2 Samuel 11–12; 1 Reyes 3; 6–9; 11

Wan naq naqileb’ li kristiaan li chanchan naq jwal kaweb’ xpaab’aal, ut naqak’oxla naq moko neke’aaleek ta. Li ink’a’ us kixb’aanu laj David sa’ 2 Samuel 11 naxk’ut xyaalal naq moko yaal ta a’an. K’a’ru nakatzol rik’in li kixk’ul laj David? Eb’ li patz’om a’in naru nakate’xtenq’a chixtzolb’al 2 Samuel 11–12:

• K’a’ru kixb’aanu laj David li kixk’e chi b’eek sa’ xb’ehil li maak? K’a’ru li tiikil na’leb’ kiru raj chixsik’b’al ru ruuchil a’an? (Chi’ilmanq ajwi’ li video “Volcar la mirada,” Biblioteca del Evangelio.)

  

  4:15

  Roksinkileb’ li video. Eb’ li video naru nakate’xtenq’a chirilb’aleb’ li seraq’ sa’eb’ li loq’laj hu ut chixk’oxlankil chan ru naq neke’xk’e aana’leb’. K’oxla chan ru naru nakawoksiheb’ re xchaab’ilob’resinkil li tzolok ut li k’utuk nakab’aanu. Naq yoo chi k’utmank “Volcar la mirada” (Biblioteca del Evangelio), maare taaxaqab’ li video re k’oxlak malaj aatinak chirixeb’ li patz’om yeeb’ileb’ sa’ li tusleb’ aatin a’in.

• K’a’ru naxb’aanu laj xik’ ilonel re aajalb’ehinkil toj sa’ xb’ehil li maak? K’a’ru naru nakab’aanu re naq kolb’ilaq aawix sa’ musiq’ej?

• K’e reetal li kixb’aanu laj David chirix naq kirab’i lix seraq’ laj Natan sa’ 2 Samuel 12:1–6. A’ yaal li kixb’aanu, chan ru naq kixk’oxla rib’ laj David? K’a’ru xb’aanu li Qaawa’ re aatenq’ankil chixk’oxlankil aawib’ sa’ xyaalal?

• Chan raj ru taak’os ru li kik’ulman sa’ 2 Samuel 11–12 sa’ jun ajwi’ li q’usum?

Rilb’al resil li ink’a’ us kixb’aanu laj David naru tatxk’e chi tzolok chirix lix xuwajelil li pornografia ut li maakob’k sa’ tz’ejwalej. Naru nakataw laa na’leb’ sa’ Choq’ re Xkawilaleb’ li Saaj: Jun tenq’ re xsik’b’al ru laa b’e, sa’eb’ li raqal “Li k’a’ru taab’aanu sa’ tz’aqal li hoonal” ut “Loq’ laa junxaqalil” (perel 21–28). Naru nakawil li hu a’an re xtawb’al li na’leb’ li kiru raj chixtenq’ankil laj David chixsik’b’al ru li us. Malaj naru nakawil “Li Jesukristo tatxtenq’a” (perel 6–9) re xtawb’al jun na’leb’ kiru raj chixtenq’ankil laj David chi sutq’iik rik’in li Qaawa’.

Naru nakab’icha jun b’ich jo’ “Rajlal nawaj aawu” (Eb’ li B’ich, 53) ut taak’oxla chan ru naq li Qaawa’ xatxkawob’resi naq xat-aaleek.

Chi’ilmanq ajwi’ 2 Nefi 28:20–24; Ulisses Soares, “Sik’ li Kristo sa’ chixjunil laa k’oxlahom,” Jolomil ch’utub’aj-ib’ re octubre 2020; “Uso responsable de la tecnología,” Biblioteca del Evangelio; “Cuida tus pasos” (video), Biblioteca del Evangelio.

2:36

Wi ta li Qaawa’ tixye aawe, “Tz’aama chiwu li k’a’ru taawaj ut laa’in tink’e aawe” (1 Reyes 3:5), k’a’ raj ru taatz’aama chiru? K’a’ru nawulak chawu chirix lix tz’aam laj Salomon? K’oxla k’a’ut naq chaab’il maatan “li na’leb’ re b’eresink,” re “xnawb’al b’ar wan li us ut li ink’a’ us” (raqal 9). Kʼaʼru naru taabʼaanu re xsik’b’al li maatan a’in?

Chi’ilmanq ajwi’ Moroni 7:12–19.

Sa’ 1 Reyes 6–7 nach’olob’aman resil li santil ochoch kixkab’la laj Salomon choq’ re li Qaawa’. Li k’a’ru nach’olob’aman aran maare ink’a’ jwal nim xwankil choq’ aawe jo’ choq’ reheb’ laj Israelita najter chaq. A’ut naq nakawileb’ li ch’ol a’in maare taak’e reetal naq jwal nim xloq’al choq’ reheb’ naq wan jun rochoch li Qaawa’. K’a’ut naq nim xloq’al choq’ aawe?

Naru nakak’oxla k’a’ru nareetali li junjunq xcha’al li santil ochoch re laj Salomon. K’a’ru naru neke’reetali li kerubin, li kala’, ut li utz’u’uj sa’ 1 Reyes 6:35? (Chi’ilmanq ajwi’ Genesis 3:24.)

Sa’ li ch’ol 8 natawman li tij kixk’e laj Salomon chirix kab’lanb’il chik li santil ochoch (che’ilmanq li raqal 22–61). Maare naru nakatz’iib’aheb’ li osob’tesink kixtz’aama laj Salomon. K’a’ru nawulak chawu chirixeb’ li osob’tesink a’in? (K’e ajwi’ reetal li kixyeechi’i li Qaawa’ sa’ 2 Reyes 6:11–13; 9:1–9.) Wi ak xatwulak sa’ rochoch li Qaawa’, k’oxla li xanumsi naq xatloq’onin aran. Chan ru naq xpaab’ankileb’ laa sumwank re li santil ochoch nakatxtenq’a chixk’ulb’aleb’ li rosob’tesihom li Qaawa’?

Chi’ilmanq ajwi’ Tzol’leb’ ut Sumwank 109; Henry B. Eyring, “Sa’ li santil ochoch,” Jolomil ch’utub’aj-ib’ re abril 2021.

K’a’ru naraj naxye naq “wan laa ch’ool … junes choq’ re li Qaawa’”? (1 Reyes 8:61). Ma jalan a’an rik’in xb’aanunkil chixjunil chi tz’aqal re ru? Chan ru? Il 1 Reyes 11:1–11, ut k’e reetal k’a’ru kixye li Qaawa’ chirix xch’ool laj Salomon. Naru nakak’oxla ma wan k’a’ruhaq sa’ laa yu’am li truuq raj tixjalb’ehi laa ch’ool rik’in li Qaawa’ toj rik’ineb’ li “jalanil dios.”

• “Li rey aj David” sa’ Eb’ li Esilal sa’ li Najter Chaq’rab’, 117–20, naru nakaxtenq’a chixseraq’inkil chiruheb’ laa kok’al li seraq’ wan sa’ 2 Samuel 11. Naru nakapatz’ reheb’ laa kok’al naq te’xye k’a’ru li ink’a’ us kixb’aanu laj David, ut te’xye k’a’ raj ru kiru chixb’aanunkil ruuchil a’an. K’a’ru naru naqab’aanu naq noko’aaleek li naru nokoxtenq’a chixsik’b’al ru li us?

  

  2:11

• Rilb’al resil lix maak laj David naru texxtenq’a chi aatinak chirix xxuwajelil li pornografia. Li video “¿Qué debo hacer si veo pornografía?” (Biblioteca del Evangelio) naru nekexxtenq’a. Tenq’aheb’ laa kok’al chixk’uub’ankil k’a’ru te’xb’aanu naq te’xk’e reetal li pornografia.

  

  5:46

• Naq yooqex chi tzolok chirix lix q’axtesinkil li santil ochoch sa’ 1 Reyes 8, naru nekerileb’ xjalam-uuch li santil ochoch sa’ li tusleb’ aatin re li xamaan a’in. Kanab’eb’ laa kok’al chixyeeb’al k’a’ru neke’ril sa’eb’ li jalam-uuch. Naru nakaka’jultikaheb’ li raqal 57–58. K’a’ru naraj naxye b’eek sa’ chixjunileb’ lix b’e li Qaawa’? (Chi’ilmanq 1 Reyes 8:58). Rajlal sut naq te’xsume li patz’om, laa kok’al naru neke’xk’e jun yokb’.

• Ye reheb’ laa kok’al chan ru naq eb’ laa sumwank re li santil ochoch nakate’xtenq’a chi b’eek sa’ xb’e li Qaawa’. Naru nakaye reheb’ k’a’ruheb’ li sumwank a’an (chi’ilmanq Jolomil K’anjenel Hu, 27.2, Biblioteca del Evangelio). Naru ajwi’ nekeb’icha jun b’ich jo’ “Sa’ li santil ochoch” (B’ichleb’aal choq’ reheb’ li Kok’al, 99).

• Naq nekeril chan ru naq eb’ li rixaqil laj Salomon ke’xjal xna’leb’ naru nekex’aatinak chirixeb’ li “jalanil dios”—malaj yalaq k’a’ru loq’oninb’il malaj raab’il xb’aaneb’ li kristiaan ruuchil li Qaawa’. Chan ru naqak’ut naq naqara li Qaawa’ chiru yalaq chik k’a’ru sa’ li qayu’am?