“Peb Hlis Ntuj 23–29. ‘Kuv Nco txog tej Lus uas Kuv Khi Lawm’: Khiav Dim 1–6,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)

“Peb Hlis Ntuj 23–29. ‘Kuv Nco txog tej Lus uas Kuv Khi Lawm’,” Los, Nrog Kuv Mus: 2026

Mauxes thiab Tsob Ntoo uas Kub Hluav Taws, los ntawm Jerry Thompson

Peb Hlis Ntuj 23–29: “Kuv Nco txog tej Lus uas Kuv Khi Lawm”

Khiav Dim 1–6

Txoj kev caw los nyob hauv Iyiv teb tau cawm Yakhauj tsev neeg. Tiam sis tom qab ntau puas xyoo, lawv cov xeeb leej xeeb ntxwv raug kaw ua tub qhev thiab tus vaj ntxwv tshiab tsim txom lawv vim nws “tsis paub Yauxej” (Khiav Dim 1:8). Tej zaum haiv neeg Ixayees yeej yuav xav paub seb vim li cas Vajtswv yuav cia lawv raug txom nyem li no, vim lawv yog Nws haiv neeg uas tau kev sib khi lus lawm. Nws puas nco qab txog Nws txoj kev khi lus nrog lawv? Lawv puas tseem ua Nws haiv neeg? Nws puas pom tias lawv raug txom nyem ntau npaum li cas?

Tej zaum koj twb muaj tej lub sij hawm thaum koj xav nug tib cov lus nug no thiab. Tej zaum koj yuav xav tias, “Vajtswv puas paub tias kuv tab tom raug tej teeb meem li cas? Nws puas hnov kuv tej kev taij thov kev pab?” Ixayees txoj kev khiav dim Iyiv teb yeej teb cov lus nug no meej meej hais tias: Vajtswv yeej nco qab ntsoov Nws haiv neeg. Nws nco qab Nws tej kev sib khi lus nrog peb thiab yuav ua kom tej ntawd tiav los raws li Nws lub sij hawm thiab txoj hau kev. Nws hais tias, “Kuv yuav tsa kuv txhais npab … cawm kom nej dim.” “Thaum kuv tso nej dim kev ua qhev … nej thiaj yuav paub hais tias kuv yog tus Tswv uas yog nej tus Vajtswv” (Khiav Dim 6:6–7).

Yog xav nyeem ib zaj lus piav txog phau Khiav Dim, saib “Khiav Dim” nyob hauv Phau Qhia txog Vaj Lug Kub.

Tej Tswv Yim Pab Qhia hauv Tsev thiab lub Koom Txoos

Khiav Dim 1–2

Vajtswv yuav siv kuv los pab ua raws li Nws cov hom phiaj.

Koj nyiam tej yam dab tsi txog cov poj niam uas sau rau hauv Khiav Dim 1–2? Lawv ua li cas thiaj pab ua raws li Vajtswv tej lub hom phiaj rau Nws haiv neeg? Lawv tej hauj lwm no qhia koj dab tsi txog koj txoj hauj lwm hauv Vajtswv txoj hauj lwm?

Khiav Dim 1–3

Yexus Khetos yog kuv tus Cawm Dim.

Ua ntej koj pib nyeem phau Khiav Dim, tej zaum koj yuav xav txog ib yam teeb meem uas koj tab tom raug—ib yam uas koj cia siab tias tus Tswv yuav cawm koj dim. Muaj tej lus twg hauv Khiav Dim 1–3 ua zoo li kev ua qhev ntawm sab ntsuj plig los sis lwm yam uas peb raug niaj hnub nim no? Nrhiav seb haiv neeg Ixayees xav tau kev cawm dim li cas thiab tus Tswv pab lawv li cas (saib, ib qho piv txwv, Khiav Dim 2:23–25; 3:7–8). Tus Tswv tau ua li cas kom “los pab kom [koj] dim”?

Hauv tag nrho phau Khiav Dim, koj kuj yuav pom tej yam uas Mauxes muaj ntsis zoo li Yexus Khetos (saib Kev Cai 18:18–19; 1 Nifais 22:20–21). Piv xam hais tias, koj pom hais tias Khiav Dim 1:22; 2:1–10 thiab Mathais 2:13–16 zoo sib xws li cas? Los sis nyob ntawm Khiav Dim 24:18 thiab Mathais 4:1–2? Koj xav tias tus Tswv xav kom koj yuav to taub dab tsi hais txog Nws thiab Nws lub hwj chim?

Nrhiav tej lub cim uas ua tim khawv txog Yexus Khetos. “Koj kuj … yuav nrhiav tau tej zaj lus piv txwv txog tus Cawm Seej lub neej los ntawm cov yaj saub thiab lwm tus txiv neej thiab poj niam uas rau siab ntseeg nyob hauv cov vaj lug kub. [Qhov no] qhia txog tej kev tseeb txog tus Cawm Seej uas tej zaum koj yuav tsis nco qab xav txog” (Saib Kev Qhia Raws Li tus Cawm Seej txoj Kev, 7; kuj saib Hauxeyas 12:10).

cov poj niam tab tom tshem lub tawb ntawm tus dej — Kev Ntseeg Nyob Tom Ntug Dej, los ntawm Anne Marie Oborn

Khiav Dim 3:1–6

Kuv hwm tau tej yam thiab tej qhov chaw uas dawb huv.

Koj xav puas tau txog ib lub sij hawm uas koj xav tsis thoob thiab tsis paub xav kiag li? Koj tau ua li cas? Koj yuav piav hais tias koj lub siab xav li cas thaum ntawd?

Thaum xav txog qhov ntawd, cia li nyeem Khiav Dim 3:1–6. Koj nyiam tej yam dab tsi txog Mauxes zaj dab neeg no? Mauxes ua li cas thiaj qhia tias nws hwm Vajtswv? Koj pom hais tias tej uas nws ua thiab kev hwm tej yam dawb ceev zoo sib xws li cas?

Tej zaum txoj kev nyeem tej nqe lus no yuav ua rau koj xav txog tej yam dawb huv thiab tej qhov chaw dawb huv hauv koj lub neej. Vim li cas tej no thiaj dawb ceev rau koj? Koj ua txawv li cas rau tej no uas tsis yog tej yam zoo xws luag? Kom coj tau koj txoj kev xav ntsoov no, tej zaum koj yuav xav nyeem kem ntawv hu ua “Nco txog tej Kev Cog Lus” hauv Txwj Laug David A. Bednar zaj lus ”Tej Kev Cog Lus Zoo Kawg thiab Muaj Nqi Heev” (Liyahaunas, Kaum Ib Hlis Ntuj 2017, 91–93). Tej zaum koj kuj yuav xav hu los sis mloog ib zaj nkauj qhuas Vajtswv uas txhib koj lub siab, zoo li “Kuv Zoo Siab Yexus Hlub Kuv” (Cov Nkauj Qhuas Vajtswv, zaj 82) thiab xav seb txoj moo zoo ua rau koj xav tsis thoob txog dab tsi.

Peb paub tseeb hais tias, tab txawm peb twb raug tej yam zoo ntawm sab ntsuj plig los, yeej muaj tej lub sij hawm uas peb saib tsis tau tej yam dawb ceev rau nqi pes tsawg. Koj ua li cas kom txhob ua li no? Nov yog ob zaj xov txog qhov no; xaiv ib zaj, thiab nrhiav tej kab lus uas pab koj: Ulisses Soares, “Xav Tsis Thoob txog Khetos thiab Nws Txoj Moo Zoo” (Liyahaunas, Tsib Hlis Ntuj 2022, 115–17); Gérald Caussé, “Puas Tseem Ua Ib Qho Zoo Rau Koj?” (Liyahaunas, Tsib Hlis Ntuj 2015, 98–100).

Kuj saib Lus Qhuab Qhia thiab Kev Khi Lus 6:10–12; 63:64.

Khiav Dim 3–4

Vajtswv muab hwj chim rau cov neeg uas Nws hu los ua Nws txoj hauj lwm.

Niaj hnub no peb paub hais tias Mauxes yog ib tug yaj saub thiab thawj coj zoo. Tiam sis Mauxes tsis xav tias nws yog li ntawd thaum tus Tswv xub hu nws los ua hauj lwm. Thaum koj nyeem Khiav Dim 3–4, sau ntawv txog Mauxes tej kev txhawj xeeb thiab seb tus Tswv teb nws li cas. Koj nrhiav tau dab tsi hauv tej tshooj no uas yuav tshoov koj lub siab thaum twg koj xav tias koj tsis muaj cuab kav ua ib yam dab tsi? Koj tau pom dab tsi thaum Vajtswv muab hwj chim rau koj los sis lwm tus neeg los ua Nws txoj hauj lwm?

Kuj saib “The Church Gives Us Opportunities to Assist in God’s Work” hauv “Lub Koom Txoos tus Txheej Txheem” hauv Tej Ntsiab Lus thiab tej Lus Nug, Txoj Moo Zoo cov Ntawv.

Khiav Dim 5–6

Tus Tswv tej hauj lwm yuav ua kom tiav raws li Nws lub sij hawm.

Tej zaum peb yuav poob siab thaum peb rau siab ntso ua zoo tab sis mas zoo nkaus li nws tsis pab dab tsi li—thaum peb tab tom sim ua raws li tus Tswv lub siab nyiam tiam sis peb tseem tsis tau yam uas peb xav tias peb tsim nyog txais. Yog xav kawm txog ib qho zoo li ntawd uas Mauxes raug lawm, cia li nyeem Khiav Dim 5:4–9, 20–23. Tus Tswv tau pab Mauxes li cas kom nws kov yeej nws txoj kev poob siab ntawd? (saib Khiav Dim 6:1–13). Tus Tswv tau pab koj li cas kom koj pheej ua raws li Nws lub siab nyiam?

Kuj saib Jeffrey R. Holland, “Cia Siab Tos Ntsoov tus Tswv,” Liyahaunas, Kaum Ib Hlis Ntuj 2020, 115–17.

Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.

Tej Tswv Yim Pab Qhia cov Me Nyuam

Vim hnub Sunday no yog hnub Sunday thib tsib rau lub hli no, xav kom cov xib hwb hauv lub Koom Haum Me Nyuam Yaus siv tej yam ntxim kawm uas nyob hauv “Ntaub Ntawv Ntxiv Tom Kawg B: Npaj cov Me Nyuam Taug Vajtswv txoj Kev Ua Raws Li Kev Khi Lus Tas Ib Sim Neej.”

Khiav Dim 1–2

Vajtswv yuav siv kuv los pab ua raws li Nws cov hom phiaj.

Mauxes ua ib txoj hauj lwm loj heev los pab Ixayees dim txoj kev ua qhev. Tiam sis nws ua tsis tau li no yog tias nws niam, nws tus muam, Vaj Ntxwv tus ntxhais, thiab lwm cov poj niam uas rau siab ntseeg tsis tau pov hwm thiab tu nws los. Pab koj cov me nyuam kawm txog cov poj niam no hauv Khiav Dim 1:15–20; Khiav Dim 2:2–10 (kuj saib Teev Npe 26:59); thiab Khiav Dim 2:16–21. Tej zaum koj siv tau phab ntawv ntxim ua rau lub lim tiam no thiab “Me Nyuam Mos Liab Mauxes” (hauv Cov Dab Neeg hauv Phau Qub, 61–63) los pab qhia lawv tej zaj dab neeg no. Cov poj niam pab li cas kom Vajtswv txoj hauj lwm tiav los? Cia li sib tham txog lwm cov neeg uas nej qhuas vim lawv pab khiav Vajtswv txoj hauj lwm, kuj hais txog tej yam me me uas lawv ua. Peb ua li cas thiaj ua tau raws li lawv tus yam ntxwv?

1:36
Baby Moses

Khiav Dim 3:1–5

Kuv yeej hwm tau tej qhov chaw dawb huv.

Tom qab nyeem Khiav Dim 3:1–5 ua ke, thov koj cov me nyuam siv lawv cov lus piav seb tej nqe no hais li cas (kuj saib “Mauxes tus Yaj Saub” hauv Cov Dab Neeg hauv Phau Qub, 64–66). Mauxes ua li cas thiaj qhia tias nws hwm tus Tswv? Tus Tswv xav kom peb yuav hwm Nws li cas? Tej zaum koj yuav xav thov koj cov me nyuam los pab koj nrhiav (los sis kos duab) txog tej qhov chaw dawb ceev los sis tej lub sij hawm uas peb yuav tsum coj tu tu. Peb yuav ua li cas thiaj ua rau peb lub tsev ua ib qho chaw dawb ceev?

1:26
Moses the Prophet
Hu ib zaj nkauj txog kev hwm ua ke, xws li “Reverence Is Love” (Children’s Songbook, 31). Thaum ua li no, koj cov me nyuam mam li nrhiav tej lo lus los sis kab lus uas piav seb kev hwm yog dab tsi. Yog tias peb tab tom coj ib tug phooj ywg los hauv lub tsev koom txoos thawj thawj zaug, peb yuav qhia lawv hais tias kev hwm yog dab tsi?

Mauxes thiab Aloos hais lus rau pab neeg coob coob — Mauxes thiab Aloos hais lus rau Pab Neeg Coob Coob, los ntawm James J. Tissot

Khiav Dim 3–4

Thaum tus Tswv thov kuv ua ib yam dab tsi, Nws yeej yuav pab kuv ua yam ntawd.

Siv zaj dab neeg hauv Khiav Dim 3; 4:1–17, cia koj cov me nyuam sib pauv los ua yeeb yam hais tias lawv yog Mauxes. Tej zaum yuav lom zem yog tias muaj tej yam khoom, zoo li ib lub teeb fai fab thiab ib tsob ntoo me me los ua piv txwv txog tsob ntoo uas kub hluav taws. Pab koj cov me nyuam kawm seb Mauxes xav li cas txog txoj hauj lwm uas tus Tswv hu nws los ua (saib Khiav Dim 3:11; 4:1, 10). Tej zaum koj mam li qhia txog tej lub sij hawm uas koj tau xav tib yam li ntawd. Peb yuav ntuas Mauxes li cas kom thiaj pab tau nws? Nyeem ntawv seb tus Tswv txhawb nqa Mauxes li cas nyob hauv Khiav Dim 3:12; 4:2–9, 11–12. Qhia cov me nyuam seb tus Cawm Seej tau pab koj li cas ua ib txoj hu, ua raws li ib txoj kev tshoov siab, los sis ua ib yam dab tsi nyuaj heev.

Yog xav tau ntxiv, saib phau xov xwm Friend rau lub hli no.

Mauxes Leej Niam, los ntawm Simeon Solomon

Lub Koom Haum Me Nyuam Yaus phab ntawv ntxim ua: Kuv zam txim rau lwm tus — Mauxes Leej Niam, los ntawm Simeon Solomon