“Xya Hli Ntuj 13–19. ‘Nws Tso Siab rau tus Tswv Ixayees tus Vajtswv’: 2 Vaj Ntxwv 16–25,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Xya Hli Ntuj 13–19. ‘Nws Tso Siab rau tus Tswv Ixayees tus Vajtswv,’” Los, Nrog Kuv Mus: Phau Qub 2026
Cov uas Raug Ntes Taug Kev, los ntawm James Jacques Joseph Tissot thiab lwm tus
Xya Hli Ntuj 13–19: “Nws Tso Siab rau tus Tswv Ixayees tus Vajtswv”
2 Vaj Ntxwv 16–25
Txawm tus yaj saub Elisas txoj kev qhuab qhia muaj zog heev, cov tib neeg hauv Ixayees lub Nceeg Vaj Nyob Sab Qaum Teb tsis tau hloov siab lees txim. Thaum kawg, Faj Tim Teb Chaws Axilias tau kav thiab muab kaum xeem neeg Ixayees tawg khiav ri niab. Thaum lub sij hawm ntawd, Yudas lub Nceeg Vaj Nyob Sab Qab Teb los yeej tsis ua zoo thiab: nyob ntawd lawv pe dab pe mlom.
Hauv lub sij hawm uas tib neeg sab ntsuj plig lwj tas, cov vaj lug kub qhia txog ob tug vaj ntxwv hauv Yudas uas tau caw cov neeg tig rov qab los cuag tus Tswv. Ib tug hu ua Hexekiyas. Thaum nws yog tus vaj ntxwv, cov neeg Axilias tau kav Yudas. Tiam sis Hexekiyas thiab nws cov neeg tau ntseeg tus Tswv, tus uas ua ib qho txuj ci tseem ceeb kom cawm Yeluxalees. Ces, tom qab ib lub sij hawm uas tso qhov tseeb tseg, Yauxiyas tau los ua vaj ntxwv. Yauxiyas tau rov qab pab kho dua tshiab lawv kev cai uas cia nws cov neeg rov qab muaj kev ntseeg thaum Yauxiyas rov qab nrhiav tau phau ntawv txog Mauxes txoj kev cai.
Ib yam li Ixayees thiab Yudas, peb sawv daws xaiv qhov yog thiab qhov phem. Thaum peb xav tias peb yuav tsum hloov tej yam hauv peb lub neej, ces ob lub sij hawm ci ntsa iab los ntawm Yudas zaj keeb kwm uas tsaus ntuj heev txhawb nqa peb. Tej zaum Hexekiyas thiab Yauxiyas tus yam ntxwv yuav tshoov peb lub siab kom peb “tso siab rau tus Tswv peb tus Vajtswv” (2 Vaj Ntxwv 18:22).
Tej Tswv Yim Pab Qhia hauv Tsev thiab lub Koom Txoos
2 Vaj Ntxwv 18–19
Kuv tso siab tau rau tus Tswv thaum kuv kev ntseeg raug teeb meem.
Peb feem coob tau muaj tej lub sij hawm uas sim peb txoj kev ntseeg. Rau Hexekiyas thiab nws cov neeg, ib qho teeb meem los thaum cov Axilias tub rog tuaj tawm tsam Yeluxalees. Thaum koj nyeem 2 Vaj Ntxwv 18–19, cia li xav tias koj nyob hauv Yeluxalees thaum lub sij hawm no. Koj yuav xav li cas yog tias, ua piv txwv, koj hnov cov neeg Axilias tej lus thuam nyob hauv 2 Vaj Ntxwv 18:28–37; 19:10–13? Koj yuav ua dab tsi thaum ntawd? Muab cov Neeg Axilias tej lus kom cov Neeg Ixayees tsis txhob tso siab rau tus Tswv piv rau Dab Ntxwg Nyoog tej lus hais kom peb ua xyem xyav txog peb txoj kev ntseeg niaj hnub no. Tej zaum koj kuj yuav xav muab cov neeg Axilias tej lus piv rau tej yam uas qhia vim li cas koj yeej tso siab rau tus Tswv.
Koj kawm dab tsi los ntawm tej yam uas Hexekiyas ua thaum lub sij hawm no? Saib 2 Vaj Ntxwv 19:1–7, 14–19). Tus Tswv teb li cas? (Saib 2 Vaj Ntxwv 19:35–37). Koj xav tias vim li cas Hexekiyas rau siab ntseeg? (Saib 2 Vaj Ntxwv 18:5–7). Xav seb tus Tswv tau txhawb nqa koj thaum koj raug tej xwm txheej uas nyuaj. Koj txais kev tshoov siab ua dab tsi kom tso siab ntxiv rau Nws?
Thawj Tswj Hwm Jeffrey R. Holland zaj lus “Tsis Txhob Ntshai: Cia Li Ntseeg Xwb!” (Liyahaunas, Tsib Hlis Ntuj 2022, 34–36) muaj tej lus ntuas uas pab thaum muaj kev ntshai los sis ua xyem xyav. Ib zaj nkauj uas qhuas Vajtswv xws li “Cia Peb Sawv Daws Sib Zog Ua Vajtswv Tes Num” (Cov Nkauj Qhuas Vajtswv, zaj. 113) kuj muaj tej zaj uas txhawb nqa nej tau. Koj nrhiav dab tsi hauv tej yam no uas pab tau koj?
Kuj saib 2 Xwm Txheej Vaj Ntxwv 31–32; 3 Nifais 3–4; Jörg Klebingat, “Kev Rau Siab Ua cov Thwj Tim hauv Hnub Nyoog Kawg,” Liyahaunas, Tsib Hlis Ntuj 2022, 107–10.
Siv tej yam pab kawm vaj lug kub. Lub Koom Txoos muaj ntau yam kev pab kom nej to taub cov vaj lug kub. Ua piv txwv, nyob hauv Txoj Moo Zoo cov Ntawv, koj nrhiav tau Phau Qhia txog Vaj Lug Kub, Tej Ntsiab Lus thiab tej Lus Nug, thiab Lub Koom Txoos tej phau ntawv xov xwm. Tsis tas li ntawd, thaum koj nyeem Phau Qub, koj muaj peev xwm nrhiav tej yam xwm txheej thiab tej lub tswv yim pab tau hauv tej zaj lus “Tej Yam Ntxim Xav Txog” nyob hauv Los, Nrog Kuv Mus. Zaj lus hu ua “Yexus Yuav Hu Kom Haiv Neeg Ixayees, ‘Cia Li Los Tsev’” tej zaum yuav pab koj kawm txog 2 Vaj Ntxwv 16–25.
2 Vaj Ntxwv 19:20–37
Txhua yam nyob hauv tus Tswv txhais tes.
Xenakhelis, tus vaj ntxwv hauv Axilias, muaj tej yam uas nws ntseeg tias tsim nyog ua rau nws pab tub rog yuav yeej Yeluxalees (saib 2 Vaj Ntxwv 17; 18:33–34; 19:11–13). Tiam sis tus Tswv muaj ib zaj lus hais txog Xenakhelis, uas nws tau muab rau tus yaj saub Yaxayas. Twb sau cia nyob hauv 2 Vaj Ntxwv 19:20–34. Koj nrhiav tej lus tseeb dab tsi hauv tus Tswv zaj lus uas pab tau koj ntseeg Nws thiab Nws txoj hau kev?
2 Vaj Ntxwv 21–23
Cov vaj lug kub tig tau kuv lub siab rau tus Tswv.
Koj puas tau xav tias tshuav ib yam tseem ceeb uas koj sab ntsuj plig tsis muaj? Tej zaum koj twb xav tias koj tsis muab siab npuab Vajtswv txaus. Muaj dab tsi uas tau pab koj tig rov qab mus cuag Nws? Xav txog tej lus nug no thaum koj nyeem 2 Vaj Ntxwv 21–23, uas qhia txog thaum lub Nceeg Vaj Yudas poob ntawm Vajtswv mus thaum Vaj Ntxwv Manaxas kav (saib 2 Vaj Ntxwv 21) thiab qhia tias Vaj Ntxwv Yauxiyas tau ua dab tsi kom pab cov tib neeg tig rov qab mus rau Nws (saib 2 Vaj Ntxwv 22–23). Yauxiyas thiab nws cov neeg hloov li cas thiab vim li cas lawv hloov? Saib 2 Vaj Ntxwv 22:8–11; 23:1–6, 21, 24).
Thawj Tswj Hwm Spencer W. Kimball hu zaj dab neeg txog Vaj Ntxwv Yauxiyas “ib zaj dab neeg uas zoo tshaj plaws hauv cov vaj lug kub” (Teachings of Presidents of the Church: Spencer W. Kimball [2006], 62). Nyeem Thawj Tswj Hwm Kimball tej lus hais txog Vaj Ntxwv Yauxiyas (phab ntawv 62–64). Tej zaum koj yuav xav txog ib lub sij hawm thaum ib nqe vaj lug kub “tshoov” koj lub siab heev. Koj yuav ua li cas kom muaj tej lub sij hawm zoo li ntawd ntxiv?
Kuj saib Amas 31:5; “Josiah and the Book of the Law” (vidi-aus), Txoj Moo Zoo cov Ntawv.
Josiah and the Book of the Law
2 Vaj Ntxwv 23:1–25
Ib txoj kev khi lus yog kev sib cog lus kawg siab kawg ntsws ntawm kuv thiab tus Tswv.
Muaj dab tsi uas tshoov koj lub siab txog kev khi lus uas Yauxiyas tau khi nyob hauv 2 Vaj Ntxwv 23:3? Thaum koj nyeem tshooj 23, xav seb Yauxiyas ua dab tsi kom qhia txog nws txoj kev cog lus rau tus Tswv (kuj saib daim duab ntawm tus txheej txheem qhia no qhov kawg). Koj yuav ua li cas kom qhia koj txoj kev cog lus rau Nws?
Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.
Tej Tswv Yim Pab Qhia cov Me Nyuam
2 Vaj Ntxwv 18:3–6; 19:14–19
Kuv tso siab tau rau Leej Txiv Saum Ntuj Ceeb Tsheej thiab Yexus Khetos.
-
Nyob hauv 2 Vaj Ntxwv 18:3, 5–6, pab koj cov me nyuam nrhiav seb dab tsi ua rau Hexekiyas ua ib tug vaj ntxwv zoo. Ces thaum nej nyeem 2 Vaj Ntxwv 19:14–19 ua ke, lawv kawm tias nws tau ua dab tsi kom qhia tias nws tso siab rau tus Tswv. Tej zaum nej yuav xav saib ib daim duab txog Yexus thiab tham txog seb vim li cas peb tso saib tau rau Nws. Peb ua tau dab tsi kom qhia tias peb tso siab rau tus Tswv?
2 Vaj Ntxwv 22:1–7
Leej Txiv Saum Ntuj Ceeb Tsheej thiab Yexus Khetos tso siab rau kuv.
-
Nyob hauv 2 Vaj Ntxwv 22:1, pab koj cov me nyuam kawm seb Yauxiyas muaj pes tsawg xyoo thaum nws los ua vaj ntxwv. Peb kawm dab tsi txog Yauxiyas nyob hauv nqe 2? Xav seb puas ua ib yam uas qhia txog kev coj raws li tus Tswv thiab “tsis tig mus rau sab xis los yog sab laug.”
-
Cov neeg ua hauj lawm nyob hauv 2 Vaj Ntxwv 22:3–7 yog cov uas teev tej nyiaj kom rov qab ua lub tuam tsev “vim lawv yog neeg ncaj” (nqe 7). Tom qab nej nyeem tej nqe no, tej zaum koj thiab koj cov me nyuam yuav xav sib tham txog tej yam uas tib neeg tau tso siab rau nej ua. Peb yuav ua li cas kom ua neeg ncaj ib yam li cov neeg ua hauj lwm hauv tej nqe no?
Ib tug teev ntawv nqa ib daim ntawv kauv rau Vaj Ntxwv Yauxiyas; daim duab los ntawm Robert T. Barrett
2 Vaj Ntxwv 22:8–11; 23:2–3
Cov vaj lug kub qhia kuv coj raws li Yexus Khetos.
-
Kom qhia zaj dab neeg txog Vaj Ntxwv Yauxiyas nyob hauv2 Vaj Ntxwv 22–23, tej zaum koj yuav xav muab ib phau vaj lug kub zais hauv koj chav nyob. Caw koj cov me nyuam nrhiav phau ntawd. Ces tej zaum koj yuav xav qhia txog thaum Yauxiyas ib tug pov thawj nrhiav tau cov vaj lug kub hauv lub tuam tsev (saib 2 Vaj Ntxwv 22:8–11; kuj saib “Vaj Ntxwv Yauxiyas” nyob hauv Cov Dab Neeg hauv Phau Qub, 148–49). Yuav ua li cas rau peb yog tias peb tsis muaj cov vaj lug kub? Cia li qhia vim li cas nej zoo siab tias peb muaj cov vaj lug kub hnub no.
1:36King Josiah
-
Tom qab nej nyeem 2 Vaj Ntxwv 23:2–3 ua ke, tej zaum koj thiab koj cov me nyuam yuav xav sib tham txog cov vaj lug kub uas tau tshoov nej lub siab kom “ua raws li tus Tswv tej lus” (nqe 3). Tej zaum nej yuav xav hu ib zaj nkauj ua ke txog txoj kev nyeem vaj lug kub, ib yam li “Search, Ponder, and Pray” (Children’s Songbook, 109).
2 Vaj Ntxwv 23:1–3
Kuv yuav ua raws li kuv tej kev khi lus nrog Vajtswv.
-
Thaum Yauxiyas thiab nws cov neeg kawm txog Vajtswv tej lus txib, lawv tau khi lus kom ua raws li tej lus txib ntawd. Nyeem txog tej no nrog koj cov me nyuam nyob hauv 2 Vaj Ntxwv 23:1–3, thiab pab lawv nrhiav tej lo lus uas qhia tias cov neeg xav li cas txog tus Tswv tej lus txib. Tej zaum koj thiab koj cov me nyuam yuav xav sawv thiab hais txog seb kev “coj raws li” kev khi lus txhais li cas. Ces cia lawv taug kev me ntsis thiab sib tham txog seb kev “ua raws li tus Tswv” txhais li cas. Tom qab ntawd, tej zaum lawv yuav xav muab lawv ob txhais tes tso rau ntawm lawv lub hauv siab thiab qhia txoj tej yam uas peb ua tau kom ua raws li tej lus cog tseg “kawg siab kawg ntsws.”
Yog xav tau ntxiv, saib phau xov xwm Phooj Ywg rau lub hli no.