Բ Մնացորդաց 14–20, 26, 30

Երբ Ասան Հուդայի թագավորն էր, նա բախվեց բազմաթիվ դժվարությունների, ճիշտ այնպես, ինչպես մենք բոլորս այսօր։ Նրա հանդիպած փորձությունների մասին կարդալիս ուշադրություն դարձրեք, թե ինչին էր նա վստահում, և ինչպես էր այդ վստահությունը փոփոխության ենթարկվում ժամանակի ընթացքում:

Ինչո՞ւ ենք մենք երբեմն դադարում վստահել Տիրոջը: Ուրիշ ի՞նչ սովորեցիք Ասայի կյանքից:

Տես նաև երեց Դ. Թոդ Քրիստոֆերսոնի «Մեր հարաբերությունը Աստծո հետ» ուղերձը, Լիահոնա, մայիս 2022, 78–80։

Միքիա մարգարեն, հավանաբար, մեծ ճնշում է զգացել՝ Սիրիայի դեմ պատերազմում Հովսափատ և Աքաաբ թագավորների հաջողությունը կանխագուշակելիս։ Այդ ճնշման ապացույցները փնտրեք Բ Մնացորդաց 18․1–12 հատվածներում։ Ի՞նչ ապացույց գտաք Միքիայի քաջության և ազնվության մասին հատված 13–27-ում։ (Նշեք, որ հատված 14-ում Միքիան հեգնական պատասխան է տալիս. նրա իրական պատասխանը ներկայացված է հատված 16-ում։) Ինչպե՞ս են կատարվում Միքիայի խոսքերը հատվածներ 28–34-ում։

Ո՞ր իրավիճակներում կարող եք բախվել նույն ճնշմանը, որին բախվեց Միքիան: Ի՞նչն է ձեզ քաջություն տալիս՝ պաշտպանելու Տիրոջը և Նրա ուսմունքները:

Բ Մնացորդաց 20․1–12 հատվածները կարդալիս փնտրեք, թե ինչ արեց Հովսափատ թագավորը, երբ բազմաթիվ ազգեր հարձակվեցին Հուդայի վրա: Ինչպե՞ս կարող եք կիրառել նրա գործողությունները ձեր առջև ծառացած դժվարին հանգամանքներում:

Տիրոջ պատասխանը Հովսափատի աղոթքին կարելի է գտնել հատվածներ 14–17-ում։ Ի՞նչ արտահայտություններ գտաք այնտեղ, որոնք դժվար ժամանակներում կարող են մխիթարել ձեզ կամ ձեզ ծանոթ մարդուն:

Հաջորդ օրը Երուսաղեմի ժողովուրդը դուրս եկավ հակառակորդի բանակին ընդառաջ։ Բ Մնացորդաց 20․20 հատվածը կարդալիս փնտրեք այն ուղերձը, որը Հովսափատը փոխանցեց Երուսաղեմի ժողովրդին: Ինչպե՞ս կատարվեցին նրա խոսքերը (տես հատվածներ 22–23)։ Ինչպե՞ս է Աստված օրհնել ձեզ՝ Իրեն հավատալու և Իր մարգարեներին հետևելու համար:

Նախագահ Ռասսել Մ. Նելսոնն ասել է. «Իմ փորձառությունը ցույց է տալիս, որ երբ մարգարեի խոսքերի վրա հարցական նշաններ դնելու փոխարեն բացականչական նշան դնեք և իսկապես անեք դա, օրհնությունները պարզապես կթափվեն ձեզ վրա: Ես երբեք ինքս ինձ չեմ հարցնում. «Ե՞րբ է մարգարեն խոսում որպես մարգարե և երբ՝ ոչ»։ Ինձ միայն հետաքրքրել է, թե «Ինչպե՞ս կարող եմ ավելի նման լինել նրան»» (Լեյն Ջոնսոնի «Russell M. Nelson: A Study in Obedience» նյութում, Ensign, օգս. 1982, 24)։

Տես նաև Վարդապետություն և Ուխտեր 21.4–6 հատվածները, «A Secure Anchor» (տեսանյութը), Gospel Library հավելվածում, «Կատարեք ոգեշնչված ընտրություններ» նյութը Երիտասարդներին զորացնելու համար. ուղեցույց ընտրություններ կատարելու համար (2022), 4–5։

3:37

Ինչպես Հուդայի մյուս թագավորների դեպքում, Ոզիայի թագավորությունը սկսվեց մեծ ձեռքբերումներով, բայց ավարտվեց ողբերգությամբ։ Փնտրեք այդ օրինակը Բ Մնացորդաց 26 գլխում։ Ըստ ձեզ, ո՞րն եր շրջադարձային կետը Ոզիայի կյանքում:

Հատվածներ 16–23-ը կարդալիս հիշեք, որ այն ժամանակ միայն քահանաներին էր թույլատրվում խունկ ծխել տաճարում: Ըստ ձեզ, Ոզիա թագավորն ինչո՞ւ չհնազանդվեց Աստծուն: Ի՞նչ սովորեցիք այս ողբերգական փորձառությունից:

Տես նաև «Be Thou Humble» օրհներգը, Հիմներ, հմր. 130։

Բ Մնացորդաց 30 գլխում Եզեկիան Հուդայի թագավորն էր։ Նա առաջարկեց Իսրայելի հակառակորդ թագավորությանը հավաքվել Երուսաղեմում՝ նշելու Զատիկը, ինչն իսրայելացիները երկար տարիներ չէին կարողանում անել (տես հատվածներ 1–12-ը)։ Ի՞նչն է ձեզ տպավորում առաջարկի մեջ և ինչպես այն ընդունվեց թե իսրայելացի հյուրերի և թե Հուդայում ապրող մարդկանց կողմից։

Քանի որ երկար ժամանակ էր անցել, Երուսաղեմ այցելած մարդկանցից շատերը ծանոթ չէին Զատիկին մասնակցելու մանրամասներին։ Բ Մնացորդաց 30․18–27 հատվածները կարդալիս ի՞նչ սովորեցիք Եզեկիայի պատասխանից և նրա պատասխանի հետևանքներից:

Sես նաև Ռասսել Մ. Նելսոնի «Պահանջվում են խաղաղարարներ» ուղերձը, Լիահոնա, մայիս 2023, 98–101։

• Որպեսզի ձեր երեխաներին ներկայացնեք Տիրոջը վստահելու գաղափարը, կարող եք նրանց ցույց տալ մի բան, ինչին վստահում եք, և որ այն կպաշտպանի ձեզ անձրևից, օրինակ՝ անձրևանոց կամ բաճկոն: Նրանց հնարավորություն տվեք պատմել թե ինչու մենք կարող ենք վստահել այդ բաներին: Ապա օգնեք նրանց համեմատել դա Տիրոջ հանդեպ մեր վստահության հետ: Ինչո՞ւ ենք Նրան վստահում մեր հոգևոր ապահովությունը:

• Օգնեք ձեր երեխաներին նշել, թե ինչպես են Ասա և Հովսափատ թագավորներն արձագանքել դժվարություններին՝ վստահելով Տիրոջը (տես Բ Մնացորդաց 14․11, 20․3–5, 12)։ Կիսվեք միմյանց հետ, թե ինչպես կարող եք ցույց տալ Տիրոջը, որ վստահում եք Նրան:

• Այս շաբաթվա գործնական աշխատանքի էջը կարող է օգնել ձեր երեխաներին հասկանալ Հովսափատի աղոթքի պատմությունը և Տիրոջ պատասխանը: Դուք և ձեր երեխաները կարող եք կիսվել այն դեպքերով, երբ Աստված լսել և պատասխանել է ձեր աղոթքներին: Կարող եք ներառել այն դեպքերը, երբ ձեր աղոթքների պատասխանները ստացել եք անսպասելի եղանակով կամ անսպասելի ժամանակ: Աղոթքի մասին «I Pray in Faith» երգը (Մանկական երգարան, 14) կարող է օգնել ձեր երեխաներին ամրացնել իրենց հավատքը:

• Հպարտության վտանգների մասին իմանալու համար ձեր երեխաները կարող են աշտարակ կառուցել խորանարդիկներով կամ փոքր բաժակներով: Յուրաքանչյուր խորանարդիկ կամ բաժակ աշտարակի վրա տեղադրելուց հետո, օգնեք նրանց նշել Ոզիայի ձեռքբերումներից մեկը Բ Մնացորդաց 26․3–15 հատվածներում։ Երբ նրանք ավարտեն կառուցել աշտարակը, քննարկեք ձեր երեխաների հետ, թե Ոզիան ինչպես կարող էր այն բարձր և ամուր պահել: Ի՞նչը կարող էր ստիպել աշտարակին ընկնել: Ապա հատված 16-ը կարդալիս կարող եք պատմել այն մասին, թե ինչ է նշանակում ունենալ գոռոզ սրտեր, որը «[մեր] կործանումին առաջնորդեց»: Կիսվեք ձեր երեխաների հետ, թե ինչ պատահեց Ոզիային հատվածներ 16–23-ում։ Թույլ տվեք նրանց քանդել իրենց աշտարակը։ Խոսեք այն մասին, թե ինչ կարող ենք անել՝ խոնարհ մնալու համար:

• Վերևում տեղադրված նկարում երևում է, թե ինչպես է Եզեկիան Իսրայելի թագավորությունից հրավիրում Հուդայի բնակիչներին՝ իրենց հետ Զատիկը տոնելու։ Կարող եք ձեր երեխաների հետ նայել այդ նկարին և կարդալ Բ Մնացորդաց 30․18–19 հատվածները, որը բացատրում է, որ հյուրերից մի քանի չեն լվացվել՝ համաձայն Մովսեսի օրենքի: Ի՞նչ արեց Եզեկիան: Ի՞նչ զգացողություններ դա կարող էր առաջացնել հյուրերի մոտ: Օգնեք ձեր երեխաներին մտածել, թե իրենք ինչպես կարող են նմանվել Եզեկիային, թե ինչպես վերաբերվել ուրիշներին: