“ວັນທີ 13–19 ເດືອນກໍລະກົດ. ‘ເພິ່ນໄວ້ວາງໃຈໃນພຣະຜູ້ເປັນເຈົ້າ ພຣະເຈົ້າຂອງຊາດອິດສະຣາເອນ’: 2 ກະສັດ 16–25,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 13–19 ເດືອນກໍລະກົດ. ‘ເພິ່ນໄວ້ວາງໃຈໃນພຣະຜູ້ເປັນເຈົ້າ ພຣະເຈົ້າຂອງຊາດອິດສະຣາເອນ,’” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026

The Flight of the Prisoners [ການໜີຂອງເຫລົ່ານັກໂທດ], ໂດຍ ເຈມສ໌ ທີໂຊ ແລະ ຄົນອື່ນໆ

ວັນທີ 13–19 ເດືອນກໍລະກົດ: “ເພິ່ນໄວ້ວາງໃຈໃນພຣະຜູ້ເປັນເຈົ້າ ພຣະເຈົ້າຂອງຊາດອິດສະຣາເອນ”

2 ກະສັດ 16–25

ເຖິງແມ່ນວ່າການປະຕິບັດສາດສະໜາກິດຂອງສາດສະດາເອລີຊາຈະຊົງພະລັງກໍຕາມ, ແຕ່ຜູ້ຄົນຂອງອານາຈັກພາກເໜືອແຫ່ງອິດສະຣາເອນບໍ່ໄດ້ກັບໃຈ. ໃນທີ່ສຸດ, ຈັກກະພົບອັດຊີເຣຍກໍໄດ້ຂຶ້ນຍຶດຄອງ ແລະ ໄດ້ເຮັດໃຫ້ສິບເຜົ່າຂອງອິດສະຣາເອນກະຈັດກະຈາຍໄປ. ໃນຂະນະດຽວກັນ, ອານາຈັກພາກໃຕ້ແຫ່ງຢູດາຍກໍບໍ່ໄດ້ດີໄປກວ່ານັ້ນ: ການຂາບໄຫວ້ຮູບເຄົາລົບກໍໄດ້ຂະຫຍາຍໄປຢ່າງກວ້າງຂວາງໃນທີ່ນັ້ນເຊັ່ນກັນ.

ໃນທ່າມກາງຄວາມເສື່ອມໂຊມທາງວິນຍານທັງໝົດນີ້, ພຣະຄຳພີໄດ້ກ່າວເຖິງກະສັດແຫ່ງຢູດາຍສອງອົງ, ຜູ້ຊຶ່ງ, ໃນຊົ່ວໄລຍະໜຶ່ງ, ໄດ້ຫັນຜູ້ຄົນຂອງພວກເພິ່ນກັບມາຫາພຣະຜູ້ເປັນເຈົ້າ. ກະສັດອົງໜຶ່ງແມ່ນ ເຮເຊກີຢາ. ລະຫວ່າງການປົກຄອງຂອງເພິ່ນ, ຊາວອັດຊີເຣຍໄດ້ຍຶດຄອງແຜ່ນດິນສ່ວນໃຫຍ່ຂອງຢູດາຍ. ແຕ່ເຮເຊກີຢາ ແລະ ຜູ້ຄົນຂອງເພິ່ນໄດ້ສະແດງສັດທາໃນພຣະຜູ້ເປັນເຈົ້າ, ຜູ້ທີ່ໄດ້ປົດປ່ອຍນະຄອນເຢຣູຊາເລັມໃນວິທີທີ່ໜ້າອັດສະຈັນ. ຕໍ່ມາ, ຫລັງຈາກຊົ່ວໄລຍະໜຶ່ງຂອງການປະຖິ້ມຄວາມເຊື່ອ, ໂຢສີຢາໄດ້ຂຶ້ນເປັນກະສັດ. ໂດຍໄດ້ຮັບການດົນໃຈສ່ວນໜຶ່ງຈາກການຄົ້ນພົບປຶ້ມກົດບັນຍັດຂອງໂມເຊອີກຄັ້ງ, ໂຢສີຢາໄດ້ນຳການປະຕິຮູບທີ່ນຳສາດສະໜາມາສູ່ຊີວິດຂອງຜູ້ຄົນຂອງເພິ່ນອີກຄັ້ງ.

ເຊັ່ນດຽວກັບອິດສະຣາເອນ ແລະ ຢູດາຍ, ເຮົາທຸກຄົນກໍເຄີຍເລືອກເຮັດສິ່ງທີ່ດີ ແລະ ສິ່ງທີ່ບໍ່ດີ. ເມື່ອເຮົາຮູ້ສຶກວ່າ ຊີວິດຂອງເຮົາຕ້ອງການການປະຕິຮູບ, ເຮົາສາມາດຮັບກຳລັງໃຈຈາກຈຸດສະຫວ່າງສອງຈຸດນີ້ ໃນຊ່ວງປີທີ່ມືດມົນໃນປະຫວັດສາດຂອງຢູດາຍ. ບາງທີ ຕົວຢ່າງຂອງເຮເຊກີຢາ ແລະ ໂຢສີຢາ ຈະສາມາດດົນໃຈເຮົາໃຫ້ “ໄວ້ວາງໃຈໃນພຣະຜູ້ເປັນເຈົ້າ ພຣະເຈົ້າຂອງເຮົາ” (2 ກະສັດ 18:22).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

2 ກະສັດ 18–19

ເຮົາສາມາດຊື່ສັດຕໍ່ພຣະຜູ້ເປັນເຈົ້າເມື່ອສັດທາຂອງເຮົາໄດ້ຮັບການທ້າທາຍ.

ເຮົາສ່ວນຫລາຍເຄີຍມີປະສົບການທີ່ທ້າທາຍສັດທາຂອງເຮົາ. ສຳລັບເຮເຊກີຢາ ແລະ ຜູ້ຄົນຂອງເພິ່ນ, ໜຶ່ງໃນການທ້າທາຍໄດ້ມາເຖິງຕອນທີ່ກອງທັບອັດຊີເຣຍໄດ້ເຂົ້າໃກ້ນະຄອນເຢຣູຊາເລັມ. ຂະນະທີ່ທ່ານອ່ານ 2 ກະສັດ 18–19, ໃຫ້ຈິນຕະນາການວ່າທ່ານໄດ້ອາໄສຢູ່ໃນນະຄອນເຢຣູຊາເລັມໃນຊ່ວງເວລານີ້. ທ່ານຈະຮູ້ສຶກແນວໃດ, ຍົກຕົວຢ່າງ, ເມື່ອໄດ້ຍິນຄຳເຍາະເຍີ້ຍຂອງຊາວອັດຊີເຣຍໃນ 2 ກະສັດ 18:28–37; 19:10–13? ທ່ານຈະເຮັດແນວໃດ? ໃຫ້ປຽບທຽບເຫດຜົນຂອງຊາວອັດຊີເຣຍທີ່ຍຸໃຫ້ຊາວອິດສະຣາເອນບໍ່ໄວ້ວາງໃຈພຣະຜູ້ເປັນເຈົ້າກັບເຫດຜົນຂອງຊາຕານທີ່ຍຸໃຫ້ເຮົາສົງໄສສັດທາຂອງເຮົາໃນທຸກມື້ນີ້. ທ່ານຍັງສາມາດປຽບທຽບເຫດຜົນຂອງຊາວອັດຊີເຣຍກັບເຫດຜົນທີ່ທ່ານ ໄວ້ວາງໃຈ ພຣະຜູ້ເປັນເຈົ້ານຳອີກ.

ທ່ານຮຽນຮູ້ຫຍັງແດ່ຈາກການກະທຳຂອງເຮເຊກີຢາໃນສະຖານະການນີ້? (ເບິ່ງ 2 ກະສັດ 19:1–7, 14–19). ພຣະຜູ້ເປັນເຈົ້າໄດ້ຕອບວ່າແນວໃດ? (ເບິ່ງ 2 ກະສັດ 19:35–37). ເປັນຫຍັງທ່ານຈຶ່ງຄິດວ່າ ເຮເຊກີຢາຄົງຢູ່ໃນຄວາມຊື່ສັດ? (ເບິ່ງ 2 ກະສັດ 18:5–7). ໃຫ້ໄຕ່ຕອງວິທີທີ່ພຣະຜູ້ເປັນເຈົ້າໄດ້ຄ້ຳຊູທ່ານໃນຊ່ວງເວລາແຫ່ງການທ້າທາຍ. ທ່ານຮູ້ສຶກດົນໃຈໃຫ້ເຮັດສິ່ງໃດ ເພື່ອເພີ່ມສັດທາຂອງທ່ານໃນພຣະອົງ?

ຂ່າວສານຂອງປະທານແຈັບຟະຣີ ອາ ຮໍແລນ “Fear Not: Believe Only!” (Liahona, May 2022, 34–36) ມີຄຳແນະນຳທີ່ມີປະໂຫຍດໃນຊ່ວງເວລາແຫ່ງຄວາມຢ້ານກົວ ຫລື ຄວາມສົງໄສ. ເພງສວດ “ຂໍໃຫ້ເຮົາເດີນໄປ” (ເພງສວດ ແລະ ເພງຂອງເດັກນ້ອຍ, 10) ກໍອາດມີຂ່າວສານທີ່ໃຫ້ກຳລັງໃຈເຊັ່ນກັນ. ທ່ານພົບເຫັນຫຍັງແດ່ຢູ່ໃນແຫລ່ງຊ່ວຍເຫລືອເຫລົ່ານີ້ທີ່ຊ່ວຍທ່ານ?

ເບິ່ງ 2 ຂ່າວຄາວ 31–32; 3 ນີໄຟ 3–4; Jörg Klebingat, “Valiant Discipleship in the Latter Days,” Liahona, May 2022, 107–10 ນຳອີກ.

ໃຊ້ສິ່ງຊ່ວຍເຫລືອການສຶກສາພຣະຄຳພີ. ສາດສະໜາຈັກມີແຫລ່ງຊ່ວຍເຫລືອຫລາຍແຫລ່ງເພື່ອຊ່ວຍໃຫ້ທ່ານເຂົ້າໃຈພຣະຄຳພີ. ຍົກຕົວຢ່າງ, ໃນຫ້ອງສະໝຸດພຣະກິດຕິຄຸນ ທ່ານສາມາດພົບ ຄູ່ມືພຣະຄຳພີ, Topics and Questions, ແລະ ວາລະສານຂອງສາດສະໜາຈັກ. ນອກຈາກນີ້, ຂະນະທີ່ທ່ານອ່ານພຣະຄຳພີເດີມ, ທ່ານສາມາດພົບບໍລິບົດ ແລະ ຄວາມຮູ້ແຈ້ງທີ່ເປັນປະໂຫຍດໃນ “ຄວາມຄິດທີ່ໃຫ້ເກັບໄວ້ໃນໃຈ” ໃນ ຈົ່ງຕາມເຮົາມາ. ບົດຄວາມທີ່ມີຫົວເລື່ອງວ່າ “ພຣະເຢຊູຈະກ່າວກັບອິດສະຣາເອນທັງໝົດວ່າ, ‘ກັບບ້ານ’” ອາດຊ່ວຍທ່ານໃນການສຶກສາ 2 ກະສັດ 16–25.

2 ກະສັດ 19:20–37

ທຸກສິ່ງຢູ່ໃນພຣະຫັດຂອງພຣະຜູ້ເປັນເຈົ້າ.

ເຊັນນາເກຣິບ, ກະສັດແຫ່່ງອັດຊີເຣຍ, ມີເຫດຜົນທີ່ດີທີ່ຈະເຊື່ອວ່າ ກອງທັບຂອງເພິ່ນຈະຍຶດເອົານະຄອນເຢຣູຊາເລັມໄດ້ (ເບິ່ງ 2 ກະສັດ 17; 18:33–34; 19:11–13). ແຕ່ພຣະຜູ້ເປັນເຈົ້າມີຂ່າວສານກ່ຽວກັບເຊັນນາເກຣິບ, ຊຶ່ງມອບໃຫ້ຜ່ານທາງສາດສະດາເອຊາຢາ. ມັນໄດ້ຖືກບັນທຶກໄວ້ໃນ 2 ກະສັດ 19:20–34. ຄວາມຈິງໃດແດ່ທີ່ທ່ານພົບໃນຂ່າວສານຂອງພຣະຜູ້ເປັນເຈົ້າທີ່ຊ່ວຍໃຫ້ທ່ານມີສັດທາໃນພຣະອົງ ແລະ ແຜນຂອງພຣະອົງ?

2 ກະສັດ 21–23

ພຣະຄຳພີສາມາດຫັນຫົວໃຈຂອງເຮົາມາຫາພຣະຜູ້ເປັນເຈົ້າໄດ້.

ທ່ານເຄີຍຮູ້ສຶກວ່າ ທ່ານຂາດເຂີນບາງຢ່າງທາງວິນຍານບໍ່? ບາງເທື່ອທ່ານກໍຮູ້ສຶກວ່າ ຄວາມສຳພັນຂອງທ່ານກັບພຣະເຈົ້າສາມາດເຂັ້ມແຂງຂຶ້ນອີກໄດ້. ແມ່ນຫຍັງທີ່ຊ່ວຍທ່ານໃຫ້ຫັນກັບມາຫາພຣະອົງ? ໃຫ້ໄຕ່ຕອງຄຳຖາມເຫລົ່ານີ້ ຂະນະທີ່ທ່ານອ່ານ 2 ກະສັດ 21–23, ຊຶ່ງບັນຍາຍວິທີທີ່ອານາຈັກແຫ່ງຢູດາຍໄດ້ຫັນໜີຈາກພຣະຜູ້ເປັນເຈົ້າພາຍໃຕ້ກະສັດມານາເຊ (ເບິ່ງ 2 ກະສັດ 21) ແລະ ວິທີທີ່ກະສັດໂຢສີຢາໄດ້ຊ່ວຍຜູ້ຄົນໃຫ້ຫັນກັບຄືນມາຫາພຣະອົງ (ເບິ່ງ 2 ກະສັດ 22–23). ໂຢສີຢາ ແລະ ຜູ້ຄົນຂອງເພິ່ນປ່ຽນແປງໄປໄດ້ແນວໃດ ແລະ ດ້ວຍເຫດໃດ? (ເບິ່ງ 2 ກະສັດ 22:8–11; 23:1–6, 21, 24).

ປະທານສະເປັນເຊີ ດັບເບິນຢູ ຄິມໂບ ເອີ້ນເລື່ອງລາວຂອງກະສັດໂຢສີຢາວ່າເປັນ “ໜຶ່ງໃນເລື່ອງລາວທີ່ດີທີ່ສຸດໃນພຣະຄຳພີທັງໝົດ” (Teachings of Presidents of the Church: Spencer W. Kimball [2006], 62). ອ່ານຖ້ອຍຄຳຂອງປະທານ ຄິມໂບກ່ຽວກັບກະສັດໂຢສີຢາ (ໜ້າທີ 62–64). ບາງທີ ທ່ານກໍສາມາດນຶກເຖິງປະສົບການເມື່ອຂໍ້ຄວາມຂອງພຣະຄຳພີ “ເຮັດວຽກຢ່າງຍິ່ງໃຫຍ່” ໃນຕົວທ່ານ. ທ່ານສາມາດເຮັດຫຍັງໄດ້ແດ່ເພື່ອຮັບປະສົບການເຊັ່ນນີ້ຫລາຍຂຶ້ນ?

ເບິ່ງ ແອວມາ 31:5; “Josiah and the Book of the Law” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

2 ກະສັດ 23:1–25

ພັນທະສັນຍາເປັນຄວາມມຸ່ງໝັ້ນໝົດທັງຈິດວິນຍານລະຫວ່າງເຮົາກັບພຣະຜູ້ເປັນເຈົ້າ.

ແມ່ນຫຍັງທີ່ປະທັບໃຈທ່ານກ່ຽວກັບພັນທະສັນຍາທີ່ໂຢສີຢາໄດ້ເຮັດໃນ 2 ກະສັດ 23:3? ຂະນະທີ່ທ່ານສືບຕໍ່ອ່ານ ບົດທີ 23, ໃຫ້ສັງເກດສິ່ງທີ່ໂຢສີຢາໄດ້ເຮັດເພື່ອສະແດງເຖິງຄວາມມຸ່ງໝັ້ນຂອງເພິ່ນຕໍ່ພຣະຜູ້ເປັນເຈົ້າ (ເບິ່ງຮູບພາບຢູ່ຕອນທ້າຍຂອງໂຄງຮ່າງນີ້). ທ່ານຈະສາມາດສະແເດງຄວາມມຸ່ງໝັ້ນຂອງທ່ານແກ່ພຣະອົງໄດ້ແນວໃດ?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

2 ກະສັດ 18:3–6; 19:14–19

ເຮົາສາມາດໄວ້ວາງໃຈພຣະບິດາເທິງສະຫວັນ ແລະ ພຣະເຢຊູຄຣິດ.

ໃນ 2 ກະສັດ 18:3, 5–6, ໃຫ້ຊ່ວຍລູກໆຂອງທ່ານຄົ້ນພົບສິ່ງທີ່ເຮັດໃຫ້ເຮເຊກີຢາເປັນກະສັດທີ່ດີ. ແລ້ວຂະນະທີ່ພວກທ່ານອ່ານ 2 ກະສັດ 19:14–19 ນຳກັນ, ພວກເຂົາກໍສາມາດຄົ້ນພົບວິທີທີ່ເພິ່ນໄດ້ສະແດງໃຫ້ເຫັນວ່າ ເພິ່ນໄວ້ວາງໃຈພຣະຜູ້ເປັນເຈົ້າ. ທ່ານສາມາດເບິ່ງຮູບພາບຂອງພຣະເຢຊູ ແລະ ເວົ້າກ່ຽວກັບເຫດຜົນທີ່ເຮົາສາມາດໄວ້ວາງໃຈພຣະອົງ. ເຮົາຈະສາມາດສະແດງໃຫ້ເຫັນວ່າ ເຮົາໄວ້ວາງໃຈພຣະຜູ້ເປັນເຈົ້າໄດ້ແນວໃດ?

2 ກະສັດ 22:1–7

ພຣະບິດາເທິງສະຫວັນ ແລະ ພຣະເຢຊູຄຣິດສາມາດໄວ້ວາງໃຈເຮົາ.

ໃນ 2 ກະສັດ 22:1, ໃຫ້ຊ່ວຍລູກໆຂອງທ່ານຄົ້ນພົບວ່າ ໂຢສີຢາອາຍຸຈັກປີຕອນທີ່ເພິ່ນຂຶ້ນເປັນກະສັດ. ເຮົາຮຽນຮູ້ຫຍັງແດ່ກ່ຽວກັບໂຢສີຢາໃນ ຂໍ້ທີ 2? ໃຫ້ພິຈາລະນາກິດຈະກຳໜຶ່ງທີ່ສາມາດວາດພາບການຕິດຕາມພຣະຜູ້ເປັນເຈົ້າ ແລະ ບໍ່ຫັນ “[ຂ້າງໄປທາງຂວາມື ຫລື ທາງຊ້າຍ].”
ຄົນເຮັດວຽກທີ່ມີບັນຍາຍໄວ້ໃນ 2 ກະສັດ 22:3–7 ໄດ້ຮັບການໄວ້ວາງໃຈໃຫ້ຮັບຜິດຊອບເງິນສຳລັບສ້າງພຣະວິຫານຂຶ້ນໃໝ່ “[ເພາະພວກເຂົາ] ເປັນຄົນສັດຊື່” (ຂໍ້ທີ 7). ຫລັງຈາກທີ່ອ່ານຂໍ້ພຣະຄຳພີເຫລົ່ານີ້, ທ່ານ ແລະ ລູກໆຂອງທ່ານສາມາດລົມກັນກ່ຽວກັບສິ່ງທີ່ທ່ານໄດ້ຮັບໄວ້ວາງໃຈໃຫ້ຮັບຜິດຊອບ. ເຮົາຈະສາມາດເປັນຄົນທີ່ໜ້າເຊື່ອຖືຄືກັນກັບຄົນເຮັດວຽກໃນຂໍ້ເຫລົ່ານີ້ໄດ້ແນວໃດ?

ເລຂາທິການກັບກະສັດໂຢສີອາ — ເລຂາທິການນຳເອົາໜັງສືມ້ວນພຣະຄຳພີມາໃຫ້ກະສັດໂຢສີອາ, ຮູບພາບປະກອບໂດຍ ຣໍເບີດ ທີ ແບແຣັດ

2 ກະສັດ 22:8–11; 23:2–3

ພຣະຄຳພີສິດສອນເຮົາໃຫ້ຕິດຕາມພຣະເຢຊູຄຣິດ.

ເພື່ອແນະນຳເລື່ອງລາວຂອງກະສັດໂຢສີຢາໃນ 2 ກະສັດ 22–23, ທ່ານສາມາດເຊື່ອງປຶ້ມພຣະຄຳພີເຫລັ້ມໜຶ່ງໄວ້ບາງບ່ອນໃນຫ້ອງ. ເຊື້ອເຊີນໃຫ້ລູກໆຂອງທ່ານຊອກຫາມັນ. ແລ້ວທ່ານກໍສາມາດແບ່ງປັນສິ່ງທີ່ເກີດຂຶ້ນ ເມື່ອໜຶ່ງໃນປະໂລຫິດຂອງໂຢສີຢາໄດ້ພົບພຣະຄຳພີໃນພຣະວິຫານ (ເບິ່ງ 2 ກະສັດ 22:8–11; ເບິ່ງ “ກະສັດໂຢສີຢາ” ໃນ ເລື່ອງພຣະຄຳພີເດີມ, 148–49 ນຳອີກ). ແມ່ນຫຍັງອາດເກີດຂຶ້ນ ຖ້າເຮົາບໍ່ມີພຣະຄຳພີ? ແບ່ງປັນນຳກັນວ່າ ເປັນຫຍັງທ່ານຈຶ່ງດີໃຈທີ່ພວກເຮົາມີພຣະຄຳພີໃນທຸກມື້ນີ້.

1:36
King Josiah
ຫລັງຈາກທີ່ອ່ານ 2 ກະສັດ 23:2–3, ທ່ານ ແລະ ລູກໆຂອງທ່ານສາມາດລົມກັນກ່ຽວກັບພຣະຄຳພີທີ່ໄດ້ດົນໃຈໃຫ້ທ່ານ “[ເດີນຕາມພຣະຜູ້ເປັນເຈົ້າ]” (ຂໍ້ທີ 3). ພວກທ່ານກໍສາມາດຮ້ອງເພງກ່ຽວກັບພຣະຄຳພີ, ດັ່ງເຊັ່ນ “ຈາລຶກທອງຄຳ” (ເພງສວດ ແລະ ເພງຂອງເດັກນ້ອຍ, 71 ນຳອີກ).

2 ກະສັດ 23:1–3

ເຮົາຈະຮັກສາພັນທະສັນຍາຂອງເຮົາກັບພຣະເຈົ້າ.

ເມື່ອໂຢສີຢາ ແລະ ຜູ້ຄົນຂອງເພິ່ນໄດ້ຮຽນຮູ້ພຣະບັນຍັດຂອງພຣະເຈົ້າ, ພວກເພິ່ນໄດ້ເຮັດພັນທະສັນຍາວ່າຈະໃຊ້ຊີວິດຕາມພຣະບັນຍັດເຫລົ່ານັ້ນ. ອ່ານກ່ຽວກັບເລື່ອງນີ້ກັບລູກໆຂອງທ່ານໃນ 2 ກະສັດ 23:1–3, ແລະ ຊ່ວຍໃຫ້ພວກເຂົາຊອກຫາຄຳ ຫລື ວະລີທີ່ສະແດງໃຫ້ເຫັນວ່າ ຜູ້ຄົນເຫລົ່ານັ້ນໄດ້ຮູ້ສຶກແນວໃດກ່ຽວກັບພຣະບັນຍັດຂອງພຣະຜູ້ເປັນເຈົ້າ. ບາງເທື່ອ ລູກໆຂອງທ່ານກໍສາມາດຢືນ ແລະ ເວົ້າກ່ຽວກັບວ່າ ການ “[ຢືນ] ຖືຮັກສາພັນທະສັນຍາ” ນັ້ນ ໝາຍຄວາມວ່າຫຍັງ. ແລ້ວພວກເຂົາກໍສາມາດຍ່າງຢູ່ບ່ອນເກົ່າ ແລະ ເວົ້າກ່ຽວກັບວ່າ ການ “[ເດີນຕາມພຣະຜູ້ເປັນເຈົ້າ]” ນັ້ນ ໝາຍຄວາມວ່າຫຍັງ? ຕໍ່ໄປ, ພວກເຂົາກໍສາມາດວາງມືໃສ່ເທິງຫົວໃຈຂອງພວກເຂົາ ແລະ ແນະນຳວິທີທີ່ເຮົາສາມາດຮັກສາພັນທະສັນຍາຂອງເຮົາ “ດ້ວຍສຸດໃຈ [ຂອງເຮົາ].”

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຜູ້ຄົນກຳລັງດຶງຮູບປັ້ນລົງດ້ວຍເຊືອກ — ຜູ້ຄົນຂອງໂຢສີຢາກຳລັງເອົາຮູບເຄົາລົບອອກຈາກເມືອງ; ພາບປະກອບໂດຍ ວິວລຽມ ໂຮລ໌

ໜ້າກິດຈະກຳປະຖົມໄວ: ພຣະຄຳພີສິດສອນເຮົາໃຫ້ຕິດຕາມພຣະເຢຊູຄຣິດ — ຜູ້ຄົນຂອງໂຢສີຢາກຳລັງເອົາຮູບເຄົາລົບອອກຈາກເມືອງ; ພາບປະກອບໂດຍ ວິວລຽມ ໂຮລ໌