Chiv Keeb 42–50

Koj puas pom tej yam zoo sib xws nyob ntawm Yauxej lub neej thiab Yexus Khetos txoj hauj lwm theej peb lub txhoj? Kom thaij pom ob peb qho piv txwv hais txog tej kev sib xws no, sim muab tej yam nram qab no sib piv:

• Chiv Keeb 37:3 nrog Mathais 3:17.

• Chiv Keeb 37:26–28 nrog Mathais 26:14–16.

• Chiv Keeb 45:5–7 nrog Lukas 4:18.

• Chiv Keeb 47:12 nrog Yauhas 6:35.

Koj xav li cas txog tus Cawm Seej thiab Nws txoj hauj lwm thaum koj nyeem tej nqe vaj lug kub no?

Thaum koj nyeem txog qhov uas Yauxej zam txim rau nws cov tij laug rau tej yam phem heev uas lawv ua rau nws, tej zaum qhov ntawd yuav tshoov koj lub siab txog ib tug neeg uas koj tsis tshua xav zam txim pub rau. Tej zaum cov lus nug nram qab no yuav pab koj thaum koj sim nruab txoj ntsiab cai no hauv koj lub neej:

• Tej zaum yuav nyuaj heev rau Yauxej zam txim pub rau nws cov tij laug yog vim li cas? (kom tshab xyuas saib lawv tau ua li cas rau Yauxej, saib Chiv Keeb 37). Muaj tus cwj pwm los sis tej yam muaj los rau Yauxej dab tsi uas yuav muab dag zog ntxiv rau nws zam txim pub rau nws cov tij laug? (saib, ua piv txwv, Chiv Keeb 45:1–15 or 50:15–21).

• Muaj tej koob hmoov dab tsi uas los ntawm qhov uas Yauxej zam txim pub rau nws cov tij laug? Piv txwv hais tias, muab tej kev sib raug zoo hauv Yakhauj tsev neeg thaum zaj dab neeg nyuam qhuav pib (saib, ua piv txwv, Chiv Keeb 37:3–11) piv rau tej kev sib raug zoo thaum kawg (saib Chiv Keeb 45:9–15; 50:15–21). Yuav muaj li cas txawv txav yog tias Yauxej yuav tsis kam zam txim pub rau nws cov tij laug?

• Xav saib puas sau tseg rau hauv ntawv lub npe ntawm ib tug neeg uas tsim nyog koj zam txim pub rau—txawm tias nws thov kom tau kev zam txim los tsis tau los xij. Koj yuav ua li cas kom thiaj caw tus Cawm Seej lub hwj chim kho koj lub siab lub ntsws los rau qhov teeb meem no? Yog tias zam txim pub rau luag nyuaj heev, xav saib puas tshab xyuas Txwj Laug Gerrit W. Gong cov lus ntuas hauv rau nqe kawg ntawm nws zaj lus hais hu ua “Zoo Siab thiab Tas Mus Li” (Liyahaunas, Kaum Ib Hlis Ntuj 2022, 85). Koj nrhiav tau dab tsi uas pab koj muaj kev cia siab tias koj zam txim pub tau?

Kuj saib Lus Qhuab Qhia thiab Kev Khi Lus 64:9–11; “Forgiveness: My Burden Was Made Light” (vidi-aus), Txoj Moo Zoo cov Ntawv.

8:24

Yakhauj tej koob hmoov rau nws cov xeeb leej xeeb ntxwv muaj tej lus paj, thiab to taub nyuaj tsawv. Ua Vajtswv tsaug, txoj moo zoo txum tim rov qab los pab tau peb. Thaum koj nyeem txoj koob hmoov rau Yauxej hauv Chiv Keeb 49:22–26, nyeem tej nqe nram qab no thiab, es saib tej nqe no muaj tswv yim zoo li cas: 1 Nifais 15:12; 2 Nifais 3:4–5; Yakhauj 2:25; Lus Qhuab Qhia thiab Kev Khi Lus 50:44.

Thaum koj nyeem txog Yudas txoj koob hmoov hauv Chiv Keeb 49:8–12, nco qab ntsoov hais tias Yexus Khetos yog Yudas ib tug xeeb leej xeeb ntxwv. Muaj tej yam nyob hauv tej nqe vaj lug kub no uas ua rau koj nco qab txog tus Cawm Seej? (kuj saib Tshwm Sim 5:5–6, 9; 1 Nifais 15:14–15; Lus Qhuab Qhia thiab Kev Khi Lus 45:59; 133:46–50).

Nyeem tej koob hmoov no tej zaum yuav ua rau koj xav nyeem koj txoj koob hmoov yawg suab—los sis, yog tias koj tsis tau txais, mus txais kom tau. Muaj tej lus thiab tej kab lus hauv koj txoj koob hmoov uas ua rau koj xav txog Yexus Khetos?

Kuj saib Randall K. Bennett, “Koj Yawg Suab txoj Koob Hmoov—Tej Lus Qhia Los ntawm Leej Txiv Saum Ntuj Ceeb Tsheej,” Liyahaunas, Tsib Hlis Ntuj 2023, 42–44.

Txawm tias yeej tsis paub tseeb li no thaum nws raug txom nyem los, nyob nyob Yauxej saib tau nws tej kev txom nyem hauv Iyiv Teb thiab pom tias “Vajtswv muab qhov phem ntawd hloov ua qhov zoo” (Chiv Keeb 50:20). Yog tias koj mus xyuas Yauxej tau thaum nws nyob hauv lub qhov taub los sis nyob hauv lub tsev kaw neeg, koj yuav nplij nws lub siab li cas? Tej nqe hauv Chiv Keeb 50:19–21 yuav ua li cas pab tau koj thaum koj raug kev sim siab?

Kuj saib Lus Qhuab Qhia thiab Kev Khi Lus 122; “Lub Hauv Paus Ruaj Nrees,” Cov Nkauj Qhuas Vajtswv, zaj 29.

Thaum koj nyeem Chiv Keeb 50:24–25 thiab Joseph Smith Kev Txhais, Chiv Keeb 50:24–38 (nyob hauv phau Npaivnpaum cov ntawv ntxiv tom kawg), xav saib yog vim li cas thiaj tseem ceeb rau Yauxej paub txog Mauxes thiab Joseph Smith ntau pua xyoo ua ntej. Joseph Smith ua li cas kom muaj raws li Yauxej tej lus qhia tias yuav muaj los hais txog nws? (saib Lus Qhuab Qhia thiab Kev Khi Lus 1:17–23; 20:7–12; 39:11; 135:3).

• Tej zaum yuav lom zem rau koj cov me nyuam ua yeeb yam txog qhov uas Yauxej thiab nws tsev neeg rov qab sib ntsib (saib Chiv Keeb 42–44). Los sis lawv siv tau “Yauxej thiab Kev Tshaib Nqhis” (hauv Cov Dab Neeg hauv Phau Qub, 57–60) los yog siv cov duab hauv tus txheej txheem qhia no kom ib leeg qhia zaj dab neeg no rau ib leeg. Nram qab no yog ib co lus nug uas yuav pab koj cov me nyuam kawm dab tsi los ntawm zaj dab neeg:

  • Yauxej tau ua li cas kom qhia tias nws hlub nws tsev neeg? (saib Chiv Keeb 45:4–15).

  • Yog vim li cas Yauxej thiaj zam txim pub rau nws cov tij laug?

  • Koj xav hais tias Yauxej cov tij laug xav li cas thaum lawv hnov tias Yauxej tau zam txim pub rau lawv? Leej twg hauv koj lub neej xav tau kev zam txim? Koj yuav ua li cas kom thiaj hlub tau lwm tus neeg thiab zam txim pub rau lawv?

  

  2:26

• Tej zaum koj los sis koj cov me nyuam yuav xav qhia txog ib lub sij hawm uas lawv zam txim pub rau ib tug neeg los yog thaum ib tug neeg zam txim pub rau lawv. Ces nej mam li hu ib zaj nkauj xws li “Love One Another” (Children’s Songbook, 136) los sis “Help Me, Dear Father” (Children’s Songbook, 99).

• Koj thiab koj cov me nyuam saib tau daim duab txog Yakhauj foom koob hmoov rau nws cov tub nyob ntawm tus txheej txheem qhia no tom kawg thiab sib tham saib muaj li cas (saib Chiv Keeb 48:8–9). Yog tias tsim nyog, piav hais tias Yakhauj, Yauxej txiv, xav siv lub pov thawj hwj foom koob hmoov rau nws tsev neeg. Tej zaum nej sib tham tau txog lwm yam uas muaj los rau nej thaum nej txais kev pab los ntawm Vajtswv dhau ntawm ib txoj koob hmoov ntawm lub pov thawj hwj. Yog vim li cas peb mam li thov kom tau ib txoj koob hmoov ntawm lub pov thawj hwj?

• Koj yuav ua li cas pab koj cov me nyuam pom tus Cawm Seej hauv zaj dab neeg txog Yauxej cawm nws tsev neeg dim ntawm kev tshaib nqhis? Xav saib puas npaj ib daim phiaj uas muaj ob txoj kab muaj npe Yauxej thiab Yexus Khetos. Pab koj cov me nyuam nrhiav tej khub nqe vaj lug kub nram qab no thiab sau rau daim phiaj tej yam uas qhia tias Yauxej thiab Yexus zoo sib xws: Chiv Keeb 37:3 thiab Mathais 3:17; Chiv Keeb 37:26–28 thiab Mathais 26:14–16; Chiv Keeb 45:5–7 thiab Lukas 4:18; thiab Chiv Keeb 47:12 thiab Yauhas 6:35.

• Nug koj cov me nyuam saib nws txhais li cas kom cawm ib tug neeg dim. Yog tias lawv ib tug twg tau muaj ib lub sij hawm uas leej twg cawm lawv dim ntawm ib yam xwm txheej, caw tus ntawd qhia txog qhov ntawd. Yauxej ua li cas cawm tau nws cov tij laug dim? (saib Chiv Keeb 42:1–3; 45:5–7). Ces nej saib tau ib daim duab txog tus Cawm Seej ua ke thiab nug koj cov me nyuam saib Yexus ua li cas cawm peb dim.