Pak

Anpil pasaj nan Ansyen Testaman an pwente sou ministè ak sakrifis ekspyatwa Sovè a. Tablo anba la a gen lis sou kèk nan pasaj sa yo. Pandan w ap li vèsè sa yo, ki enpresyon w resevwa konsènan Sovè a?

Pwofesi ki anseye sou Sovè a menm pi abondan ak pi klè toujou nan Liv Mòmon an. Konsidere kijan lafwa w te fòtifye gras ak pasaj tankou sa yo: 1 Nefi 11:31–33; 2 Nefi 25:13; Mozya 3:2–11; Alma 7:10–13.

Pwofèt dènye jou yo kontinye rann temwayaj espesyal konsènan Jezikri ak misyon ekspyatwa L la. Pandan w ap koute konferans jeneral nan wikenn Pak sa a, pran nòt sou temwayaj konsènan Kris la ke w tande yo. Kisa vèsè sa yo anseye w konsènan Li?

Pak se yon tan kè kontan, paske se yon moman pou selebre Ekspyasyon ak Rezirèksyon Sovè a. Epoutan, menm pandan Pak, gen anpil moun ki pa santi yo kontan pou plizyè rezon. Kisa w ka fè pou w simaye lapè ak lajwa Sovè a pandan Pak sa a?

Yon ide se jwenn mesaj nan ekriti yo konsènan lapè ak lajwa Jezikri ofri a, tankou sa yo: Sòm 16:8–11; 30:2–5; Ezayi 12; 25:8–9; 40:28–31; Jan 14:27; 16:33; Alma 26:11–22. Konsidere kijan w ka pataje mesaj sa yo avèk lòt moun. Pou egzanp, petèt ou ta ka kreye kat Pak pou w pataje, ki baze sou mesaj sa yo. Priye pou w ka konnen kiyès ki bezwen resevwa salitasyon Pak ou a. Ou gendwa deside pataje mesaj ou yo sou rezo sosyal tou, kote anpil moun ka wè yo.

Kantik sou Kris la ak Rezirèksyon an, tankou “Chantons tous, pleins d‘allégresse!” (Cantiques, no. 121), ka ede nou tou santi lapè ak lajwa nan Pak tou. Chèche fraz nan kantik ki, nan opinyon pa w, kapte lajwa Pak la.

Gade tou Jeffrey R. Holland, “Pa tankou Mond lan Bay la,“ Lyawona, Me 2021, 35–38; Mak S. Palmer, “Lapenn nou an pral tounen kè kontan,“ Lyawona, Me 2021, 88–90.

Men yon aktivite ki ka ede w wè pakèt benediksyon yo ki vini atravè Jezikri ak Ekspyasyon L lan. Li ekriti ki anba la yo konsènan sa Jezikri ede nou simonte. Eseye klase pasaj yo nan kategori sa yo: peche, lanmò, eprèv, ak feblès (kèk pasaj ka tonbe nan plis pase yon kategori). Pandan w ap li, ki enpresyon ou genyen sou pouvwa Sovè a?

• Ezayi 61:1–3

• Ezekyèl 36:26–28

• Matye 11:28–30

• Lik 1: 46–55

• Women 8:35–39

• Alma 7:10–13

• Alma 11:42–45

• Alma 58:11

• Mowoni 10:32–33

• Doktrin ak Alyans 19:15–19

• Moyiz 5:9–12

Kijan ou ta eksplike yon zanmi ki pa yon Kretyen poukisa Jezikri enpòtan pou ou? Mesaj Èldè Ahmad S. Corbitt la “Èske ou konnen poukisa mwen kòm yon Kretyen Kwè nan Kris la?“ (Lyawona, Me 2023, 119–21) a ka ede.

Gade tou Reyna I. Aburto, “Tonb lan pa gen okenn viktwa,“ Lyawona, Me 2021, 85–87; Sijè ak Kesyon, “Ekspyasyon Jezikri,“ “Rezirèksyon,“ Bibliyotèk Levanjil.

Kisa nou aprann nan vèsè sa yo konsènan pri Jezikri te peye pou sali nou: Ezayi 53:3–5; Mozya 3:7; Doktrin ak Alyans 19:16–19? Ki pri Pè Selès la te peye? (gade Jan 3:16).

• Semèn Pak la se yon bon moman pou anseye timoun ou yo sou sa Sovè a te fè pou nou nan Jetsemane ak sou kwa a. Ou ta ka kòmanse pa montre yo foto ki anba yo epi kite yo pale sou sa k ap pase nan foto yo. Pandan pitit ou yo ap gade foto yo, ou ka li vèsè ki dekri evènman sa yo (gade Matye 26:36–46; 27:35–50; Lik 22:39–46; Jan 19:16–30). Timoun ou yo te ka endike detay yo nan foto yo ke yo tande nan vèsè yo.

• Ki benediksyon nou resevwa akoz sakrifis Jezi a pou nou? Ede timoun ou yo chèche pawòl ak fraz ki reponn kesyon sa a nan Ezayi 53:4–12; Alma 7:11–13; ak Doktrin ak Alyans 19:16–19. Pataje youn ak lòt kijan ou santi ou konsènan Sovè a apre ou fin li ekriti sa yo.

• Ou ta ka itilize paj aktivite semèn sa a oswa lòt foto nan plan leson sa a pou rakonte timoun ou yo istwa Rezirèksyon an (gade tou “Jezi Resisite,“ nan Istwa Nouvo Testaman yo, 139–44). Apresa kite timoun ou yo repete istwa a ba ou.

• Konsidere kijan w ap ede timoun ou yo jwenn lajwa nan Kris la pou Pak sa a. Pa egzanp, nou ta ka chante ansanm yon kantik favori sou Pak, tankou “Le Christ est Ressucité” (Cantiques, no. 122) oswa “Gethsemane“ (Bibliyotèk Levanjil). Pou jwenn lòt kantik sou Rezirèksyon an, ou ta ka gade nan endèsk liv Cantiques la ak nan Chants pour les Enfants. Oumenm ak timoun ou yo te kapab pataje youn ak lòt poukisa nou renmen chan sa yo ak fason nou santi n lè n ap chante yo. Kisa chante sa yo anseye nou konsènan Pè Selès la ak Jezikri?

• Bibliyotèk Levanjil la gen yon koleksyon videyo Pak ke timoun ou yo ka renmen. Petèt ou ta kapab kite yo chwazi youn pou yo gade. Mande yo kisa yo aprann konsènan Jezikri nan videyo a. Ou ta ka mande yo tou pou yo rezime mesaj videyo a nan yon fraz.

• Pandan w ap gade konferans jeneral ansanm avèk timoun ou yo nan fen semèn Pak sa a, ede yo remake lè temwayaj espesyal Sovè a rann temwayaj konsènan Rezirèksyon an. Petèt ou ta ka fè yon jwèt avèk sa—envite yo kanpe chak fwa yo tande mo tankou Pak oswa Ekspyasyon oswa Rezirèksyon. Pataje youn ak lòt poukisa nou rekonesan pou temwayaj pwofèt vivan yo konsènan Sovè a.