1. Konungabók 12–13; 17–22

Hvernig mynduð þið lýsa mistökunum sem Rehabeam konungur, sonur Salómons, gerði í 1. Konungabók 12:1–14? Hvaða kristilegir eiginleikar gætu hafa hjálpað Rehabeam að bjarga ríki hans? (sjá vers 7; Matteus 20:25–28; Mósía 2:10–21). Hvernig getið þið notað þessa eiginleika sem leiðtogar – hvort heldur í kirkjuköllun eða sem leiðtogi eigin lífs?

Spámaðurinn Elía bað ekkju nokkra að gefa sér mat og vatn áður en hún gæfi sjálfri sér og sveltandi syni sínum að borða. Af hverju gerði hann það? Beiðni Elía mætti líta á sem blessun fyrir þessa litlu fjölskyldu. Þau þurftu á blessunum Drottins að halda og fórn færir blessanir – þar á meðal blessun sterkari trúar.

Þegar þið lesið 1. Konungabók 17:8–16, ímyndið ykkur þá að þið væruð þessi ekkja. Hvað hrífur ykkur varðandi hana? Þið gætuð líka skráð ákvarðanir sem krefjast trúar á Jesú Krist (sjá t.d. Til styrktar ungmennum: Leiðarvísir að ákvarðanatökum [2022]). Hvað lærið þið af þessari ekkju um trúariðkun?

Hvernig svipar gjörðum Elísa í 1. Konungabók 19:19–21 til breytni ekkjunnar?

Íhugið fórnir ykkar til að fylgja frelsaranum. Hvað kennir 1. Konungabók 17:8–16; 19:19–21 ykkur um þessar fórnir? Hvernig hjálpar vitneskja ykkar um frelsarann þegar hann biður ykkur að færa fórnir? Hvernig hefur hann blessað ykkur?

Sjá einnig Matteus 4:18–22; 6:25–33; Lúkas 4:24–26; „Elijah and the Widow of Zarephath“ (myndband), Gospel Library; „Trú mín er á Krist,“ Sálmar, nr. 34.

10:13

Ísraelsmönnum gæti hafa fundist góð ástæða að baki þess að tilbiðja Baal, sem var kunnur sem guð storma og regns. Eftir þriggja ára þurrkatíð, þurftu þeir sárlega á rigningu að halda. Tilbeiðsla Baals var almennt viðurkennd og konungur og drottning hvöttu til hennar. Þegar þið lesið 1. Konungabók 18, íhugið þá hvers vegna einhver á okkar tíma gæti verið hikandi við að fylgja Drottni. Hvað haldið þið að Drottinn hafi verið að reyna að kenna um sig sjálfan í þessum kafla? Hvaða upplifanir hafa hjálpað ykkur að einsetja ykkur að fylgja frelsaranum?

Sjá einnig D. Todd Christofferson, „Choice and Commitment“ (heimslæg trúarsamkoma fyrir ungt fólk, 12. jan. 2020), Gospel Library.

Því miður gerði kraftaverkið á Karmelfjalli verkefni Elía ekki auðveldara. Í raun var líf hans í hættu og hann varð að fela sig í helli í óbyggðunum. Þar háði hann baráttu við einmanaleika og vanmátt og hlaut reynslu með Drottni sem var afar frábrugðin upplifuninni á Karmelfjalli. Hvað kennir reynsla Elía í 1. Konungabók 19:1–18 um það hvernig Drottinn hefur samskipti við ykkur á tíma neyðar?

Íhugið hvenær ykkur finnst Drottinn hafa talað til ykkar. Hvernig mynduð þið lýsa því hvernig hann hefur samskipti við ykkur? Af hverju eru orðin „hljóðlát“ og „lágvær“ vel lýsandi fyrir rödd andans? Hvaða önnur orð finnið þið í Helaman 5:30; Kenning og sáttmálar 6:22–23; 11:12–14? Hvað þurfið þið að gera til að hljóta oftar leiðsögn Drottins?

Sjá einnig Sálmana 46:11.

• Til að hjálpa börnum ykkar að læra trúarsögur í 1. Konungabók 17, gætuð þið sýnt þeim hluti eða myndir til að útskýra sögurnar, eins og af fuglum, brauði eða dreng. Þegar þið segið börnum ykkar þessar sögur, bjóðið þeim þá að finna myndina eða hlutinn sem á við hverja frásögn. Kaflinn „Spámaðurinn Elía“ (í Sögur úr Gamla testamentinu, 121–24) getur hjálpað ykkur að segja þessar sögur. Hvað kennir hver þessara sagna okkur um að trúa á Jesú Krist?

  

  1:58

• Hjálpið börnum ykkar að hugsa um leiðir til að sýna trú sína á Jesú Krist. Syngið með þeim söng um trú, t.d. „Trú“ (Barnasöngbókin, 50) og miðlið hvert öðru því sem þið lærið um trú af söngnum.

• Börn ykkar gætu ef til vill teiknað mynd af því sem Drottinn bauð ekkjunni að gefa Elía (sjá 1. Konungabók 17:12–13) og af því sem ekkjan fékk í staðinn (sjá 1. Konungabók 17:15–16). (Sjá einnig verkefnasíðu þessarar viku.) Þau gætu líka leitað að myndum af öðru fólki sem gaf eitthvað upp á bátinn fyrir eitthvað enn betra. Bjóðið börnum ykkar að finna myndir í Trúarmyndabók eða Kom, fylg mér. Hverju býður Drottinn okkur að fórna? Hvernig blessar hann okkur?

• Þegar þið lesið saman 1. Konungabók 18:17–39, gætu börn ykkar valið vers og teiknað mynd af því sem þar er lýst. Þau gætu notað myndirnar sínar til að segja söguna með eigin orðum. (Sjá einnig „Elía og Baalsprestarnir,“ í Sögur úr Gamla testamentinu, 125–28.)

  

  2:17

• Hjálpið börnum ykkar að hugsa um aðstæður þar sem þau gætu þurft að ákveða hvort þau eigi að fylgja Jesú Kristi eða ekki. Þau gætu ef til vill teiknað myndir af sjálfum sér að taka réttar ákvarðanir. Miðlið hvert öðru ástæðu þess að þið veljið að fylgja Jesú.

• Þegar þið dragið saman 1. Konungabók 19:9–12, bjóðið þá börnum ykkar að gera hreyfingar sem tákna sterkan vind, jarðskjálfta og eld. Bjóðið þeim síðan að sitja kyrr þegar þið segið saman hljóðlátri röddu: „Eftir eldinn kom þytur af þýðum blæ“ (vers 12). (Sjá einnig „Drottinn talar til Elía,“ í Sögur úr Gamla testamentinu, 129–31.) Segið börnum ykkar frá því þegar þið hafið upplifað hina lágu, hljóðlátu rödd heilags anda.

  

  1:48

• Syngið saman söng um heilagan anda, svo sem „Heilagur andi“ (Barnasöngbókin, 56). Hvað getur truflað okkur frá því að bera kennsl á andann? Hvað getur hjálpað okkur að hlýða á hann?