ຄົນແຫ່ງພັນທະສັນຍາກຳລັງສ້າງຂຶ້ນເຖິງຈຸດສູງສຸດຂອງມັນ, ແລະ ທ່ານກໍເປັນຜູ້ໜຶ່ງທີ່ສຳຄັນໃນນັ້ນ. ນີ້ຄືເວລາເມື່ອ “ພຣະເຢຊູຈະກ່າວກັບຊາວອິດສະຣາເອນທັງໝົດວ່າ, ‘ຈົ່ງກັບບ້ານ.’”
ນີ້ຄືຂ່າວສານຂອງການເຕົ້າໂຮມ: ຈົ່ງກັບບ້ານສູ່ພັນທະສັນຍາ. ຈົ່ງກັບບ້ານສູ່ຊີໂອນ. ຈົ່ງກັບບ້ານຫາພຣະເຢຊູຄຣິດ, ພຣະຜູ້ບໍລິສຸດຂອງຊາວອິດສະຣາເອນ, ແລະ ພຣະອົງຈະນຳພາທ່ານກັບບ້ານຫາພຣະເຈົ້າ, ພຣະບິດາຂອງທ່ານ.