“Li Jesus tixye re laj Israel, “Chexchalq””

Wiib’ oxib’ sut chalen 735 toj 720 chihab’ ma nayo’la li Kristo, eb’ laj Asiria ke’ok sa’ li awa’b’ejihom re Israel sa’ xnim li saq’e, a’an xch’och’eb’ lajeeb’ reheb’ li kab’laju chi teepal, ut ke’xk’am k’iila mil chi aj Israelita chi preexil toj sa’ jalan jalanq chi tenamit li ke’wan rub’el li awa’b’ejihom re Asiria. Nawb’ileb’ ru laj Israelita a’in jo’ “li teepal sachenaqeb’,” xb’aan naq ke’isiik sa’ xtenamiteb’ ut ke’jek’iik sa’ xyanqeb’ li tenamit. A’b’an sachenaqeb’ ajwi’ xb’aan naq ink’a’ chik ke’wan choq’ xtenamit li Dios re li sumwank.

Moqon naab’aleb’ li tenamit sa’ li awa’b’ejihom re Juda sa’ xtz’e li saq’e ke’xtz’eqtaana ajwi’ li Qaawa’. Eb’ laj Asiria ke’xpleeti ut ke’reechani xk’ihal li awa’b’ejihom a’an ajwi’; ka’ajwi’ Jerusalen kikole’ rix rik’in sachb’a-ch’oolej. Moqon, chalen 597 toj 580 chihab’ ma nayo’la li Kristo, eb’ laj Babilonia ke’xsach Jerusalen ut li santil ochoch, ut ke’xk’am k’iila kristiaan chi preexil. Maare 70 chihab’ chirix a’an, jun rela’ laj Juda ke’kanab’aak chi sutq’iik Jerusalen ut chixkab’lankil wi’chik li santil ochoch. A’ut, ke’wan naab’al li ke’kana aran Babilonia.

Chirix xnumik k’iila chihab’, ke’cha’cha’iik chixjunileb’ lix teepal laj Israel “sa’ chixjunileb’ li tenamit ink’a’ xnawomeb’ ru” (Sakarias 7:14). Ke’wan chik li ke’k’ame’ xb’aan li Qaawa’ sa’ jalaneb’ chik li ch’och’. Ut ke’wan chik li ke’el aran Israel re naq ink’a’ te’k’ehe’q chi preexil malaj jalan chik li k’a’aq re ru.

Chixjunil a’in, a’an lix jek’inkil Israel naqaye re. Aajel ru xnawb’al chirix lix jek’inkil Israel. Xb’een, a’an jun jolomil na’leb’ sa’ li Najter Chaq’rab’—naab’al reheb’ li profeet sa’ li Najter Chaq’rab’ ke’wan choq’ aj k’ehol reetal lix t’anik laj Israel sa’ musiq’ej li kixk’eheb’ chi jek’iik. Ke’ril chi rub’elaj ut ke’xye resil. Ke’wan ajwi’ li ke’xnumsi. Li na’leb’ a’in naru nakatxtenq’a naq nakawileb’ li hu re Isaias, Jeremias, Amos, ut xkomoneb’ chik li profeet sa’ roso’jik li Najter Chaq’rab’. Rik’in li na’leb’ a’in sa’ aak’a’uxl, naq nakawil li profeetil aatin chirix Asiria ut Babilonia, li loq’onink pak’b’il dios ut li preexil, li sachk ut li k’ojob’ank wi’chik, taanaw k’a’ru neke’aatinak wi’.

Xtawb’al ru lix jek’inkil Israel tatxtenq’a chixtawb’al ajwi’ ru lix Hu laj Mormon, xb’aan naq lix Hu laj Mormon, a’an resil jun ruq’ laj Israel li jek’inb’ileb’. Li esil a’an natikla rik’in lix junkab’al laj Lehi naq ke’eelelik Jerusalen 600 chihab’ tana ma nayo’la li Kristo, ka’ch’in chik ma nawulak Babilonia chixpleetinkil. Laj Lehi, a’an xkomoneb’ li profeet li ke’aatinak chirix lix jek’inkil Israel. Ut lix junkab’al kixtenq’a xtz’aqob’resinkil ru li profeetil aatin a’an naq, jo’ jun ruq’ Israel, ke’q’axon chixjunpak’al li ruchich’och’ toj sa’ li ch’och’ America.

Lix jek’inkil Israel, a’an yal xyijach li seraq’. Li Qaawa’ ink’a’ naxtz’eqtaana lix tenamit, chi moko naxkanab’eb’ xjuneseb’, us ta eb’ a’an neke’xkanab’ li Qaawa’. K’iheb’ li profeetil aatin chirix lix jek’inkil Israel xb’aan li Dios, a’ut k’iheb’ ajwi’ xyeechi’ihom naq tixch’utub’eb’ wi’chik sa’ junaq kutan.

Li kutan a’an, a’an li kutan wanko wi’. Ak natikla lix ch’utub’ankil Israel. Sa’ 1836, k’iila mil chihab’ chirix naq laj Moises kixch’utub’eb’ li ralal xk’ajol sa’ roq li Tzuul Sinai, a’an kixk’utb’esi rib’ sa’ li santil ochoch re Kirtland re xk’eeb’al re laj Jose Smith “xlaawil lix ch’utub’ankil Israel chalen chaq sa’ xkaajachalil ruchich’och’” (Tzol’leb’ ut Sumwank 110:11). Anajwan, chi b’eresinb’il xb’aaneb’ li neke’k’amok reheb’ li laaw a’in, yookeb’ chi ch’utub’aak li kab’laju xteepal laj Israel sa’ chixjunil li tenamit b’ar wi’ neke’ru chi wulak lix moos li Qaawa’.

Li Awa’b’ej Russell M. Nelson kixye naq li ch’utub’ank a’in, a’an “li k’anjel q’axal nim li yoo chi uxmank sa’ li ruchich’och’ anajwan. Maak’a’ chik naru xjuntaq’eetankil rik’in lix nimal ru, rik’in lix aajelil ru, rik’in lix loq’alil. Ut wi nakasik’ ru, wi nakawaj, naru naq nimaq laa tz’aqonik sa’ li k’anjel a’an.”

Chan ru taqatenq’a? K’a’ru naraj naxye xch’utub’ankil Israel? Ma naraj naxye xk’ojob’ankileb’ wi’chik li kab’laju teepal sa’ xch’och’il li reechanihomeb’? Relik chi yaal, li k’anjel a’in q’axal nim wi’chik xwankil chiru yal a’an, ut maajo’q’e taa’oso’q. Li Awa’b’ej Nelson kixye:

“Naq noko’aatinak chirix li ch’utub’ank, ka’ajwi’ yooko chixyeeb’al li yaalil na’leb’ a’in: chixjunileb’ li ralal xk’ajol li qaChoxahil Yuwa’, sa’ xka’pak’alil li tz’apleb’ t’ikr, xk’ulub’eb’ chirab’inkil li esil chirix lix evangelio li Jesukristo k’ojob’anb’il wi’chik. …

“Yalaq jo’q’e nakab’aanu yalaq k’a’ru li naxtenq’a yalaq ani ma yo’yo malaj kamenaq—chi ok sa’ sumwank rik’in li Dios ut xk’ulb’al li kub’iha’ ut eb’ li k’ojob’anb’il k’anjel re li santil ochoch, yookat chi tenq’ank chixch’utub’ankil Israel. Saqen ru a’an.”

A’in nak’ulman, jo’ kixye laj Isaias, “chi junjunqil” (Isaias 27:12) malaj, jo’ kixye laj Jeremias, “yal jun sa’ xtenamit, ut yal ka’k’ab’ sa’ xjunkab’al” (Jeremias 3:14).

Xch’utub’ankil Israel naraj naxye xk’amb’aleb’ li ralal xk’ajol rik’in li Dios wi’chik. Naraj naxye xk’ojob’ankileb’ wi’chik sa’ sumwank rik’in li Dios. Naraj naxye xxaqab’ankil wi’chik jun “santil tenamit” li kiraj xxaqab’ankil chalen chaq junxil (Exodo 19:6).

Okenaqat sa’ sumwank rik’in li Dios, chi jo’kan naq okenaqat sa’ lix junkab’al laj Israel. Ak xatch’utub’aak, ut laa’at chik aj ch’utub’anel. Li nimla seraq’ chirix li tenamit re li sumwank li kitikla k’iila mil chihab’ chaq yoo chi tz’aqlok ru anajwan, ut aajel aawu sa’ li k’anjel a’an. Anajwan xq’ehil naq li “Jesus tixye re laj Israel, “Chexchalq.””

A’in li aatin neke’xwotz laj ch’utub’anel: Sutq’inqex rik’in li sumwank. Sutq’inqex chaq sa’ Sion. Sutq’inqex rik’in li Jesukristo, lix Santil Dios laj Israel, ut a’an texxk’am wi’chik rik’in li Dios, lee Yuwa’.