Egzòd 19–20; 24; 31–34

Prezidan Russell M. Nelson te ofri yo eksplikasyon pou fraz sa a: “Nan Ansyen Testaman an, ekspresyon Ebre ki tradui mo patikilye a se segullah, ki siyifi ‘pwopriyete plen valè,’ oubyen ‘trezò.’ … Lefè ke sèvitè Senyè yo idantifye nou kòm pèp patikilye Li se yon konpliman nan pi wo degre a” (“Timoun yo nan Alyans lan,” Ensign, Me 1995, 34). Kijan pawòl Prezidan Nelson yo afekte fason ou konprann Egzòd 19:3–6? Kijan Senyè a revele w ke Li r3enmen ou?

Senyè a te di Moyiz ke timoun Izrayèl yo te bezwen prepare yo anvan pou yo te ka “rankontre avèk Bondye” (Egzòd 19:10–11, 17) epi kenbe yon alyans avèk Li (gade Egzòd 19:5). Kijan w prepare w pou eksperyans espirityèl yo, enkli òdonans Sentsèn nan ak òdonans tanp yo? Kijan w ka ede lòt moun prepare yo? Kisa ou aprann konsènan preparasyon nan Lik 6:12–13; Enòs 1:2–6; Alma 17:2–3?

Pandan ke Izrayelit yo te rasanble nan pye mòn Sinayi a, yo te tande vwa Bondye ki t ap bay Dis Kòmandman yo (gade Detewonòm 4:12–13). Evidaman, sa yo se pa sèl kòmandman Bondye bay—gen anpil lòt nan ekriti yo. Konsa, pandan w ap li Egzòd 20:1-17, mande tèt ou poukisa Bondye mete aksan sou dis sa yo an patikilye. Men yon echantiyon tablo ou ta ka itilize pandan w ap medite sou enpòtans Dis Kòmandman yo nan lavi ou:

• Kijan respekte dis kòmandman sa yo ede ou respekte de gran kòmandman Jezi te bay nan Matye 22:34–40yo?

• Ki bagay nou kapab tante pou nou mete anvan Bondye? Ki benediksyon ou te wè nan mete Bondye an premye?

• Kijan w t ap reponn yon moun ki di Dis Kòmandman yo te bay sa gen anpil tan epi yo pa aplike jodia? Ki egzanp nan lavi w ou t ap pataje kòm yon pati nan repons ou a? Kjan kantik “Oui tes Commendements” (Cantiques, no. 66) ka afekte fason ou esplike lòt moun kòmandman Bondye yo?

• Kijan Sovè a te akonpli pwomès ki nan Egzòd 20:6 la nan lavi ou?

Gade tou “Gran Kòmandman an—Renmen Senyè a,“ nan Enseignements des Présidents de l‘Église: Ezra Taft Benson (2014), 37–45; Dallin H. Oaks, “Pa gen okenn lòt Bondye,“ Liahona, Nov. 2013, 72–75; Sijè ak Kesyon, “Kòmandman,“ Bibliyotèk Levanjil la.

Pandan w ap li Egzòd 24:3–8, konsidere alyans ou te fè avèk Bondye yo. Byenke alyans Izrayèl la te enkli rityèl ki diferan de sa Bondye mande jodia, ou ka remake kèk resanblans. Pa egzanp, vèsè 4, 5, ak 8 yo mansyone yon otèl, sakrifis zannimo, ak san. Kisa bagay sa yo te ka reprezante, e ki rapò yo genyen avèk alyans ou yo?

Eseye mete tèt ou nan plas Izrayelit yo—ou nan dezè a, Moyiz ale pou 40 jou, epi gen yon konfwontasyon avèk Kananeyen yo nan tè pwomiz la ke w poko wè (gade Egzòd 32:1–8). Poukisa ou panse Izrayelit yo te vle yon idòl annò? Kisa ki enspire w apwopo siplikasyon Moyiz te fè Senyè a nan Egzòd 33:11–17la?

Pandan ke peche Izrayelit yo te grav, istwa sa a gen yon mesaj sou mizèrikòd ak padon Bondye tou. Kisa Egzòd 34:1–10 anseye ou konsènan Sovè a? (gade Egzòd 32:30–32; Mozya 14:4–8; 15:9; Doktrin ak Alyans 45:3–5).

Prezidan Russell M. Nelson te eksplike: “Lè m te pi jèn, mwen te konn etidye travay lòt moun ki te konn prepare lis sa pou yo fè ak sa pou yo pa fè nan jou Saba a. Se byen lontan apre ke m te aprann nan ekriti yo ke konpòtman mwen ak atitid mwen nan jou Saba a sete yon siy ant mwenmenm ak Papa m ki nan Syè la [gade Egzòd 31:13; Ezekyèl 20:12, 20]. Avèk konpreyansyon sa a, mwen pa t bezwen lis bagay pou m te fè ak pa t fè ankò. Lè m te gen pou m pran yon desizyon pou m konnen si wi ou non yon aktivite te apwopriye pou jou Saba a, mwen te konn senpleman mande tèt mwen: Ki siy m vle bay Bondye?” Kesyon sa a te fè chwa m yo konsènan jou Saba a klè tankou kristal” (“Saba a se yon Delis,” Lyawona, Me 2015, 130). Medite sou ki siy ou vle bay Bondye avèk jan ou obsève jou Saba a.

Lè Moyiz te desann soti sou mòn nan, li te pote lwa a ekri sou tablèt an wòch. Apre l te vin reyalize ke Izrayelit yo te kraze alyans yo te fè a, Moyiz te kraze tablèt yo (gade Egzòd 31:18; 32:19). Apresa, Bondye te kòmande Moyiz pou l te fè yon lòt gwoup tablèt an wòch epi pote yo tounen sou mòn nan (gade Egzòd 34:1–4). Tradiksyon Joseph Smith, Egzòd 34:1–2 (nan apendiks Bib la) klarifye ke premye gwoup tablèt an wòch yo te gen òdonans “lòd sakre” Bondye a oswa Prètriz Mèlkisekèk la. Dezyèm gwoup la te gen “lwa sou yon kòmandman chanèl.” Sete yon lwa pi piti ki te administre pa “pi piti prètriz la” (gade Doktrin ak Alyans 84:17–27), ki te fèt pou prepare Izrayelit yo pou yon lwa siperyè ak yon prètriz siperyè pou yo te kapab antre nan prezans Bondye.

• Kijan w kapab fè sa y ap aprann konsènan Dis Kòmandman yo amizan pou timoun ou yo? Pandan n ap li Egzòd 20:3–17 ansanm, fè timoun ou yo ede w jwenn oswa desine yon foto pou reprezante chak nan Dis Kòmandman yo. Apresa, timoun ou yo ka youn apre lòt chwazi yon foto epi pale konsènan fason yo ka viv kòmandman sa a. Pataje youn ak lòt fason viv kòmandman sa a pote kè kontan pou ou.

• Nou ta kapab chante ansanm tou yon kantik tankou “Pour Trouver la Paix” (Chants pour les Enfants, 68-69). Ede timoun ou yo jwenn mo nan chan an ki anseye yo poukisa Bondye vle nou respekte kòmandman Li yo.

• Ede timoun ou yo aprann fraz “Onore manman w ak papa w” la nan (Egzòd 20:12). Ou ka anvi eksplike ke “onore” yon moun ka vledi montre respè pou li oubyen pote bonè pou li. Kisa Jezi te fè pou onore manman mòtèl Li ak Pè Selès Li a? (gade Lik 2:48–51; Jan 19:26–27). Petèt timoun ou yo ka youn apore lòt jwe wòl sou bagay yo kapab fè pou onore paran yo, pandan ke lòt timoun yo ap devine sa y ap fè a.

• Timoun ou yo gendwa apresye gade egzanp siy—tankou sinyalizasyon sou wout oswa siy sou yon bilding. Ki objektif siy sa yo? Timoun ou yo ta kapab apresa chèche mo “siy“ la nan Egzòd 31:13, 16–17. Kisa Senyè a te di ki se yon siy ant noumenm avèk Li? Pataje avèk timoun yo kèk fason oumenm ak fanmi w eseye montre lanmou nou pou Senyè a nan jou Saba a.

• Konsidere pou w itilize “Moyiz sou mòn Sinayi“ (nan Istwa Ansyen Testaman yo, 77–82) pou ede timoun ou yo aprann istwa a nan Egzòd 32:1–8, 19–24. Poukisa li pa t bon pou Izrayelit yo te adore yon estati olye de Bondye?

  

  2:55

• Li ta ka amizan pou w kreye yon chemen atè a (oswa jwenn youn tou pre lakay ou) pou ilistre pawòl sa yo nan Egzòd 32: 8la: “Yo te vire ale byen vit lwen wout la.“ Pandan y ap mache sou chemen an, timoun ou yo te ka pale konsènan tantasyon yo nou rankontre pou nou vire do bay Bondye. Kisa ki ede nou rete sou chemen Bondye a—epi retounen sou l si nou ekate de li? (gade Egzòd 34:6–7).