1 Samuel 17–18; 24–26; 2 Samuel 5–7

Li seraq’ chirix laj David ut laj Goliat a’an jun seraq’ jwal nawb’il ru sa’eb’ li loq’laj hu. Ch’olch’o naq k’aynaqo chirilb’al laj David. A’b’anan naq yooqat chirilb’al chi ak’il 1 Samuel 17, k’oxla ajwi’ li raatineb’ li siir chik chi kristiaan sa’ li ch’ol a’in (wan xk’ab’a’eb’ rub’el a’in). K’a’ru nakatzol chirixeb’ a’an ut rajomeb’ xch’ool? K’a’ru nakatzol chirix laj David? Chan ru naq jalan a’an?

• Laj Goliat: eb’ li raqal 8–10, 43–44

• Laj Eliab: raqal 28

• Laj Saul: raqal 33

• Laj David: eb’ li raqal 26, 32, 34–37, 39, 45–47

Sa’ laa seraq’ laa’at, us ta moko jwal nawb’il ta ru jo’ xseraq’ laj David, taataweb’ li ch’a’ajkilal jwal ninqeb’ jo’ laj Goliat, ut taanumsiheb’ hoonal taak’anjela wi’ laa paab’aal chirix li Qaawa’. K’a’ru nakatzol rik’in laj David li nakatxtenq’a chixk’ulb’aleb’ li ch’a’ajkilal sa’ laa seraq’? Naru ajwi’ nakawil li raatin li Awa’b’ej Camille N. Johnson, “B’oq li Kristo chixtz’iib’ankil laa seraq’” (Jolomil ch’utub’aj-ib’ re octubre 2021) chi wan sa’ aak’a’uxl jun reheb’ laa ch’a’ajkilal. Sik’ xsumenkileb’ li patz’om jo’eb’ a’in: Chan ru naraj li Qaawa’ naq tinwileb’ lin ch’a’ajkilal? Chan ru naq a’an xinxtenq’a junxil? Chan ru naru nink’ut chiru naq ninkanab’ a’an chixtz’iib’ankil lin seraq’?

Maare ak nakanaw naq nujenaq lix raqik lix seraq’ laj David rik’in rahil ch’oolej (chi’ilmanq 2 Samuel 11). Wi tatruuq raj chixk’eeb’al xna’leb’ laj David chirix naq kipleetik rik’in laj Goliat, k’a’ raj ru taaye re? Chan ru naru nakawoksi li na’leb’ a’an sa’ laa yu’am?

Chi’ilmanq ajwi’ “El Señor me librará” (video), Biblioteca del Evangelio.

3:24

Rochb’eeneb’ li qach’a’ajkilal sa’ junesal, naqanumsi ajwi’ ninqi ch’a’ajkilal toch’b’il wi’ chixjunil li ruchich’och’. Naq “naxch’utub’ rib’” li wankilal re maa’usilal re pleetik rik’in li wankilal re usilal (1 Samuel 17:1), maare naqapatz’ chan tab’i’ ru naru nokotenq’an qajunes qib’. K’a’ru nakataw sa’ lix seraq’ laj David li naxk’e aayo’onihom?

Chi’ilmanq ajwi’ “Sa’ xk’anjel li Dios chiqayal tz’aqal qaq’e,” Eb’ li B’ich, 155.

Naq yooqat chirilb’al 1 Samuel 18, k’e reetal xjalanil laj Saul ut laj Jonatan, li ralal (li taa’ok raj choq’ rey wi ta maak’a’ laj David). K’a’ru ke’xb’aanu laj Saul ut laj Jonatan naq ke’ril laj David chi usaak? K’a’ru nakatzol rik’in li kik’ulman?

K’a’ru nakawil sa’ xna’leb’ ut xb’aanuhom laj Jonatan li nakatxk’e chixk’oxlankil li Jesukristo?

Sa’ 1 Samuel 24–26, k’e reetal li na’leb’ chirix li q’etq’eto’k, li kuyuk maak, ut li ramok-ib’. Naru ajwi’ nakawil li raatin li Elder Mark A. Bragg, “Xtuqulal li wank joʼ li Kristo” naq yooqat chi tzolok (Jolomil ch’utub’aj-ib’ re abril 2023). K’a’ru ke’xb’aanu laj David, xAbigahil, ut xkomoneb’ chik re wank—malaj ink’a’ wank—jo’ li Kristo sa’eb’ li ch’ol a’in? Ma wankeb’ hoonal naq nakatru chi wank jo’ li Kristo?

Li raatin li Hermana Kristen Yee, “Li k’a’ru xchaq’al ru ruuchil li cha: Li b’e aj k’irtesinel re xkuyb’al li maak” (Jolomil ch’utub’aj-ib’ re octubre 2022), naru nakatxtenq’a chixtz’ilb’al rix 1 Samuel 25. Chan ru naq li xAbigahil chanchan chik li Jesukristo?

Laj David kinumta sa’ xb’een laj Goliat, a’b’an toj wan li ch’a’ajkilal rik’ineb’ laj Filisteo. Naq yooqat chirilb’al 2 Samuel 5:17–25, k’oxla chan ru naq li k’a’ru kixb’aanu laj David naru tatxtenq’a sa’ laa ch’a’ajkilal (chi’ilmanq ajwi’ 1 Samuel 23:2, 10–11; 30:8; 2 Samuel 2:1). Chan ru nakat-osob’tesiik naq nakayu’ami li na’leb’ k’utb’esinb’il chawu?

Naq laj David kixyeechi’i xkab’lankil jun li ochoch, malaj li santil ochoch, choq’ re li Qaawa’ (chi’ilmanq 2 Samuel 7:1–3), li Qaawa’ kixye re naq li ralal laj David taakab’lanq re (che’ilmanq li raqal 12–15; chi’ilmanq ajwi’ 1 Kronikas 17:1–15). Li Qaawa’ kixye ajwi’ naq tixkab’la jun “ochoch” choq’ re laj David, li naraj naxye naq te’wanq ralal xk’ajol, ut naq lix k’ojarib’aal k’ojk’ooq sa’ xna’aj chi junelik (chi’ilmanq 2 Samuel 7:11, 16, 25–29; Salmos 89:3–4, 35–37). Kitz’aqlok ru li yeechi’ihom a’in rik’in li Jesukristo, li qaJunelikil Rey, a’an ralal xk’ajol laj David (chi’ilmanq Mateo 1:1; Lukas 1:32–33; Jwan 18:33–37).

• Naru nakawoksi “Laj David ut laj Goliat” sa’ Eb’ li Esilal sa’ li Najter Chaq’rab’, 112–116, re xtenq’ankileb’ laa kok’al chixnawb’al k’a’ru kik’ulman sa’ 1 Samuel 17:20–54. Chirix a’an naru nakakanab’eb’ chixseraq’inkil a’an rik’ineb’ li jalam-uuch li wankeb’ sa’ li tusleb’ aatin a’in. Patz’ reheb’ k’a’ru naraj li Qaawa’ naq te’xtzol sa’ li seraq’ a’in.

  

  2:36

• Naru ajwi’ neketz’iib’aheb’ li ch’a’ajkilal maare te’xnumsi sa’ xyu’ameb’. Tenq’aheb’ chixtawb’al li raatin laj David li taatenq’anq reheb’ sa’eb’ li ch’a’ajkilal a’in (chi’ilmanq 1 Samuel 17:26, 32, 34–37, 45–47). Ye reheb’ laa kok’al chan ru naq li Jesukristo xatxtenq’a sa’eb’ li ch’a’ajkilal.

• Laa kok’al naru te’b’eeq chanchan ta wi’ naq jo’ laj David yookeb’ chi xik chi pleetik rik’in laj Goliat, ut te’xb’icha jun li b’ich chirix li kawil ch’oolej, jo’ “Kawaq inch’ool” (B’ichleb’aal choq’ reheb’ li Kok’al, 85).

• Chan ru naq laa kok’al naru te’xtaw xna’leb’ rik’in li amiiwul ke’wan wi’ laj Jonatan ut laj David? Naru nakak’e re li junjunq wiib’ li aamej yiib’anb’il rik’in hu, jun taareetali laj David ut li jun chik taareetali laj Jonatan. Chirix a’an teeyaab’asi junjunq ch’ol aatin sa’ 1 Samuel 18:1–4 li neke’aatinak chirix lix rahomeb’ chirib’ileb’ rib’ li wiib’ chi aamiiw a’in. Laa kok’al naru te’xtz’iib’a malaj te’xyiib’ xjalam-uuch chan ru naru neke’xk’ut xrahom choq’ reheb’ li ramiiw chiru li aamej.

• Sa’eb’ li ch’ol a’in, laj David ki’ok choq’ xrey Israel. Maare taawulaq chiruheb’ laa kok’al xk’oxlankil naq a’aneb’ rey. K’a’ruheb’ li chaq’rab’ te’xxaqab’? B’ar te’xik re xtawb’al xtenq’eb’? Tenq’aheb’ laa kok’al chixk’eeb’al reetal naq re xtawb’al xtenq’, laj David “kipatz’ok” malaj kitijok re xtawb’al xsumenkil. Naq yooqat chirilb’al 2 Samuel 5:19, 23 chiruheb’, patz’ reheb’ laa kok’al naq te’rab’i li aatin “kipatz’ok” ut te’xq’alu lix tel naq te’rab’i. K’a’ut naq laj David kiraj ru tenq’aak xb’aan li Qaawa’ sa’ lix k’anjel?

• Wotzomaq cherib’il eerib’ resil hoonal b’ar wi’ xextijok re xpatz’b’al eetenq’ankil re lee Choxahil Yuwa’. Ma xek’e reetal naq nim xwankil lix tenq’?

• Eb’ li rey li naqil resil sa’ li Najter Chaq’rab’ moko tz’aqaleb’ ta re ru, ut ke’oso’ lix awa’b’ejihomeb’. A’b’an li Jesukristo a’an li Rey tz’aqal re ru ut taa’awa’b’ejinq chi junelik. Naru nakatenq’aheb’ laa kok’al chixtawb’al ru a’in wi teeril li kixye li profeet aj Natan re li rey aj David sa’ 2 Samuel 7:16–17. Chan raj ru naq maajun wa taa’oso’q li rawa’b’ejihom laj David? Tenq’aheb’ laa kok’al chixtawb’aleb’ ut chirilb’aleb’ li raqal li neke’xk’ut naq li Jesukristo, jun ralal xk’ajol laj David, a’an li qaRey, sa’ Lukas 1:32–33; Jwan 18:33–37; ut Apokalipsis 19:16. Chan ru naq jalan li Jesus rik’ineb’ li ruchich’och’il rey? Chan ru naq tawoxloq’i li Jesukristo jo’ li qaJunelikil Rey?