“Tej Yam Ntxim Xav Txog: “Yexus Yuav Hu Kom Haiv Neeg Ixayees, ‘Cia Li Los Tsev,”’” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Tej Yam Ntxim Xav Txog: “Yexus Yuav Hu Kom Haiv Neeg Ixayees, ‘Cia Li Los Tsev,”’” Los, Nrog Kuv Mus: Phau Qub 2026
Tej Yam Ntxim Xav Txog
“Yexus Yuav Hu Kom Haiv Neeg Ixayees, ‘Cia Li Los Tsev’”
Nyob hauv roob moj sab qhua Xinais. Mauxes sau haiv neeg Ixayees los ua ke ntawm taw roob. Nyob ntawd tus Tswv qhia tias Nws xav ua rau pawg neeg tub qhev uas nyuam qhuav khiav dim no rais los mus ua ib haiv neeg loj heev. Nws hais tias, “Nej yuav yog ib lub nceeg vaj ntawm cov pov thawj rau kuv, thiab ib tsoom haiv neeg dawb huv” (Khiav Dim 19:6). Nws cog lus hais tias lawv yuav vam meej thiab huaj vam, tab txawm muaj tej pab yeeb ncuab loj heev uas puav lawv ib ncig.
Yuav tsis ua li no vim hais tias haiv neeg Ixayees muaj coob los yog muaj zog los yog txawj ntse heev. Tus Tswv piav hais tias yuav muaj li ntawd, yog hais tias lawv yuav “mloog [Nws] lus thiab ua raws li [Nws txoj kev khi lus]” (Khiav Dim 19:5). Vajtswv lub hwj chim, tsis yog lawv li, yuav ua rau lawv muaj zog.
Tiam sis haiv neeg Ixayees tsis mloog Vajtswv lus tas mus li, nyob nyob ces lawv tsis ua raws li Nws tej kev khi lus lawm. Lawv coob leej tau pe hawm lwm tus vaj tswv thiab pib ua raws li tej neeg ib ncig lawv tej kab lig kev cai. Lawv tau xyeej tej yam pov tseg uas ua rau lawv txawv lwm lub teb chaws—uas yog lawv txoj kev nrog tus Tswv sib khi lus tseg. Thaum tsis muaj Vajtswv lub hwj chim los pov hwm lawv, thiaj tsis muaj dab tsi tiv thaiv lawv ntawm lawv cov yeeb ncuab.
Txoj Kev Tawg Khiav Ri Niab
Ntau zaus thaum xyoo 735 mus txog 720 ua ntej yug Yexus, cov Neeg Axilias tau tuaj txeeb Ixayees lub Nceeg Vaj Nyob Sab Qaum Teb, uas yog chaw nyob rau kaum xeem ntawm kaum ob xeem neeg, thiab lawv tau coj ntau txhiab leej neeg Ixayees mus ua tub qhev hauv ntau qhov chaw hauv Teb Chaws Axilias. Cov neeg Ixayees no txawm raug hu ua “tej xeem neeg uas ploj lawm,” vim lawv raug tshem tawm ntawm lawv lub teb chaws thiab raug tawg khiav ri niab hauv lwm lub teb chaws lawm. Tiam sis lawv yeej ploj mus ntau tshaj qhov ntawd: nyob nyob ces lawv tsis nco qab hais tias lawv yog Vajtswv haiv neeg ntawm kev sib khi lus.
Nyob nyob ces coob leej hauv Yudas lub Nceeg Vaj Nyob Sab Qab Teb kuj tig mus ntawm tus Tswv thiab. Cov neeg Axilias tau tawm tsam thiab kov yeej yuav luag txhua qhov chaw hauv teb chaws ntawd thiab; tsuas tshuav Yeluxalees nkaus uas tau dim. Yav tom qab ntawd, thaum xyoo 597 mus rau 580 ua ntej yug Yexus, cov neeg Npanpiloos tau ua rau lub nroog Yeluxalees puas tsuaj, kuj rhuav lub tuam tsev thiab, thiab tau coj coob leej mus ua tub qhev. Ze li 70 xyoo tom qab ntawd, ib feem ntawm xeem neeg Yudas tau rov qab los nyob hauv Yeluxalees thiab tau rov qab ua lub tuam tsev. Tiam sis, coob leej tau nyob twj ywm hauv Npanpiloos.
Txoj Kev Ua rau lub Nroog Yeluxalees Puas Tsuaj Los ntawm Nenpuxaladas, los ntawm William Brassey Hole, © Providence Collection/tau laisxees los ntawm goodsalt.com
Sij hawm dhau los mus ces, cov neeg Ixayees ntawm txhua xeem neeg raug “ntiab tawm mus nyob rau lwm teb chaws ib yam li cua daj cua dub ntsawj” (Xakhaliyas 7:14). Tus Tswv coj ib txhia mus rau pej kum teb chaws. Lwm cov khiav ntawm Ixayees kom lawv tsib txhob mag ntes los yog vim tej ntsiab cai ntawm kev kas moos los sis kev khwv nyiaj txiag.
Peb hu txhua yam no puav leej hu ua Ixayees raug tawg khiav ri niab. Thiab tseem ceeb rau peb to taub txog kev tawg khiav ri niab no. Qhov thib ib, yog ib lub ntsiab lus tseem ceeb heev hauv Phau Qub—coob tug yaj saub hauv Phau Qub ua tim khawv txog tej kev poob ntawm sab ntsuj plig uas ua rau lawv tawg khiav ri niab. Lawv twb paub ua ntej thiab twb ceeb toom hais tias yuav muaj li no. Ib txhia twb ua neej nyob dhau mus tej qhov xwm txheej no. Koj yuav tsum nco qab ntsoov li ntawd thaum uas koj nyeem phau Yaxayas, Yelemis, Amaus, thiab lwm cov yaj saub hauv tej tshooj kawg hauv Phau Qub. Thaum xav txog qhov no, thaum uas koj nyeem txog tej kev tshwm sim hais txog Axilias thiab Npanpiloos, kev pe cov mlom thiab raug ntes, kev puas tsuaj, thiab thaum kawg kev muab txum tim rov qab los, koj thiaj yuav to taub lawv qhia txog dab tsi.
Qhov uas yus to taub Ixayees txoj kev tawg khiav ri niab yuav pab koj haj yam to taub Phau Ntawv Maumoos, vim Phau Ntawv Maumoos yog ib phau ntawv qhia txog ib ceg ntawm Ixayees uas tawg khiav ri niab. Phau ntawv ceev xwm txheej no pib thaum Lihais tsev neeg khiav ntawm lub nroog Yeluxalees ze li 600 xyoo ua ntej yug Yexus, ua ntej cov neeg Npanpiloos tuaj tawm tsam lawv. Lihais yog ib tug yaj saub uas qhia txog qhov uas Ixayees yuav tawg khiav ri niab. Thiab nws tsev neeg pab ua kom tej lus tshwm sim ntawd muaj tiav los, vim lawv coj lawv ceg ntawm Ixayees mus thiab tau muab cog cia rau hauv sab ntuj tom ub, nyob rau hauv teb chaws Amelikas.
Txoj Kev Muab Sau Ua Ke
Tiam sis, txoj kev muab Ixayees tawg khiav ri niab, tsuas yog ib nrab ntawm zaj dab neeg no. Tus Tswv yeej nco qab ntsoov Nws cov neeg, thiab Nws tsis tso lawv tseg, tab txawm lawv twb tso Nws tseg los xij. Muaj ntau lo lus qhia tej uas yuav muaj los yav tom ntej hais tias Vajtswv yuav muab Ixayees tawg khiav ri niab tiam sis tseem muaj lus cog tseg hais tias yuav muaj ib hnub twg uas Nws yuav muab lawv sau los ua ke.
Thiab hnub ntawd yog hnub no ntag—peb lub caij lub nyoog no. Txoj kev muab sau ua ke twb pib lawm. Hauv xyoo 1836, ntau txhiab xyoo tom qab Mauxes sau haiv neeg Ixayees los ua ke rau ntawm lub taw Roob Xinais, nws tshwm los rau hauv lub Tuam Tsev hauv Kirtland yuav muab rau Joseph Smith “cov yawm sij ntawm txoj kev muab Ixayees sau los ua ke tim plaub ceg kaum ntiaj teb” (Lus Qhuab Qhia thiab Kev Khi Lus 110:11). Niaj hnub no, vim muaj cov neeg uas tuav cov yuaj sij no, lawv tab tom sau haiv neeg Ixayees los ua ke los ntawm txhua lub teb chaws uas tus Tswv cov tub qhev muaj cai mus hauv.
Mauxes, Eli-as thiab Eliyas Tshwm Los rau hauv lub Tuam Tsev Kirtland, los ntawm Gary E. Smith
Thawj Tswj Hwm Russell M. Nelson hais tias txoj kev sib sau ua ke no yog “qhov tseem ceeb tshaj plaws uas muaj hauv lub ntiaj teb no. Tsis muaj ib yam loj dua, tsis muaj ib yam tseem ceeb dua, tsis muaj ib yam uas muaj yeeb koob dua ntxiv. Thiab yog nej xaiv, yog nej xav ua, ces nej yuav muaj feem ua txoj hauj lwm no.”
Peb yuav ua li cas thiaj pab tau? Txoj kev muab Ixayees sau los ua ke txhais tau li cas? Puas yog hais tias yuav muab kaum ob xeem neeg coj rov qab mus nyob hauv lawv qub teb qub chaws? Tiag tiag mas, nws yeej tseem ceeb dua, yog ib qho uas kav ntev mus ib txhis. Xws li Thawj Tswj Hwm Nelson piav hais tias:
“Thaum peb hais txog kev sib sau, peb tsuas hais qhov tseeb no hais tias: txhua tus ntawm Leej Txiv Saum Ntuj Ceeb Tsheej cov me nyuam, nyob ob sab ntawm daim ntaub thaiv, tsim nyog hnov txog Yexus Khetos txoj moo zoo. …
“Txhua lub sij hawm nej ua ib yam dab tsi pab lwm tus—tsis hais nyob sab twg ntawm daim ntaub thaiv los yog—mus ib ruam tom ntej khi lus nrog Vajtswv thiab ua kev cai raus dej thiab ua kab ke hauv lub tuam tsev, nej pab muab Ixayees sau los ua ke. Yeej yooj yim to taub npaum li ntawd”
Yuav muaj li no, raws li Yaxayas hais tias, “ib tug zuj zus” (Yaxayas 27:12) los sis, raws li Yelemis qhia tseg tias, “ ib tug hauv ib lub nroog thiab ib xeem twg ob leeg” (Yelemis 3:14).
Txoj kev muab Ixayees sau los ua ke txhais tau hais tias coj Vajtswv cov me nyuam rov los cuag Nws. Qhov no txhais tau hais tias yus pab lawv rov qab nrog Nws sib khi lus tseg. Nws txhais tau hais tias rov qab muab lawv tsa ua “ib haiv neeg dawb huv” uas Nws twb teem cia puag thaum ub (Khiav Dim 19:6).
Los Tsev
Ua ib tug neeg uas twb nrog Vajtswv sib khi lus lawm, koj yog ib tug hauv haiv neeg Ixayees. Koj twb raug los sib sau ua ke lawm, thiab koj yog ib tug neeg uas pab sau tib neeg los ua ke. Zaj dab neeg txog ib haiv neeg uas ua tej kev khi lus tab tom yuav tiav los, thiab koj yog ib tug neeg tseem ceeb rau zaj ntawd. Nim no twb txog sij hawm uas “Yexus Yuav Hu Kom Haiv Neeg Ixayees, ‘Cia Li Los Tsev.’”
Cov neeg uas pab sau tib neeg los ua ke zaj xov yog li no hais tias: Cia li los tsev rau txoj kev sib khi lus. Cia li los tsev los nyob hauv Xi-oos. Cia li los tsev rau Yexus Khetos, tus Neeg Dawb Huv hauv Ixayees, thiab Nws yuav coj nej rov los cuag Vajtswv, nej Leej Txiv.