“Xya Hli Ntuj 20–26. ‘Peb Thov Koj Pab Peb’: 2 Xwm Txheej Vaj Ntxwv 14–20; 26; 30,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Xya Hli Ntuj 20–26. ‘Peb Thov Koj Pab Peb,’” Los, Nrog Kuv Mus: 2026
Vaj Ntxwv Yehausafas thov Vajtswv, los ntawm Keeley Rae
Xya Hli Ntuj 20-26: “Peb Thov Koj Pab Peb”
2 Xwm Txheej Vaj Ntxwv 14–20; 26; 30
Muaj cov yeeb ncuab nyob ib puag ncig lub Nceeg Vaj Yudas. Muaj peb pawg tub rog yeeb ncuab los ntawm peb lub teb chaws uas muaj zog heev tuaj ua ke yuav tuaj ua rog. Thaum lub sij hawm txaus ntshai heev, Yehausafas, tus Vaj Ntxwv ntawm cov Neeg Yudas, tau thov tus Vaj Ntxwv ntawm lub ntuj thiab lub ntiaj teb. Yehausafas tau muab nws cov neeg sau los rau lub tuam tsev thiab thov Vajtswv. Nws lees lawv txoj kev qaug zog thiab thov kom Vajtswv pab lawv dim. Tus Tswv tau teb lawv, cog lus tias Nws yuav tiv thaiv lawv: “Tsis txhob ntshai los sis poob siab” (2 Xwm Txheej Vaj Ntxwv 20:17).
Tej zaum peb tsis muaj ib pab tub rog nyob ntawm peb qhov rooj xav los ua rog nrog peb kom peb puas tsuaj mus, tiam sis tej lub sij hawm peb xav tias muaj kev ntxhov siab thiab kev phem nyob ib puag ncig peb. Peb txoj kev dim yeej yog tib txoj kev uas Yehausafas xav tau, thiab peb tej kev thov Vajtswv los yuav zoo li nws li thiab: “Koj yog peb tus Vajtswv, … tsis muaj leej twg pab peb kom dim ntawm cov tub rog coob heev uas tuaj tua peb. Peb tsis paub yuav ua li cas, tiam sis peb thov koj pab peb.” (2 Xwm Txheej Vaj Ntxwv 20:12).
Nyob hauv 2 Xwm Txheej Vaj Ntxwv 14–30, koj yuav nyeem txog Yehausafas thiab lwm cov vaj ntxwv nyob hauv teb chaws Yudas. Cia li xav seb tej yam lawv kho dua tshiab kom muaj kev ntseeg ntxiv, tej kev yeej, thiab tej teeb meem yuav pab tau koj li cas hauv koj lub neej.
Yog xav nyeem ib zaj lus piav txog phau 2 Xwm Txheej Vaj Ntxwv, saib “Xwm Txheej Vaj Ntxwv” nyob hauv Phau Qhia txog Vaj Lug Kub.
Tej Tswv Yim Pab Qhia hauv Tsev thiab lub Koom Txoos
2 Xwm Txheej Vaj Ntxwv 14–16
Kuv yuav txais kev kaj siab lug los ntawm txoj kev tso siab rau Vajtswv.
Thaum Axas ua tus vaj ntxwv hauv teb chaws Yudas, nws raug ntau yam teeb meem—ib yam li peb hnub no. Thaum koj nyeem txog tej kev sim siab uas nws raug, nyeem seb nws tso siab rau leej twg thiab qhov ntawd txawv li cas thaum yav tom ntej.
|
Tej Nqe hauv Vaj Lug Kub |
Tej Teeb Meem uas Axas Raug |
Axas tso siab rau leej twg |
|---|---|---|
Tej Nqe hauv Vaj Lug Kub 2 Xwm Txheej Vaj Ntxwv 14:9–12 | ||
Tej Nqe hauv Vaj Lug Kub 2 Xwm Txheej Vaj Ntxwv 15:1–8 | ||
Tej Nqe hauv Vaj Lug Kub 2 Xwm Txheej Vaj Ntxwv 16:1–10 |
Vim li cas muaj tej lub sij hawm thaum peb ntxeev siab tsis tso siab rau tus Tswv ntxiv? Koj kawm dab tsi ntxiv los ntawm Axas lub neej?
Kuj saib D. Todd Christofferson, “Peb txoj Kev Txheeb Ze Vajtswv,” Liyahaunas, Tsib Hlis Ntuj 2022, 78–80.
2 Xwm Txheej Vaj Ntxwv 18
Kuv muaj peev xwm tiv thaiv qhov tseeb, tsis hais thaum tsis muaj neeg coob nyiam.
Nyaj tus yaj saub Mikayas tau raug kev ntxhov siab vim xav tias txhua tus xav kom nws qhia tias yav tom ntej ob tug vaj ntxwv Yehausafas thiab Ahaj yuav yeej thaum ua rog rau Xilias. Nrhiav tej yam uas qhia txog txoj kev ntxhov siab ntawd nyob hauv2 Xwm Txheej Vaj Ntxwv 18:1–12. Muaj dab tsi hauv nqe 13–27 uas qhia txog Mikayas lub siab loj? (Nyeem hauv nqe 14, thaum Mikayas tau hais lus saib tsis taus; nws tej lus teb tiag tiag nyob hauv nqe 16.) Twb tau muaj li cas kom thiaj li muaj raws li Mikayas tej lus nyob hauv nqe 28–34?
Muaj tej lub sij hawm twg thaum koj yuav txais kev ntxhov siab ib yam li Mikayas tau raug? Dab tsi ua rau koj ua siab loj txhawb nqa tus Tswv thiab Nws tej lus qhia?
Nyob rau lub sij hawm thaum muaj Vaj Ntxwv Yehausafas, peb lub teb chaws tau tuaj tawm tsam Yeluxalees.
2 Xwm Txheej Vaj Ntxwv 20:1–25
Thaum lub caij nyuaj, kuv tig tau mus rau Vajtswv thiab Nws cov yaj saub.
Thaum koj nyeem 2 Xwm Txheej Vaj Ntxwv 20:1–12, nyeem seb Vaj Ntxwv Yehausafas ua dab tsi thaum ntau lub teb chaws tuaj tawm tsam Yudas. Koj yuav ua li cas kom siv tej yam uas nws ua kom pab koj thaum koj muaj tej lub sij hawm uas nyuaj thiab?
Tus Tswv tej lus teb Yehausafas tej lus thov Vajtswv nyob hauv nqe 14–17. Koj nrhiav tej kab lus twg uas pab nplij koj los sis leej twg koj paub lub siab nyob hauv tej lub sij hawm nyuaj heev?
Hnub tom qab, cov tib neeg ntawm Yeluxalees tau tawm sab nraud mus ntsib pawg tub rog. Thaum koj nyeem 2 Xwm Txheej Vaj Ntxwv 20:20, nrhiav zaj lus uas Yehausafas tau hais rau cov neeg ntawm Yeluxalees. Twb tau muaj li cas kom thiaj li muaj raws li Nws tej lus? (saib nqe 22–23). Vajtswv tau foom koob hmoov dab tsi rau koj thaum koj ntseeg Nws thiab ua raws Nws cov yaj saub hais?
Thawj Tswj Hwm Russell M. Nelson hais tias: “Kuv kawm tias thaum koj tsis txhob sau tus cim nug tom qab tus yaj saub tej lus thiab cia li sau tus cim nthe xwb, thiab ua li ntawd, cov koob hmoov yuav tuaj. Kuj yeej tsis nug kuv tus kheej tias, ‘Thaum twg tus yaj saub hais lus ua tus yaj saub thiab thaum twg nws tsis hais li ntawd?’ Kuv tsuas xav paub hais tias, ‘Kuv yuav ua li cas kom ua neeg zoo li nws?’” (nyob hauv Lane Johnson, “Russell M. Nelson: A Study in Obedience,” Ensign, Yim Hlis Ntuj 1982, 24).
Kuj saib Lus Qhuab Qhia thiab Kev Khi Lus 21:4–6; “A Secure Anchor” (vidi-aus), Txoj Moo Zoo cov Ntawv; “Xaiv tej yam raws li kev tshoov siab,” Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv (2022), 4–5.
A Secure Anchor
Cia li kawm tej lus tseeb. Txwj Laug Neal A. Maxwell qhia tias: “Cov vaj lug kub muaj tej qhuab qhia uas muaj nqi zoo li cov pov haum. Thiab thaum tus Vaj Ntsuj Plig lub teeb ci rau cov pov haum no, lawv ci ntsa iab zoo li cov hnub qub thiab ci rau peb pom txoj kev uas peb yuav tsum mus rau” (“According to the Desire of [Our] Hearts,” Ensign, Kaum Ib Hlis Ntuj. 1996, 21). Thaum koj kawm cov vaj lug kub, xav seb puas siv sij hawm kom nrhiav, sau txog, thiab xav txog tej lus qhia uas tsis ntev tiam sis muaj tswv yim tseem ceeb. Koj nrhiav tau tej zaj lus piv txwv nyob hauv 2 Xwm Txheej Vaj Ntxwv 14:11; 15:7; 18:13; 20:15; 26:5. Koj nrhiav lwm yam “tej qhuab qhia uas muaj nqi zoo li pov haum” dab tsi?
2 Xwm Txheej Vaj Ntxwv 26:3–21
Kev muab hlob mus rau txoj kev puas tsuaj.
Ib yam li lwm cov vaj ntxwv hauv Yudas, Uxiyas tau pib ua hauj lwm zoo tiam sis thaum kawg tau raug txom nyem. Nrhiav tus txheej txheem no hauv 2 Xwm Txheej Vaj Ntxwv 26. Koj xav tias muaj dab tsi uas hloov hauv Uxiyas lub neej?
Thaum koj nyeem nqe 16–23, nco ntsoov tias thaum lub sij hawm no, tsuas cia cov pov thawj hwj hlawv tej hmoov tshuaj tsw qab hauv lub tuam tsev. Koj xav vim li cas Vaj Ntxwv Uxiyas tsis mloog Vajtswv? Koj kawm dab tsi los ntawm qhov xwm txheej nyuaj siab no?
Kuj saib “Txo lub Hwj Chim,” Cov Nkauj Qhuas Vajtswv, zaj 48.
2 Xwm Txheej Vaj Ntxwv 30
Kuv muaj peev xwm ua ib tug tsim kev thaj yeeb.
Nyob hauv 2 Xwm Txheej Vaj Ntxwv 30, Hexekiyas yog Yudas tus vaj ntxwv. Nws caw lub teb chaw uas ua yeeb ncuab nrog lawv, lub Nceeg Vaj Ixayees los ua koob tsheej txog Kev Cai Hla Dhau nyob hauv Yeluxalees—ib yam uas cov neeg Ixayees tsis tau ua tau ntau xyoo lawm (saib tej nqe 1–12). Koj xav li cas txog lus caw ntawd thiab qhov uas tib neeg tau teb li cas—hais txog cov neeg Ixayees thiab cov neeg nyob hauv Yudas?
Vim hais tias tau ntev lawm, ib cov uas tuaj rau Yeluxalees tsis paub yuav tsum ua li cas koom tes ua Kev Cai Hla Dhau. Thaum koj nyeem 2 Xwm Txheej Vaj Ntxwv 30:18–27, koj kawm dab tsi los ntawm Hexekiyas tej lus teb thiab tej yam dab tsi uas muaj los ntawm nws tej lus teb?
Kuj saib Russell M. Nelson, “Xav Tau cov uas Ua rau Neeg Nyob Sib Haum Xeeb,” Liyahaunas, Tsib Hlis Ntuj 2023, 98–101.
Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.
Tej Tswv Yim Pab Qhia cov Me Nyuam
2 Xwm Txheej Vaj Ntxwv 14–16; 20
Kuv tso siab rau tus Tswv.
-
Kom qhia koj cov me nyuam txog txoj kev tso siab rau tus Tswv, tej zaum koj yuav xav muab ib yam dab tsi rau lawv saib uas koj cia siab tias yuav pab koj tsis ntub thaum los nag, ib yam li ib lub kaus los sis lub tsho loj. Cia lawv sib tham tias vim li cas peb tso siab tau rau tej no. Ces pab lawv muab qhov ntawd piv rau peb txoj kev tso siab rau tus Tswv. Vim li cas peb tso siab tias Nws yuav tiv thaiv peb kom muaj kev nyab xeeb ntawm sab ntsuj plig?
-
Koj pab tau koj cov me nyuam kawm tias Vaj Ntxwv Axas thiab Vaj Ntxwv Yehausafas tso siab rau tus Tswv li cas thaum muaj teeb meem (saib 2 Xwm Txheej Vaj Ntxwv 14:11; 20:3–5, 12). Sib tham txog tej yam uas nej ua tau kom qhia tus Tswv tias nej tso siab rau Nws.
2 Xwm Txheej Vaj Ntxwv 20:1–29
Vajtswv yuav hnov thiab teb kuv tej lus thov.
-
Phab ntawv ntxim ua rau lub lim tiam no pab tau koj cov me nyuam to taub zaj dab neeg txog Yehausafas kev thov Vajtswv thiab Vajtswv tej lus teb. Tej zaum koj thiab koj cov me nyuam yuav xav qhia txog tej lub sij hawm thaum Vajtswv hnov thiab teb nej tej lus thov Vajtswv. Xav seb puas qhia txog tej lub sij hawm thaum koj tau txais tej lus teb uas tsis zoo li koj tau xav. Ib zaj nkauj txog kev thov Vajtswv, xws li “I Pray in Faith” (Children’s Songbook, 14), tej zaum yuav pab koj cov me nyuam muaj kev ntseeg ntxiv.
2 Xwm Txheej Vaj Ntxwv 26:3–23
Kuv xaiv tau kom txo hwj chim.
-
Kom kawm txog tej xwm txheej phem ntawm kev muab hlob, cia koj cov me nyuam siv pob zeb los sis cov khob tsim ib tug pej thuam. Txhua zaus lawv muab ib lub pob zeb los sis khob saum tus pej thuam, pab lawv qhia txog ib txoj hauj lwm tseem ceeb uas Uxiyas tau ua nyob hauv 2 Xwm Txheej Vaj Ntxwv 26:3–15. Tom qab lawv tsim tus pej thuam tas, nrog koj cov me nyuam sib tham seb Uxiyas yuav ua dab tsi kom cia tus pej thuam ntawd siab thiab muaj zog. Muaj dab tsi uas yuav ua rau tus pej thuam ntawd poob? Ces, thaum koj nyeem nqe 16, tej zaum nej yuav xav sib tham txog qhov uas “txawm khav theeb heev thiaj ua rau [peb] raug kev puas tsuaj” txhais li cas. Qhia koj cov me nyuam tias muaj dab tsi tshwm sim rau Uxiyas nyob hauv nqe 16–23. Cia lawv ua kom tus pej thuam puas tsuaj. Sib tham txog tej yam uas peb ua tau kom txo hwj chim tas mus li.
Vaj Ntxwv Hexekiyas thiab cov Tib Neeg Thov Vajtswv Tsaug, © Lifeway Collection/licensed from goodsalt.com
2 Xwm Txheej Vaj Ntxwv 30
Kuv muaj peev xwm ua ib tug tsim kev thaj yeeb.
-
Daim duab sab saud qhia txog thaum Hexekiyas caw cov neeg ntawm lub Nceeg Vaj Ixayees nyob ntawm Yudas ib sab tuaj ua koob tsheej txog Kev Cai Hla Dhau nrog lawv. Tej zaum koj yuav xav nrog koj cov me nyuam saib daim duab thiab nyeem 2 Xwm Txheej Vaj Ntxwv 30:18–19, uas qhia tias muaj ib txhia ntawm cov neeg tuaj uas tsis tau ntxuav lawv tus kheej raws li Mauxes txoj kev cai. Hexekiyas ua dab tsi? Qhov no yuav ua rau cov tib neeg uas tuaj xav li cas? Pab koj cov me nyuam xav txog seb lawv yuav ua li cas rau lwm tus kom ua li Hexekiyas.
Yog xav tau ntxiv, saib phau xov xwm Phooj Ywg rau lub hli no.