“ຄວາມຄິດທີ່ໃຫ້ເກັບໄວ້ໃນໃຈ: ໜັງສືປະຫວັດສາດຢູ່ໃນພຣະຄຳພີເດີມ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ໜັງສືປະຫວັດສາດຢູ່ໃນພຣະຄຳພີເດີມ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026
ຄວາມຄິດທີ່ໃຫ້ເກັບໄວ້ໃນໃຈ
ໜັງສືປະຫວັດສາດຢູ່ໃນພຣະຄຳພີເດີມ
ພຣະທຳໂຢຊວຍ ຕະຫລອດເຖິງ ເອສະເທີເປັນທີ່ຮູ້ຈັກກັນວ່າເປັນ “ໜັງສືປະຫວັດສາດ” ຂອງພຣະຄຳພີເດີມ. ນີ້ບໍ່ໄດ້ໝາຍຄວາມວ່າໜັງສືເຫລັ້ມອື່ນໆຢູ່ໃນພຣະຄຳພີເດີມບໍ່ມີຄຸນຄ່າທາງປະຫວັດສາດ. ແທນທີ່, ໜັງສືປະຫວັດສາດຖືກເອີ້ນວ່າແນວນັ້ນ ຍ້ອນວ່າຈຸດປະສົງຕົ້ນຕໍຂອງຜູ້ຂຽນແມ່ນເພື່ອສະແດງພຣະຫັດຂອງພຣະເຈົ້າໃນປະຫວັດສາດຂອງປະຊາຊົນອິດສະຣາເອນ. ຈຸດປະສົງບໍ່ແມ່ນເພື່ອສະຫລຸບກົດຂອງໂມເຊ, ຄືກັນກັບລະບຽບພວກເລວີ ແລະ ພຣະບັນຍັດສອງ. ມັນບໍ່ແມ່ນເພື່ອສະແດງຄຳສັນລະເສີນ ຫລື ການຄ່ຳຄວນໃນຮູບແບບບົດກະວີ, ຄືກັນກັບ ເພງສັນລະເສີນ ແລະ ເພງຄ່ຳຄວນ. ແລະ ມັນບໍ່ແມ່ນເພື່ອບັນທຶກຖ້ອຍຄຳຂອງບັນດາສາດສະດາ, ຄືກັນກັບພຣະທຳເອຊາຢາ ແລະ ເອເຊກຽນ. ແທນທີ່, ໜັງສືປະຫວັດສາດບອກເລື່ອງລາວ.
ເລື່ອງຂອງມຸມມອງ
ໂດຍທຳມະຊາດແລ້ວ, ເລື່ອງລາວເຫລົ່ານີ້ ແມ່ນຖືກເລົ່າຈາກມຸມມອງໃດໜຶ່ງ. ດັ່ງທີ່ມັນເປັນໄປບໍ່ໄດ້ທີ່ຈະຫລຽວເບິ່ງດອກໄມ້, ກ້ອນຫີນ, ຫລື ຕົ້ນໄມ້ຈາກຫລາຍກວ່າໜຶ່ງມຸມພ້ອມກັນບາດດຽວ, ເລື່ອງລາວໃນປະຫວັດສາດກໍຈະສະທ້ອນເຖິງມຸມມອງຂອງບຸກຄົນ ຫລື ກຸ່ມຄົນທີ່ຂຽນມັນຢ່າງຫລີກລ້ຽງບໍ່ໄດ້. ມຸມມອງນີ້ລວມເຊື້ອຊາດ ຫລື ຊົນເຜົ່າທີ່ກ່ຽວພັນ ແລະ ບັນທັດຖານດ້ານວັດທະນະທຳ ແລະ ຄວາມເຊື່ອຂອງຜູ້ຂຽນ. ການຮູ້ຈັກສິ່ງນີ້ສາມາດຊ່ວຍໃຫ້ເຮົາເຂົ້າໃຈວ່າ ຜູ້ຂຽນ ແລະ ຜູ້ຮວບຮວມໜັງສືປະຫວັດສາດໄດ້ເອົາໃຈໃສ່ຕໍ່ລາຍລະອຽດບາງຢ່າງຂະນະທີ່ລະເລີຍລາຍລະອຽດຢ່າງອື່ນ. ພວກເພິ່ນໄດ້ຕັ້ງສົມມຸດຕິຖານທີ່ຄົນອື່ນບໍ່ອາດເຮັດໄດ້. ແລະ ພວກເພິ່ນໄດ້ສະຫລຸບໂດຍອີງຕາມລາຍລະອຽດ ແລະ ສົມມຸດຕິຖານເຫລົ່ານີ້. ເຮົາສາມາດເຫັນມຸມມອງທີ່ແຕກຕ່າງກັນຕະຫລອດທົ່ວໜັງສືຕ່າງໆຂອງພຣະຄຣິສຕະທຳຄຳພີ (ແລະ ບາງເທື່ອກໍຢູ່ພາຍໃນໜັງສືເຫລັ້ມດຽວກັນນັ້ນ). ຍິ່ງເຮົາຮູ້ຈັກມຸມມອງເຫລົ່ານີ້ຫລາຍສໍ່າໃດ, ເຮົາກໍຈະສາມາດເຂົ້າໃຈໜັງສືປະຫວັດສາດໄດ້ດີຫລາຍຂຶ້ນເທົ່ານັ້ນ.
ມຸມມອງໜຶ່ງທີ່ເຫັນຢູ່ທົ່ວໄປໃນໜັງສືປະຫວັດສາດຂອງພຣະຄຳພີເດີມ ແມ່ນມຸມມອງຂອງລູກຫລານຂອງອິດສະຣາເອນ, ຜູ້ຄົນແຫ່ງພັນທະສັນຍາຂອງພຣະເຈົ້າ. ສັດທາຂອງພວກເຂົາໃນພຣະຜູ້ເປັນເຈົ້າໄດ້ຊ່ວຍໃຫ້ພວກເຮົາເຫັນພຣະຫັດຂອງພຣະອົງໃນຊີວິດຂອງພວກເຂົາ ແລະ ໃນກິດຈະການຂອງປະເທດຊາດຂອງພວກເຂົາ. ຂະນະທີ່ໜັງສືປະຫວັດສາດຂອງໂລກມັກຈະບໍ່ເຫັນສິ່ງຕ່າງໆໃນທາງນີ້, ມຸມມອງທາງວິນຍານນີ້ເປັນພາກສ່ວນທີ່ເຮັດໃຫ້ໜັງສືປະຫວັດສາດຂອງພຣະຄຳພີເດີມມີຄ່າຫລາຍຕໍ່ຜູ້ທີ່ສະແຫວງຫາທີ່ຈະສ້າງສັດທາຂອງຕົນໃນພຣະເຈົ້າ.
ບໍລິບົດສຳລັບສ່ວນທີ່ເຫລືອຢູ່ຂອງພຣະຄຳພີເດີມ
ໜັງສືປະຫວັດສາດເລີ່ມຕົ້ນຈາກບ່ອນທີ່ພຣະທຳພຣະບັນຍັດສອງ ສິ້ນສຸດລົງ, ໂດຍທີ່ການຊັດເຊພະເນຈອນຂອງຊາວອິດສະຣາເອນເປັນເວລາຫລາຍປີໃນຖິ່ນແຫ້ງແລ້ງກັນດານໃກ້ຈະສິ້ນສຸດລົງ. ພຣະທຳໂຢຊວຍ ສະແດງໃຫ້ເຫັນວ່າ ລູກຫລານຂອງອິດສະຣາເອນພ້ອມແລ້ວທີ່ຈະເຂົ້າໄປສູ່ການາອານ, ແຜ່ນດິນແຫ່ງຄຳສັນຍາຂອງພວກເຂົາ, ແລະ ບັນຍາຍເຖິງວິທີທີ່ພວກເຂົາໄດ້ຍຶດຄອງມັນມາ. ພຣະທຳເຫລັ້ມອື່ນຕໍ່ມາ, ພວກຜູ້ປົກຄອງ ຕະຫລອດເຖິງ 2 ຂ່າວຄາວ, ພັນລະນາປະສົບການຂອງອິດສະຣາເອນໃນແຜ່ນດິນແຫ່ງຄຳສັນຍາ, ຕັ້ງແຕ່ເວລາທີ່ພວກເຂົາໄດ້ໄປຕັ້ງຖິ່ນຖານ ຈົນເຖິງເວລາທີ່ພວກເຂົາຖືກຍຶດຄອງໂດຍອັດຊີເຣຍ ແລະ ບາບີໂລນ. ພຣະທຳເອຊະຣາ ແລະ ເນເຫມີຢາ ເລົ່າເຖິງການກັບຄືນຂອງຊາວອິດສະຣາເອນຫລາຍກຸ່ມ ສູ່ເຢຣູຊາເລັມ, ນະຄອນຫລວງຂອງພວກເຂົາ, ຫລາຍທົດສະວັດຕໍ່ມາ. ສຸດທ້າຍ, ພຣະທຳເອສະເທີ ບອກເລົ່າເລື່ອງລາວຂອງຊາວອິດສະຣາເອນທີ່ຖືກເນລະເທດ ພາຍໃຕ້ການປົກຄອງຂອງຊາວເປີເຊຍ.
ແລະ ນັ້ນຄືຈຸດທີ່ລຳດັບເຫດການຂອງພຣະຄຳພີເດີມໄດ້ສິ້ນສຸດລົງ. ບາງຄົນທີ່ຫາກໍເລີ່ມອ່ານພຣະຄຣິສຕະທຳຄຳພີເປັນເທື່ອທຳອິດໄດ້ແປກໃຈທີ່ພົບວ່າ ຕົວເອງໄດ້ອ່ານ ເລື່ອງລາວ ຂອງພຣະຄຳພີເດີມຈົບກ່ອນທີ່ຕົນໄດ້ອ່ານຫລາຍກວ່າເຄິ່ງເຫລັ້ມ. ຫລັງຈາກ ເອສະເທີ, ເຮົາບໍ່ມີຂໍ້ມູນຫລາຍປານໃດກ່ຽວກັບປະຫວັດສາດຂອງຊາວອິດສະຣາເອນ. ແທນທີ່, ໜັງສືຕ່າງໆຕໍ່ຈາກນັ້ນ—ໂດຍສະເພາະໜັງສືຂອງບັນດາສາດສະດາ—ລົງຮອຍພໍດີ ພາຍໃນ ເສັ້ນເວລາທີ່ໜັງສືປະຫວັດສາດບອກກ່າວ. ການປະຕິບັດສາດສະໜາກິດຂອງສາດສະດາເຢເຣມີຢາ, ຍົກຕົວຢ່າງ, ໄດ້ເກີດຂຶ້ນລະຫວ່າງເຫດການທີ່ຖືກບັນທຶກໄວ້ໃນ 2 ກະສັດ 22–25 (ແລະ ໃນເລື່ອງລາວທີ່ຄຽງຄູ່ໄປດ້ວຍກັນ ໃນ 2 ຂ່າວຄາວ 34–36). ການຮູ້ຈັກສິ່ງນີ້ສາມາດສົ່ງຜົນຕໍ່ວິທີທີ່ທ່ານອ່ານເລື່ອງເລົ່າທາງປະຫວັດສາດ ແລະ ໜັງສືຂອງສາດສະດາ.
ເມື່ອບາງສິ່ງບໍ່ເຂົ້າຮູບເຂົ້າຮອຍ
ເມື່ອອ່ານພຣະຄຳພີເດີມ, ຄືກັນກັບປະຫວັດສາດອື່ນໆ, ທ່ານມັກຈະອ່ານກ່ຽວກັບຜູ້ຄົນທີ່ໄດ້ເຮັດ ຫລື ໄດ້ເວົ້າສິ່ງທີ່, ຕໍ່ສາຍຕາໃນໂລກປະຈຸບັນ, ຈະເບິ່ງຄືວ່າເປັນເລື່ອງແປກ ຫລື ໜັກໃຈ. ເຮົາຄວນຄາດຫວັງສິ່ງນີ້—ຜູ້ຂຽນພຣະຄຳພີເດີມໄດ້ເຫັນໂລກຈາກມຸມມອງທີ່, ໃນບາງວິທີ, ແຕກຕ່າງຫລາຍຈາກມຸມມອງຂອງເຮົາ. ຄວາມຮຸນແຮງ, ຄວາມສຳພັນທາງຊົນເຜົ່າ, ແລະ ບົດບາດຂອງແມ່ຍິງ ເປັນພຽງແຕ່ບັນຫາບາງຢ່າງເທົ່ານັ້ນ ທີ່ຜູ້ຂຽນໃນສະໄໝບູຮານອາດເຫັນແຕກຕ່າງຈາກສິ່ງທີ່ເຮົາເຫັນໃນທຸກມື້ນີ້.
ສະນັ້ນ ເຮົາຄວນເຮັດແນວໃດເມື່ອເຮົາອ່ານຂໍ້ຄວາມໃນພຣະຄຳພີທີ່ເບິ່ງຄືວ່າເປັນຕາໜັກໃຈ? ທຳອິດ, ມັນອາດເປັນການດີທີ່ຈະພິຈາລະນາແຕ່ລະຂໍ້ຄວາມໃນບໍລິບົດທີ່ກວ້າງຂວາງ. ມັນສອດຄ່ອງກັບແຜນແຫ່ງຄວາມລອດຂອງພຣະເຈົ້າແນວໃດ? ມັນສອດຄ່ອງກັບສິ່ງທີ່ທ່ານຮູ້ຈັກກ່ຽວກັບທຳມະຊາດຂອງພຣະບິດາເທິງສະຫວັນ ແລະ ພຣະເຢຊູຄຣິດແນວໃດ? ມັນສອດຄ່ອງກັບຄວາມຈິງທີ່ເປີດເຜີຍໃນພຣະຄຳພີອື່ນໆ ຫລື ກັບຄຳສອນຂອງບັນດາສາດສະດາທີ່ມີຊີວິດຢູ່ແນວໃດ? ແລະ ມັນສອດຄ່ອງກັບສຽງກະຊິບຂອງພຣະວິນຍານຕໍ່ຫົວໃຈ ແລະ ຈິດໃຈຂອງທ່ານເອງແນວໃດ?
ໃນບາງກໍລະນີ, ຂໍ້ຄວາມເຫລົ່ານີ້ອາດເບິ່ງຄືວ່າບໍ່ເຂົ້າກັບສິ່ງເຫລົ່ານີ້ຈັກຢ່າງເລີຍ. ບາງເທື່ອຂໍ້ຄວາມນັ້ນອາດເປັນຄືກັນກັບຊິ້ນສ່ວນຈິກຊໍທີ່ເບິ່ງຄືວ່າບໍ່ມີຈັກບ່ອນທີ່ຖືກຕ້ອງສຳລັບມັນໃນທ່າມກາງຊິ້ນສ່ວນທີ່ທ່ານໄດ້ຕໍ່ເຂົ້າກັນແລ້ວ. ການພະຍາຍາມທີ່ຈະບັງຄັບໃຫ້ຊິ້ນສ່ວນເຂົ້າກັນ ບໍ່ແມ່ນແນວທາງທີ່ດີທີ່ສຸດ. ແຕ່ການຍອມແພ້ຕໍ່ຈິກຊໍທັງໝົດກໍບໍ່ແມ່ນແນວທາງທີ່ດີເຊັ່ນກັນ. ແທນທີ່, ທ່ານອາດຕ້ອງວາງຊິ້ນສ່ວນນັ້ນໄວ້ທາງຂ້າງຈັກໄລຍະໜຶ່ງກ່ອນ. ຂະນະທ່ານຮຽນຮູ້ຫລາຍຂຶ້ນ ແລະ ຕໍ່ຈິກຊໍເຂົ້າກັນຫລາຍຂຶ້ນ, ທ່ານອາດສາມາດເຫັນເຖິງວິທີທີ່ຊິ້ນສ່ວນຕ່າງໆຕໍ່ເຂົ້າກັນໄດ້ດີກວ່າເກົ່າ.
ມັນກໍອາດເປັນປະໂຫຍດທີ່ຈະຈື່ຈຳວ່າ ນອກເໜືອໄປຈາກການຖືກຈຳກັດຕໍ່ມຸມມອງໃດໜຶ່ງໂດຍສະເພາະແລ້ວ, ເລື່ອງລາວໃນພຣະຄຳພີກໍມີຄວາມຜິດພາດຂອງມະນຸດໃນນັ້ນດ້ວຍເຊັ່ນກັນ. ຍົກຕົວຢ່າງ, ເປັນເວລາຫລາຍສັດຕະວັດ “ຫລາຍຢ່າງທີ່ແຈ່ມແຈ້ງ ແລະ ມີຄ່າ [ໄດ້ຖືກ] ເອົາໄປຈາກ [ພຣະຄຣິສຕະທຳຄຳພີ],” ລວມທັງຄວາມຈິງທີ່ສຳຄັນກ່ຽວກັບຄຳສອນ, ພິທີການຕ່າງໆ, ແລະ ພັນທະສັນຍາ (1 ນີໄຟ 13:28; ເບິ່ງ ຂໍ້ທີ 26, 29, 40 ນຳອີກ). ໃນເວລາດຽວກັນ, ເຮົາຄວນເຕັມໃຈທີ່ຈະຍອມຮັບວ່າ ມຸມມອງຂອງເຮົາເອງກໍຖືກຈຳກັດຄືກັນ: ມັນຈະມີຫລາຍສິ່ງທີ່ເຮົາບໍ່ເຂົ້າໃຈຄັກ ແລະ ມີຄຳຖາມທີ່ເຮົາຍັງບໍ່ສາມາດຕອບໄດ້ເທື່ອ.
ຂໍ້ຄວາມພຣະຄຳພີບາງຂໍ້ອາດເປັນຄືກັນກັບຊິ້ນສ່ວນຈິກຊໍທີ່ເຮົາບໍ່ຮູ້ວິທີຕໍ່ມັນໃສ່ກັບຈິກຊໍທີ່ເຫລືອ.
ການຊອກຫາເພັດພອຍ
ແຕ່ໃນລະຫວ່າງນີ້, ຄຳຖາມທີ່ຍັງບໍ່ໄດ້ຮັບຄຳຕອບເທື່ອ ບໍ່ຄວນກີດກັນເຮົາຈາກເພັດພອຍແຫ່ງຄວາມຈິງນິລັນດອນທີ່ພົບໃນພຣະຄຳພີເດີມ—ເຖິງແມ່ນວ່າ ເພັດພອຍເຫລົ່ານີ້ ບາງເທື່ອກໍຖືກເຊື່ອງຊ້ອນຢູ່ໃນພື້ນຫີນແຫ່ງປະສົບການທີ່ໜ້າໜັກໃຈ ແລະ ການເລືອກທີ່ບໍ່ສະຫລາດຂອງຜູ້ຄົນທີ່ບໍ່ດີພ້ອມ. ບາງທີ ເພັດພອຍທີ່ມີຄ່າທີ່ສຸດຂອງເພັດພອຍເຫລົ່ານີ້ ກໍຄືເລື່ອງລາວ ແລະ ຂໍ້ຄວາມທີ່ເປັນພະຍານເຖິງຄວາມຮັກຂອງພຣະເຈົ້າ—ໂດຍສະເພາະອັນທີ່ຫັນຈິດໃຈຂອງເຮົາໄປຫາການເສຍສະລະຂອງພຣະເຢຊູຄຣິດ. ເມື່ອແນມເບິ່ງຈາກທຸກມຸມແລ້ວ, ເພັດພອຍເຊັ່ນນີ້ກໍເປັ່ງປະກາຍຢ່າງເຈີດຈ້າໃນທຸກມື້ນີ້ ເທົ່າໆກັບທີ່ມັນໄດ້ເປັ່ງປະກາຍຕອນນັ້ນ. ແລະ ຍ້ອນວ່າເລື່ອງລາວເຫລົ່ານີ້ບອກເຖິງຜູ້ຄົນແຫ່ງພັນທະສັນຍາຂອງພຣະເຈົ້າ—ຊາຍ ແລະ ຍິງຜູ້ທີ່ມີຄວາມອ່ອນແອຂອງມະນຸດ ແຕ່ກໍຍັງຮັກ ແລະ ຮັບໃຊ້ພຣະຜູ້ເປັນເຈົ້າ—ເພັດພອຍແຫ່ງຄວາມຈິງກໍຍັງມີຢູ່ຢ່າງຫລວງຫລາຍໃນໜັງສືປະຫວັດສາດຂອງພຣະຄຳພີເດີມ.