Chiv Keeb 37–41

Ntau lub sij hawm, zoo li Yauxej tsis tau muaj txoj hmoov zoo hlo li, tiam sis tus Tswv tsis tau tso nws tseg. Thaum koj nyeem Yauxej zaj dab neeg, cia li xav txog tej lus nug zoo li no: Yauxej tau ua dab tsi kom nrog tus Tswv sib raug zoo tas li? Tus Tswv tau ua li cas kom “nrog nraim nws”? (saib Chiv Keeb 39; 40:1–19; 41:9–45). Koj kawm dab tsi los ntawm Yauxej zaj dab neeg uas pab tau koj paub tias tus Tswv nrog koj nyob hauv koj lub neej?

Tej zaum koj yuav xav nug tej lus nug no txog koj lub neej thiab. Koj tau pom dab tsi uas qhia tias tus Tswv tsis tau tso koj tseg thaum koj raug tej kev sim siab? Cia li xav seb koj yuav ua li cas kom qhia tej no rau koj tsev neeg thiab tej tiam neeg uas yuav nyob thaum yav tom ntej (saib 1 Nifais 5:14).

Muaj tseeb tiag, koj yuav raug tej kev sim siab thaum yav tom ntej. Koj yuav ua li cas tam sim no kom pab koj tus kheej koj thiaj li yuav tsis txav deb ntawm tus Tswv mus? Cia li xav seb koj puas sau ib tsab ntawv kom txhawb nqa koj tus kheej nyob rau yav tom ntej thiaj li yuav nrog Nws sib raug zoo. Tej zaum koj yuav xav sau tej lub tswv yim los ntawm Yauxej lub neej los sis los ntawm Txwj Laug D. Todd Christofferson zaj lus “Peb txoj Kev Txheeb Ze Vajtswv” (Liyahaunas, Tsib Hlis Ntuj 2022, 78–81).

Kuj saib Yauhas 14:18; Loos 8:28; Amas 36:3; Lus Qhuab Qhia thiab Kev Khi Lus 121:7–8; “Nyob Nrog Nraim Kuv!,” Cov Nkauj Qhuas Vajtswv, zaj 71.

Yauxej muaj ib lub txiaj ntsim txawj to taub tej zaj ua npau suav uas tus Tswv muab rau neeg. Koj yuav kawm dab tsi los ntawm Chiv Keeb 37:5–11; 40:5–8; 41:14–25, 37–38 txog kev txais thiab kev to taub tej kev tshwm sim los ntawm tus Tswv? Piv txwv hais tias, koj kawm tau dab tsi los ntawm Yauxej tus yam ntxwv thaum nyuaj rau koj to taub kev tshwm sim? (saib Chiv Keeb 40:8; 41:16).

Cia li xav seb tus Tswv ua dab tsi kom qhia Nws lub siab nyiam rau koj. Koj ua dab tsi kom ua raws li tej kev tshwm sim uas Nws tau muab rau koj? Koj ua li cas kom nrhiav Nws tej lus qhia ntxiv?

Yog Yauxej yuav qhia tias yuav tsum ua li cas kom tiv tau kev ntxias kom ua txhaum txoj kev cai coj dawb huv, koj xav tias nws yuav hais li cas? Cia li xav txog qhov no thaum koj nyeem nws zaj lus nyob hauv Chiv Keeb 39. Piv txwv hais tias, xav seb Yauxej yuav ua li cas thaum muaj neeg hais tej yam xws li no:

• Yog tsis muaj leej twg paub tias kuv ua dab tsi, ces kuv ua txhaum dab tsi? (saib nqe 8–9).

• Kuv sim tiv tau kev ntxias, tiam sis kuv tseem raug kev ntxias tas li (saib nqe 10).

• Kuv yuav tsum ua li cas thaum kuv raug kev ntxias loj heev? (saib nqe 12).

Koj yuav ua li cas kom piav yog vim li cas txoj kev cai coj dawb huv tseem ceeb heev? (saib Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv, 23–28).

Yauxej tus yam ntxwv yeej pab tau thaum raug lwm yam kev ntxias. Thaum koj xav txog Yauxej lub neej, cia li xav seb koj puas sau ib txoj kev npaj kom tsis raug thiab tiv tau kev ntxias. Piv txwv hais tias, tej zaum koj yuav xav txog ib txoj kev ntxias ces sau tej xwm txheej uas koj yuav tsum tsis txhob raug thiab koj yuav ua li cas kom “khiav tawm” thaum twg koj raug ntxias.

Nov yog tej nqe vaj lug kub ntxiv uas tej zaum yuav pab koj txoj kev npaj. Koj kawm dab tsi los ntawm tej nqe no txog qhov uas tus Cawm Seej pab tau koj li cas kom tiv tau kev ntxias? Mathais 4:1–11; 1 Kauleethaus 10:13; 1 Nifais 15:23–24; 3 Nifais 18:17–18.

Thaum koj npaj ua tej no, tej zaum qhov uas koj xav txog tej lub sij hawm dhau los thaum koj dim kev ntxias los sis tiv taus kev ntxias yuav pab koj. Tus Cawm Seej tau pab koj li cas? (saib 2 Nifais 4:18–33).

Yauxej txoj kev txhais tus Falaus zaj npau suav ua rau nws tawm laj lim tswv yim uas zoo thiab txawj ntse kom nyiaj tau kev tshaib kev nqhis (saib Chiv Keeb 41:15–57). Xav seb tus Tswv xav qhia dab tsi rau koj sab ntsuj plig hauv zaj no. Koj xav tias Nws xav kom koj npaj li cas rau tej yam nyuaj uas yuav raug thaum yav tom ntej?

Kuj saib David A. Bednar, “Peb Yuav Sim Lawv lub Siab,” Liyahaunas, Kaum Ib Hlis Ntuj 2020, 8–11.

• Tej zaum kev nyeem txog kev tu siab hauv Yauxej tsev neeg yuav pab nej sib tham txog qhov uas peb yuav tsum ua li cas rau peb tsev neeg. Kom pab qhia zaj dab neeg txog Yauxej thiab nws cov tij laug los ntawm Chiv Keeb 37, tej zaum koj yuav xav siv cov duab hauv tus txheej txheem qhia no los sis nyob hauv “Yauxej tej Kev Ua Npau Suav” (nyob hauv Cov Dab Neeg hauv Phau Qub, 47–51). Cia koj cov me nyuam qhia seb lawv paub dab tsi txog zaj dab neeg no. Tej zaum koj yuav xav hais kom koj cov me nyuam xav seb yuav zoo il cas yog lawv nyob hauv Yauxej tsev neeg. Lawv yuav hais li cas los sis ua li cas kom lawv tsev neeg sib raug zoo? Piv txwv hais tias, cov lus “hais ib lo lus zoo” txhais li cas hauv peb tsev neeg? (nqe 4). Vim li cas Yexus Khetos yog tus uas tsim kev thaj yeeb hauv Vajtswv tsev neeg?

  

  2:17

• Thaum koj cov me nyuam raug tej yam nyuaj, lawv yuav tsum paub tias tus Tswv yuav nrog lawv nyob, ib yam li Nws nrog nraim Yauxej. Tej zaum koj pab tau koj cov me nyuam sau tej yam nyuaj uas Yauxej raug (saib Chiv Keeb 37:23–28; 39:20; los sis “Yauxej tej Kev Npau Suav” thiab “Yauxej nyob hauv Iyiv,” nyob hauv Cov Dab Neeg hauv Phau Qub, 47–51, 52–56). Tom qab txhua yam nyuaj uas lawv nrhiav tau, caw koj cov me nyuam hais tej lus no, “Tus Tswv nrog nraim Yauxej” (Chiv Keeb 39:2).

  

  2:17

  

  2:50

• Tej zaum koj cov me nyuam yuav xav nrhiav hauv Chiv Keeb 39:1–3, 20–23 saib txhua zaus pom cov lus “Tus Tswv nrog nraim Yauxej” thiab tej lus zoo li ntawd. Cia lawv qhia tias lawv xav tias cov lus no muaj lub ntsiab dab tsi. Peb yuav ua li cas kom paub tias tus Tswv nrog nraim peb nyob? Cia ib leeg qhia ib leeg txog qhov uas nej xav tias Vajtswv nrog nej nyob thaum nej raug ib yam uas nyuaj.

• Nov yog ib txoj kev siv ib yam khoom qhia uas pab tau koj cov me nyuam ua raws li Yauxej tus yam ntxwv khiav ntawm Pautifas tus poj niam: Siv ob daim hlau nplaum kom piv txog Yexus Khetos thiab Dab Ntxwg Nyoog. Siv ib qho hlau me me, xws li ib lub khawm, kom piv txog peb. Ces cia koj cov me nyuam seb daim hlau nplaum muaj zog npaum li cas rub qhov hlau me thaum lawv muab qhov hlau me txav ze ib daim hlau nplaum. Yauxej zaj dab neeg nyob hauv Chiv Keeb 39:7–12 qhia dab tsi txog qhov tseeb no? Peb yuav ua li cas kom txav deb ntawm kev txhaum thiab txav ze Yexus ntxiv? Qhov vidi-aus “Temptation Fades as We Saib Christ in Every Thought” (Txoj Moo Zoo cov Ntawv) thiab ib zaj nkauj xws li “Tus Tswv Nyob Nrog Nraim Kuv” (Cov Nkauj Qhuas Vajtswv, zaj 36) pab tau nej sib tham txog qhov no.

  

  2:58

  Siv cov nkauj. “Cov nkauj qhuas Vajtswv thiab lwm zaj nkauj yuav pab cov me nyuam hnov Vajtswv txoj kev hlub, hnov tus Ntsuj Plig, thiab kawm qhov tseeb ntawm txoj moo zoo. Tej suab nkauj, suab paj nruas, thiab tej paj lug pab cov me nyuam nco ntsoov qhov tseeb ntawm txoj moo zoo. Thaum koj nrog cov me nyuam hu nkauj, pab lawv kawm thiab to taub cov ntsiab cai nyob hauv tej zaj nkauj ntawd” (Kev Qhia Raws Li tus Cawm Seej txoj Kev, 32).

• Pab koj cov me nyuam xav seb lawv yuav raug tej kev ntxias twg. Cia lawv ua yeeb yam txog qhov uas lawv yuav ua li cas kom “khiav” ntawm tej kev ntxias no.