2 రాజులు 2–7

అద్భుతాలు దేవుని శక్తిని మనకు చూపుతాయి. అవి మర్త్యత్వములోని కష్టాలను జయించడానికి మనకు సహాయపడగలవు—బంజరు భూమికి అవసరమైన స్వచ్ఛమైన నీళ్లు (2 రాజులు 2:19–22 చూడండి) మరియు కోల్పోయిన గొడ్డలిని తిరిగి పొందడం (2 రాజులు 6:4–7 చూడండి) వంటివి. కానీ ముఖ్యంగా, అద్భుతాలు మనల్ని ప్రభువు వైపుకు తిప్పగలవు. 2 రాజులు 2–6ను మీరు చదివినప్పుడు, మీరు కనుగొనే అద్భుతాల జాబితాను చేయడాన్ని పరిగణించండి మరియు ప్రతీ దానినుండి మీరు నేర్చుకొనే ఆత్మీయ పాఠములను ధ్యానించండి.

మీరు ఎలీషా చేసిన అద్భుతాలను యేసు క్రీస్తు చేసిన అద్భుతాలతో పోల్చవచ్చు (2 రాజులు 4:8–37 మరియు లూకా 7:11–16; 2 రాజులు 4:42–44 మరియు యోహాను 6:1–13; 2 రాజులు 5:1–15 మరియు లూకా 17:11–19 చూడండి). ఈ అద్భుతాలు రక్షకుని గురించి మరియు ఆయన ప్రవక్తల గురించి మీకు ఏమి బోధిస్తాయి?

2 నీఫై 26:12–13; 27:23; మొరోనై 7:35–37; రస్సెల్ ఎమ్. నెల్సన్, “ఆత్మీయ వేగము యొక్క శక్తి,” లియహోనా, మే 2022, 99–100లో “అద్భుతాలను వెదకండి మరియు ఆశించండి” విభాగము కూడా చూడండి.

రాబోయే విషయాలు—సాధారణంగా, జరగడానికి అవకాశం లేని వాటి గురించి ప్రవచించమని ప్రభువు ఎలీషాను ప్రేరేపించారు. మీరు 2 రాజులు 4:8–17; 7:1–16 చదివినప్పుడు, నేడు ఆయన ప్రవక్తల ద్వారా ఇవ్వబడే ప్రభువు వాక్యమునకు మీరు ఎలా స్పందిస్తున్నారో ఆలోచించండి. జీవిస్తున్న ప్రవక్తలనుండి మీరు వినిన బోధనలు, ప్రవచనాలు లేదా వాగ్దానాలు ఏవి? వారి మాటలపై విశ్వాసముతో పని చేయడానికి మీరేమి చేస్తున్నారు?

3 నీఫై 29:6; సిద్ధాంతము మరియు నిబంధనలు 1:37–38 కూడా చూడండి.

మీరు 2 రాజులు 5 చదువుతున్నప్పుడు, నయమాను యొక్క కుష్టరోగమును మీరు ఎదుర్కొంటున్న ఆత్మీయ సవాలుతో పోల్చడాన్ని పరిగణించండి.

ప్రభువు యొక్క ప్రవక్తల నుండి మీ సవాలుకు నడిపింపు వెదకమని మిమ్మల్ని ప్రోత్సహించేలా మీ జీవితంలో “చిన్నదాని” వంటి వారెవరైనా ఉన్నారా? (2–3, 13 వచనములు చూడండి).

“స్నానము చేసి శుద్ధుడవు కమ్ము” వలె—చాలా సరళంగా అనిపించే దేనిని చేయమని ప్రభువు మిమ్మల్ని ఆహ్వానిస్తున్నారు? (13వ వచనము). అతని సాధారణ ఆహ్వానాలను అంగీకరించకుండా మిమ్మల్ని ఏది అడ్డుకుంటుంది?

నయమానులా మీరు వినయాన్ని ఎలా చూపించగలరు?

నయమాను యొక్క అనుభవం ఇశ్రాయేలు దేవునియందు అతడి విశ్వాసమును ఎలా ప్రభావితం చేసిందో గమనించండి (15వ వచనము చూడండి). దీని నుండి మీరు ఏమి నేర్చుకుంటారు?

లూకా 4:27; 1 పేతురు 5:5–7; ఆల్మా 37:3–7; ఈథర్ 12:27; ఎల్. విట్నీ క్లేటన్, “అతడు చేయమని నీకేమి చెప్పినను, దానిని చేయుము,” లియహోనా, మే 2017, 97–99 కూడా చూడండి.

14:30

మీరు క్రీస్తును అనుసరించడానికి ప్రయత్నిస్తున్నప్పుడు, మీరు ఎప్పుడైనా ఎలీషా యొక్క యువ సేవకునిగా—అధిక సంఖ్యాకులుగా మరియు భయంకరంగా భావించారా? మీరు 2 రాజులు 6:8–23 చదువుతున్నప్పుడు, మీరు అతని స్థానంలో ఉన్నట్లు ఊహించుకోండి. ఈ కథ మీ శ్రమలు, మీ బాధ్యతలు లేదా సువార్తను జీవించడానికి మీ ప్రయత్నాలను గూర్చి మీరు ఆలోచించే మరియు భావించే విధానమును ఎలా మారుస్తుంది?

మీరు ధ్యానించినప్పుడు, అధ్యక్షులు హెన్రీ బి. ఐరింగ్ గారి మాటలను పరిగణించండి: “ఎలీషా యొక్క ఆ సేవకుని వలె, మీరు చూడగలిగినట్లు మీకు వ్యతిరేకముగా ఉన్న వారికంటె మీతో ఉన్నవారే అధికులైయున్నారు. మీతో ఉన్నవారు కొందరు మీ మర్త్య కన్నులకు అదృశ్యంగా ఉన్నారు. ప్రభువు మిమ్మల్ని వహించును మరియు కొన్నిసార్లు మీతో నిలబడుటకు ఇతరులను పిలుచుట ద్వారా దానిని చేయును” (“O Ye That Embark,” Liahona, Nov. 2008, 58).

“[మీతో] ఉన్నవారు” (16వ వచనము)—మీకు మద్దతుగా దేవుడు మీ జీవితంలో ఉంచిన వ్యక్తుల జాబితాను రూపొందించడాన్ని పరిగణించండి. మీ ఆధ్యాత్మిక కన్నులను తెరవడం ద్వారా వారిని గుర్తించడంలో మీకు సహాయం చేయమని మీరు ఆయనను అడగవచ్చు. ఇతరులకు సహాయం చేయడానికి ఆయన బహుశా మిమ్మల్ని కూడా వారి జీవితాల్లో ఉంచియుండవచ్చు. మీరు ఒకరికొకరు బలము మరియు మద్దతును ఎలా పొందగలరు?

సిద్ధాంతము మరియు నిబంధనలు 84:88 లో ప్రభువు వివరించిన మద్దతును మీరెప్పుడు భావించారు?

సహోదరి మిచెల్ డి. క్రైయిగ్ గారి సందేశము, “చూసే కన్నులు,” (లియహోనా, నవ. 2020, 15-17) కూడా మీరు చదవవచ్చు. “నేను ఏమి చూడాలని ప్రభువు కోరుతున్నారు?” అని మిమ్మల్ని మీరు అడగండి.

2 రాజులు 6:8–23లోని కథను ప్రస్తావిస్తూ, ఎల్డర్ రోనాల్డ్ ఎ. రాస్బాండ్ ఇలా అన్నారు: “మన భయాలను చెదరగొట్టి మన దయ్యాలను జయించడానికి మనకు గుఱ్ఱముల రథములు ఉండవచ్చు లేకపోవచ్చు, కానీ పాఠము స్పష్టమైనది. ప్రభువు మనతో ఉన్నాడు, మనల్ని గుర్తుంచుకున్నాడు మరియు ఆయన మాత్రమే చేయగల విధానాలలో మనల్ని దీవిస్తున్నాడు. ప్రార్థన మన ఆలోచనలను యేసు క్రీస్తుపై మరియు ఆయన ప్రాయశ్చిత్త త్యాగంపై కేంద్రీకరించడానికి అవసరమైన బలాన్ని మరియు బయల్పాటును ఇవ్వగలదు. కొన్నిసార్లు మనం భయపడతామని ప్రభువుకు తెలుసు. నేను ఆ పరిస్థితిలో ఉన్నాను మరియు మీరు కూడా ఉన్నారు. … ఈ సంఘములో ప్రపంచంపై ప్రభావం చూపే విషయంలో మనం తక్కువ సంఖ్యలో ఉండవచ్చు, కానీ మనం మన ఆధ్యాత్మిక కళ్ళను తెరిచినప్పుడు, ‘మన పక్షమున నున్నవారు వారికంటె అధికులైయున్నారు’ [2 రాజులు 6:16]” (“కలవరపడకుము,” లియహోనా, నవ. 2018, 18, 19). ఆత్రుతగా లేదా భయపడుతున్న వ్యక్తికి సహాయం చేయడానికి మీరు ఈ పదాలను ఎలా ఉపయోగిస్తారు?

• అద్భుతం అంటే ఏమిటో అర్థం చేసుకోవడంలో మీ పిల్లలకు సహాయం చేసిన తర్వాత, వీలైనన్ని అద్భుతాల ఉదాహరణలను జాబితా చేయడానికి వారిని ఆహ్వానించండి. Gospel Art Book [సువార్త కళా పుస్తకము] లేదా రండి, నన్ను అనుసరించండి లోని చిత్రాలు సహాయపడగలవు. తర్వాత వారు అద్భుతాల కొరకు 2 రాజులు 4:1–7, 14–17, 32–35, 38–44 లో చూడవచ్చు. ఈ అద్భుతాలు పరలోక తండ్రి గురించి ఏమి బోధిస్తాయి?

• అద్భుతాల ద్వారా దేవుడు తన ప్రేమను ఎలా చూపించారనే దాని గురించి మీరు మరియు మీ పిల్లలు మాట్లాడవచ్చు.

• 2 రాజులు 5:1–3, 9–14 లోని కథను నేర్చుకోవడానికి మీ పిల్లలకు సహాయపడండి. (పాత నిబంధన కథలు, 134-37లో) “ఎలీషా నయమానును స్వస్థపరచును” లేదా ఈ వారపు నమూనాలో ఉన్న నయమాను చిత్రాన్ని ఉపయోగించడాన్ని పరిగణించండి. అతని వ్యాధిని నయం చేస్తుందని ఎలీషా చెప్పినా, నయమాను యొర్దాను నదిలో ఎందుకు స్నానం చేయాలని అనుకోలేదు? ఎలీషా సూచనలను అనుసరించినప్పుడు నయమాను ఎలా ఆశీర్వదించబడ్డాడు? మీరు లోబడాలని కోరుకోనప్పుడు కూడా, మీరు ప్రభువుకు విధేయత చూపినప్పటి అనుభవాలను మీరు ఒకరికొకరు పంచుకోవచ్చు.

  

  1:52

• ప్రవక్తయైన ఎలీషాకు విధేయత చూపాలని నిర్ణయించుకోవడంలో నయమాను సేవకులు అతనికి సహాయం చేసిన 2 రాజులు 5:13ని కూడా మీరు నొక్కి చెప్పవచ్చు. అప్పుడు ప్రవక్త చెప్పేది వినడానికి మరియు విధేయత చూపడానికి వారి స్నేహితులకు లేదా కుటుంబ సభ్యులకు సహాయపడే మార్గాల గురించి మీ పిల్లలు మాట్లాడవచ్చు.

• కత్తులు, గుర్రాలు మరియు రథాలతో ఒక సైన్యం మిమ్మల్ని చుట్టుముట్టినట్లు మీరు మరియు మీ పిల్లలు ఊహించవచ్చు. మీరు ఎలా భావిస్తారు? మీరు ఏమి చేస్తారు? మీరు వారి కోసం 2 రాజులు 6:16–17 చదివేటప్పుడు మీ పిల్లలు కళ్లు మూసుకోవచ్చు. (పాత నిబంధన కథలు, 138–39లో “ఎలీషా మరియు ప్రభువు యొక్క సైన్యము” లేదా ఈ నమూనా చివరనున్న చిత్ర్రాన్ని కూడా చూడండి.) “వీని కండ్లను తెరువుము” (17వ వచనము) అనే పదాలను మీరు చదివినప్పుడు, పిల్లలను వారి కళ్ళు తెరవమని అడగండి. సేవకుడు చూసిన దాని గురించి మాట్లాడండి. మీరు ఒంటరిగా ఉన్నట్లు అనిపించినప్పటికీ, మీ సవాళ్ల సమయంలో ప్రభువు మీతో ఉన్నారని మీరు భావించిన మార్గాలను మీ పిల్లలతో పంచుకోండి.

  

  1:9