2 Vaj Ntxwv 2–7

Tej txuj ci tseem ceeb qhia peb txog Vajtswv lub hwj chim. Tej no pab tau peb kov yeej tej yam nyuaj ntawm lub neej no—ib yam li cov av qhuav uas xav tau cov dej ntshiab huv (saib 2 Vaj Ntxwv 2:19–22) los sis ib rab taus uas ua poob lawm (saib 2 Vaj Ntxwv 6:4–7). Tiam sis, qhov tseem ceeb, tej txuj ci tseem ceeb ua rau peb tig mus rau tus Tswv. Thaum koj nyeem 2 Vaj Ntxwv 2–6, xav seb puas sau ntawv txog tej qhov txuj ci tseem ceeb uas koj nrhiav tau, thiab xav txog tej zaj lus qhia ntawm sab ntsuj plig uas koj kawm los ntawm txhua qhov.

Tej zaum koj kuj yuav xav muab tej txuj ci tseem ceeb uas Elisas ua piv rau tej txuj ci tseem ceeb uas Yexus Khetos ua (saib 2 Vaj Ntxwv 4:8–37 thiab Lukas 7:11–16; 2 Vaj Ntxwv 4:42–44 thiab Yauhas 6:1–13; 2 Vaj Ntxwv 5:1–15 thiab Lukas 17:11–19). Tej txuj ci tseem ceeb no qhia koj dab tsi txog tus Cawm Seej thiab Nws cov yaj saub?

Kuj saib 2 Nifais 26:12–13; 27:23; Maulaunais 7:35–37; nqe lus “Nrhiav thiab tos ntsoov tej txuj ci tseem ceeb” nyob hauv Russell M. Nelson, “Lub Hwj Chim ntawm Sab Ntsuj Plig txoj Kev Muaj Zog Zuj Zus Tuaj,” Liyahaunas, Tsib Hlis Ntuj 2022, 99–100.

Tus Tswv tau tshoov Elisas kom hais txog tej yam uas yuav muaj los yav tom ntej—feem ntau yog tej yam uas yeej tsis tau xav tias yuav muaj. Thaum koj nyeem 2 Vaj Ntxwv 4:8–17; 7:1–16, cia li xav seb koj ua li cas txog tus Tswv txoj lus uas koj txais dhau los ntawm Nws cov yaj saub niaj hnub no. Koj tau hnov tej lus qhia, tej lus txog tej yam uas yuav muaj los yav tom ntej, los sis tej lus cog tseg twg dhau los ntawm cov yaj saub niaj hnub no? Koj ua dab tsi kom muaj kev ntseeg ua raws li lawv tej lus?

Kuj saib 3 Nifais 29:6; Lus Qhuab Qhia thiab Kev Khi Lus 1:37–38; “Teachings of Presidents” pawg ntawv, Txoj Moo Zoo cov Ntawv.

Thaum koj nyeem 2 Vaj Ntxwv 5, xav seb puas muab Na-amas txoj kev mob ruas piv rau ib qho teeb meem ntawm sab ntsuj plig uas koj raug.

Puas muaj ib tug zoo li “tus ntxhais qhev” hauv koj lub neej, uas txhawb nqa kom koj nrhiav tej lus qhia txog koj qhov teeb meem los ntawm tus Tswv cov yaj saub? (saib nqe 2–3, 13).

Tus Tswv caw nej ua dab tsi uas koj xav tias yog ib yam yooj yim dhau—xws li “mus raus dej … kom koj zoo”? (nqe 13). Tej yam twg ua rau koj tsis lees txais Nws tej lus caw?

Koj yuav ua li cas kom qhia tias koj txo hwj chim ib yam li Na-amas?

Cia li saib qhov uas Na-amas ua tau hloov nws txoj kev ntseeg Ixayees tus Vajtswv (saib nqe 15). Koj kawm dab tsi los ntawm qhov no?

Kuj saib Lukas 4:27; 1 Petus 5:5–7; Amas 37:3–7; Ethaws 12:27; L. Whitney Clayton, “Nws Kom Nej Ua Dab Tsi, Nej Cia Li Ua Raws Li Nws Hais,” Liyahaunas, Tsib Hlis Ntuj 2017, 97–99; “Naaman and Elisha” (vidi-aus), Txoj Moo Zoo cov Ntawv.

14:30

Thaum koj siv zog coj raws li Yexus Khetos, koj puas tau xav zoo li Elisas tus tub txib hluas—cov yeeb ncuab coob dhau thiab ua rau koj ntshai heev? Xav seb yuav zoo li cas yog koj yog nws thaum koj nyeem 2 Vaj Ntxwv 6:8–23. Zaj dab neeg puas hloov koj txoj kev xav txog koj tej kev sim siab, koj tej kev lav ris, los sis koj txoj kev siv zog ua raws li txoj moo zoo?

Thaum koj xav txog qhov no, cia li xav txog Thawj Tswj Hwm Henry B. Eyring tej lus: “Ib yam li Elisas tus tub txib, muaj neeg coob nrog koj dua li cov uas koj pom tias tawm tsam koj. Ib txhia usa nrog koj nyob los koj pom tsis taus nrog koj qhov muag ntawm lub neej no. Tus Tswv yuav txhawb nqa koj thiab tej lub sij hawm Nws yuav ua li ntawd thaum Nws hu lwm tus los nrog nraim koj” (“O Ye That Embark,” Liyahaunas, Kaum Ib Hlis Ntuj 2008, 58).

Cia li xav seb puas sau ib daim ntawv txog “[koj] tag” (nqe 16)—tib neeg uas Vajtswv tau txib kom nrog nraim koj thiab txhawb nqa koj. Tej zaum koj yuav xav thov Nws pab qhib koj qhov muag ntawm sab ntsuj plig kom koj paub tias lawv yog leej twg. Nyaj Nws twb tso koj nrog lwm tus kom pab lawv lub neej thiab. Nej yuav ua li cas kom ib leeb txhawb ib leeg lub zog?

Koj tau hnov tus Tswv txoj kev txhawb nqa thaum twg raws li piav txog nyob hauv Lus Qhuab Qhia thiab Kev Khi Lus 84:88?

Tej zaum koj kuj yuav xav kawm Muam Michelle D. Craig zaj lus “Qhov Muag uas Pom Tau Ke” (Liyahaunas, Kaum Ib Hlis Ntuj 2020, 15–17). Nug koj tus kheej tias, “Vajtswv xav kom kuv pom dab tsi?”

Hais txog zaj dab neeg nyob hauv 2 Vaj Ntxwv 6:8–23, Txwj Laug Ronald A. Rasband hais tias: “Tej zaum peb yuav tsis muaj tej nees tsheb nees nplaim taws los ua rau peb txoj kev ntshai ploj thiab kov yeej peb cov yeeb ncuab, tiam sis zaj dab neeg no yeej qhia meej. Tus Tswv nrog nraim peb, paub txog peb thiab foom koob hmoov rau peb zoo li Nws tib leeg ua tau. Kev thov Vajtswv yuav ua rau peb txais dag zog thiab kev tshwm sim uas peb xav tau kom tsom ntsoov rau Yexus Khetos thiab Nws txoj kev theej txhoj. Tus Tswv paub tias yuav muaj tej lub sij hawm thaum peb ntshai. Peb txhua tus yeej muaj sij hawm thaum peb ntshai. … Nyob hauv lub Koom Txoos ntshe peb tsis muaj neeg coob raws li neeg ntiaj teb xav, tiam sis thaum peb qhib peb qhov muag ntawm sab ntsuj plig, ‘peb tog muaj coob dua lawv tog’ [2 Vaj Ntxwv 6:16]” (“Tsis Txhob Nyuaj Siab,” Liyahaunas, Kaum Ib Hlis Ntuj 2018, 18, 19). Koj yuav siv tej lus no li cas kom pab ib tug uas txhawj xeeb los sis ntshai?

Kuj saib “Me Tub Me Ntxhais, Vajtswv Nyob Ze,” Cov Nkauj Qhuas Vajtswv, zaj 34.

• Tom qab koj pab cov me nyuam to taub tias ib qho txuj ci tseem ceeb yog dab tsi, caw lawv hais txog tej txuj ci tseem ceeb ntau npaum li lawv hais tau. Cov duab nyob hauv Phau Muaj Duab txog Txoj Moo Zoo los sis Los, Nrog Kuv Mus pab tau. Ces lawv nrhiav tau tej txuj ci tseem ceeb nyob hauv 2 Vaj Ntxwv 4:1–7, 14–17, 32–35, 38–44. Tej txuj ci tseem ceeb no qhia dab tsi txog Leej Txiv Saum Ntuj Ceeb Tsheej?

• Koj thiab koj cov me nyuam sib tham tau txog qhov uas Vajtswv qhia tias Nws hlub peb dhau los ntawm tej txuj ci tseem ceeb no. Tej zaum nej kuj yuav xav hu ib zaj nkauj xws li “God’s Gracious Love” (Txoj Moo Zoo cov Ntawv) ua ke.

• Pab koj cov me nyuam kawm zaj dab neeg nyob hauv 2 Vaj Ntxwv 5:1–3, 9–14. Xav seb puas siv “Elisas Kho Na-amas” (nyob hauv Cov Dab Neeg hauv Phau Qub, 134–37) los sis daim duab txog Na-amas nyob hauv tus txheej txheem qhia rau lub lim tiam no. Vim li cas Na-amas tsis xav raus rau hauv tus Dej Yauladees, txawm yog Elisas hais tias nws tus mob ruas yuav zoo lawm yog nws ua li ntawd? Na-amas tau koob hmoov li cas thaum nws ua raws li Elisas tej lus qhia? Tej zaum nej yuav xav sib tham txog tej lub sij hawm thaum nej ua raws li tus Tswv hais, txawm yog nej tsis tau paub tseeb tias nej xav ua li ntawd tiag.

  

  1:52

• Tej zaum koj yuav xav nyeem 2 Vaj Ntxwv 5:13, thaum uas Na-amas cov tub txib pab nws txiav txim siab nws yuav ua raws li tus yaj saub Elisas hais. Tej zaum koj cov me nyuam yuav xav sib tham txog tej yam lawv ua tau kom pab lawv cov phooj ywg los sis tsev neeg mloog tus yaj saub lus.

• Tej zaum koj thiab koj cov me nyuam yuav xav seb zoo li cas thaum muaj ib pawg tub rog uas muaj ntaj riam, nees, thiab cov tsheb nees nyob ib puag ncig. Nej yuav xav li cas? Nej yuav ua li cas? Ces koj cov me nyuam qi tau lawv qhov muag thaum koj nyeem 2 Vaj Ntxwv 6:16–17 rau lawv. (Kuj saib “Elisas thiab tus Tswv Pawg Tub Rog,” nyob hauv Cov Dab Neeg hauv Phau Qub, 138–39, los sis daim duab nyob tom kawg ntawm tus txheej txheem qhia no.) Thaum koj nyeem tej lus “qhib nws lub qhov muag” (nqe 17), hais kom cov me nyuam qhib lawv lub qhov muag thiab. Cia li sib tham txog tej yam uas tus tub txib pom. Qhia koj cov me nyuam txog tej lub sij hawm uas koj xav tias tus Tswv nrog nraim koj nyob thaum koj raug teeb meem, tsis hais tej lub sij hawm uas zoo li koj nyob koj ib leeg xwb los yog.

  

  1:9