Eksodi 35–40; Levitiku 1; 4; 16; 19

Eksodi 35–40 përshkruan përpjekjet e izraelitëve për të ndërtuar një tabernakull, ku ordinancat e shenjta do t’i ndihmonin të bëheshin një popull i shenjtë. Teksa i lexoni këta kapituj, kërkoni gjërat që Zoti ia kërkoi popullit të Tij që t’i vendoste brenda në tabernakull. Çfarë mund të përfaqësojnë këta artikuj? Çfarë ju sugjerojnë lidhur me rritjen e shenjtërisë? Merrni parasysh veçanërisht mënyrën se si këta artikuj i kthejnë mendimet tuaja drejt Shpëtimtarit. Një tabelë si kjo mund t’ju ndihmojë:

Sigurisht, thjesht të qenit në vende të shenjta nuk na bën të shenjtë. Levitiku 19 përshkruan ligjet dhe urdhërimet që dha Zoti për t’i ndihmuar izraelitët të rritnin shenjtërinë. Çfarë gjeni në këto urdhërime që mund t’ju ndihmojnë të kërkoni shenjtëri nga Zoti? Çfarë ndiheni të nxitur të bëni për t’i jetuar më plotësisht këto parime?

Shihni edhe te Henri B. Ajring, “Shenjtëria dhe Plani i Lumturisë”, Liahona, nëntor 2019, f. 100–103; “The Tabernacle” [“Tabernakulli”] (material filmik), Gospel Library [Biblioteka e Ungjillit].

7:19

Në vitin pas largimit nga Egjipti, marrëdhënia e fëmijëve të Izraelit me Jehovën mund të përshkruhet si e paqëndrueshme. Prapëseprapë, ndërsa lexoni tek Eksodi 35:4–35 dhe36:1–7, vini re mënyrën se si iu përgjigjën izraelitët urdhërimit për të ndërtuar tabernakullin. Çfarë mësoni nga izraelitët që mund t’ju ndihmojë për t’i shërbyer më mirë Zotit?

Ai mund të mos ju kërkojë metale të çmuara, pëlhura apo dru për një tabernakull. Çfarë ju ka dhënë Zoti dhe çfarë po ju kërkon Ai që të ofroni? Kur jeni “shtyrë nga zemra” juaj për të ardhur tek vepra?

Shihni edhe tek Tema dhe Pyetje, “Sacrifice” [“Sakrifica”], Gospel Library [Biblioteka e Ungjillit].

Eksodi 40:12–14 iu referohet ordinancave të lashta që administrohen edhe në kohën tonë në shtëpinë e Zotit. Ja tek janë disa vargje shtesë që mund t’ju ndihmojnë të mësoni se si këto ordinanca dëshmojnë për Jezu Krishtin:

• Larja: Psalmeve 51:2; Ezekiel 36:25–27

• Veshja e rrobave të shenjta: Isaia 61:10; Mateu 22:11–14; Zbulesa 19:7–8

• Vajosja: Lluka 4:18–19; Veprat e Apostujve 10:38

Pjesa më e madhe e librit të Levitikut mund të duket e çuditshme për ne – flijime kafshësh, rituale që përfshijnë gjak e ujë, dhe ligje që rregullojnë hollësi të vogla të jetës. Por këto rituale dhe ligje kishin për qëllim të jepnin mësim parime që janë të njohura – pendimin, shenjtërinë dhe Shlyerjen e Shpëtimtarit. Për t’i gjetur këto parime teksa lexoni te Levitiku 1:1–9, 4, 16, merrni parasysh pyetje si këto:

• Çfarë fjalësh ose frazash gjej, të cilat më kujtojnë Jezu Krishtin dhe flijimin e Tij shlyes?

• Çfarë mësoj nga këto flijime rreth flijimit të Shpëtimtarit?

• Si jam unë i/e ngjashëm/me me njerëzit që i bënë këto flijime?

Zoti nuk kërkon më flijime kafshësh. Por flijimi është ende një parim i rëndësishëm i ungjillit. Për të mësuar rreth llojeve të sakrificave që kërkon Zoti, studioni vargjet tek 3 Nefi 9:19–20; Doktrina e Besëlidhje 64:34. Si po i ofroni këto lloj sakrificash? Çfarë mësoni nga vargu te Moisiu 5:7 rreth mënyrës se si duhet t’i shihni sakrificat tuaja?

Shihni edhe te “Mendime për t’i Mbajtur Parasysh: Tabernakulli dhe Flijimi”.

• Në fund të këtij përvijimi është një figurë e tabernakullit të izraelitëve në vendin e shkretë. Nëse dëshironi, mund ta shihni atë me fëmijët tuaj dhe t’i pyetni se çfarë materialesh do të ishin dashur për të ndërtuar tabernakullin. Më pas mund të lexoni së bashku tek Eksodi 35:20–29 për të zbuluar se si u siguruan këto materiale. Si na ka ftuar Zoti që të japim ndihmesë në ndërtimin e mbretërisë së Tij?

• Merreni parasysh të lexoni me ta tek Eksodi 36:1 për të zbuluar se çfarë u dha Zoti Betsaleelit dhe Oholiabit për të ndihmuar në ndërtimin e tabernakullit. Më pas mund të flisni me fëmijët tuaj rreth asaj që e ndiejnë se Zoti ua ka dhënë atyre për të ndihmuar në ndërtimin e mbretërisë së Tij. Si mund t’i përdorim këto gjëra për të bekuar të tjerët?

• Eksodi 40:17–34 rendit gjërat që ishin pjesë e tabernakullit të izraelitëve. Ndoshta ju dhe fëmijët tuaj mund t’i gjeni ato në këto vargje dhe në figurën e tabernakullit në fund të këtij përvijimi. Flisni rreth asaj se si çdo pjesë e tabernakullit mund të na mësojë për Shpëtimtarin ose Atin Qiellor. Për shembull, arka e dëshmisë mund të na kujtojë urdhërimet e Perëndisë, altari mund të na kujtojë flijimin e Jezu Krishtit, e kështu me radhë.

• Çfarë vendesh të shenjta kemi sot që na ndihmojnë të ndihemi më pranë Jezu Krishtit? Si pjesë e këtij bashkëbisedimi, ju mund të shihni së bashku materialin filmik “Temples” [“Tempujt”] (Gospel Library) [Biblioteka e Ungjillit]. Gjithashtu mund të këndoni një këngë të tillë si “Holy Places” [“Vende të Shenjta”] (Gospel Library) [Biblioteka e Ungjillit]. Tregojini njëri‑tjetrit se si ndiheni rreth vendeve të shenjta si tempulli.

5:41

• Flijimet e kafshëve të përshkruara te Dhiata e Vjetër kishin për qëllim t’u mësonin fëmijëve të Izraelit rreth faljes nëpërmjet Jezu Krishtit. Merreni parasysh se si leximi rreth këtyre flijimeve mund të bëjë të njëjtën gjë për fëmijët tuaj. Mund të tregoni figura të Jezu Krishtit në Gjetseman dhe në kryq (shihni te Libri i Figurave Artistike të Ungjillit, nr. 56, 57) teksa lexoni me fëmijët te Levitiku 1:1–4. Ndihmojini të gjejnë fjalë ose fraza që u kujtojnë flijimin e Jezu Krishtit.

• Gjithashtu mund të lexoni së bashku tek 3 Nefi 9:19–20 për të zbuluar se çfarë urdhërohemi të flijojmë ose sakrifikojmë në vend të kafshëve. Çfarë do të thotë t’i ofrojmë Zotit një zemër të thyer dhe një shpirt të penduar? Shihni tek Udhëzuesi për Shkrimet e Shenjta, “Zemër e Thyer” (Gospel Library) [Biblioteka e Ungjillit] për ndihmë që t’i përgjigjeni kësaj pyetje.