Numrat 11–14; 20–24; 27

Te Numrat 11:11–17, 24–29, vini re problemin që ndeshi Moisiu dhe zgjedhjen që propozoi Perëndia. Çfarë mendoni se donte të thoshte Moisiu kur tha se uronte që “të ishin të gjithë profetë”? (Vargu 29.) Teksa e përsiatni këtë pyetje, kërkoni përgjigje të mundshme në mesazhin e Presidentit Rasëll M. Nelson “Zbulesë për Kishën, Zbulesë për Jetën Tonë” (Liahona, maj 2018, f. 93–96).

Sidoqoftë, të themi se ne të gjithë mund të marrim zbulesë, nuk do të thotë që të gjithë mund ta udhëheqin popullin e Perëndisë ashtu siç bëri Moisiu. Ngjarja te Numrat 12 e bën të qartë këtë. Çfarë paralajmërimesh gjeni në këtë kapitull? Çfarë ndieni se Zoti dëshiron që ju të kuptoni rreth zbulesës vetjake dhe ndjekjes së profetit të Tij?

Shihni edhe te 1 Nefi 10:17; Doktrina e Besëlidhje 28:1–7; Dallin H. Ouks, “Dy Linja Komunikimi”, Liahona, nëntor 2010, f. 83–86.

Disa njerëz habiten kur mësojnë se Moisiu, udhëheqësi i fuqishëm i cili qëndroi përpara faraonit dhe kreu mrekulli mahnitëse me fuqinë e Zotit, ishte gjithashtu “shumë zemërbutë” (Numrat 12:3). Çfarë do të thotë të jesh zemërbutë? Merreni parasysh të studioni shpjegimin e Plakut Dejvid A. Bednar te “Zemërbutë dhe të Përulur nga Zemra” (Liahona, maj 2018, f. 30–33) ose studioni zërin “Zemërbutë, Zemërbutësi” tek Udhëzuesi për Shkrimet e Shenjta (Gospel Library) [Biblioteka e Ungjillit].

Çfarë mësoni nga shembujt e Moisiut për zemërbutësinë tek Eksodi 18:13–25; Numrat 11:26–29; Numrat 12; Hebrenjve 11:24–27 dhe Moisiu 1:10–11? Ju gjithashtu mund të përsiatni se si Shpëtimtari tregoi zemërbutësi (shihni te Mateu 11:29; 27:11–14; Lluka 22:41–42; Gjoni 13:4–5). Çfarë ju mësojnë këta shembuj?

Ndërsa lexoni te Numrat 13–14, përpiquni ta vini veten në vendin e izraelitëve. Si mendoni, përse ata dëshironin që “të kthehe[shin] në Egjipt”? (Numrat 14:3.) Si do ta përshkruanit “frymë[n]” tjetër që kishte Kalebi? (Numrat 14:24.) Çfarë ju bën përshtypje rreth besimit të Kalebit dhe Jozueut dhe si mund t’i zbatoni shembujt e tyre në situatat me të cilat përballeni?

Profetët e Librit të Mormonit e dinin ngjarjen që gjendet te Numrat 21:4–9 dhe e kuptuan domethënien e saj shpirtërore. Lexojini mësimet e tyre rreth kësaj ngjarjeje te 1 Nefi 17:40–41; Alma 33:18–22 dhe Helamani 8:13–15. Ja tek janë disa pyetje për t’i përsiatur ndërsa lexoni:

• Çfarë mund të përfaqësojë gjarpri prej bronzi?

• Çfarë mund të përfaqësojnë kafshimet e gjarpërinjve?

• Izraelitëve iu desh të “shikon[in] gjarprin prej bronzi” (Numrat 21:9) që të shëroheshin. Si mendoni, përse disa njerëz refuzuan të shihnin? A ju ka ndodhur ndonjëherë diçka e ngjashme juve?

• Çfarë ndiheni të frymëzuar të bëni për të “[parë më plotësisht] në Birin e Perëndisë me besim” dhe për t’u shëruar? (Helamani 8:15.)

Leximi i këtyre fragmenteve mund t’ju kujtojë për raste të tjera në shkrimet e shenjta kur njerëzit patën nevojë që ta mbanin përqendrimin e tyre te Krishti. Për shembull, krahasoni mesazhin te Numrat 21:4–9 me atë te Mateu 14:25–31 dhe 1 Nefi 8:24–28 (shihni edhe figurat në fund të përvijimit të kësaj jave). Çfarë ka prirje të na largoja nga Krishti? Si i bekon Ai njerëzit të cilët qëndrojnë të përqendruar tek Ai?

Shihni edhe te “Jezus, Vet’ Mendimi për Ty” (Himne, nr. 79).

Kur Balaku, mbreti i Moabit, mësoi se izraelitët po afroheshin, ai thirri Balaamin, një njeri i njohur për dhënien e bekimeve dhe mallkimeve. Balaku donte që ai t’i mallkonte izraelitët. Vini re se si u përpoq Balaku që ta bindte Balaamin (shihni te Numrat 22: 5–7, 15–17) dhe mendoni për tundimet me të cilat mund të përballeni kur shkoni kundër vullnetit të Perëndisë. Çfarë ju bën përshtypje rreth përgjigjeve të Balaamit te Numrat 22:18, 38; 23:8, 12, 26; 24:13? Për fat të keq, Balaami përfundimisht iu dorëzua trysnisë dhe e tradhtoi Izraelin (shihni te Numrat 31:16; Judë 1:11). Përsiatni se si mund t’i qëndroni besnikë Zotit, pavarësisht nga trysnia prej të tjerëve.

• Pyetini fëmijët tuaj nëse mbajnë mend disa nga mrekullitë që kreu Zoti për t’i ndihmuar izraelitët (shihni mësimin “Plagët e Egjiptit” dhe “Pashka” tek Tregime nga Dhiata e Vjetër, f. 67–74). Pastaj mund të përmblidhni për ta vargjet te Numrat 11:4–10, duke theksuar se izraelitët i kishin harruar bekimet e tyre dhe po ankoheshin. Çfarë bekimesh nganjëherë i harrojmë?

• Teksa këndoni ose dëgjoni një këngë rreth mirënjohjes, të tillë si “Numëro Bekimet” (Himne, nr. 152), fëmijët tuaj mund të vizatojnë figura të bekimeve që ua ka dhënë Zoti.

• Për të paraqitur kapitullin te Numrat 12, mund t’u thoni fëmijëve tuaj se Zoti nuk ishte i lumtur me Aaronin dhe Miriamin, vëllanë dhe motrën e Moisiut. Ftojini ata të lexojnë te Numrat 12:1–8 për të zbuluar arsyen. Merreni parasysh të përdorni materialin Libri i Figurave Artistike të Ungjillit për t’i ndihmuar fëmijët tuaj të gjejnë shembuj të njerëzve në shkrimet e shenjta të cilët e respektuan profetin e Zotit dhe u bekuan. Si bekohemi kur e ndjekim profetin e Zotit?

• Mund të përdorni mësimin “Moisiu dhe Gjarpri prej Bronzi” tek Tregime nga Dhiata e Vjetër, f. 83–84, që t’i ndihmoni fëmijët tuaj të mësojnë se çfarë ndodhi te Numrat 21:6–9. Në ç’mënyrë është gjarpri prej bronzi si Jezu Krishti? (Shihni te Gjoni 3:14–15.) Fëmijëve tuaj mund t’iu pëlqejë të bëjnë një gjarpër prej letre dhe duke shkruar mbi të disa gjëra të thjeshta që mund t’i bëjnë për të “[parë] në Birin e Perëndisë me besim” (Helamani 8:15).

  

  1:2

• Fëmijët më të mëdhenj mund të zgjedhin një nga shkrimet e shenjta vijuese dhe të tregojë se çfarë kuptueshmërie shtesë morën rreth historisë: 1 Nefi 17:41; Alma 33:18–20; Helamani 8:13–15; Doktrina e Besëlidhje 6:36.

• Përmblidhini për fëmijët tuaj vargjet te Numrat 22:1–18, duke theksuar se si Balaami nuk pranoi ta mallkonte popullin e Perëndisë edhe pse Balaku, mbreti i Moabit, i ofroi atij nder dhe pasuri. Më pas mund t’i ndihmoni fëmijët tuaj të kërkojnë te vargjet vijuese për fraza që e ndiejnë se tregojnë që Balaami dëshironte ta ndiqte Perëndinë: Numrat 22:18; 23:26; 24:13. Ndoshta fëmijët tuaj mund të zgjedhin një frazë që u pëlqen, dhe ta shkruajnë në një kartë për t’i ndihmuar që të mbajnë mend t’i binden Zotit.