« ថ្ងៃទី៦–១២ ខែកក្កដា ‹ មានហោរា ១ នៅពួកអ៊ីស្រាអែល › ៖ ពង្សាវតារក្សត្រ ទី២ ២–៧ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )

« ថ្ងៃទី៦–១២ ខែកក្កដា ‹ មានហោរា ១ នៅពួកអ៊ីស្រាអែល › » ចូរមកតាមខ្ញុំ ៖ ព្រះគម្ពីរសញ្ញាចាស់ ឆ្នាំ២០២៦

At River’s Edge [ នៅឯមាត់ទន្លេ ] ដោយអានី ហែនរី ណេឌើរ

ថ្ងៃទី៤–១០ ខែកក្កដា ៖ « មានហោរា ១ នៅពួកអ៊ីស្រាអែល »

ពង្សាវតារក្សត្រ ទី២ ២–៧

បេសកកម្មចម្បងរបស់ព្យាការីគឺដើម្បីបង្រៀន និងថ្លែងទីបន្ទាល់ពីព្រះអង្គសង្រ្គោះ ព្រះយេស៊ូវគ្រីស្ទ ។ ទោះជាយ៉ាងណាក្តី កំណត់ត្រារបស់យើងពីព្យាការីអេលីសេ មិនបានបញ្ចូលច្រើនពីការបង្រៀន ឬការថ្លែងទីបន្ទាល់របស់លោកឡើយ ។ អ្វីដែលកំណត់ត្រានេះបានបញ្ចូលគឺជាអព្ភូតហេតុដែលអេលីសេ បានសម្តែងដោយរួមទាំងការប្រោសក្មេងម្នាក់ឲ្យរស់ពីស្លាប់ ( សូមមើល ពង្សាវតារក្សត្រ ទី២ ៤:១៨–៣៧ ) ការផ្តល់អាហារដល់ហ្វូងមនុស្សដោយនូវអាហារដែលមានតែបន្តិចបន្តួច ( សូមមើល ពង្សាវតារក្សត្រ ទី២ ៤:៤២–៤៤ ) និងការព្យាបាលអ្នកកើតរោគឃ្លង់ ( សូមមើល ពង្សាវតារក្សត្រ ទី២ ៥:១–១៤ ) ។ ដូច្នេះ ខណៈដែលយើងមិនមានពាក្យរបស់អេលីសេអំពីព្រះគ្រីស្ទ យើងមានការងារបម្រើ និងអព្ភូតហេតុរបស់អេលីសេ ដែលថ្លែងទីបន្ទាល់អំពីព្រះគ្រីស្ទ ។ វាគឺជាការបង្ហាញដ៏មានឥទ្ធិពលអំពីអំណាចនៃការប្រោសជីវិត ការចិញ្ចឹមបីបាច់ និងការព្យាបាលរបស់ព្រះអម្ចាស់ ។ អព្ភូតហេតុកើតឡើងកាន់តែញឹកញាប់នៅក្នុងជីវិតរបស់យើង ដែលពេលខ្លះ យើងពុំបានដឹងឡើយ ។ ដើម្បីមើលឃើញវា យើងត្រូវតែស្វែងយល់ពីសេចក្តីជំនឿដែលអេលីសេបានមាន នៅពេលលោកបានអធិស្ឋានជំនួសបាវបម្រើវ័យក្មេងដែលពេញដោយការភ័យខ្លាចរបស់លោក ៖ « ឱព្រះយេហូវ៉ាអើយ សូមទ្រង់ប្រោសឲ្យភ្នែកវាបានមើលឃើញ » ( ពង្សាវតារក្សត្រ ទី២ ៦:១៧ ) ។

សម្រាប់ព័ត៌មានបន្ថែមទៀតអំពី ពង្សាវតារក្សត្រ ទី២ សូមមើល « ពង្សាវតារក្សត្រ » នៅក្នុងសេចក្តីណែនាំដល់បទគម្ពីរទាំងឡាយ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ

ពង្សាវតារក្សត្រ ទី២ ២–៦

ព្រះអាចធ្វើឲ្យមានអព្ភូតហេតុនៅក្នុងជីវិតរបស់ខ្ញុំ ។

អព្ភូតហេតុទាំងឡាយបង្ហាញយើងពីព្រះចេស្ដារបស់ព្រះ ។ វាអាចជួយយើងយកឈ្នះលើការលំបាកនៃជីវិតរមែងស្លាប់—ដូចជាដីមិនកើតផលត្រូវការទឹកបរិសុទ្ធ ( សូមមើល ពង្សាវតារក្សត្រ ទី២ ២:១៨–២២ ) ឬពូថៅដែលបាត់ដែលត្រូវរកឲ្យឃើញ ( សូមមើល ពង្សាវតារក្សត្រ ទី២ ៦:៤–៧ ) ។ ប៉ុន្តែសំខាន់បំផុត អព្ភូតហេតុអាចបង្វែរយើងទៅរកព្រះអម្ចាស់ ។ នៅពេលបងប្អូនអាន ពង្សាវតារក្សត្រ ទី២ ២–៦ សូមពិចារណាធ្វើបញ្ជីអព្ភូតហេតុទាំងឡាយដែលបងប្អូនរកឃើញ ហើយសូមពិចារណាពីមេរៀនខាងវិញ្ញាណដែលបងប្អូនរៀនចេញពីអព្ភូតហេតុនីមួយៗ ។

បងប្អូនក៏អាចប្រៀបធៀបអព្ភូតហេតុទាំងនេះដែលអេលីសេបានធ្វើជាមួយនឹងអ្វីដែលព្រះយេស៊ូវគ្រីស្ទបានធ្វើ ( សូមមើល ពង្សាវតារក្សត្រ ទី២ ៤:៨–៣៧ និង លូកា ៧:១១–១៦; ពង្សាវតារក្សត្រ ទី២ ៤:៤២–៤៤ និង យ៉ូហាន ៦:១–១៣; ពង្សាវតារក្សត្រ ទី២ ៥:១–១៥ និង លូកា ១៧:១១–១៩ ) ។ តើអព្ភូតហេតុទាំងនេះបង្រៀនបងប្អូនអ្វីខ្លះអំពីព្រះអង្គសង្គ្រោះ និងព្យាការីរបស់ទ្រង់ ?

សូមមើលផងដែរ នីហ្វៃទី២ ២៦:១២–១៣; ២៧:២៣; មរ៉ូណៃ ៧:៣៥–៣៧; ផ្នែក « ស្វែងរក និងរំពឹងថាមានអព្ភូតហេតុ » នៅក្នុង រ័សុល អិម ណិលសុន « អំណាចនៃសន្ទុះខាងវិញ្ញាណ » លីអាហូណា ខែឧសភា ឆ្នាំ២០២២ ទំព័រ ៩៩–១០០ ។

អេលីសេប្រោសក្មេងម្នាក់ឲ្យរស់ឡើងវិញ — Elisha Raising the Son of the Shunamite [ អេលីសេប្រោសកូនប្រុសរបស់ស៊ូណែម ] ដោយ ហ្វ្រេឌ្រិច ឡេតតុន

ពង្សាវតារក្សត្រ ទី២ ៤:៨–១៧; ៧:១–១៦

ព្រះអម្ចាស់នឹងបំពេញព្រះបន្ទូលរបស់ទ្រង់ដែលបានប្រទានមកតាមរយៈពួកព្យាការីរបស់ទ្រង់ ។

ព្រះអម្ចាស់បានបំផុសគំនិតអេលីសេឲ្យព្យាករអំពីអ្វីដែលនឹងកើតឡើង—ជាធម្មតា អ្វីៗដែលហាក់ដូចជាមិនទំនងនឹងកើតឡើងឡើយ ។ នៅពេលបងប្អូនអាន ពង្សាវតារក្សត្រ ទី២ ៤:៨–១៧; ៧:១–១៦ គិតអំពីរបៀបដែលបងប្អូនឆ្លើយតបទៅនឹងព្រះបន្ទូលរបស់ព្រះអម្ចាស់តាមរយៈពួកព្យាការីរបស់ទ្រង់នៅថ្ងៃនេះ ។ តើការបង្រៀន ការព្យាករ ឬការសន្យាអ្វីដែលបងប្អូនបានឮពីព្យាការីដែលនៅរស់ ? តើបងប្អូននឹងធ្វើអ្វីដើម្បីធ្វើសកម្មភាពដោយសេចក្តីជំនឿតាមពាក្យសម្តីរបស់ពួកលោក ?

សូមមើលផងដែរ នីហ្វៃទី៣ ២៩:៦; គោលលទ្ធិ និងសេចក្តីសញ្ញា ១:៣៧–៣៨; កម្រង « Teachings of Presidents » នៅលើបណ្ណាល័យដំណឹងល្អ ។

ពង្សាវតារក្សត្រ ទី២ ៥

ប្រសិនបើខ្ញុំបន្ទាបខ្លួន និងប្រតិបត្តិតាម នោះព្រះយេស៊ូវគ្រីស្ទអាចព្យាបាលខ្ញុំ ។

នៅពេលបងប្អូនអាន ពង្សាវតារក្សត្រ ទី២ ៥ សូមពិចារណាប្រៀបធៀបជំងឺឃ្លង់របស់ណាម៉ាន់ជាមួយនឹងបញ្ហាខាងវិញ្ញាណដែលបងប្អូនកំពុងប្រឈមមុខ ។

តើមាននរណាខ្លះដែលដូចជា « អ្នកបម្រើតូចតាច » ក្នុងជីវិតរបស់បងប្អូនផ្តល់នូវការលើកទឹកចិត្តបងប្អូនឲ្យស្វែងរកការណែនាំអំពីការប្រឈមរបស់បងប្អូនពីព្យាការីរបស់ព្រះអម្ចាស់ដែរឬទេ ? ( សូមមើល ខទី ២–៣, ១៣ ) ។

តើព្រះអម្ចាស់បានអញ្ជើញបងប្អូនឲ្យធ្វើអ្វីខ្លះ ដែលហាក់ដូចជាសាមញ្ញពេក—ដូចជា « មុជទឹកប៉ុណ្ណោះ ដើម្បីឲ្យបានស្អាត » ? ( ខទី ១៣ ) ។ តើអ្វីអាចនឹងរារាំងបងប្អូនពីការទទួលយកការអញ្ជើញដ៏សាមញ្ញរបស់ទ្រង់ ?

តើបងប្អូនអាចបង្ហាញចិត្តរាបទាបដូចណាម៉ាន់យ៉ាងដូចម្ដេច ?

សូមកត់ចំណាំ ពីរបៀបដែលបទពិសោធន៍របស់ ណាម៉ាន់ បានជះឥទ្ធិពលលើសេចក្តីជំនឿរបស់គាត់លើព្រះនៃអ៊ីស្រាអែល ? ( សូមមើល ខទី ១៥ ) ។ តើបងប្អូនអាចរៀនអ្វីខ្លះអំពីការណ៍នេះ ?

សូមមើលផងដែរ លូកា ៤:២៧; ពេត្រុស ទី១ ៥:៥–៧; អាលម៉ា ៣៧:៣–៧; អេធើរ ១២:២៧; អិល វិតនី ក្លេតុន « Whatsoever He Saith unto You, Do It » Liahona ខែឧសភា ឆ្នាំ២០១៧, ទំព័រ ៩៧–៩៩; « Naaman and Elisha » ( វីដេអូ ) នៅលើបណ្ណាល័យដំណឹងល្អ ។

សូមប្រៀបធៀបបទគម្ពីរនៅក្នុងជីវិតរបស់បងប្អូន ។ នៅពេលខ្លះវាងាយស្រួលជាងដើម្បីស្វែងរកអត្ថន័យផ្ទាល់ខ្លួននៅក្នុងព្រះគម្ពីរ នៅពេលបងប្អូនប្រៀបធៀបរឿងខាងរូបកាយទៅនឹងរឿងខាងវិញ្ញាណនៅក្នុងជីវិតរបស់បងប្អូន ។ ឧទារហណ៍ ខណៈពេលបងប្អូនសិក្សា ពង្សាវតារក្សត្រ ទី២ ២–៧ បងប្អូនអាចប្រៀបធៀបស្ថានភាពក្នុងជីវិតបងប្អូនទៅនឹងរឿងដូចជា ជំងឺឃ្លង់ ពូថៅដែលបានខ្ចី ទន្លេយ័រដាន់ ឬកងទ័ពឈ្លានពានដ៏ធំ ។ តើមេរៀនអ្វីដែលព្រះអម្ចាស់អាចមានសម្រាប់បងប្អូននៅក្នុងដំណើររឿងទាំងនេះ ?

ពង្សាវតារក្សត្រ ទី២ ៦:៨–២៣

« ពួកដែលនៅខាងយើង មានគ្នាច្រើនជាងពួកដែលនៅខាងគេទៅទៀត » ។

ពេលបងប្អូនព្យាយាមដើរតាមព្រះគ្រីស្ទ តើបងប្អូនធ្លាប់មានអារម្មណ៍ដូចជាអ្នកបម្រើវ័យក្មេងរបស់អេលីសេ—មានចំនួនដ៏ច្រើន ហើយខ្លាចដែរឬទេ ? សូមស្រមៃថា បងប្អូននៅស្ថានភាពរបស់គាត់នៅពេលបងប្អូនអាន ពង្សាវតារក្សត្រ ទី២ ៦:៨–២៣ ។ តើដំណើររឿងនេះផ្លាស់ប្តូររបៀបដែលបងប្អូនគិត និងមានអារម្មណ៍អំពីការសាកល្បងរបស់បងប្អូន ការទទួលខុសត្រូវរបស់បងប្អូន ឬការខិតខំរបស់បងប្អូនដើម្បីរស់នៅតាមដំណឹងល្អដែរឬទេ ?

នៅពេលបងប្អូនជញ្ជឹងគិត សូមពិចារណាប្រសាសន៍របស់ប្រធាន ហែនរី ប៊ី អាវរិង ៖ « ដូចជាបាវបម្រើរបស់អេលីសេ រូបនោះផងដែរមានអ្នកនៅជាមួយបងប្អូនច្រើនជាងអ្នកដែលបងប្អូនអាចឃើញប្រឆាំងនឹងបងប្អូន ។ ពួកគេខ្លះដែលនៅជាមួយបងប្អូន ភ្នែកធម្មតាមិនអាចមើលឃើញទេ ។ ព្រះអម្ចាស់នឹងលើកបងប្អូនឡើង ហើយនៅពេលខ្លះក៏ហៅអ្នកដទៃមកនៅជាមួយបងប្អូន » ( « O Ye That Embark » Liahona ខែវិច្ឆិកា ឆ្នាំ២០០៨ ទំព័រ ៥៨ ) ។

សូមពិចារណាធ្វើបញ្ជី « ពួកដែលនៅខាង [ បងប្អូន ] » ( ខទី ១៦ )—មនុស្សដែលព្រះបានដាក់នៅក្នុងជីវិតរបស់បងប្អូនដើម្បីគាំទ្រដល់បងប្អូន ។ បងប្អូនអាចទូលសុំទ្រង់ជួយបងប្អូនស្វែងរកវាដោយបើកភ្នែកខាងវិញ្ញាណរបស់បងប្អូន ។ ទ្រង់ប្រហែលជាបានដាក់បងប្អូននៅក្នុងជីវិតរបស់អ្នកដទៃដើម្បីជួយពួកគេផងដែរ ។ តើបងប្អូនអាចទាញកម្លាំង និងការគាំទ្រពីគ្នាទៅវិញទៅមកដោយរបៀបណា ?

តើនៅពេលណាដែលបងប្អូនមានអារម្មណ៍ថា មានការគាំទ្រដែលព្រះអម្ចាស់ពិពណ៌នានៅក្នុង គោលលទ្ធិ និងសេចក្តីសញ្ញា ៨៤:៨៨ ?

បងប្អូនក៏អាចសិក្សាសារលិខិតរបស់ស៊ីស្ទើរ មីឈែល ឌី ក្រេហ្គ « Eyes to See » ( Liahona ខែវិច្ឆិកា ឆ្នាំ២០២០ ទំព័រ ១៥–១៧ ) ។ សូមសួរខ្លួនឯងថា « តើព្រះចង់ឲ្យខ្ញុំមើលឃើញអ្វី ? »

យោងទៅដំណើររឿងនៅក្នុង ពង្សាវតារក្សត្រ ទី២ ៦:៨–២៣ អែលឌើរ រ៉ូណល អេ រ៉ាសបាន បានមានប្រសាសន៍ ៖ « យើងប្រហែលជាអាចមាន ឬក៏ពុំអាចមានរទេះចម្បាំង ដែលសុទ្ធតែជាភ្លើងត្រូវបានបញ្ជូនមកដើម្បីជួយលុបបំបាត់ការភ័យខ្លាចរបស់យើង ហើយវាយផ្ចាញ់ពួកសត្រូវរបស់យើងឡើយ ប៉ុន្តែមេរៀននេះមានភាពសាមញ្ញណាស់ ។ ព្រះអម្ចាស់គង់នៅជាមួយនឹងយើង ខ្វល់ព្រះទ័យចំពោះយើង ហើយប្រទានពរយើងតាមរបៀបដែលមានតែទ្រង់ប៉ុណ្ណោះទើបអាចធ្វើបាន ។ ការអធិស្ឋានអាចធ្វើឲ្យកើតមានកម្លាំង និងវិវរណៈដែលយើងត្រូវការដើម្បីផ្តោតគំនិតរបស់យើងទៅលើព្រះយេស៊ូវគ្រីស្ទ និងពលិកម្មធួនរបស់ទ្រង់ ។ ព្រះអម្ចាស់បានជ្រាបថា ពេលខ្លះយើងនឹងមាននូវការភ័យខ្លាច ។ ខ្ញុំធ្លាប់មានអារម្មណ៍នោះ ហើយបងប្អូនក៏មានដូចគ្នាដែរ ។ … នៅក្នុងសាសនាចក្រនេះ យើងប្រហែលជាមានចំនួនតិចដើម្បីមានឥទ្ធិពលនៅក្នុងពិភពលោកនេះ ប៉ុន្តែនៅពេលយើងបើកភ្នែកខាងវិញ្ញាណរបស់យើង ‹ ដ្បិតពួកដែលនៅខាងយើង មានគ្នាច្រើនជាងពួកដែលនៅខាងគេទៅទៀត › [ ពង្សាវតារក្សត្រទី២ ៦:១៦ ] » ( « Be Not Troubled » Liahona ខែវិច្ឆិកា ឆ្នាំ២០១៨ ទំព័រ ១៨–១៩ ) ។ តើបងប្អូននឹងប្រើពាក្យទាំងនេះយ៉ាងណាដើម្បីជួយអ្នកដែលមានអារម្មណ៍ថប់បារម្ភ ឬភ័យខ្លាច ?

សូមមើលផងដែរ ៖ « កូនចៅនៃព្រះទ្រង់គង់ក្បែរអ្នក » ទំនុកតម្កើង ល.រ. ៩៦ ។

សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

ពង្សាវតារក្សត្រ ទី២ ៤

ព្រះអាចធ្វើឲ្យមានអព្ភូតហេតុនៅក្នុងជីវិតរបស់ខ្ញុំ ។

បន្ទាប់ពីជួយកូនៗបងប្អូនឲ្យយល់ពីអត្ថន័យនៃអព្ភូតហេតុនោះ សូមអញ្ជើញពួកគេឲ្យរាយបញ្ជីឧទាហរណ៍ជាច្រើននៃអព្ភូតហេតុតាមដែលពួកគេអាចធ្វើបាន ។ រូបភាពនៅក្នុង សៀវភៅរូបភាពដំណឹងល្អ ឬ ចូរមកតាមខ្ញុំ អាចជួយបាន ។ បន្ទាប់មកពួកគេអាចរកមើលអព្ភូតហេតុនៅក្នុង ពង្សាវតារក្សត្រ ទី២ ៤:១–៧, ១៤–១៧, ៣២–៣៥, ៣៨–៤៤ ។ តើអព្ភូតហេតុទាំងនេះបង្រៀនអ្វីខ្លះអំពីព្រះវរបិតាសួគ៌ ?
បងប្អូន និងកូនៗបងប្អូនអាចនិយាយអំពីរបៀបដែលព្រះបានបង្ហាញសេចក្ដីស្រឡាញ់របស់ទ្រង់តាមរយៈអព្ភូតហេតុទាំងឡាយ ។ បងប្អូនក៏អាចច្រៀងជាមួយគ្នានូវបទចម្រៀងមួយចំនួនដូចជា « God’s Gracious Love » ( បណ្ណាល័យដំណឹងល្អ ) ។

អ្នកបម្រើវ័យក្មេងពួកសាសន៍អ៊ីស្រាអែលម្នាក់ថ្លែងទីបន្ទាល់ដល់ភរិយារបស់ណាម៉ាន់ — Stand as a Witness [ ឈរជាសាក្សី ] ដោយ ក្វានី ប៉ូវី វីនឌើរ

ពង្សាវតារក្សត្យ ទី២ ៥:១–១៥

ខ្ញុំអាចជ្រើសរើសធ្វើអ្វីដែលព្រះបញ្ជាតាមរយៈព្យាការីរបស់ទ្រង់ ។

សូមជួយកូនៗបងប្អូនរៀនដំណើររឿងនៅក្នុង ពង្សាវតារក្សត្រ ទី២ ៥:១–៣, ៩–១៤ ។ សូមពិចារណាប្រើប្រាស់ « អេលីសេព្យាបាលណាម៉ាន់ » ( នៅក្នុង ដំណើររឿងព្រះគម្ពីរសញ្ញាចាស់ ទំព័រ ១២៣–១៣៧ ) ឬរូបភាពរបស់ណាម៉ាន់នៅក្នុងគម្រោងសប្តាហ៍នេះ ។ ហេតុអ្វីណាម៉ាន់មិនចង់មុជទឹកនៅក្នុងទន្លេយ័រដាន់ ទោះបីជាអេលីសេបានប្រាប់គាត់ថា ការណ៍នេះនឹងជួយឲ្យជាសះស្បើយពីជំងឺរបស់គាត់ក៏ដោយនោះ ? តើណាម៉ាន់បានពរយ៉ាងណា ពេលគាត់ធ្វើតាមការណែនាំរបស់អេលីសេ ? បងប្អូនអាចចែកចាយបទពិសោធន៍ជាមួយគ្នាទៅវិញទៅមក ពេលបងប្អូនបានគោរពតាមព្រះអម្ចាស់ ទោះជានៅពេលបងប្អូនមិនប្រាកដថាបងប្អូនចង់ធ្វើតាមក៏ដោយ ។

1:52
Elisha Heals Naaman
បងប្អូនក៏អាចបញ្ជាក់ ពង្សាវតារក្សត្រ ទី២ ៥:១៣ ដែលអ្នកបម្រើរបស់ណាម៉ាន់បានជួយគាត់សម្រេចចិត្តស្តាប់តាមព្យាការីអេលីសេ ។ បន្ទាប់មក កូនៗបងប្អូនអាចនិយាយអំពីរបៀបដែលពួកគេអាចជួយមិត្តភក្តិ ឬសមាជិកគ្រួសាររបស់ពួកគេឲ្យស្តាប់ ហើយធ្វើតាមព្យាការី ។

ពង្សាវតារក្សត្យ ទី២ ៦:៨–១៧

ខ្ញុំមិននៅម្នាក់ឯងទេ ។

បងប្អូន និងកូនៗបងប្អូនអាចស្រមៃថា បងប្អូនត្រូវបានហ៊ុំព័ទ្ធដោយកងទ័ពដែលមានដាវ សេះ និងរទេះចម្បាំង ។ តើបងប្អូននឹងមានអារម្មណ៍បែបណា ? តើបងប្អូននឹងធ្វើអ្វីខ្លះ ? បន្ទាប់មក កូនៗបងប្អូនអាចបិទភ្នែកនៅពេលដែលបងប្អូនអាន ពង្សាវតារក្សត្យ ទី២ ៦:១៦–១៧ ទៅកាន់ពួកគេ ។ ( សូមមើលផងដែរ « អេលីសេ និង កងទ័ពរបស់ព្រះអម្ចាស់ » នៅក្នុង ដំណើររឿងព្រះគម្ពីរសញ្ញាចាស់ ទំព័រ ១៣៨–១៣៩ ឬរូបភាពនៅចុងបញ្ចប់នៃគម្រោងនេះ ) ។ នៅពេលអ្នកអានដល់ពាក្យ « ប្រោសឲ្យភ្នែកវាបានមើលឃើញ » ( ខទី ១៧ ) សូមឲ្យកូនៗបើកភ្នែករបស់ពួកគេ ។ សូមនិយាយអំពីអ្វីដែលអ្នកបម្រើបានឃើញ ។ សូមចែកចាយជាមួយកូនៗបងប្អូននូវរបៀបដែលបងប្អូនធ្លាប់មានអារម្មណ៍ថា ព្រះអម្ចាស់គង់នៅជាមួយបងប្អូន ក្នុងអំឡុងពេលបងប្អូនមានបញ្ហាប្រឈម ទោះបីជាវាហាក់ដូចជាបងប្អូននៅម្នាក់ឯងក៏ដោយ ។

1:9
Elisha and the Lord’s Army

សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។

អេលីសេ និងយុវជនម្នាក់មើលរទេះចម្បាំងមានភ្លើង — « កុំខ្លាចអ្វីឡើយ ដ្បិតពួកដែលនៅខាងយើងមានគ្នាច្រើនជាងពួកដែលនៅខាងគេទៅទៀត » ដោយ ស្ទេស៊ី មីង

ទំព័រសកម្មភាពសម្រាប់កុមារ ៖ ខ្ញុំអាចជ្រើសរើសធ្វើអ្វីដែលព្រះបញ្ជាតាមរយៈព្យាការីរបស់ទ្រង់ — « កុំខ្លាចអ្វីឡើយ ដ្បិតពួកដែលនៅខាងយើងមានគ្នាច្រើនជាងពួកដែលនៅខាងគេទៅទៀត » ដោយ ស្ទេស៊ី មីង