1 Samuel 8–10; 13; 15–16

Sa’ 1 Samuel 8 nayeeman resil li k’a’ru kijalok chi jun waakaj xb’eheb’ laj Israelita. Re naq kolb’ilaqeb’ rix chiruheb’ li xik’ neke’ilok reheb’, eb’ laj Israelita ke’raj li ak wan reheb’ li tenamit chixsutameb’—jun rey li taa’awa’b’ejinq sa’ xb’eeneb’. Naq nakawil li ke’xpatz’ re li Qaawa’ ut li kixsume a’an, k’oxla ani nakat-ilok wi’ re xtawb’al laa kolb’al ut laa b’eresinkil. K’a’ru naraj naxye naq taakanab’ li Qaawa’ “chi taqlank sa’ aab’een” (1 Samuel 8:7).

Chiruheb’ li xamaan chalkeb’ re, taawil resileb’ li rey li ke’b’oqe’ chi jolomink sa’ xb’een Israel. Naq yooqat chirilb’al resileb’ a’an, k’oxlaheb’ li patz’om a’in:

• Chan ru naq lix q’usum li Qaawa’ kitz’aqlok ru sa’ 1 Samuel 8:10–18?

• K’a’ru ke’xk’ul li ralal xk’ajol laj Israel chirix naq ke’xsik’ ru awa’b’ejiik xb’aan jun ruchich’och’il rey?

• Chan ru naq jalan li Jesukristo rik’ineb’ li rey sa’ ruchich’och’? K’e reetal li k’a’ru wan sa’ ruchich’och’ li tento taawisi sa’ laa yu’am re naq li Kristo taawanq choq’ aaRey.

Chi’ilmanq ajwi’ “Li Kristo wan choq’ rey!,” Eb’ li B’ich, 33.

Il chan ru naq li Dios kixsik’eb’ ru li rey choq’ re Israel sa’ 1 Samuel 9–10 ut 16 (il tz’aqal 9:15–17; 10:1–12; 16:1–13). Sik’eb’ li raqal li nakate’xtenq’a chixtawb’al ru k’a’ru naraj naxye “bʼoqeʼk xbʼaan li Dios, rikʼin profeetil aatin” sa’ lix Iglees li Qaawa’ sa’ li kutan a’in (Eb’ lix Raqalil li Paab’aal 1:5). Maare naru nakak’e aawib’ sa’ xna’aj jun laj jolominel li nab’oqok (laj Samuel), li ani nab’oqe’ (laj Saul ut laj David), ut li tenamit b’oqb’ileb’ chi k’anjelak chiru (eb’ laj Israelita). K’a’ru nakatzol rik’in li raatineb’ sa’eb’ li ch’ol a’in?

Naq naqak’e reetal xka’ch’inal lix ch’ool laj Saul sa’ 1 Samuel 10, nasach qach’ool chirilb’al naq kixpo’resi xch’ool ut kixjipob’resi xk’a’uxl chirix naq ki’ok jo’ rey (1 Samuel 15:23). K’a’ut naq kik’ulman a’an? Sa’ 1 Samuel 13:5–14, k’a’ru li na’leb’ nakawil li xk’ehok re laj Saul chi t’ane’k?

Sa’ 1 Samuel 15, taawil naq laj Saul kixq’et xtaqlahom li Qaawa’ xb’aan naq kixk’oxla naq wan rajb’al xq’etb’al. Re xtawb’al aana’leb’ rik’in li ink’a’ us kixsik’ ru laj Saul, il li raqal 22 ut sa’ xna’ajeb’ li aatin “k’atb’il mayej” ut “xxeeb’ul li karneer” k’e li k’a’ru chanchan naq chaab’il a’b’an moko nim ta wi’chik xwankil chiru li ab’ink chiru li Qaawa’. K’a’ru li osob’tesinb’ilat wi’ naq nakak’e li rajom xch’ool li Qaawa’ sa’ xb’een na’ajej sa’ laa yu’am?

Ma wan hoonal naq xasik’ ru k’a’ruhaq malaj anihaq xb’aan “chan ru na’ilok,” ut moqon xak’e reetal naq moko us ta li xasik’ ru? Maare xatzeka li tzakemq chaab’il na’ilok a’ut moko sa ta. Maare xaraq aatin chirix anihaq chi moko tiik ta ru.

Naq laj Samuel yoo chaq chixsik’b’al jun ak’ rey choq’ re Israel, li Qaawa’ kixk’ut jun b’e jwal chaab’il chiru. Il a’an sa’ 1 Samuel 16:6–7, ut maare naru nakatz’iib’a chan ru naq li kristiaan neke’rileb’ li rech kristiaanil a’ yaal “chan ru neke’ilok.” Naru nakataw li na’leb’ chirix a’an sa’ li raatin li Elder Christophe G. Giraud-Carrier, “Laa’o li ralal xk’ajol” (Jolomil ch’utub’aj-ib’ re octubre 2023). K’a’ru naraj naxye rilb’al “li ch’oolej,” jo’ naxb’aanu li Qaawa’? (1 Samuel 16:7). Naru ajwi’ nakataw li na’leb’ chirix a’in sa’ li raatin li Elder Giraud-Carrier. Naru nakak’oxlaheb’ jalan chik hoonal naq li Kolonel kiril chan ru na’ilok junaq. (Chi’ilmanq Markos 12:41–44; Lukas 5:1–11; 19:1–9; Jwan 4:5–30; Moises 6:31–36.) K’a’ru nakatzol sa’eb’ li seraq’ a’an?

Chan ru naru nakawileb’ laa was aawiitz’in—ut nakawil aawib’ jo’ naxb’aanu li Kolonel? Chan ru naq xb’aanunkil a’an tixjal laa wanjik rik’ineb’ laa was aawiitz’in? K’e aach’ool chixyeeb’al re anihaq li chaab’ilal nakawil sa’ xch’ool.

Chi’ilmanq ajwi’ Ulisses Soares, “As iitz’inb’ej rik’in li Kristo,” Jolomil ch’utub’aj-ib’ re octubre 2023.

• Naq yooqat chirilb’al 1 Samuel 8 rik’ineb’ laa kok’al, tenq’aheb’ chixk’eeb’al reetal k’a’ut naq laj Samuel kixye reheb’ laj Israelita naq moko us ta naq taawanq jun rey. K’a’ut naq chaab’il wi’chik naq taawanq li Jesukristo choq’ rey? Naru teeyiib’ jun koroon rik’in hu, ut naq li junjunq tixk’e sa’ xb’een xjolom tixye k’a’ru naru naqab’aanu re xk’utb’al naq naqaj naq li Jesukristo taawanq choq’ qaRey. (Chi’ilmanq ajwi’ Jeremias 23:5; Tzol’leb’ ut Sumwank 45:59.)

• Eb’ li seraq’ chirix li Dios naq kixsik’ ru laj Saul ut laj David re naq te’wanq choq’ rey naru neke’xtenq’aheb’ laa kok’al chixtawb’al ru chan ru naq neke’b’oqe’ li komon chi k’anjelak sa’ li Iglees anajwan rik’in k’utb’esinb’il na’leb’. Re xk’utb’aleb’ li seraq’ a’in chiruheb’, naru nakatz’iib’a li kik’ulman sa’eb’ li seraq’ chiruheb’ kok’ hu, ut taakanab’eb’ laa kok’al chixtusub’ankileb’ li hu naq yooqat chirilb’aleb’ li raqal sa’ li loq’laj hu (chi’ilmanq ajwi’ “Li saaj aj David” sa’ Eb’ li Esilal sa’ li Najter Chaq’rab’, 110–111). Chirix a’an naru nekex’aatinak chirix hoonal naq li Dios xexrosob’tesi rik’in musiq’ejil wankilal re xb’aanunkil lee k’anjel malaj b’oqb’al (chi’ilmanq 1 Samuel 10:9–10).

  

  1:16

• Maare us ajwi’ naq taak’ut li ro’ xraqalil li paab’aal chiruheb’ laa kok’al. Ye reheb’ chan ru naq xak’ul laa b’oqb’al sa’ li Iglees. Chan ru nakanaw naq b’oqb’ilat xb’aan li Dios?

• Naru nakawoksiheb’ kok’ k’a’aq re ru re xtenq’ankileb’ laa kok’al chixtawb’al ru li na’leb’ wan sa’ 1 Samuel 16:7. Naru nakak’ut chiruheb’ jun xtib’el wa malaj junaq li hu chi lanlo rix malaj chi muqmu sa’ junaq ka’a’q re ru jalan tz’aqal. K’a’ru naxye 1 Samuel 16:7 ut li ch’ina na’leb’ a’in chirix chan ru tento taqil qib’ laa’o ut eb’ li qas qiitz’in? B’ichahomaq jun li b’ich chirix li na’leb’ a’in, jo’ “Li rahok cherib’il eerib’” (B’ichleb’aal choq’ reheb’ li Kok’al, 74).

  Oksiheb’ li k’anjeleb’aal sa’ li k’utuk. Naq laa kok’al neke’ru chirilb’al ut chixch’e’b’al k’a’ruhaq li naxk’ut xyaalal li na’leb’ re li evangelio, ak re naq taanaq a’an sa’ xch’ooleb’. Naq yooqat chirilb’al 1 Samuel 16:7 rik’ineb’, naru nakakanab’eb’ chixtawb’al reetalil li ilusion optica re xk’utb’al naq tento taqayal qaq’e chi ilok jo’ chanru na’ilok li Qaawa’—“rilb’al li ch’oolej”—sa’ xna’aj rilb’al “chan ru na’ilok.”

• Naru nekewotz cherib’il eerib’ eenumsihom b’ar wi’ xetzol k’a’ut naq tento “teeril li ch’oolej,” ut ink’a’ ka’ajwi’ “chan ru na’ilok” (raqal 7). Naru ajwi’ nekeye cherib’il eerib’ li chaab’ilal nekeril sa’ xch’ooleb’ li junjunq.