2 రాజులు 16–25

మనలో అనేకమంది మన విశ్వాసాన్ని సవాలు చేసే అనుభవాలను కలిగియున్నాము. అష్షూరు సైన్యము యెరూషలేమును సమీపించినప్పుడు, హిజ్కియా మరియు అతని జనులకు అటువంటి సవాళ్ళలో ఒకటి వచ్చింది. మీరు 2 రాజులు 18–19 చదివినప్పుడు, ఆ సమయమందు మీరు యెరూషలేములో నివసిస్తున్నట్లు ఊహించుకోండి. ఉదాహరణకు, 2 రాజులు 18:28–37; 19:10–13 లో అష్షూరీయుల వెక్కిరింపులను వినినప్పుడు మీరు ఎలా భావించియుండవచ్చు? మీరు ఏమి చేసియుండవచ్చు? ఇశ్రాయేలీయులు ప్రభువును విశ్వసించకపోవడానికి అష్షూరీయుల కారణాలను, నేడు మన విశ్వాసాన్ని అనుమానించడానికి సాతాను చెప్పిన కారణాలతో పోల్చండి. మీరు ప్రభువును ఎందుకు విశ్వసిస్తున్నారనే దానికి మీ కారణాలతో అష్షూరీయుల కారణాలను కూడా మీరు విభేదించవచ్చు.

ఈ సందర్భంలో హిజ్కియా చేసిన దాని నుండి మీరు ఏమి నేర్చుకుంటారు? (2 రాజులు 19:1–7, 14–19 చూడండి). ప్రభువు ఎలా స్పందించారు? (2 రాజులు 19:35–37 చూడండి). హిజ్కియా ఎందుకు విశ్వాసంగా నిలిచాడని మీరనుకుంటున్నారు? (2 రాజులు 18:5–7 చూడండి). కష్టకాలములందు ప్రభువు మిమ్మల్ని ఎలా బలపరిచారో ధ్యానించండి. ఆయనపై మీ నమ్మకాన్ని పెంచుకోవడానికి మీరు ఏమి చేయాలని ప్రేరేపించబడినట్లు భావిస్తున్నారు?

అధ్యక్షులు జెఫ్రీ ఆర్. హాలండ్ గారి సందేశము, “భయపడవద్దు, నమ్మికమాత్రముంచుము!” (లియహోనా, మే 2022, 34–36) భయం లేదా సందేహాలు గల సమయాల్లో సహాయకరమైన సలహాను కలిగియుంది. మీకు సహాయపడేలా ఈ వనరులలో మీరు ఏమి కనుగొంటారు?

2 దినవృత్తాంతములు 31–32; 3 నీఫై 3–4; యోర్గ్ క్లెబింగెట్, “కడవరి దినాలలో సాహసముగల శిష్యత్వము,” లియహోనా, మే 2022, 107–10 కూడా చూడండి.

అతడి సైన్యము యెరూషలేమును జయించగలదని నమ్మడానికి అష్షూరు రాజైన సన్హెరీబుకు మంచి కారణమున్నది (2 రాజులు 17; 18:33–34; 19:11–13 చూడండి). కానీ సన్హెరీబు కోసం ప్రభువు ఒక సందేశాన్ని కలిగియున్నారు, అది యెషయా ప్రవక్త ద్వారా ఇవ్వబడింది. అది 2 రాజులు 19:20–34 లో నమోదు చేయబడింది. ప్రభువు యందు మరియు ఆయన ప్రణాళికయందు మీరు విశ్వాసము కలిగియుండునట్లు మీకు సహాయపడేలా ఆయన సందేశంలో మీరు కనుగొన్న సత్యములేవి?

మీకు ఆత్మీయంగా ఏదైనా కొదువుగా ఉన్నట్లు మీరెప్పుడైనా భావించారా? దేవునితో మీ అనుబంధము బలమైనదిగా కాగలదని మీరు భావించియుండవచ్చు. ఆయన యొద్దకు తిరిగి రావడానికి మీకు సహాయపడినదేమిటి? మీరు 2 రాజులు 21–23 చదివినప్పుడు ఈ ప్రశ్నలను గూర్చి ధ్యానించండి, అవి మనష్షే రాజు ఏలుబడిలో యూదా రాజ్యము ప్రభువు నుండి ఏవిధంగా దూరమైంది (2 రాజులు 21 చూడండి) మరియు జనులు ఆయన వైపుకు తిరిగి రావడానికి యోషీయా రాజు వారికి ఏవిధంగా సహాయము చేసాడో వివరిస్తాయి (2 రాజులు 22–23 చూడండి). యోషీయా మరియు అతని జనులు ఎలా మరియు ఎందుకు మారారు? (2 రాజులు 22:8–11; 23:1–6, 21, 24 చూడండి).

అధ్యక్షులు స్పెన్సర్ డబ్ల్యు. కింబల్ యోషీయా రాజు కథను “అన్ని గ్రంథాలలోని అత్యుత్తమ కథలలో ఒకటి” అని పేర్కొన్నారు (Teachings of Presidents of the Church: Spencer W. Kimball [2006], 62). యోషీయా రాజు గురించి అధ్యక్షులు కింబల్ గారి మాటలను చదవండి (62–64 పేజీలు ). బహుశా మీరు లేఖనంలోని ఒక భాగం మీలో “శక్తివంతంగా పనిచేసినప్పటి” అనుభవం గురించి ఆలోచించవచ్చు. ఇలాంటి మరిన్ని అనుభవాలను పొందడానికి మీరు ఏమి చేయవచ్చు?

ఆల్మా 31:5 కూడా చూడండి.

12:25

2 రాజులు 23:3లో యోషీయా చేసిన నిబంధన గురించి ఏది మిమ్మల్ని ఆకట్టుకుంటుంది? మీరు 23వ అధ్యాయం చదవడాన్ని కొనసాగిస్తున్నప్పుడు, ప్రభువు పట్ల తనకున్న నిబద్ధతను చూపించడానికి యోషీయా ఏమి చేసాడో గమనించండి (ఈ నమూనా చివర ఉన్న చిత్రాన్ని కూడా చూడండి). ఆయనపట్ల మీ నిబద్ధతను మీరెలా చూపగలరు?

• 2 రాజులు 18:3, 5–6లో, హిజ్కియాను మంచి రాజుగా చేసిన వాటిని కనుగొనడంలో మీ పిల్లలకు సహాయం చేయండి. తర్వాత మీరు కలిసి 2 రాజులు 19:14–19 చదివినప్పుడు, అతను ప్రభువును నమ్మాడని అతను ఎలా చూపించాడో వారు కనుగొనగలరు. మీరు యేసు చిత్రాన్ని చూసి, మనం ఆయనను ఎందుకు నమ్మగలము అనే దాని గురించి మాట్లాడవచ్చు. మనము ప్రభువును నమ్ముతున్నామని మనమెలా చూపగలము?

• 2 రాజులు 22:1లో, యోషీయా రాజు అయినప్పుడు అతని వయస్సు ఎంత ఉందో తెలుసుకోవడానికి మీ పిల్లలకు సహాయం చేయండి. 2వ వచనములో యోషీయా గురించి మనం ఏమి నేర్చుకుంటాము? “కుడి ఎడమలకు” తిరగక ప్రభువును అనుసరించడాన్ని వివరించగల ఒక ప్రోత్సాహకార్యక్రమమును పరిగణించండి.

• 2 రాజులు 22:3–7లో వివరించబడిన పనివారు దేవాలయమును తిరిగి కట్టడానికి ఉపయోగించబడిన ద్రవ్యముతో “వారు నమ్మకంగా వ్యవహరించినందున” నమ్మబడ్డారు (7వ వచనము). ఈ వచనాలను చదివిన తర్వాత, మీరు మరియు మీ పిల్లలు మిమ్మల్ని నమ్మి అప్పగించిన విషయాల గురించి మాట్లాడవచ్చు. ఈ వచనములలోని పనివారివలే మనము నమ్మకస్థులుగా ఎలా ఉండగలము?

• 2 రాజులు 22–23లో యోషీయా రాజు కథను పరిచయం చేయడానికి, మీరు గదిలో ఎక్కడో ఒక చోట లేఖనాల ప్రతిని దాచవచ్చు. దాన్ని కనుగొనడానికి మీ పిల్లలను ఆహ్వానించండి. అప్పుడు యోషీయా యొక్క యాజకులలో ఒకరు దేవాలయంలో లేఖనాలను కనుగొన్నప్పుడు ఏమి జరిగిందో మీరు పంచుకోవచ్చు (2 రాజులు 22:8–11 చూడండి; పాత నిబంధన కథలు, 148–49లో “రాజైన యోషీయా” కూడా చూడండి). మన దగ్గర లేఖనాలు లేకపోతే మనకు ఏమి జరుగవచ్చు? ఈ రోజు మన వద్ద లేఖనాలు ఉన్నాయని మీరు ఎందుకు సంతోషిస్తున్నారో పరస్పరం పంచుకోండి.

  

  1:36

• 2 రాజులు 23:2–3 చదివిన తరువాత, మీరు మరియు మీ పిల్లలు “ప్రభువు వెంట నడవడానికి” (3వ వచనము) మిమ్మల్ని ప్రేరేపించిన లేఖనాల గురించి మాట్లాడవచ్చు.

• యోషీయా మరియు అతని జనులు దేవుని ఆజ్ఞలను నేర్చుకున్నప్పుడు, వారు వాటిని జీవించడానికి ఒక నిబంధన చేసారు. మీ పిల్లలతో కలిసి 2 రాజులు 23:1–3లో దాని గురించి చదవండి మరియు ప్రభువు యొక్క ఆజ్ఞల గురించి జనులు ఎలా భావించారో చూపించే పదాలు లేదా వాక్యభాగాలను కనుగొనడంలో వారికి సహాయపడండి. బహుశా మీ పిల్లలు నిలబడి, “నిబంధనను [స్థిరపరచడం]” అంటే అర్థం ఏమిటో మాట్లాడవచ్చు. తరువాత వారు ఒక ప్రదేశంలో నడుస్తూ, “ప్రభువు వెంట నడవడం” అంటే ఏమిటో మాట్లాడవచ్చు. ఆ తర్వాత, వారు తమ హృదయాలపై చేతులు వేసి, మన నిబంధనలను “[మన] పూర్ణహృదయంతో” పాటించగల మార్గాలను సూచించవచ్చు.