Isita

Ndima dzakawanda dziri muTestamente Yekare dzinotaura nezve kushumira uye nekuzvipira kwerudzikinuro zveMuponesi. Tebhuru iri pazasi inodorongodza dzimwe dzendima idzi. Apo paunoverenga ndima idzi, ndeapi manzwiro anouya kwauri pamusoro peMuponesi?

Huporofita hwunodzidzisa pamusoro peMuponesi hwakatonyanya kuwanda uye kujeka muBhuku raMormoni. Funga pamusoro pemasimbisirwo anoitwa rutendo rwako nendima dzakaita seidzi: 1 Nifai 11:31–33; 2 Nifai 25:13; Mosaya 3:2–11; Aruma 7:10–13.

Vaporofita vamazuva ekupedzisira vanoramba vachipupura uchapupu hwakakosha hwaJesu Kristu uye nebasa rerudzikinuro Rake. Apo paunoteerera kumusangano mukuru vhiki yeIsita ino, nyora pasi uchapupu hwaKristu hwaunonzwa. Chii chaanokudzidzisa pamusoro Pake?

Isita inguva yomufaro, nokuda kwokuti inguva yokupemberera Rudzikinuro noKumuka Kuvakafa zveMuponesi. Asi zvakadaro, kunyangwe panguva yeIsita, kune vanhu vakawanda vasinganzwi mufaro nokuda kwezvikonzero zvakasiyana siyana. Chii chaunokwanisa kuita kuparadzira runyararo nomufaro zveMuponesi Isita ino?

Rimwe zano nderokuwana mashoko mumagwaro matsvene pamusoro perunyararo nomufaro zvinopuwa naJesu Kristu, akaita seaya: Mapisarema 16:8–11; 30:2–5; Muporofita Isaya 12; 25:8–9; 40:28–31; Johane 14:27; 16:33; Aruma 26:11–22. Funga pamusoro pokuti ungagoverana sei mashoko aya navamwe. Somuenzaniso, pamwe unokwanisa kugadzira makadhi eIsita okugovera vanhu, akamisirwa pamashoko aya. Namata pamusoro paavo vanofanira kugamuchira kwaziso yako yeIsita. Ungangosarudzawo kugovera mashoko ako panhepfenuro dzepaindaneti, apo vanhu vakawanda pavanokwanisa kuaona.

Nziyo pamusoro paKristu noKumuka Kuvakafa, sezvakaita rwokuti “Amuka” (Nziyo neDzeVana Vadiki, nhamba 108, dzinokwanisawo kutibatsira kunzwa runyararo nemufaro paIsita. Tsvaka ndevo murwiyo rwacho idzo, mumafungiro ako, dzinomiririra mufaro weIsita.

Onawo Jeffrey R. Holland, “Not as the World Giveth,” Liahona, Chivabvu 2021, 35–38; Mark S. Palmer, “Our Sorrow Shall Be Turned into Joy,” Liahona, Chivabvu 2021, 88–90.

Hechino chiitwa chinokwanisa kukubatsira kuona maropafadzo akawanda ayo anouya kuburikidza naJesu Kristu uye neRudzikinuro Rwake? Verenga zvinyorwa zvitsvene zviri pazasi pamusoro peizvo Jesu Kristu zvaanotibatsira kukunda. Edza kuronga ndima dzacho muzvikamu izvi: chivi, rufu, zviedzo, uye utera (dzimwe ndima dzinogona kukwana muzvikamu zvinopfuura chimwechete). Apo paunoverenga, ndeapi manzwiro anuova navo pamusoro pesimba roMuponesi?

• Muporofita Isaya 61:1–3

• Muporofita Ezekieri 36:26–28

• Mateo 11:28–30

• Ruka 1:46–55

• VaRoma 8:35–39

• Aruma7:10–13

• Aruma11:42–45

• Aruma 58:11

• Moronai 10:32–33

• Dzidziso neZvibvumirano 19:15–19

• Mosesi 5:9–12

Ungazotsanangura sei kushamwari isiri muKristu kuti sei Jesu Kristu akakosha kwauri? Shoko ragosa Ahmad S. Corbitt “Do You Know Why I as a Christian Believe in Christ?” (Liahona, Chivabvu 2023, 119–21) rinokwanisa kubatsira.

Onawo Reyna I. Aburto, “The Grave has No Victory,” Liahona, Chivabvu 2021, 85–87; Topics and Questions, “Atonement of Jesus Christ,” “Resurrection,” Gospel Library.

Chii chaunodzidza kubva kundima dzinotevera pamusoro pemutengo uyo Jesu Kristu waakaripira ruponeso rwako: Muporofita Isaya 53:3–5; Mosaya 3:7; Dzidziso neZvibvumirano 19:16–19? Mutengo upi wakaripwa naBaba Vokudenga? (ona Johane 3:16).

• Vhiki yeIsita inguva yakanaka yokudzidzisa vana vako pamusoro peizvo Muponesi zvaakatiira muGetsemani uye pamuchinjikwa. Unokwanisa kutanga nokuvataridza mifananidzo iri pazasi uye woita kuti vataure pamusoro pezviri kuitika mumifananidzo. Apo vana vako pavanenge vachitarisa pamifananidzo, unokwanisa kuverenga ndima idzo dzinotsanangura zviitiko izvi (ona Mateo 26:36–46; 27:35–50; Ruka 22:39–46; Johane 19:16–30). Vana vako vanokwanisa kudoma zvinhu zviri mumifananidzo izvo zvavanonzwa mundima dzacho.

• Tinoropafadzwa sei nokuda kwokuzvipira kwaJesu kuitira isu? Batsira vana vako kutsvaka mashoko nendevo izvo zvinopindura mubvunzo uyu muna Muporofita Isaya 53:4–12; Aruma 7:11–13; uye Dzidziso neZvibvumirano 19:16–19. Goveranai manzwiro amunoita pamusoro poMuponesi mushure mokuverenga zvinyorwa zvitsvene izvi.

• Unokwanisa kushandisa peji yechiitwa yevhiki rino kana mimwe mifananidzo muchidzidzo chino kutaurira vana vako nyaya yeKumuka Kuvakafa (onawo “Jesu Amuka,” muNyaya dzemuTestamente Yekare, 139–44). Zvino ita kuti vana vako vataure nyaya yacho kwauri.

• Funga pamusoro pamabatsiriro aunozoita vana vako kuwana mufaro muna Kristu Isita ino. Somuenzaniso, munokwanisa kuimba pamwechete rwiyo rwunodikanwa rweIsita, rwakaita serwokuti “Kristu Ishe Wamuka Nhasi” (Nziyo neDzevana Vadiki, nhamba 106) kana “Gethsemane” (Gospel Library). Kuti muwane dzimwe dzimbo pamusoro peKumuka Kuvakafa, munokwanisa kutarisa mumunongedzo wenziyo weHymns uye weChildren’s Songbook. Iwe nevana vako munokwanisa kugoverana kuti sei muchida dzimbo idzi uye manzwiro amunoita apo pamunodziimba. Chii chatinodzidziswa nedzimbo idzi pamusoro paBaba Vokudenga naJesu Kristu?

• Raibhurari yeVhangeri ine muunganidzwa weEaster videos ayo vana vako avangangofarira. Pamwe unokwanisa kuita kuti vasarudze rimwechete rokuona. Vabvunze izvo zvavanodzidza pamusoro paJesu Kristu kubva muvhidhiyo yacho? Ungangovakumbirawo kuti vapfupise shoko rinodzidziswa nevhidhiyo mumutsetse mumwechete.

• Apo iwe navana vako pamunoona musungano mukuru pamwechete paIsita pano, vabatsire kucherechedza apo zvapupu zvakakosha zveMuponesi pazvinopa uchapupu hweKumuka Kuvakafa. Pamwe mungangoita mutambo wazvo—vakoke kusimuka nguva dzose dzavanonzwa mashoko akaita sookuti Isita kana Rudzikinuro kana Kumuka Kuvakafa. Goveranai kuti sei muchivonga nezvapupu zvavaporofita vanorarama veMuponesi.