Eksodo 1–6

Chii chinokufadza pamusoro pemadzimai anotsanangurwa muna Eksodo 1–2? Vakabatsira sei kuzadzikisa chirongwa chaMwari kuvanhu Vavo? Kuedza kwavo kunokudzidzisa chii pamusoro pokushandira mubasa raMwari?

Usati watanga kuverenga Eksodo, ungangofunga pamusoro pedambudziko rauinaro—chimwe chinhu chauri kutarisira kuti Ishe vanozokununura kubva kwachiri. Ndeapi mashoko nendevo zviri muna Eksodo 1–3 zvinonzwikwa zvakafanana neutapwa hwezvepamweya kana zvimwe zvinhu zvatinotarisana nazvo nhasi? Cherechedzawo kuti vana vaIsraeri vakatsvaga sei rununuro uye kuti Ishe vakapindura sei (ona, semuenzaniso, Eksodo 2:23–25; 3:7–8). Ishe “vakaburuka sei kuzonunura” iwe?

Nemubhuku rose raEksodo, ungangocherechedzawo fanano dziri pakati paMosesi naJesu Kristu (ona Deuteronomio 18:18–19; 1 Nifai 22:20–21). Somuenzaniso, ndedzipi fanano dzaunoona pakati paEksodo 1:22; 2:1–10 naMateo 2:13–16? Kana pakati paEksodo 24:18 naMateo 4:1–2? Chii chaunonzwa kuti Ishe vanoda kuti unzwisise pamusoro Pavo nesimba Ravo?

Unokwanisa here kufunga nezve nguva iyo chimwe chinhu pachakakuzadza nerukudzo uye nokushamisika Wakaita sei? Unozotsanangura sei manzwiro awakaita?

Naizvozvo mupfungwa, verenga Eksodo 3:1–6. Chii chinokufadza pamusoro pechiitiko chinosimudzira chaMosesi? Chii chakaitwa naMosesi kuti aratidze rukudzo kuna Mwari? Ndedzipi enderano dzaunoona pakati pezviito zvake neruremekedzo rwezvinhu zvinoera?

Kuverenga ndima idzi kunokwanisa kukukurudzira kuti ufunge pamusoro pezvinhu zvitsvene uye nzvimbo tsvene muupenyu hwako. Sei zvichiera kwauri? Unozvibata zvakasiyana sei kubva kuzvinhuwo zvazvo? Kutungamirira kufungisisa kwako, unokwanisa kutarisa kuchikamu chine musoro wenyaya unoti “Remembering the Promises” mushoko raGosa David A. Bednar rinoti “Exceeding Great and Precious Promises” (Liahona, Mbudzi. 2017, 91–93). Unogonawo kuimba kana kuteerera rwiyo rwunokurudzira kushamisika, rwakaita serwokuti “Ndinoshamiswa Kwazvo” (Nziyo neDzeVana Vadiki, nhamba 42) uye wofungisisa kuti chii chaizvo pamusoro pevhangeri chinokushamisa.

Chokwadi ndechokuti, kunyangwe takambova nezviitiko zvinoshamisa zvepamweya, pane njodzi yokuva tinonyanya kurerutsa zvinhu zvinoera. Unodzivirira sei izvi? Heano mashoko maviri anogadzirisa nyaya iyi; sarudza imwechete, uye wotsvaka zvirevo zvinokubatsira: Ulisses Soares, “In Awe of Christ and His Gospel” (Liahona, Chivabvu 2022, 115–17); Gérald Caussé, “Is It Still Wonderful to You?” (Liahona, Chivabvu 2015, 98–100).

Onawo Dzidziso neZvibvumirano 6:10–12; 63:64.

Nhasi tinoziva Mosesi semuporofita nemutungamiri mukuru. Asi Mosesi haana kuzviona nenzira iyoyo apo Ishe pavakatanga kumudana. Apo paunenge uchiverenga Eksodo 3–4, dorongodza zvinetso zvaMosesi uye madaviriro akaita Ishe kune chimwe nechimwe chazvo. Chii chaunowana muzvitsauko izvi chingangokukurudzira apo paunonzwa sokuti hauna kwaniso yokuita zvimwe zvinhu? Ndiriinhi wawakaona Mwari vachikusimbisa iwe kana vamwe mukuita basa Ravo?­

Onawo “The Church Gives Us Opportunities to Assist in God’s Work” muna “Church Organization” iri muTopics and Questions, Gospel Library.

Zvinokwanisa kuva zvinooresa mwoyo apo kuedza kwedu nemwoyo wose kuita zvakanaka kuchiratidzika sekusiri kushanda—apo patinenge tichiedza kuita chido chaIshe asi tisingaone mhedzisiro dzatanga tichitarisira. Kuti udzidze pamusoro pechiitiko chakafanana neicho Mosesi chaakava nacho, verenga Eksodo 5:4–9, 20–23. Ishe vakabatsira Mosesi sei kuti akunde manzwiro ake ekuora mwoyo? (ona Eksodo 6:1–13). Ishe vakakubatsira sei kuti utsungirire kuita chido Chavo?

­Onawo Jeffrey R. Holland, “Waiting on the Lord,” Liahona, Mbudzi. 2020, 115–17.

• Mosesi aiva nebasa gurusa mukusunungura Israeri kubva muusungwa. Asi angadai asina kukwanisa kuzviita dai amai vake, hanzvadzi yake, mwanasikana waFarao, nemamwe madzimai akatendeka vasina kumudzivirira nokumuchengeta. Batsira vana vako kudzidza pamusoro pemadzimai aya muna Eksodo 1:15–20; Eksodo 2:2–10 (onawo Numeri 26:59); uye Eksodo 2:16–21. Unokwanisawo kushandisa peji yechiitwa chevhiki ino uye “Mosesi Mucheche” ( muNyaya dzeTestamente Yekare, 61–63) kutaura nyaya dzavo. Madzimai aya akabatsira kuzadzikisa chirongwa chaMwari sei? Taurai pamwechete pamusoro pevamwe vanhu vamunoyemura avo vanobatsira nebasa raMwari, kusanganisira munzira diki uye dzirinyore. Tingatevera sei muenzaniso wavo?

  

  1:36

• Mushure mokuverenga Eksodo 3:1–5 pamwechete, kumbira vana vako kuti vataure muchidimbu ndima idzi mumashoko avo pachavo (onawo “Mosesi Muporofita” muNyaya dzemuTestamente Yekare, 64–66). Mosesi akaratidza sei ruremekedzo pamberi paMwari? Mwari vanoda kuti tiratidze sei ruremekedzo? Ungangokumbira vana vako kuti vakubatsire kuwana (kana kudhirowa) mifananidzo yenzvimbo dzinoera kana zviitwa umo matinofanirwa kuva neruremekedzo. Chii chatingakwanisa kuita kuti imba yedu ive nzvimbo inoera?

  

  1:26

• - ­ Dai taiva tiri kuunza shamwari kuchechi kwokutanga, taizotsanangura sei zvazvinoreva kuva neruremekedzo?

• Uchishandisa rondedzero iri muna Eksodo 3; 4:1–17, ita kuti vana vako vatore mijana yokunyepedzera kuva Mosesi. Zvingangova zvinonakidza kusanganisira zvinhu kana zvishandiso zvakareruka, zvakaita sechivenekeso uye chirimwa kuti zvimiririre gwenzi rinopfuta. Batsira vana vako kuona manzwiro akaita Mosesi pamusoro pebasa raakapuwa naIshe (ona Eksodo 3:11; 4:1, 10). Pamwe munokwanisa kugoverana dzimwe nguva dzamakava nemanzwiro akafanana neaya. Nderipi zano rataizogoverana naMosesi kumubatsira? Verenga pamusoro pokuti Ishe vakakurudzira Mosesi sei muna Eksodo 3:12; 4:2–9, 11–12. Taurira vana kuti Ishe vakakubatsira sei kuzadzikisa daidzo, kutevera kurudziro, kana kuita chimwe chinhu chakanga chakakuomera.