Tabènak la ak Sakrifis

Lè Bondye te kòmande Moyiz pou l te bati yon tabènak nan kan Izrayelit yo, Li te deklare bi tabènak la: “pou m ka vin rete nan mitan yo” (Egzòd 25:8). Anndan tabènak la, prezans Bondye te reprezante pa ach alyans lan—yon bwat an bwa ki te kouvri avèk lò, ki te genyen rejis alyans Bondye te fè avèk pèp Li a ekri ladann. Yo te mete ach la nan sal ki te pi sen an, pi apa an, se yon vwal ki te separe l de rès tabènak la. Vwal sa a ka senbolize separasyon nou de prezans Bondye poutèt chit la, osi byen ke fason nou tounen vin jwenn Li—atravè Sovè a.

Aleksepsyon de Moyiz, nou konnen yon sèl moun ki te kapab antre “kote ki pi sen an” (Egzòd 26:34)—gran prèt la. Menm jan avèk lòt prèt yo, li te oblije resevwa lavman ak onksyon toudabò epi li te abiye nan rad sakre ki se senbòl ofis li a. Yon fwa pa an, nan yon jou ki te rele Jou Ekspyasyon an, granprèt la te ofri sakrifis nan non pèp la anvan l te antre poukont li nan tabènak la. Devan vwal la, li te konn boule lansan. Lafimen pafime ki t ap monte nan syèl la te reprezante priyè pèp la ki t ap monte al jwenn Bondye. Apresa, gran prèt la, ki t ap pote san ki te soti nan yon sakrifis animal, te konn travèse vwal la pou l te apwoche bò twòn Bondye a, ki te senbolize pa lach alyans lan.

Lè w konnen sa w konnen konsènan Jezikri ak wòl li nan plan Pè Selès la, èske w ka konprann kijan tabènak la oryante nou nan direksyon Sovè a? Menm jan avèk tabènak la, ak lach ki anndan l lan te reprezante prezans Bondye pami pèp Li a, Jezikri sete prezans Bondye pami pèp Li a. Menmjan avèk gran prèt la, Jezikri se Medyatè ant noumenm ak Bondye Papa a. Li te pase atravè vwal la pou l te entèsede pou nou gras ak san pwòp sakrifis Li a.

Kèk aspè nan tabènak Izrayèl la kapab parèt familye pou nou, sitou si nou te ale nan tanp pou nou te resevwa pwòp òdonans nou yo. Tanp lan se kay Senyè a—Kote Li rete nan mitan pèp Li a. Menmjan avèk kote ki pi sen nan tabènak la, sal selès nan tanp lan reprezante prezans Bondye. Pou antre, nou dwe dabò resevwa lavman ak onksyon. Nou mete rad sakre. Nou fè alyans. Nou priye devan yon otèl kote priyè yo monte al jwenn Bondye. E finalman nou pase atravè yon vwal pou nou antre nan prezans Bondye.

Petèt resanblans ki pi enpòtan ant tanp modèn yo ak tabènak tan lontan an sèke toulède, si nou byen konprann, ranfòse lafwa nou nan Jezikri epi ranpli nou avèk gratitid pou Sakrifis Espyatwa L la. Bondye vle pou tout pitit Li yo antre nan prezans Li; Li vle “yon wayòm prèt” ak prètrès (Egzòd 19:6). Men peche nou yo anpeche nou jwenn benediksyon sa a, paske “okenn bagay sal pa kapab rete avèk Bondye” (1 Nefi 10:21). Pou rezon sa a, Bondye Papa a te voye Jezikri, “gran prèt tout bon bagay ki gen pou vini yo” (Ebre 9:11). Li separe vwal la pou nou epi li bay tout pèp Bondye a pouvwa pou yo “pwoche avèk konfyans devan twòn gras la pou nou kapab jwenn mizerikòd” (Ebre 4:16).

Jodi a, bi tanp yo se plis pase jwenn egzaltasyon pou tèt nou. Apre nou fin resevwa pwòp òdonans pa nou, nou kapab kanpe nan plas zansèt nou yo, kòm reprezantan yo pou nou resevwa òdonans nan non yo. Nan yon sans, nou kapab vin tounen tankou gran prèt tan lontan an—ak Gwo Gran Prèt la —ki ap ouvri wout prezans Bondye pou lòt moun.

Yo byen anseye prensip ekspyasyon ak rekonsilyasyon yo nan ansyen pratik sakrifis bèt, ki te egziste nan tan lontan anvan lwa Moyiz la. Adan ak Èv te ofri sakrifis. Yo te konprann referans senbolik li nan sakrifis Sovè a. Epi yo te anseye pitit yo sa.

Karaktè senbolik sakrifis animal la kapab te sanble li patikilyèman touchan nan Jou Ekspyasyon (“Yom Kippur” nan lang ebre) Izrayèl tan lontan an. Bezwen seremoni anyèl sa a te eksprime nan Levitik 16:30: “Jou sa a ya fè sèvis pou wete yo anba tout peche yo, pou yo ka parèt nan bon kondisyon devan Senyè a.” Sa te pèmèt prezans Bondye rete pami pèp la. Ekspyasyon sa a te akonpli atravè yon bann seremony. Nan youn ladan yo, yo te konn touye yon kabrit kòm ofrann pour peche pèp la, epi gran prèt la te konn pote san kabrit la nan kote ki pi sen an. Apresa, gran prèt la te poze men l sou yon kabrit vivan epi li te konfese peche timoun Izrayèl yo—kote l te senbolikman transfere peche sa yo sou kabrit la. Apre sa yo te konn mete kabrit la deyò kan Izrayèl la.

Nan rityèl sa yo, kabrit yo te senbolize Jezikri, ki pran plas moun ki fè peche yo. Peche pa dwe admèt nan prezans Bondye. Men olye l te detwi oswa chase moun ki fè pechè yo, Bondye te bay yon lòt mwayen—yo te pito touye oswa chase yon kabrit. “Bouk la va pote sou li tout peche yo” (Levitik 16:22).

Rityèl senbolik sa yo te oryante sou mwayen Bondye te ba nou pou nou retounen nan prezans Li—Jezikri ak Ekspyasyon L lan. Sovè a “pote doulè nou yo, ak chagren nou yo,” menm “inikite nou tout” (Ezayi 53:4, 6 Li te kanpe nan plas nou, Li te bay lavi L pou peye pri peche, epi Li te ranpòte laviktwa sou lamò gras a Rezirèksyon L lan. Sakrifis Jezikri a sete “gwo sakrifis final; wi, se pa yon sakrifis moun, ni bèt” men pito “yon sakifis enfini, yon sakrifis etènèl” (Alma 34:10). Se Li ki te akonplisman tout bagay ke sakrifis tan lontan yo te reprezante.

Pou rezon sa a, apre sakrifis Li a te fin fèt, Li te di: “Pa ofri m pou san koule ankò; wi, sakrifis … nou yo fini. … Ofri m yon kè brize ak yon lespri kontri kòm sakrifis” (3 Nefi 9:19–20).

Konsa lè w jwenn pasaj ki nan Ansyen Testaman an konsènan sakrifis yo ak tabènak la (oubyen apre, tanp lan)—e w ap jwenn anpil nan yo—sonje ke bi prensipal tout bagay sa yo se pou ranfòse lafwa w nan Mesi a, Jezikri. Konekte sa ou li ak aprann avèk adorasyon ou nan kay Li. Kite kè w ak lespri w tounen anvè Limenm. Medite sou sa L te fè pou L te mennen w tounen nan prezans Bondye—ak sa w ap fè pou suiv Li.