Jozye 1–8; 23–24

Imajine kijan Jozye dwe te santi li lè li te aple pou ranplase Moyiz. Note sa Senyè a te di nan Jozye l:1–9 pou ankouraje li. Panse a eprèv difisil w ap rankontre yo; kisa nan vèsè sa yo ki ba w kouraj?

Non (Jozye (Yehoshua oswa Yeshua nan Ebre) vledi ”Jewova sove.” Epi non Jezi a soti nan Yeshua. Kidonk, pandan w ap li konsènan Jozye, konsidere wòl li jwe nan dirije timoun Izrayèl yo travèse Rivyè Jouden an epi antre nan tè pwomès la. Kijan misyon l lan te sanble ak sa Kris fè pou nou?

Pandan li t ap ankouraje Jozye, Senyè a te bay konsèy nan Jozye 1:8 konsènan ekriti yo, oswa ”pawòl lalwa a.” Lè nou konsidere gwo responsablite Jozye te genyen an, poukisa konsèy sa a te ka espesyalman itil?

Lè Senyè a envite nou li ekriti yo, Li souvan itilize mo ki ale pi lwen pase jis lekti a. Li pwomèt tou gwo benediksyon. Tablo ki anba a ka ede w dekouvri envitasyon ak pwomès benediksyon sa yo:

Kijan Senyè a kenbe pwomès sa yo nan lavi w? Kounyea kapab yon bon moman pou w evalye abitid etidye ekriti w yo. Sa k ap pase byen? Kisa w santi w enspire pou w fè pou gen plis eksperyans siyifikatif avèk pawòl Bondye a?

Gade tou: “Pour Sonder Tes Ecritures,” Cantiques, no.163

Kretyen Nouvo Testaman yo te wè Rahab kòm yon egzanp sou pouvwa lafwa melanje ak zèv (gade Ebre 11:31; Jak 2:25). Pandan w ap li Jozye 2, konsidere wòl lafwa ak zèv Rahab yo jwe nan sove tèt li, fanmi li ak espyon Izrayelit yo. Kisa sa anseye w apwopo fason lafwa w nan Kris la ak zèv ou yo kapab enfliyanse oumenm ak lòt moun?

Senyè a te akonpli mèvèy nan mitan pèp Li a pandan Li t ap mennen yo nan tè pwomiz la, epi Li ka fè menm bagay la pou ou. Men kèk kesyon pou gide etid ou nan Jozye 3–4:

• Poukisa ou panse Izrayelit yo te bezwen sanktifye tèt yo anvan yo te travèse Rivyè Jouden an? (gade Jozye 3:5).

• Note ke rivyè a te separe sèlman apre ”pye prèt yo … te plonje nan kouran dlo a” (Jozye 3:13, 15). Poukisa sa te enpòtan?

• Anpil lòt evenman enpòtan te rive nan Rivyè Jouden an—gade 2 Wa 2:6–15; 5:1–14; ak Mak 1:9–11. Ki koneksyon ou wè ant evènman sa yo?

• Kijan Senyè a te fè “mèvèy” nan lavi ou? (Jozye 3:5). Kijan ou ka fè eksperyans—oubyen rekonèt—mèvèy sa yo pi souvan? (pa egzanp, gade Jozye 3:17).

Joshua 6–8 prezante batay yo sou teritwa Jeriko yo ak Ai. Pandan w ap li chapit sa yo, konsidere kijan ou konbat tantasyon (pa egzanp, gade Jozye 7:10–13). Kisa w aprann konsènan fason Bondye ka ede ou ak sa w bezwen fè pou gen aksè a pouvwa Li? Pa egzanp, kisa ki enpresyone w apwopo enstriksyon Senyè a pou te pran Jeriko a? (gade Jozye 6:1–5). Petèt resi sa a nan Jozye 7 la ap enspire w pou w detèmine si “gen yon bagay mal” nan lavi w ou bezwen retire (Jozye 7:13).

Dènye ansèyman Jozye te bay Izrayelit yo nan Jozye 23–24 enkli avètisman, konsèy ak pwomès benediksyon enpòtan. Petèt ou ka fè yon lis sou sa w jwenn. Lè w konsidere tout bagay Izrayelit yo te pase, poukisa w panse Jozye te chwazi di yo bagay sa yo nan fen lavi li? Kisa w jwenn ki enspire w pou w “akwoche w nan Senyè a” (Jozye 23:8).

Gade Dale G. Renlund tou, ”Chwazi Jodi a Menm,” Lyawona, Nov. 2018, 104–6.

• Me yon fason pou ede timoun ou yo ”rete fèm epi pran kouraj” (Jozye 1:6) atravè Jezikri. Envite yo jwenn yon fraz ki repete nan Jozye 1:6, 9, ak18, epi ekri li oswa memorize li. Ede timoun yo pou yo panse sou sitiyasyon kote yo ta ka bezwen mesaj sa a, menmjan Jozye te bezwen. Nou ta ka repase ansanm tou kèk nan istwa yo nan Jozye 1–4; 6 (gade tou ”Jozye Pwofèt la” ak ”Rahab ak Espyon yo” nan Istwa Ansyen Testaman, 85–91). Kijan moun yo nan istwa sa yo te montre lafwa yo nan Senyè a?

  

  2:59

  

  1:39

• Li Jozye 1:8 ta kapab enspire timoun ou yo pou li ekriti yo poukont yo. Ede yo jwenn mo yo nan vèsè sa a ki anseye yo kijan e poukisa nou dwe li ekriti yo. Yo ta kapab chèche menm bagay la nan 1 Nefi 15:23–24; 2 Nefi 31:20; 32:3; Jakòb 4:6; Elaman 3:29–30. Epitou, ou ka ede yo fè epi suiv yon plan pou li ekriti yo tou.

• Ou ka itilize istwa Izrayelit yo k ap travèse Rivyè Jouden an kòm yon senbòl batèm--abandone ansyen fason yo t ap viv nan dezè a epi kòmanse youn tounèf nan yon relasyon alyans avèk Bondye. Konsa, pandan n ap li ansanm Jozye 3–4 (oswa ”Jozye Pwofèt la” nan Istwa Ansyen Testaman yo, 85–89), ou ta ka gade tou yon foto Jezi k ap batize epi eksplike ke Jezi te batize nan menm rivyè Izrayelit yo te travèse a. Apresa ou ta ka chante yon chan tankou ”Baptème” (Chants pour les Enfants, 100–101). Pataje youn ak lòt kijan vin batize se tankou kòmanse yon nouvo lavi nan wayòm Jezikri a.

  

  2:59

• Ki sa w ka fè pou w ede timoun ou yo aprann suiv Jezi Kris, jan Jozye te envite Izrayelit yo pou yo fè? Ou ka envite yo pou:

  • Memorize yon tibout fraz soti nan Jozye 24:15. Eseye fè li amizan pou timoun ou yo. Kantite mo yo memorize ka depann de laj yo.

  • Jwenn istwa konsènans moun ki te chwazi sèvi Jezikri. Yo te ka gade nan revi Zanmi an, Liv Ilistrasyon Levanjil la, oswa Istwa Ansyen Testaman yo ak lòt liv istwa ekriti yo.

  • Monte senaryo sou sitiyasyon yo kote yo ka chwazi suiv ak sèvi Sovè a.