2 Kronikas 14–20; 26; 30

Naq laj Asa ki’awa’b’ejin sa’ xb’een Juda, kixnumsi k’iila ch’a’ajkilal—jo’ naqak’ul ajwi’ chiqajunilo sa’ li kutan a’in. Naq yooqat chirilb’al resileb’ li ch’a’ajkilal kixnumsi, k’e reetal b’ar kixk’ojob’ xpaab’aal ut chan ru naq kijala a’an rik’in xnumik li hoonal.

K’a’ut naq wan naq ink’a’ chik naqapaab’ li Qaawa’? K’a’ chik ru naqatzol rik’in lix yu’am laj Asa?

Chi’ilmanq ajwi’ D. Todd Christofferson, “Li qawanjik rik’in li Dios,” Jolomil ch’utub’aj-ib’ re abril 2022.

Li profeet aj Mikeas kireek’a tana naq tento tixq’ehi li chaab’ilal choq’ reheb’ li rey aj Josafat ut li rey aj Ajab sa’ xpleeteb’ rik’in Siria. Sik’ reetalil li kireek’a’ a’an sa’ 2 Kronikas 18:1–12. Ma wan reetalil lix kawilal xch’ool ut lix tiikilal laj Mikeas sa’eb’ li raqal 13–27? (K’e reetal naq sa’ li raqal 14, moko yaal ta lix sumenkil laj Mikeas; a’ut naxye li yaal sa’ li raqal 16.) Chan ru naq kitz’aqlok ru li kixye laj Mikeas sa’eb’ li raqal 28–34?

Ma wankeb’ hoonal b’ar wi’ taanumsi li ch’a’ajkilal kixnumsi laj Mikeas? K’a’ru naxk’e xkawilal aach’ool chi xaqliik chi kaw choq’ re li Qaawa’ ut li raatin?

Naq yooqat chirilb’al 2 Kronikas 20:1–12, k’e reetal k’a’ru kixb’aanu laj Josafat naq ke’chal li tenamit chixpleetinkil Juda. Chan ru naru nakab’aanu li kixb’aanu a’an sa’eb’ li ch’a’ajkilal nakanumsi laa’at?

Li Qaawa’ kixsume lix tij laj Josafat sa’eb’ li raqal 14–17. K’a’ruheb’ li aatin nakataw li te’ruuq raj chixk’ojob’ankil aach’ool laa’at malaj xch’ool anihaq chik sa’ xyiheb’ li ch’a’ajkilal?

Sa’ li kutan jun chik, eb’ laj Jerusalen ke’el chixk’ulb’aleb’ li teep aj pleet. Naq yooqat chirilb’al 2 Kronikas 20:20, sik’ li aatin kixye laj Josafat reheb’ laj Jerusalen. Chan ru naq kitz’aqlok ru li raatin? (che’ilmanq li raqal 22–23). Chan ru naq xatrosob’tesi li Dios naq xapaab’ a’an ut xataaqeheb’ lix profeet?

Li Awa’b’ej Russell M. Nelson kixye: “Laa’in intawom naq wi taqakanab’ xtz’ilb’al rix ma tz’aqal yaal li raatin li profeet it sa’ xna’aj a’an taqab’aanu li naxye, neke’hoyman li qosob’tesinkil. Maajo’q’e ninpatz’ wib’, “Jo’q’e na’aatinak li profeet jo’ profeet ut jo’q’e na’aatinak jo’ yal winq?” Li ninpatz’ b’an a’an, “Chan ru naq tinwanq jo’ a’an?”” (sa’ Lane Johnson, “Russell M. Nelson: A Study in Obedience,” Ensign, agosto 1982, 24).

Chi’ilmanq ajwi’ Tzol’leb’ ut Sumwank 21:4–6; “Un ancla segura” (video), Biblioteca del Evangelio; “Chasik’ ru li chaab’il,” Choq’ re Xkawilaleb’ li Saaj: Jun tenq’ re xsik’b’al ru laa b’e (2022), 4–5.

3:37

Jo’ ke’xb’aanu naab’aleb’ li rey sa’ xb’een Juda, laj Osias kixtikib’ li rawa’b’ejil rik’in ninqal ru k’anjel a’b’an kixchoy sa’ rahilal. K’e reetal li na’leb’ a’in sa’ 2 Kronikas 26. Jo’ nakawil, jo’q’e kijala xb’ehil lix yu’am laj Osias?

Naq yooqat chirilb’aleb’ li raqal 16–23, k’e reetal naq sa’ li kutan a’an, ka’ajeb’ wi’ laj tij k’eeb’ileb’ xliceens chixk’atb’al li sununkil b’an sa’ li santil ochoch. K’a’ut naq li rey aj Osias kixq’et xtaqlahom li Dios? K’a’ru nakatzol rik’in li nimla rahilal a’in?

Chi’ilmanq ajwi’ “Sa’ laa ch’ool tuulan chatwanq,” Eb’ li B’ich, 73.

Sa’ 2 Kronikas 30, laj Esekias a’an li rey sa’ xb’een Juda. A’an kixb’oq li awa’b’ejihom re Israel chi wulak aran Jerusalen re xninq’ehinkil li Paswa—li ink’a’ ke’ru chixb’aanunkileb’ laj Israelita chiru k’iila chihab’ (che’ilmanq li raqal 1–12). K’a’ru nawulak chawu chirix li b’oqok ut chan ru naq kik’ule’—xb’aaneb’ li ula’ aj Israelita, jo’eb’ ajwi’ laj Juda?

Junxil junxil naq ke’ninq’ehiman li Paswa, jo’kan naq ke’wulak li ula’ aran Jerusalen li ink’a’ neke’xnaw chan ru tz’aqonk sa’ li Paswa. Naq yooqat chirilb’al 2 Kronikas 30:18–27, k’a’ru nakatzol rik’in li ratin laj Esekias ut li kik’ulman chirix a’an?

Chi’ilmanq ajwi’ Russell M. Nelson, “Ajb’ileb’ ru li te’k’ojob’anq re li tuqtuukilal,” Jolomil ch’utub’aj-ib’ re abril 2023.

• Re aatinak chirix li kanab’ank-ib’ sa’ ruq’ li Qaawa’, naru nakak’ut chiruheb’ laa kok’al li k’a’ru nakawoksi re xkolb’al aawix chiru li hab’, jo’ jun sombrilla malaj chakeet. Kanab’eb’ chixyeeb’al k’a’ut naq us roksinkileb’ a’an naq yoo li hab’. Tenq’aheb’ chixjuntaq’eetankil a’an rik’in li kanab’ank-ib’ chiru li Qaawa’. K’a’ut naq naqakanab’ a’an chiqakolb’al sa’ musiq’ej?

• Naru nakatenq’aheb’ laa kok’al chixtawb’al chan ru naq li rey aj Asa ut li rey aj Josafat ke’xk’uleb’ li ch’a’ajkilal naq ke’xkanab’ rib’ sa’ ruq’ li Qaawa’ (chi’ilmanq 2 Kronikas 14:11; 20:3–5, 12). Wotzomaq cherib’il eerib’ chan ru naq naru nekek’ut chiru li Qaawa’ naq nekekanab’ eerib’ sa’ ruq’.

• Li perel re kok’ k’anjel re li xamaan a’in naru tixtenq’aheb’ laa kok’al chixtawb’al ru li seraq’ chirix lix tij laj Josafat ut lix sumenkil li Qaawa’. Laa’at ut eb’ laa kok’al naru nekeye resil hoonal naq li Dios kirab’iheb’ ut kixsumeheb’ lee tij. Naru ajwi’ nekewotz resil hoonal naq ke’sumeek lee tij jo’q’e ut jo’ chanru ink’a’ oyb’eninb’il eeb’aan. Jun li b’ich chirix li tijok, jo’ “Ninmutz’ li wu” (B’ichleb’aal choq’ reheb’ li Kok’al, 18) naru natenq’an chixkawob’resinkil lix paab’aaleb’ laa kok’al.

• Re tzolok chirix lix xuwajelil li q’etq’etil, laa kok’al naru neke’xyiib’ jun najt xtermil kab’l rik’ineb’ kok’ kaaxukuut malaj sek’. Naq te’xk’e li junjunq chi kaaxukuut malaj sek’ sa’ li najt xteramil kab’l, tenq’aheb’ chixk’eeb’al reetal jun reheb’ lix chaab’il k’anjel laj Osias sa’ 2 Kronikas 26:3–15. Chirix naq yiib’anb’ilaq chik li najt xteramil kab’l, tz’ilomaq rix chan ru naq laj Osias kiru raj chirilb’al re naq ink’a’ taat’ane’q. K’a’ raj ru taaruuq tixt’an? Chirix a’an, naq yooqex chirilb’al li raqal 16, naru neketz’il rix k’a’ru naraj naxye li “q’etq’eto’k toj reetal xsik’b’al rahilal.” Ye reheb’ laa kok’al li kixk’ul laj Osias sa’eb’ li raqal 16–23. Kanab’eb’ chixt’anb’al li najt xteramil kab’l. Aatinanqex chirix li na’ajman ru re kanaak chi tuulan qach’ool.

• Li jalam-uuch wan chi taqe’q naxk’ut laj Esekias naq kixb’oqeb’ li rech kab’al Juda sa’ li awa’b’ejihom re Israel chixninq’ehinkil li Paswa sa’ komonil. Naru nakawil li jalam-uuch a’in rik’ineb’ laa kok’al ut teeril 2 Kronikas 30:18–19, li naxye naq ke’wan li ula’ li ink’a’ ke’xch’ajob’resi rib’ a’ yaal lix chaq’rab’ laj Moises. K’a’ru kixb’aanu laj Esekias? K’a’ raj ru ke’reek’a li ula’ xb’aan li kixb’aanu? Tenq’aheb’ laa kok’al chixk’oxlankil chan ru naru te’rileb’ li ras riitz’in jo’ kixb’aanu laj Esekias.