« ថ្ងៃទី២៩ ខែមិថុនា–ថ្ងៃទី៥ ខែកក្កដា ‹ បើព្រះយេហូវ៉ាទ្រង់ជាព្រះ នោះចូរដើរតាមទ្រង់ទៅ › ៖ ពង្សាវតារក្សត្រ ទី១ ១២–១៣, ១៧–២២ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )

« ថ្ងៃទី២៩ ខែមិថុនា–ថ្ងៃទី៥ ខែកក្កដា ‹ បើព្រះយេហូវ៉ាទ្រង់ជាព្រះ នោះចូរដើរតាមទ្រង់ទៅ › » ចូរមកតាមខ្ញុំ ៖ ព្រះគម្ពីរសញ្ញាចាស់ ឆ្នាំ២០២៦

Elijah Contends against the Priests of Baal [ អេលីយ៉ាតតាំងនឹងពួកសង្ឃនៃព្រះបាល ] ដោយ ជេរី ហាស្តុន

ថ្ងៃទី២៩ ខែមិថុនា–ថ្ងៃទី៥ ខែកក្កដា ៖ « បើព្រះយេហូវ៉ាទ្រង់ជាព្រះ នោះចូរដើរតាមទ្រង់ទៅ »

ពង្សាវតារក្សត្រ ទី១ ១២–១៣; ១៧–២២

វង្សអ៊ីស្រាអែលបានវង្វេងស្មារតី ។ នគរនេះត្រូវបានបែងចែក ដែលមានពូជអំបូរទាំងដប់បានបង្កើតជានគរខាងជើងនៃអ៊ីស្រាអែល និងពូជអំបូរពីរទៀតបង្កើតជានគរនៃយូដាខាងត្បូង ។ ប៉ុន្តែអាក្រក់ជាងការបែកចេញពីគ្នាគឺការបំបែកនគរទាំងពីរចេញពីសេចក្ដីសញ្ញារបស់ពួកគេ ។ ស្ដេចទុច្ចរិតបាននាំប្រជាជនចេញពីព្រះអម្ចាស់ ហើយមនុស្សជាច្រើនបានវង្វេងក្នុងជំនឿរបស់ពួកគេ ។

ក្នុងស្ថានភាពនេះ ព្រះអម្ចាស់បានហៅអេលីយ៉ាឲ្យធ្វើជាព្យាការី ។ ជីវិតរបស់លោកបង្ហាញថា មនុស្សម្នាក់អាចមានជំនឿយ៉ាងខ្លាំងទៅលើព្រះអម្ចាស់ ទោះជាស្ថិតក្នុងកាលៈទេសៈអាក្រក់ក៏ដោយ ។ នៅពេលខ្លះព្រះអម្ចាស់ឆ្លើយតបចំពោះជំនឿបែបនោះ ជាមួយនឹងអព្ភូតហេតុដ៏អស្ចារ្យនៅទីសាធារណៈដូចជា ភ្លើងធ្លាក់ពីលើមេឃ ជាដើម ។ ប៉ុន្តែ ទ្រង់ក៏ធ្វើឲ្យមានអព្ភូតហេតុផ្ទាល់ខ្លួនដោយស្ងប់ស្ងាត់ផងដែរ ដូចជាការបំពេញឲ្យអាហារដល់ស្រ្តីមេម៉ាយដ៏ស្មោះត្រង់ និងកូនប្រុសរបស់នាង ។ ហើយជាញឹកញាប់បំផុត អព្ភូតហេតុរបស់ព្រះអម្ចាស់គឺមានលក្ខណៈផ្ទាល់ខ្លួនដែលវាឲ្យតែមនុស្សម្នាក់ប៉ុណ្ណោះដឹង—ឧទាហរណ៍ នៅពេលព្រះអម្ចាស់បើកសម្តែងព្រះអង្គទ្រង់ និងទៅកាន់បងប្អូន តាមរយៈ « សំឡេងតូចរហៀងៗ » ( ពង្សាវតារក្សត្រ ទី១ ១៩:១២ ) ។

សម្រាប់សាច់រឿងបន្ថែមទៀតអំពី អេលីយ៉ា សូមមើល « អេលីយ៉ា » នៅក្នុងសេចក្តីណែនាំដល់បទគម្ពីរទាំងឡាយ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ

ពង្សាវតារក្សត្រ ទី១ ១២:១–២០

ថ្នាក់ដឹកនាំដូចជាព្រះគ្រីស្ទបម្រើមនុស្សដែលពួកគាត់ដឹកនាំ ។

តើបងប្អូននឹងពិពណ៌នាអំពីកំហុសដែលស្តេចរេហូបោម ជាបុត្រារបស់សាឡូម៉ូនបានធ្វើយ៉ាងណា ? ពង្សាវតារក្សត្រ ទី១ ១២:១–១៤ ? តើគុណលក្ខណៈដូចជាព្រះគ្រីស្ទអ្វីខ្លះដែលអាចជួយរេហូបោមសង្គ្រោះនគររបស់ទ្រង់ ? ( សូមមើល ខទី ៧; ម៉ាថាយ ២០:២៥–២៨; ម៉ូសាយ ២:១០–២១ ) ។ តើបងប្អូនអាចប្រើគុណលក្ខណៈទាំងនេះក្នុងនាមជាអ្នកដឹកនាំដោយរបៀបណា—មិនថានៅក្នុងការហៅក្នុងសាសនាចក្រ ឬជាអ្នកដឹកនាំក្នុងជីវិតរបស់បងប្អូននោះទេ ?

ពង្សាវតារក្សត្រ ទី១ ១៧:៨–១៦; ១៩:១៩–២១

ការអញ្ជើញឲ្យមានពលិកម្មគឺជាឱកាសដើម្បីអនុវត្តសេចក្តីជំនឿរបស់ខ្ញុំលើព្រះយេស៊ូវគ្រីស្ទ ។

ព្យាការីអេលីយ៉ាបានសុំឲ្យស្រ្តីមេម៉ាយផ្តល់អាហារ និងទឹកដល់លោកមុនពេលផ្តល់អាហារដល់ខ្លួននាង និងកូនប្រុសដែលកំពុងស្រេកឃ្លានរបស់នាង ។ ហេតុអ្វីលោកធ្វើដូច្នោះ ? សំណើរបស់អេលីយ៉ាក៏អាចឃើញថាជាពរជ័យដល់គ្រួសារដ៏តូចនេះផងដែរ ។ ពួកគេត្រូវការពរជ័យរបស់ព្រះអម្ចាស់ហើយការពលិកម្មតែងតែនាំមកនូវពរជ័យ—រួមទាំងពរជ័យនៃការមានជំនឿកាន់តែរឹងមាំផងដែរ ។

នៅពេលបងប្អូនអាន ពង្សាវតារក្សត្រ ទី១ ១៧–១៦ សូមស្រមៃថាបងប្អូនគឺជាស្រ្តីមេម៉ាយរូបនេះ ។ តើមានអ្វីខ្លះដែលធ្វើឲ្យបងប្អូនចាប់អារម្មណ៍ចំពោះគាត់ ? បងប្អូនក៏អាចធ្វើបញ្ជីនៃជម្រើសដែលតម្រូវឲ្យមានសេចក្ដីជំនឿលើព្រះយេស៊ូវគ្រីស្ទផងដែរ ( ឧទាហរណ៍ សូមមើល ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] ) ។ តើបងប្អូនរៀនអ្វីខ្លះមកពីស្រ្តីមេម៉ាយរូបនេះអំពីរបៀបអនុវត្តសេចក្តីជំនឿ ?

តើសកម្មភាពរបស់អេលីសេនៅក្នុង ពង្សាវតារក្សត្រ ទី១ ១៩:១៩–២១ ស្រដៀងនឹងទង្វើរបស់ស្រ្តីមេម៉ាយរូបនេះដោយរបៀបណា ?

សូមគិតអំពីពលិកម្មដែលបងប្អូនបានធ្វើដើម្បីដើរតាមព្រះអង្គសង្គ្រោះ ។ តើ ពង្សាវតារក្សត្រ ទី១ ១៧:៨–១៦; ១៩:១៩–២១ បង្រៀនបងប្អូនអ្វីខ្លះអំពីការពលិកម្មទាំងនេះ ? តើចំណេះដឹងរបស់បងប្អូនអំពីព្រះអង្គសង្គ្រោះជួយបងប្អូនដូចម្តេច នៅពេលទ្រង់សុំឲ្យបងប្អូនឲ្យធ្វើការបូជា ? តើទ្រង់បានប្រទានពរដល់បងប្អូនដោយរបៀបណា ?

សូមមើលផងដែរ ម៉ាថាយ ៤:១៨–២២; ៦:២៥–៣៣; លូកា ៤:២៤–២៦; « Elijah and the Widow of Zarephath » ( វីដេអូ ) នៅលើបណ្ណាល័យដំណឹងល្អ « កាលតស៊ូជឿ » ទំនុកតម្កើង ល.រ. ៦០ ។

ពង្សាវតារក្សត្រ ទី១ ១៨

« បើព្រះយេហូវ៉ាទ្រង់ជាព្រះ នោះចូរដើរតាមទ្រង់ទៅ » ។

ពួកសាសន៍អ៊ីស្រាអែលប្រហែលជាមានអារម្មណ៍ថាពួកគេមានហេតុផលល្អដើម្បីថ្វាយបង្គំព្រះបាល ដែលត្រូវបានស្គាល់ថាជាព្រះនៃព្យុះ និងភ្លៀង ។ បន្ទាប់ពីគ្រោះរាំងស្ងួតរយៈពេលបីឆ្នាំ ពួកគេត្រូវការភ្លៀងយ៉ាងខ្លាំង ។ ហើយការថ្វាយបង្គំព្រះបាលគឺត្រូវបានសង្គមទទួលស្គាល់ និងត្រូវបានជំរុញដោយស្តេច និងម្ចាស់ក្សត្រី ។ នៅពេលបងប្អូនអាន ពង្សាវតារក្សត្រ ទី១ ១៨ សូមគិតអំពីមូលហេតុដែលនរណាម្នាក់នៅជំនាន់របស់យើងអាចមិនប្រាកដចិត្តក្នុងការធ្វើតាមព្រះអម្ចាស់ ។ នៅក្នុងជំពូកនេះ តើបងប្អូនគិតថាព្រះអម្ចាស់កំពុងព្យាយាមបង្រៀនអ្វីខ្លះអំពីអង្គទ្រង់ ? តើបទពិសោធន៍អ្វីខ្លះដែលបានជួយបងប្អូនឲ្យតាំងចិត្តធ្វើតាមព្រះអង្គសង្រ្គោះ ?

សូមមើលផងដែរ ឌី ថត គ្រីស្តូហ្វឺសិន « Choice and Commitment » ( worldwide devotional for young adults ថ្ងៃទី១២ ខែមករា ឆ្នាំ២០២០ ) នៅលើបណ្ណាល័យដំណឹងល្អ ។

អេលីយ៉ានៅលើភ្នំហូរែប — រចនារូបភាពរបស់អេលីយ៉ា ដោយ វិលសុន អ៊ុង

ពង្សាវតារក្សត្រ ទី១ ១៩:១–១៨

ជាញឹកញាប់ ព្រះអម្ចាស់មានបន្ទូលដោយស្ងប់ស្ងាត់ និងសាមញ្ញ ។

គួរឲ្យស្តាយ អព្ភូតហេតុនៅលើភ្នំកើមែលមិនបានធ្វើឲ្យបេសកកម្មរបស់អេលីយ៉ាកាន់តែងាយស្រួលនោះទេ ។ តាមពិតជីវិតលោកស្ថិតក្នុងគ្រោះថ្នាក់ ហើយលោកត្រូវលាក់ខ្លួនក្នុងរូងភ្នំក្នុងទីរហោស្ថាន ។ នៅទីនោះ កើតមានភាពឯកោ និងការបាក់ទឹកចិត្ត លោកបានមានបទពិសោធន៍ជាមួយព្រះអម្ចាស់ខុសពីអ្វីដែលមាននៅលើភ្នំកើមែល ។ តើបទពិសោធន៍របស់អេលីយ៉ា នៅក្នុង ពង្សាវតារក្សត្រ ទី១ ១៩:១–១៨ បង្រៀនបងប្អូនអ្វីខ្លះអំពីរបៀបដែលព្រះអម្ចាស់ទំនាក់ទំនងជាមួយបងប្អូននៅក្នុងគ្រាលំបាករបស់បងប្អូន ?

សូមជញ្ជឹងគិតពេលដែលបងប្អូនមានអារម្មណ៍ថាព្រះអម្ចាស់បានមានព្រះបន្ទូលមកកាន់បងប្អូន ។ តើបងប្អូននឹងពិពណ៌នាអំពីរបៀបដែលទ្រង់ប្រាស្រ័យទាក់ទងជាមួយបងប្អូនយ៉ាងដូចម្ដេច ? ហេតុអ្វីពាក្យ « រហៀង » និង « តូច » ជារបៀបដ៏ល្អដើម្បីពិពណ៌នាសំឡេងនៃព្រះវិញ្ញាណ ? តើពាក្យសម្តីអ្វីផ្សេងទៀតដែលបងប្អូនរកឃើញនៅក្នុង ហេលេមិន ៥:៣០; គោលលទ្ធិ និងសេចក្តីសញ្ញា ៦:២២–២៣; ១១:១២–១៤ ? តើបងប្អូនត្រូវធ្វើអ្វីខ្លះដើម្បីទទួលបានការដឹកនាំរបស់ព្រះអម្ចាស់កាន់តែញឹកញាប់បន្ថែមទៀត ?

សូមមើលផងដែរ ទំនុកដំកើង ៤៦:១០ ។

សូមប្រើញាណច្រើនដើម្បីបង្កើនការរៀនសូត្រ ។ យើងទាំងអស់គ្នារៀនអំពីពិភពលោកតាមរយៈញ្ញាណទាំងប្រាំរបស់យើង ។ ការប្រើប្រាស់ញាណទាំងនោះក៏អាចបង្កើនការរៀនសូត្រផងដែរ ។ ឧទាហរណ៍ គិតពីរូបភាព ឬសំឡេងដែលបងប្អូនអាចប្រើដើម្បីបង្ហាញពាក្យ « រហៀង » និង « តូច » នៅពេលបងប្អូនរៀន ឬបង្រៀនអំពីព្រះសូរសៀងរបស់ព្រះអម្ចាស់នៅក្នុង ពង្សាវតារក្សត្រ ទី១ ១៩ ។

សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

ពង្សាវតារក្សត្រ ទី១ ១៧

ព្រះអម្ចាស់ប្រទានពរដល់ខ្ញុំ កាលដែលខ្ញុំមានជំនឿលើទ្រង់ ។

ដើម្បីជួយដល់កូនៗបងប្អូនរៀនពីដំណើររឿងនៃសេចក្តីជំនឿនៅក្នុង ពង្សាវតារក្សត្រ ទី១ ១៧ បងប្អូនអាចបង្ហាញរូបភាព ឬវត្ថុនានាឲ្យពួកគេដើម្បីបង្ហាញពីដំណើររឿង ដូចជាសត្វស្លាប នំប៉័ង ឬក្មេងប្រុសម្នាក់ ។ នៅពេលបងប្អូនប្រាប់កូនៗបងប្អូននូវដំណើររឿងទាំងនេះ សូមអញ្ជើញពួកគេឲ្យស្វែងរករូបភាព ឬវត្ថុដែលទាក់ទងនឹងដំណើររឿងនីមួយៗ ។ « អេលីយ៉ាជាព្យាការី » ( នៅក្នុង ដំណើររឿងព្រះគម្ពីរសញ្ញាចាស់ ទំព័រ ១២១–១២៤ ) អាចជួយបងប្អូនប្រាប់ដំណើររឿងទាំងនេះ ។ តើដំណើររឿងនីមួយៗបង្រៀនយើងអ្វីខ្លះ អំពីការបង្ហាញសេចក្ដីជំនឿលើព្រះយេស៊ូវគ្រីស្ទ ?

1:58
Elijah the Prophet
សូមជួយកូនៗរបស់បងប្អូនគិតអំពីរបៀបដែលពួកគេអាចបង្ហាញសេចក្ដីជំនឿរបស់ពួកគេលើព្រះយេស៊ូវគ្រីស្ទ ។ សូមច្រៀងចម្រៀងជាមួយពួកគេមួយបទអំពីសេចក្ដីជំនឿ ដូចជាបទ « I Have Faith in the Lord, Jesus Christ » ( បណ្ណាល័យដំណឹងល្អ ) ហើយចែកចាយជាមួយគ្នានូវអ្វីដែលបងប្អូនរៀនអំពីសេចក្ដីជំនឿពីបទចម្រៀងនេះ ។

អេលីយ៉ា ស្ត្រីមេម៉ាយ និងកូនប្រុសរបស់នាង — រចនារូបភាពនៃអេលីយ៉ា និងការព្យាបាលកូនប្រុសរបស់ស្ត្រីមេម៉ាយ ដោយ ឆាល អេដម៉ុន ប្រូក

ពង្សាវតារក្សត្រ ទី១ ១៧:៨–១៦

នៅពេលព្រះអម្ចាស់សុំឲ្យខ្ញុំលះបង់ ខ្ញុំអាចគោរពតាមដោយសេចក្ដីជំនឿ ។

ប្រហែលជាកូនៗបងប្អូនអាចគូររូបភាពនៃអ្វីដែលព្រះអម្ចាស់បានបង្គាប់ស្ត្រីមេម៉ាយឲ្យផ្តល់ទៅអេលីយ៉ា ( សូមមើល ពង្សាវតារក្សត្រ ទី១ ១៧:១២–១៣ ) និងអ្វីដែលស្រ្តីមេម៉ាយរូបនោះបានទទួលជាការតបស្នងមកវិញ( សូមមើល ពង្សាវតារក្សត្រ ទី១ ១៧:១៥–១៦ ) ។ ( សូមមើលទំព័រសកម្មភាពនាសប្ដាហ៍នេះផងដែរ ) ។ ពួកគេក៏អាចរកមើលរូបភាពរបស់មនុស្សផ្សេងទៀតដែលបានលះបង់អ្វីដែលពួកគេចង់បានសម្រាប់អ្វីដែលប្រសើរជាងនេះ ។ សូមអញ្ជើញកូនៗបងប្អូនឲ្យស្វែងរករូបភាពនៅក្នុង សៀវភៅរូបភាពដំណឹងល្អ ឬ ចូរមកតាមខ្ញុំ ។ តើព្រះអម្ចាស់បង្គាប់ឲ្យយើងបូជាអ្វីខ្លះ ? តើទ្រង់ប្រទានពរដល់យើងដោយរបៀបណា ?

ពង្សាវតារក្សត្រ ទី១ ១៨:១៧–៣៩

ខ្ញុំអាចជ្រើសរើសដើម្បីធ្វើតាមព្រះយេស៊ូវគ្រីស្ទ ។

នៅពេលបងប្អូនអាន ពង្សាវតារក្សត្រ ទី១ ១៨:១៧–៣៩ ជាមួយគ្នា នោះកូនៗបងប្អូនអាចជ្រើសរើសខគម្ពីរមួយ ហើយគូររូបភាពនៃអ្វីដែលវាពិពណ៌នា ។ ពួកគេអាចប្រើរូបភាពរបស់ពួកគេដើម្បីប្រាប់ពីដំណើររឿងជាពាក្យសម្តីរបស់ពួកគេផ្ទាល់ ។ ( សូមមើលផងដែរ « អេលីយ៉ា និងពួកសង្ឃព្រះបាល » នៅក្នុង ដំណើររឿងព្រះគម្ពីរសញ្ញាចាស់ ទំព័រ ១២៥–១២៨ ) ។

2:17
Elijah and the Priests of Baal
សូមជួយកូនៗបងប្អូនគិតពីស្ថានភាពនៅពេលដែលពួកគេត្រូវការសម្រេចចិត្តថា តើត្រូវធ្វើតាមឬមិនធ្វើតាមព្រះយេស៊ូវគ្រីស្ទ ។ ប្រហែលជាពួកគេអាចគូររូបខ្លួនឯងធ្វើការជ្រើសរើសដ៏ត្រឹមត្រូវ ។ ចែកចាយជាមួយគ្នាអំពីមូលហេតុដែលបងប្អូនជ្រើសរើសដើរតាមព្រះយេស៊ូវ ។

ពង្សាវតារក្សត្រ ទី១ ១៩:៩–១២

ព្រះអម្ចាស់មានព្រះបន្ទូលមកខ្ញុំតាមរយៈសំឡេងតូចរហៀងនៃព្រះវិញ្ញាណបរិសុទ្ធ ។

នៅពេលបងប្អូនសង្ខេប ពង្សាវតារក្សត្រ ទី១ ១៩:៨–១២ អញ្ជើញកូនៗបងប្អូនឲ្យធ្វើសកម្មភាពតំណាងឲ្យខ្យល់បក់ខ្លាំង ការរញ្ជួយដី និងភ្លើង ។ បន្ទាប់មកអញ្ជើញពួកគេអង្គុយឲ្យស្ងៀម នៅពេលបងប្អូនអានជាមួយគ្នាជាសំឡេងតូចរហៀង « ក្រោយពីភ្លើងនោះមក មានឮសំឡេងតូចរហៀងៗ » ( ខទី ១២ ) ។ ( សូមមើលផងដែរ « ព្រះអម្ចាស់មានព្រះបន្ទូលទៅកាន់អេលីយ៉ា » នៅក្នុង ដំណើររឿងព្រះគម្ពីរសញ្ញាចាស់ ទំព័រ ១២៩–១៣១ ) ។ សូមប្រាប់កូនៗបងប្អូនអំពីពេលដែលបងប្អូនបានដកពិសោធន៍នូវសំឡេងតូចរហៀងនៃព្រះវិញ្ញាណបរិសុទ្ធ ។

1:48
The Lord Speaks to Elijah
សូមច្រៀងដោយសំឡេងតិចៗនូវបទចម្រៀងអំពីព្រះវិញ្ញាណ ដូចជាបទ « The Still Small Voice » ( Children’s Songbook ទំព័រ ១០៦–១០៧ ) ។ តើអ្វីអាចបង្វែរអារម្មណ៍យើងពីការស្គាល់ព្រះវិញ្ញាណ ? តើអ្វីអាចជួយយើងឲ្យស្ដាប់ឮទ្រង់ ?

សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។

ស្ត្រីមេម៉ាយនៃស្រុកសារិបតា និងកូនប្រុសរបស់នាង — Widow of Zarephath [ ស្រ្តីមេម៉ាយនៅសារិបតា ] ដោយ រ៉ូស ដាតុច ដាល

ទំព័រសកម្មភាពសម្រាប់កុមារ ៖ នៅពេលព្រះអម្ចាស់សុំឲ្យខ្ញុំឲ្យពលិកម្ម ខ្ញុំអាចគោរពតាមដោយសេចក្ដីជំនឿ — Widow of Zarephath [ ស្រ្តីមេម៉ាយនៅសារិបតា ] ដោយ រ៉ូស ដាតុច ដាល