1 Reyes 12–13; 17–22

Chan raj ru taach’olob’ lix majelal li rey aj Roboam, li ralal laj Salomon, sa’ 1 Reyes 12:1–14? B’ar wankeb’ li na’leb’ re li Kristo li ke’ru raj chixtenq’ankil laj Roboam chixkolb’al lix awa’b’ejihom? (chi’ilmanq raqal 7; Mateo 20:25–28; Mosiah 2:10–21). Chan ru naru taayu’amiheb’ li na’leb’ a’an jo’ aj jolominel—maare sa’ laa b’oqb’al sa’ li Iglees malaj aajunes aawib’ sa’ laa yu’am?

Li profeet aj Elias kixpatz’ re jun xmalka’an naq tixk’e xwa ut ruk’a re rub’elaj naq tixch’oolani rib’ a’an ut li ralal li yoo xtz’okajik. K’a’ut naq kixb’aanu a’in? Lix tz’aam laj Elias naru na’ilman jo’ jun li osob’tesink choq’ re li ch’ina junkab’al a’in. Ke’raj ru osob’tesiik xb’aan li Qaawa’, ut li mayejak naxk’e li osob’tesiik—jo’ ajwi’ lix kawresinkil li qapaab’aal.

Naq yooqat chirilb’al 1 Reyes 17:8–16, k’oxla naq laa’at raj li xmalka’an a’in. K’a’ru nawulak chawu chirix li xmalka’an? Naru ajwi’ nakatz’iib’a jalan jalanq na’leb’ li neke’raj ru li paab’aal chirix li Jesukristo re xb’aanunkil (chi’ilmanq Choq’ re Xkawilaleb’ li Saaj: Jun tenq’ re xsik’b’al ru laa b’e [2022]). K’a’ru nakatzol rik’in li xmalka’an a’in chirix xk’anjalenkil laa paab’aal?

Chan ru naq li kixb’aanu laj Eliseo sa’ 1 Reyes 19:19–21 chanchan li kixb’aanu li xmalka’an?

K’oxlaheb’ li mayej nakak’e re xtaaqenkil li Kolonel. K’a’ru naxk’ut 1 Reyes 17:8–16; 19:19–21 chawu chirixeb’ li mayej a’in? Chan ru naq laa nawom chirix li Kolonel nakatxtenq’a naq a’an naxpatz’e aaqe naq taak’e jun mayej? Chan ru naq li Kolonel nakatrosob’tesi?

Chi’ilmanq ajwi’ Mateo 4:18–22; 6:25–33; Lukas 4:24–26; “Elías y la viuda de Sarepta” (video), Biblioteca del Evangelio.

10:13

Eb’ laj Israelita maare ke’reek’a naq us xloq’oninkil laj Bahal, li nawb’il ru jo’ li dios re li kaq-sut-iq’ ut li hab’. Chirix xnumik oxib’ chihab’ sa’ li chaqi-eel, q’axal neke’raj ru li hab’. Jo’kan ajwi’ li rey ut li rixaqil ke’xye naq us xloq’oninkil laj Bahal. Naq yooqat chirilb’al 1 Reyes 18, k’oxla k’a’ut naq li kristiaan sa’ li kutan a’in te’wiib’anq raj xch’ool chixtaaqenkil li Qaawa’. Sa’ li ch’ol a’in, k’a’ru nakak’oxla naq kiraj xk’utb’al li Qaawa’ chirix a’an? K’a’ru li xak’ul laa’at li xatxtenq’a chixk’eeb’al aach’ool chixtaaqenkil li Kolonel?

Chi’ilmanq ajwi’ D. Todd Christofferson, “La elección y el compromiso” (ch’utam choq’ reheb’ li saaj sa’ chixjunil li ruchich’och’, 12 enero, 2020), Biblioteca del Evangelio.

Li sachb’a-ch’oolejil kixk’ul laj Elias sa’ xb’een li Tzuul Karmelo ink’a’ kixseeb’ob’resi lix k’anjel laj Elias. Relik chi yaal, jwal xiwxiw li wan wi’, jo’kan naq kixmuq rib’ sa’ jun ochoch pek sa’ li yamyookil ch’och’. Aran, chi rahob’tesinb’il xb’aan li junaatal ut rahilal xch’ool, kixk’ul jun na’leb’ rik’in li Qaawa’ li jwal jalan wi’chik chiru li kixk’ul sa’ li Tzuul Karmelo. K’a’ru naxk’ut lix numsihom laj Elias sa’ 1 Reyes 19:1–18 chawu chirix li naxye li Qaawa’ aawe naq nakawaj ru tenq’aak?

K’oxla hoonal naq xaweek’a naq li Qaawa’ yoo chawaatinankil. Chan ru naq a’an na’aatinak aawik’in? K’a’ut naq li aatin “timil timil” chaab’il re xch’olob’ankil lix yaab’ xkux li Musiq’ej? K’a’ruheb’ chik li aatin nakataw sa’ Helaman 5:30; Tzol’leb’ ut Sumwank 6:22–23; 11:12–14? K’a’ru tento taab’aanu re naq tatb’eresiiq rajlal xb’aan li Qaawa’?

Chi’ilmanq ajwi’ Salmos 46:10.

• Re xtenq’ankileb’ laa kok’al chixtzolb’aleb’ li seraq’ chirix li paab’aal sa’ 1 Reyes 17, naru nakak’ut chiruheb’ jalam-uuch malaj kok’ k’a’aq re ru re reetalinkileb’ li seraq’, jo’ jun tz’ik, li kaxlan wa, malaj jun ch’ina al. Naq yooqat chixk’utb’aleb’ li seraq’ a’in chiruheb’ laa kok’al, patz’ reheb’ naq te’xtaw li jalam-uuch malaj k’a’aq re ru nareetaliheb’ li seraq’. “Li profeet aj Elias” (sa’ Eb’ li Esilal sa’ li Najter Chaq’rab’, 121–124) naru nakatxtenq’a chixk’utb’aleb’ li seraq’. K‘a‘ru neke‘xk‘ut chiqu li seraq‘ a‘an chirix xpaab‘ankil li Jesukristo?

  

  1:58

• Tenq’aheb’ laa kok’al chixk’oxlankil chan ru naru neke’xk’ut xpaab’aaleb’ chirix li Jesukristo. B’icha rik’ineb’ jun b’ich chirix li paab’aal, ut wotzomaq cherib’il eerib’ k’a’ru neketzol chirix li paab’aal sa’ li b’ich.

• Laa kok’al naru neke’xyiib’ xjalam-uuch li kixpatz’ li Qaawa’ re li xmalka’an naq tixk’e re laj Elias (chi’ilmanq 1 Reyes 17:12–13) ut li kixk’ul li xmalka’an choq’ reeqaj a’an (chi’ilmanq 1 Reyes 17:15–16). (Chi’ilmanq ajwi’ li perel re kok’ k’anjel re li xamaan a’in.) Naru ajwi’ neke’xsik’ xjalam-uucheb’ kristiaan li ke’xmayeja li ajb’il xb’aaneb’ a’an choq’ re xk’ulb’al li k’a’ru k’a’jo’ wi’chik xchaab’ilal. Patz’ reheb’ laa kok’al naq te’xtaweb’ li jalam-uuch sa’ li Hu reheb’ li Jalam-uuch re li Evangelio malaj Kim, Taaqehin. K’a’ru naxpatz’ li Qaawa’ naq taqamayeja? Chan ru naq nokorosob’tesi a’an?

• Naq yooqex chirilb’al 1 Reyes 18:17–39, laa kok’al naru te’xsik’ ru jun raqal ut te’xyiib’ xjalam-uuch li naxye. Naru te’roksi lix jalam-uucheb’ re xwotzb’al li seraq’ rik’ineb’ li raatin. (Chi’ilmanq ajwi’ “Laj Elias ut eb’ laj tij re laj Bahal,” sa’ Eb’ li Esilal sa’ li Najter Chaq’rab’, 125–128.)

  

  2:17

• Tenq’aheb’ laa kok’al chixk’oxlankil jo’q’e maare te’raj ru xsik’b’al ru ma te’xtaaqe li Jesukristo malaj ink’a’. Naru te’xyiib’ xjalam-uucheb’ a’an naq yookeb’ chixsik’b’al ru li us. Wotzomaq cherib’il eerib’ k’a’ut naq neketaaqe li Jesus.

• Naq yooqat chixseraq’inkil 1 Reyes 19:9–12, patz’ reheb’ laa kok’al naq te’reek’asi rib’ re reetalinkil li kawil iq’, li hiik, ut li xam. Chirix a’an, patz’ reheb’ naq ch’anch’o te’wanq, ut teeyaab’asi chi q’un xyaab’ eekux, “chirix chik li xam aka’ chik li mayuus, timil timil ki’eek’ank” (raqal 12). (Chi’ilmanq ajwi’ “Li Qaawa’ na’aatinak rik’in laj Elias,” sa’ Eb’ li Esilal sa’ li Najter Chaq’rab’, 129–131.) Seraq’i reheb’ laa kok’al hoonal naq li Santil Musiq’ej ki’aatinak aawik’in chi q’un xyaab’ xkux.

  

  1:48

• B’ichahomaq chi q’un xyaab’ eekux jun li b’ich chirix li Musiq’ej, jo’ “Li Santil Musiq’ej” (B’ichleb’aal choq’ reheb’ li Kok’al, 56). K’a’ru naru naramok qe chirab’inkil li Musiq’ej? K’a’ru naru natenq’ank qe chirab’inkil?